1. Rosai komarisen fa snonkaku ḇesesya sifrur yoḇ ko na?

AUSYA mambir ma ḇesyowi kaku snonkaku oso, mboi ḇyefnder snombri ma ḇeḇyeḇa syadi wer myamḇaḇir Au ḇa. Na moḇsa ḇaḇir rai? Kakuḇae na wafafko rawo. Snaro? Snar kokame komarisen snonkaku ḇesesya sfandun ko, ma inema marisen ḇesasar risyaḇa. Ḇape, komarisen sifawi ko monda ḇa. Komarisen insama smambir pyum manseisi ko ma sifawi rosai kofrur kwar na.​—Bilangan 11:16; Ayub 31:6.

2, 3. Kosasor ko ḇa ido, moḇsa na kofrur marisen koḇena rai? (Mam sonin ro randak artikel ine.)

² Ḇape kosasor ko ḇa ido, na kofrur marisen koḇenane kuker nyan ḇesasar. Setan dunya ḇyedine nari dawninyan ko fa komarisen kosewar snonsnon ma koḇaḇir koma kofandun syadi. Kofrur rarirya ido, na jadi ḇa fa koḇuk ḇe Kma koḇedi ro nanki, Allah Yahwe I, rosai ḇesyus fa ismai na isoine syowi ma samsyom koḇena.​—Fasasna faro Yohanes 4:11.

³ Ro Yesus fafisu ḇyedi, manfarkin agama ḇeḇeso sna  kakara ḇesasar kuker mansei ḇesyus fa ḇesmai syowi. Yesus ḇyuk swarapepen ḇe manfamyan ḇyesya, ”Mkoḇe sasor mko ro ḇefawinananem Refo Yahudi ḇesansun syatu ḇekwan ḇo ḇemarisen ḇembran ḇeḇesewar syom ro buḇes (pasar) ḇemarisen ḇekain ro ḇarpon ro rum ari ma moḇ sisma syom ro munara.” Ikofen wer, ”Nari sisma samamyai ḇemarḇak syadi.” (Lukas 20:46, 47) Ḇape Yesus ima iḇese, ḇyesyowi kabom ḇesaḇarar oso ḇefarser remis risuru, imbude fafisu anya snonkaku ḇesesya smamepen rosai ifrur nane ḇa. (Lukas 21:1-4) Nasnai kaku, Yesus mamam ḇyedi kuker mansei na ḇesmai syowi ima iḇese ro snonkaku ḇesesya mamam sena. Artikel ine nari ifnoḇek ko fa kona ma kofaduru mamam raris Yahwe mamam Ḇyedi kuker mansei ḇesyus fa ḇesmai syowi.

4. Mansei marisen ḇyena ḇeba syadi ya, ma rosai ḇefnai ya?

⁴ Mansei marisen ḇyena ḇeba syadi ya? Inema marisen snonkaku ḇebor sisewar fa sismai roro farkarkor ḇekaki, fararur ḇepyum, ḇaido dunya hiburan risyaḇa. Paulus fyasnaiḇair roi ine rofyor ikofen, ”Ḇape kirine, rofyor mkomambir Allah I kwar, ḇaido ḇekaku ya Allah myambir mko kwar, rosai ḇefnai fa mkokaḇer fa mkoso kakara ma nyan kankenem ḇefromo monda ma ḇeyun royoḇa, ma mkomarisen mkoḇe women faro na wer?” (Galatia 4:9, nwt) Manḇepoik Ḇekaki Syadi ro supswan farsyos ḇeba ine ’myambir ko’, inema syowi ḇeba kaku! Yahwe ifawi pyum ko, iswar ko, ma imarisen kakfanam faro I. Yahwe ifrur ko insama kakḇe maniḇoḇ Ḇyesi.​—Pengkhotbah 12:13, 14.

5. Rosai fandun fa kofrur insama Allah myambir ko?

⁵ Kofawi kwar Moses ima Yahwe maniḇoḇ oser ḇyediri. Rofyor dor ro nadi ḇe Yahwe I, ”Wafnoḇek aya fa yafawi nyan Bena”, Yahwe kyarem ḇo doḇe, ”Nari yaḇuk kako roi wor insanja anna, snar yamarisen faro au ma yamambir pyum au.” (Keluaran 33:12-17) Yahwe na dakmambir pyum ko kako. Ḇape, rosai fandun fa kofrur insama kakḇe maniḇoḇ ḇe Yahwe I? Fandun fa koswar I ma koḇuk kankenem koḇena fa kofarmyan ḇe I.​—Wasya 1 Korintus 8:3.

6, 7. Rosai na ḇefrur fa ḇaḇebati koḇena kuker Yahwe I namuk?

⁶ Ḇape, fandun fa kofaduru ḇaḇebati koḇena kuker Kma koḇedi ro nanki. Raris snonkaku Kristen ro Galatia ḇero abad randak siwara, komnai fa koḇemanfyan faro ”kakara ma nyan kankenem ḇefromo monda ma ḇeyun royoḇa” ḇero dunya ine. Ine kako faro sasewar arasai nabor ma snonsnon. (Galatia 4:9) Snonkaku Kristen ḇero Galatia ansi smambir Allah I kwar, ma Allah dakmambir si kwar. Ḇape, Paulus doḇe naek srar ansine sisya ’skaḇer wer’ faro roi ḇefromo anna. Inja, ifuken si, ”Rosai ḇefnai fa mkokaḇer fa mkoso kakara ma nyan kankenem ḇefromo monda ma ḇeyun royoḇa, ma mkomarisen mkoḇe women faro na wer?”

⁷ Roi ḇeradine na nkur ko kako ke? Imboḇae. Raris Paulus i, fyor kofawi kakaku ya kwar, imbude korir roi ḇero Setan dunya ḇyedine raris sasewar arasai ma  snonsnon. (Wasya Filipi 3:7, 8.) Imbude sḇuk beasiswa, fararur ḇepyum ḇe ko, ḇaido kona swaf fa kosewar pipi nabor. Ḇaido, bisa kona snonsnon roḇa kokenem mararen snar kokir ro musik ma olahraga na. Ḇape, kopampum swaf ḇeradine kam. (Ibrani 11:24-27) Kopampum na ido nama nfasnai kofawinanem. Inja, kopok kofafko awer kuker kokara nari kankenem koḇena napyum syadi rofyor kokaḇer ḇe roi korir kwar anna kam! Kakara ḇeradine na nafnai fa kokaḇer wer ḇe roi ḇero dunya ine, komam kwar na ḇe roi ”ḇefromo monda ma ḇeyun royoḇa”. *—Mam fasfas kasun ro sop.

8. Rosai na ḇefnoḇek ko fa kosewar kaku insama kosmai Yahwe marisen Ḇyena?

⁸ Rosai na ḇefnoḇek ko fa kosewar kaku insama kosmai Yahwe marisen Ḇyena mboi dunya ine ḇa? Fandun fa kokarauser roi ḇefandun kaku risuru. Ḇeoser ya, Yahwe ḇyuk marisen Ḇyena ḇesya kwar faro snonkaku ḇefarmyan ḇe I kuker soasuser. (Wasya Ibrani 6:10; 11:6) Yahwe ḇyesyowi kaku manfamyan ḇesoasuser Ḇyesi oser-oser. Inja, rofyor fyanander si ido ḇyaḇir nama ifrur roi ḇenapes ḇa nairi. Yahwe myambir kaku ”snonkaku ḇyesi” ḇesya kwar. (2 Timotius 2:19) Ima ”ifawi nyan kankenem snonkaku ḇenapes sya” ma ifawi moḇsa fyaspar si rai.​—Mazmur 1:6; 2 Petrus 2:9.

9. Fawarḇairpan moḇsa Yahwe fyasnai marisen Ḇyena faro kawasa Ḇyesi rai.

⁹ Fafisu ono, Yahwe fyasnai marisen Ḇyena faro kawasa Ḇyesi kuker nyan ḇebor ḇepyum kaku. (2 Tawarikh 20:20, 29) Imnis raris, kokarapan moḇsa Yahwe fyaspar kawasa Ḇyesi ro Soren Ḇerik rofyor Firaun sordade ḇyesi siyawuser si. (Keluaran 14:21-30; Mazmur 106:9-11) Inema sarisa ḇefarfnak ḇa ḇefrur fa snonkaku ḇero moḇ nakam sawos kaker na isof ro indokada swaf taun ri 40 ḇe ḇarpon ya. (Yosua 2:9-11) Koswarepen moḇsa Yahwe iswar ma ḇyuk papoik Ḇyeja fa fyaspar kawasa Ḇyesi ro ḇepon siwara ido, nari nsambraḇser kakyar koḇena snar Gog ro Magog kerower nari myun ko. (Yehezkiel 38:8-12) Ro fafisuya, nari komarisen kaku snar kofawi kosewar fa kosmai Allah marisen Ḇyena mboi dunya ine ḇa.

10. Roi ḇefandun kaku rosai wer kokarauser na?

¹⁰ Roi ḇefandun kaku ḇesuru kokarauser na iso Yahwe na ḇyuk marisen Ḇyena ḇe ko kuker nyan kokara ḇaim na. Rofyor snonkaku sya sifrur roi ḇepyum insama ḇesesya sisandik si ido, nari Yahwe ḇyebarakas si ḇa. Rosai ḇefnai ya? Snaro raris rosai Yesus ikofen na, rofyor snonkaku ḇesesya sisandik si, sismai ḇaḇyak sedi kwar. (Wasya Matius 6:1-5.) Ḇape fyor snonkaku ono sifrur  roi ḇepyum mboi ḇesesya smam na ḇa, Yahwe ”ḇemam roi ḇeyokef” myam roi anna. Myamepen rosai sifrur na, ma ḇyebok ḇaido ḇyebarakas si. Fafisu ono, Yahwe ḇyebarakas manfamyan Ḇyesi kuker nyan skara ḇaim na. Mkorama kawos fawar ḇeḇeso.

11. Rariso Yahwe fyasnai marisen Ḇyena faro Maria i rai?

¹¹ Yahwe kyinfir bin ḇebabo oso ḇena sne ḇerun ḇenir ḇe Maria fa ḇye sna faro Rumkun Ḇyedi, Yesus i. Maria ḇyarek ro mnu kasun snoriso Nazaret, ḇinkwan kaku ro Yerusalem ma bait ḇepyum kaku ro diwa. (Wasya Lukas 1:26-33.) Rosai ḇefnai fa Yahwe kyinfir Maria i? Malaikat Gabriel ikofenḇair ḇe Maria snar ’isma saswar ma fakamaman ro Allah’. Na kofawi Maria fyanam kaku faro Yahwe I ro rosai ikofen ḇe Elisabet i. (Lukas 1:46-55) Yahwe myamepen Maria i, ma ḇyuk barakas kyara ḇaim nane snar isouser faro I.

12, 13. Rariso sesyowi Yesus i (a) rofyor ḇyeḇeaḇen ya? (b) rofyor Maria dun i ḇe bait ya?

¹² Ro fafisu Maria imbe daḇen Yesus i, faro mansei Yahwe ikofenḇair ḇaḇeaḇen ḇyedi? Ikofenḇair ḇe ḇeḇarara ma ḇepoik ro Yerusalem ma Betlehem sya ḇa. Mboi, iwan malaikat Ḇyedi fa ikofenḇair ḇe manfarandows ḇena sne ḇerun ḇewaren rofanfan sesya ro maper ḇero Betlehem ḇandiri. (Lukas 2:8-14) Ramnai, manfarandows ansya sra smamfar kapira ḇeḇeaḇen babo ani. (Lukas 2:15-17) Maria ma Yusuf na sukandor kaku fyor sumam Yesus ismai syowi kuker nyan ḇeradirya. Nyan Yahwe ifrur roi nakam neḇesisyebur Setan nyan ḇyena. Fafisu Setan iwan ḇefawinananem mak sya fa sra smamfar Yesus ma sinan ḇyesuya, kawasa ḇero Yerusalem sakfawi Yesus ḇaḇeaḇen ḇyana, ma nane nun samswen nabore. (Matius 2:3) Ḇarpur mura, smun roma mkun ḇebor sya.​—Matius 2:16.

¹³ Ro Sasoser Yahwe ḇyuk faro er Israel sya, ikofen ḇo doḇe ro ras ḇe 40 rofyor bin oso kyapar romawa oso raposa, bin  ḇekapar babo ani fandun fa ḇyuk farsarser ḇe Yahwe I. Inja Maria, Yusuf, ma Yesus skora ro Betlehem ḇe bait ro Yerusalem. Marandan senane kawanwan ya kilometer risiw. (Lukas 2:22-24) Ro marandan anya, imbude Maria kyara na imam ya ifrur roi ḇepyum syadi fa ḇyesyowi Yesus indi. Kakuḇae na sesyowi Yesus i, mboi imnis Maria nyan kyara na ḇa. Yahwe kyinfir Simeon, snon ”ḇekyar faro Allah ma ḇenapes”, ma nabiah Hana, kabom ḇeumur taun ri 84 fa sukofenḇair Yesus iso nari ḇe Mesias ḇaido Kristus ḇeḇeasas kwar ani.​—Lukas 2:25-38.

14. Moḇsa Yahwe ḇyebarakas Maria i rai?

¹⁴ Snar Maria fyaduru pyum Yesus i isof iba rya, Yahwe fyasnai marisen Ḇyena ḇe Maria i pdef ke? Imboḇae. Allah myam mnis kaku insama rosai Maria ikofen ma ifrur na neḇefasepen ro Refo. Rya Maria daksowarpu Yesus i ḇa ro marandan ḇyedi fa ḇyaryas ro swaf taun rikyor ma paik riwonem. Imbude snar ḇye kabom kwar, fandun fa ḇyarek pdef ro Nazaret. Inja daksmai farfyar ḇepyum raris ḇesesya ḇa. Mboi, myam ro mankundi rofyor Yesus imar. (Yohanes 19:26) Ḇarpur mura, Maria ryo Yerusalem fnoḇek Yesus manfamyan ḇyesi ro ras Pentakosta rofyor rur ḇesren dado ḇaim. (Farfyar ro Manwawansya 1:13, 14) Daksmai ramrem kayamyam kuker manfamyan ḇesesya. Ine kyurfasnai na daksmai swaf ḇepyum fa dakḇe kayamyam kuker Yesus i ro nanki isof fyoro-fyoro. Inema barakas ḇepyum kaku faro fararmyan kuker soasuser ḇyena!

15. Rariso Yahwe fyasnai marisen Ḇyena ḇe Yesus i fafisu isya ryo supswan ine?

¹⁵ Yesus imewer ismai syowi ḇerama ro manfarkin agama ma polotik sya. Ḇape, Yahwe dawos ḇeri ro nanki rarwan rikyor, imarisen insama Rumkun Ḇyedi ifawi snar ima iswar i kaku. Ine syambraḇser kaku Yesus i! Rofyor Yesus ḇyebaptis ro Warḇeki Yordan raposa, Yahwe doḇe, ”Inekada Romawa Yaswar  kaku, faro I Ya ḇeḇare.” (Matius 3:17) Rya Yohanes Ḇeḇebaptis derer monda ḇerower wos annane. Ramnai, indokada taun oser rofyor Yesus imar ḇaim, manwawan rikyor ḇyeskoya skorower Yahwe wos Ḇyena nkur ḇe Yesus i, ”Ine Rumkun yaswar kakurirya, faro I sneri imarisen, iḇye mkomnaf I.” (Matius 17:5) Oso wer, ras riḇeso fanam ḇe ras Yesus imar ya, Yahwe dawos ḇeri ro nanki ḇe Rumkun Ḇyedi.​—Yohanes 12:28.

16, 17. Rariso Yahwe fyasnai marisen Ḇyena ḇe Yesus i kuker nyan kyara ḇaim na?

¹⁶ Yesus ifawi snonkaku sya na sor i ḇe snon ḇeanonef ma nari marmar ḇyedi nafrur mamyai. Ḇape, ḇyenadi ḇo dor insama Allah marisen Ḇyedi ryarirya mura ḇo marisen ḇyedi awer. (Matius 26:39, 42) ”Ḇyefandun ḇa imar ro [ai kandera] imnis roi oso ḇefrur mamyai”, snaro imarisen ismai marisen ro Kmari mboi dunya ine ḇa. (Ibrani 12:2) Rariso Yahwe fyasnai marisen Ḇyena faro Yesus i rai?

¹⁷ Fafisu Yesus isya ro supswan ine, ḇyenadi ḇe Kmari ḇo dor baba ismai ḇepon kwar rofyor ryo nanki kaker anya. (Yohanes 17:5) Mnuk osoḇaḇeri ḇekofenḇair snar Yesus dor insama ismai baba nabor syadi wer. Kyara ḇaḇeri barakas ḇepyum rosai nari ismai snar ifrur Yahwe marisen Ḇyena ro supswan ine. Ḇape rosai Yahwe ifrur ya? Fyasnai marisen Ḇyena faro Yesus i kuker nyan kyara ḇaim na. Rofyor Yahwe ḇyawes Yesus i ”ikanowi fa ikaki syadi” ro nanki. Ḇyuk kako ḇe Yesus kankenem rur ḇepok ḇemnai ḇa, snonkaku oso ḇaim ḇesmai roi ḇeradine! * (Mam fasfas kasun ro sop.) (Filipi 2:9; 1 Timotius 6:16) Nyan Yahwe ḇyebarakas Yesus i snar fararmyan ḇyena kuker soasuser ima ipyum bose!

18. Rosai nari ḇefnoḇek ko fa kosmai Yahwe marisen Ḇyena mboi dunya ine ḇa?

¹⁸ Rosai nari ḇefnoḇek ko fa kosmai Yahwe marisen Ḇyena mboi dunya ine ḇa? Fandun fa koswarepen Yahwe fyasnai marisen Ḇyena faro manfamyan Ḇyesi ḇesoasuser ḇesya kwar. Ma fafisu ono, ifrur roi nane kuker nyan skara ḇaim na. Na kokarauser monda rariso Yahwe ḇyebarakas ko ro fafisu iyama rai! Ḇape ro kirine, fyor kofarmku ro fafisu ḇesamswen ro dunya ḇeḇarḇor ine, fandun fa koswarepen kaku roi ḇero dunya inena naisya nḇenande kwar. Inja, sasewar snonsnon ro i nari nefromo monda. (1 Yohanes 2:17) Oso wer ido, Kma ḇesaswar koḇedi, Yahwe I, na ipok fa ḇyefnder ḇaḇeri fararur koḇena ma saswar kofasnai kwar faro snonsnon Ḇyedi, snaro ima ”inapes”. (Ibrani 6:10) Nari fyasnai kaku marisen Ḇyena ḇe ko, imbude kuker nyan kopok kokara ḇaim na!