1. Snemuk rosai fandun fa romawa babo sifrurna? Ma rosai ḇefnai fa simkakwarek syadi awer? (Mam sonin ro randak artikel ine.)

ROMAWA babo mkoya imbude mko kako mkofawi rofyor mkofrur marandan oser baim, fandun fa mkofrur snemuk imbe mkomarisen mkoraḇe moḇ risai. Kankenem koḇena ine imnis marandan oso. Inja ro kirine fandun kaku mkofrur snemuk imbe mkoraḇe moḇ risai. Kakuḇae, kofrur aw inema roi ḇepyanḇa. Inainkbor oso ḇenirḇe Heather doḇe, ”Kakuya yamkak, snaro snemuk yedine bisa nawyae kankenem yedi ro fafisu iyama.” Rofyor wakḇaḇir rarirya ido, waswarepen Yahwe wos ḇyenane, ”Mam mura muma awer snaro ayaiso Allah bedi. Nari yayarwarek au. Nari yafnoḇek kaku au.”—Yesaya 41:10.

2. Rosai ḇefasnaḇair snar Yahwe imarisen insama mkosma aski ro fafisu iyama?

² Yahwe imarisen insama mkofrur aw faro fafisu iyama kuker fawawinanem. (Pengkhotbah 12:1; Matius 6:20) Imarisen mkosma aski. Ine nasnaibos ro rosai komam, korower, ma koḇaḇir ro braur ḇyenakam. Yahwe I  kako fyaduru ko ro roi ḇesenawer. Ḇyuk ananun ḇeko ma fyarkor ko nyan rariso kokenem kuker payamyum. Inja, rofyor kopampun farkankin ḇyena ido, nari imarisenḇa. Ikofen faro snonkaku ḇemewer ḇeso wos ananun ḇyena, ”Wakinfir roi yamarisenḇana. . . . Mame! Manfamyan yesi nari siryaḇ, ḇape nari wasma mamyai. Mame! Manfamyan yesi nari sibras kuker raryaḇ, snaro sisnesna napyum.” (Yesaya 65:12-14) Rofyor mkokinfir kuker fawawinanem ido, nari mkoḇuk sanandik ḇe Yahwe I.—Amsal 27:11.

3. Rosai Yahwe danun ḇe mkoya?

³ Aw ḇemnis rariso Yahwe danun ḇe mkoya? Yahwe ifrur snonkaku sya kuker fandandun rur ya. Inja insama mkosma aski, fandun fa mkomamḇir Yahwe I ma mkofarmyan ḇe I. (Mazmur 128:1; Matius 5:3) Aiwan sya sifandun monda roḇean, war, ma sikapar. Ḇape, Yahwe imarisen insama snonkaku sya sna aw ḇefrur fa siraryaḇ ma simarisen. Manḇedaw koḇedi ima ”Allah ḇesaswar syadi,” ma ’Allah ḇeḇeaski’, ifrur snonkaku sya imnis ”fanir ḇyedi”. (2 Korintus 13:11; 1 Timotius 1:11; Kejadian 1:27) Nari mkosma aski rofyor mkoso farari Allah ḇesawarwar faro mkoya. Refo ikofen, ”Ipyum syadi ro koḇuk ya ro kosma ya.” (Kisah 20:35) Fafisu oso imbude mkoḇaḇir kwar wos ani nkaku ḇeri. Snaro ineiso wos ḇefarkin ro kankenem koḇena. Inja Yahwe imarisen aw mkofrurna neknam ro saswar faro min ḇesesya ma faro I.—Wasya Matius 22:36-39.

4, 5. Rosai ḇefrur fa Yesus iraryaḇ ya?

⁴ Yesus Kristus ima farari ḇepyum kaku faro romawa babo mkoya. Rofyor ḇyeromawa kasun kaker, imarisen kaku rofyor ifarfnak kuker romawa kasun ḇesesya. Imnis raris Refo ikofen, ”oras fa kombrif” ma ”oras fa kapoper” nasya. (Pengkhotbah 3:4) Osower ido, Yesus fyanam kuker Yahwe snar fyarkor Fas-Fas ḇesren. Rofyor ḇyeumur 12, mankorari ḇero bait sya smanen kaku faro ”fawawi ḇyena ma kankarem ḇyukna kam”.—Lukas 2:42, 46, 47.

⁵ Rofyor Yesus iba kwar, iryaḇ kaku snar ifrur rosai Allah dor ro i na. Imnis raris, Allah imarisen insama ’ḇyaryas Ankankinem Ḇeḇye faro snonkaku ḇesaḇarar’ ma ”mamam faro ḇeprafsya”. (Lukas 4:18, 19) Mazmur 40:8 fyasnaḇair Yesus sneḇaḇir ḇyena, ”Yafrur marisen bedi sye, Allah yedi, yamarisen kaku.” Yesus iryaḇ kaku fa fyarkor snonkaku ḇesesya kuker Kmari. (Wasya Lukas 10:21.) Ras oso, rofyor dawos kwar ḇe bin oso kuker farsamsyom ḇekakuya, Yesus ikofen faro manfamyan ḇyesya, ”Roḇean ayena isoine yafrur marisen ḇewan ayanya ma yaḇeimnis fararur ḇyuk ḇe ayanya.” (Yohanes 4:31-34) Yesus imarisen kaku snar ifrur roi ḇeyun marisen faro Allah ma snonkaku ḇesesya. Rofyor mkofrur rarirya ido, nari mkosma aski ma raryaḇ.

6. Rosai fainda ya snar kofawar aw koḇena faro snonkaku ḇesesya?

⁶ Naek srar sibor sisya sisun ro fararur  perintis fyor sbabo kaker. Ine ḇefrur fa simarisen kaku. Fawarpan rosai aw bedi ro fafisu iyama faro si. Snar Refoya ikofen, ”Fararur nambran ḇa rofyor kokarapyum na ḇa, ḇape fararur nambran pyum rofyor ḇekarana sibore.” (Amsal 15:22) Imbude nari sikofen snar fararur perintis nḇuk fari ḇepyum kaku ro kankenem koḇena ḇesiper. Rofyor Yesus dado ḇe supswan baim, fyarkor roi nabor kaku ro Kmari. Ramnai, rofyor ifarmyan ro supswan, ifarkor pdef. Isma aski snar ḇyaryas ḇe snonkaku ḇese ma isouser pdef ro fafisu ḇesamswen. (Wasya Yesaya 50:4; Ibrani 5:8; 12:2) Mkorama kowawos rosai ḇefnai fa fararur ḇesren ro oras nakam bisa nafrur fa kosma aski ma raryaḇ.

7. Rosai ḇefnai fa romawa babo sya simarisen sakso ro fararur Yesus ḇyukna?

⁷ Yesus ḇyuk parenta ḇeko fa kofarkor snonkaku ḇesesya fa sakḇe manfamyan. (Matius 28:19, 20) Rofyor mkofakapon fararur ine ro kankenem mkoḇena ido, nari mkosma aski ma mkoḇuk sanandik ḇe Allah I kako. Imnis raris fararur ḇesena, nefandun oras fa mkoḇekir syadi ro fararur mkoḇena. Naek oso ḇenirḇe Timothy ḇesun ro fararur perintis fyor byabo kaker, doḇe, ”Yamarisen yafarmyan ḇe Yahwe I oras nakam, snaro iso nyan fa yafasnaḇair snar yaswar I kaku. Randakya, yana farkarkor Refoḇa. Ḇape rofyor yara ḇe moḇ ḇesena, ro paik oser yana farkarkor Refo ḇeḇeso kwar. Ḇarpurya, yaso farkarkor Sekolah bagi Saudara Lajang ro swaf paik risuru. Ramnai yafarmyan ro moḇ ḇebabo wer. Yamarisen yafarkor snonkaku ḇesesya, snar bisa yamam rur ḇesren nafnoḇek si fa sifadwer kankenem sena.” * (Mam fas-fas kasun ro sop.)—1 Tesalonika 2:19.

8. Rosai romawa babo ḇeḇeso sifrurna fa sḇaryas ḇe snonkaku ḇeborsya?

⁸ Romawa babo ḇesesya sisya sifarkor wos ḇesena. Imnis raris, Jacob, ḇerama ro Amerika Utara, fyas, ”Rofyor yaḇeumur taun rifik, ḇebor ro bati yesya ro rumfarkor sima snonkaku Vietnam siri. Yamarisen yafawar ḇesi kuker Yahwe I. Inja ro fafisu ḇeḇeso yaḇensewar fa yafarkor wos sena. Nyan fa yafarkor wos sena isoine, kuker yamam Baryas ro wos Inggris ma wos Vietnam. Aya kako yaḇebati kuker naek srar ro sidang ḇeyawos wos Vietnam ḇefanam kuker rum yedi. Rofyor yaḇeumur 18, yaksun ro fararur perintis. Ḇarpurya, yakso Sekolah bagi Saudara Lajang. Farkarkor ine ḇyefainda kaku ro moḇ ḇebabo yafarmyan ya. Yafarmyan ḇe perintis ma penatua ro raryur kasun ḇeyawos wos Vietnam ma yemir ḇeḇepenatua rodia. Snonkaku Vietnam ḇeborsya skandor ma simarisen kaku snar bisa yawos ro wos sena. Sor aya fa yasun ḇe rum sena, ma bisa yaḇuk farkarkor Refo ḇesi. Ma ḇeḇeso ro si sebaptis kwar.”—Mam kako Kisah 2:7, 8.

9. Fainda rosai mkosmana snar mkoso ro fararur ḇefrur manfamyan ine?

⁹ Fararur ḇefrur manfamyan ine, nfarkor mko rariso mkufmnis fararurna, ma nyan fa mkawospyum ḇe snonkaku ḇesesya. Mko kako nari mkofarkor fa mkomkakḇa ma mkona fawawinanem.  (Amsal 21:5; 2 Timotius 2:24) Ḇape ḇefandun syadiya fararur ine bisa nafrur fa mkosma aski snar mkofarkor rariso mkofasna kakyar mkoḇena faro Refoya. Mko kako nari mkofarkor fa mkofararur kayam kuker Yahwe I.—1 Korintus 3:9.

10. Rosai ḇefnai fa mkoraryaḇ pdef rofyor snonkaku ro moḇ mkoḇedi simarisen mankenemḇa faro Refoya?

¹⁰ Imbude ro moḇ mkoḇedi snonkaku kermkun monda ḇemarisen faro abar mkoḇaryasna, ḇape nari mkosma aski pdef snaro mkofnoḇek kwar snonkaku ḇesesya fa sḇemanfamyan. Infa snonkaku ḇesesya sakḇe manfamyan, fandun fa naek srar ro sidang sifararur kayam ḇe tim oser. Imbude oser monda ḇefnoḇek snonkaku oso fa ḇyemanfamyan raryano, kokame komarisen snar koso ro ḇaḇeḇaryas ya kwar. Raris, Brandon, ḇyeperintis swaf taun ri 9 ro moḇ snonkaku simarisen mankenemḇa faro abar ro Refoya. Doḇe, ”Yamarisen kaku yaḇaryas snar iso roi Yahwe dor ro ko. Yasun ro fararur perintis rofyor yamnai ro farkarkor yena. Yamarisen yanun ḇe naek srar ḇebabo ro sidang sya ma yamam sisur ro napnapes ya. Rofyor yaso Sekolah bagi Saudara Lajang ramnai, yafarmyan ro moḇ ḇebabo. Kakuḇae, ro moḇ ine yafnoḇek ḇefarkor Refo isof sebaptis ḇaim. Ḇape naek srar sino sisya sifnoḇek ḇesesya kwar. Yamarisen kaku snar ro randakya yafrur aw insa yakso ro fararur ḇefrur manfamyan ma ineiso roi yasewar ro kankenem yedi.”—Pengkhotbah 11:6.

11. Fararur ḇesren rosai monda romawa babo sya simarisen sismana?

¹¹ Swaf nabor nasya fa kofarmyan ḇe Yahwe I. Imnis raris, romawa babo sya sifnoḇek fararur ḇaḇawes. Sifandun Balai Kerajaan utin ma utin, ma Balai Kerajaan ḇeradirya nun sanandik faro Yahwe I. Inja nari mkosma aski rofyor mkakso ro fararur ḇaḇebawes ine. Mko kako nari mkomarisen snar mkofararur kayam fnoḇek naek srar ḇesesya. Ma nari mkofarkor roi nabor, imnis raris nyan fa mkofararur kuker payamyum ma nyan fa mkofararur kayam kuker pengawas mkoḇedi.

12. Swaf ḇebabo rosai nasya rofyor mkoḇemerintis kwar?

¹² Naek oso ḇenirḇe Kevin doḇe, ”Rofyor yababaya, yamarisen fa yafarmyan ḇe Yahwe I ro oras nakam. Yaḇemerintis rofyor umur yedi 19. Infa yana kumpan, yafararur ro oras ḇeḇeso monda kuker naek oso ḇefararur ro ḇaḇebawes. Yafarkor nyan rariso amfamfur rum, kekbir, ma kedwa. Ḇarpurya, yaso ro tim penanggulangan bencana alam taun risuru. Nkobawes kaḇer Balai-Balai Kerajaan ma rum ḇe naek srar sya. Rofyor yarower fandandun nasya ro Afrika Selatan ro babawes ya, yaser formulir ramnai sor ayafa yara ḇediwa. Ro Afrika, minggu ḇe minggu yara ḇe proyek  Balai Kerajaan oser ḇe proyek ḇesena. Yakara ḇaḇeri snar aw yafrur rofyor yababa ya bisa nḇuk swaf ḇebabo ḇe aya ḇefrur fa yararyaḇ kaku.”

13. Rosai ḇefnai fa romawa babo sya simarisen sifarmyan ro Betel?

¹³ Perintis ḇeḇeso sya kirine sifarmyan ro Betel. Dinas Betel bisa nafrur fa mkosma aski ma marisen snar rosai mkofrur rodiakam mkofrurna faro Yahwe I. Kina ro Betel sifnoḇek fararur fa sḇuk Refo ma publikasi insama snonkaku sya bisa sfarkor napnapes. Naek oso ḇefararur ro Betel ḇenirḇe Dustin doḇe, ”Yamarisen yafrur aw fa yafarmyan ro oras nakam rofyor yaḇeumur taun risiw. Ma yaḇemerintis rofyor yamnai ro farkarkor yedi. Paik riwonem ramnai, yasma undangan fa yafarmyan ro Betel. Rodiwa yafarkor nyan rariso yuf mesin cetak ma ḇarpurya yafararur ro bar pemograman komputer. Ro Betel, yamarisen snar bisa yarower ḇeri rosai ḇebabo ro fararur ḇefrur manfamyan ḇero supswan ḇesiper. Yamarisen kaku yafarmyan rodine snaro rosai nkofrurna bisa nafnoḇek snonkaku sya fa sfanam syadi ḇe Yahwe I.”

14. Rosai na mkofrur ro kirine fyor mkofarmyan ḇaim ro oras nakam?

¹⁴ Rosai na mkofrur ya insama  mkofarmyan ro oras nakam? Insama mkofarmyan ḇe Yahwe I kuker payamyum, fandun fa mkona rari-rari Kristen. Mkofarkor Refo ro ras ḇe ras, mkowasen rosai mkowasyana, ma mkoḇuk kankarem ro sidang kuker sne ḇesiper. Mkofarkor kaker ido, bisa mkoḇensewar fa mkoḇaryas kuker nyan nabor syadiwer. Mkofasna mkoswar kaku snonkaku ḇesesya kuker mkofuken rariso kakara sena ma mkorowerpyum kankarem sena. Mko kako bisa mkofnoḇek sidang, imnis raris mkofrur sren ma mkofrurmnis Balai Kerajaan. Yahwe imarisen ḇyuk fararur faro snonkaku bena sneḇerun ma ḇemarisen ḇefararur. (Wasya Mazmur 110:3; Kisah 6:1-3) Manwawan Paulus dor Timotius i fa dakfarmyan ḇe misionaris snaro ”naek srar ḇero Listra ma Ikonium siwafi kam”.—Kisah 16:1-5.

15. Rosai bisa mkofrur ya, insama mkosma fararur na ḇefnoḇek mko fa mkoḇe perintis?

¹⁵ Perintis ḇeborsya sifararur fa sefamfon mankunsi. (Kisah 18:2, 3) Bisa mkoso kursus ḇekawanḇa. Ine bisa nafnoḇek mkofa mkosma fararur ḇesrow kuker oras mkoḇena ro moḇ mkoḇedi. Mkofawar rosai imbe mkofrurna ḇe pengawas wilayah ma perintis ḇesesya ma mkor anun ro si. Ramnai, imnis raris Refo ikofenna, ”Buk fararur benakam faro Yahwe ma aw benakam nari nun bon.”—Amsal 16:3; 20:18.

16. Fainda rosai mkosma ro fafisu iyama snar mkosun ro fararur ḇesren ro oras nakam?

¹⁶ Mkokyar snar Yahwe imarisen insama ’mkosma kankenem ḇekakuya’ ḇefo kuker aski ro fafisu iyama. (Wasya 1 Timotius 6:18, 19.) Fararur ḇesren ro oras nakam nafrur fa mkofararur kayam kuker manfamyan ro oras nakam ḇesesya. Ine kako nari nafnoḇek mkofa mkoḇe snonkaku Kristen ḇemas ro rur ya. Sino sisya sḇaḇir farḇakḇuk sena neaski syadi snar sifarmyan ro oras nakam fyor sbaboya. Fyorno ido, sisun ro fararur perintis rofyor sifarḇuk ḇaim ma nari sḇeperintis pdef fnoḇek swa sesya rofyor sifarḇuk kwar.—Roma 16:3, 4.

17, 18. Rosai ḇefnai fa fandun kaku mkofrur aw kuker sne ḇesiper?

¹⁷ Mazmur 20:4 ikofenḇair kuker Yahwe, ”Iḇye kada ḇyuk ḇe au marisen sne bedi, ma ifrur aw benakam ndarirya ḇesya kwar.” Rofyor mkofrur aw kuker fafisu iyama mkokara rosai mkomarisen mkosmana. Mkokarapan rosai Yahwe ifrur ro fafisu iyama ma rosai nari mkofrur fa mkofnoḇek I. Ramnai mkofrur aw faro fafisu iwama ḇefrur fa Yahwe imarisen.

¹⁸ Rofyor mkoḇuk kankenem mkoḇenakam fa mkofarmyan ma mkosandik Yahwe I ido, nari mkosma aski ma raryaḇ. Nari ”wasma raryaḇ beba snar Yahwe, ma nari ḇyuk ḇe au fararyor sne bedi”.—Mazmur 37:4.