1. Rosai ḇefnai fa na kokofen roi ḇebor nakam naiso Yahwe ronyariri? (Mam sonin ro randak artikel ine.)

ROI ḆEBOR nakam Yahwe ronyariri! Iso ḇena ”farsyos, syadi wer farsyos ḇekaki syadi ya, ma supswan fnoḇek roi ḇebor ḇero dori nakam.” (Ulangan 10:14; Fasasna 4:11) Snar Yahwe iso ḇefrur snonkaku koine, inja kokame iso ḇena konya. (Mazmur 100:3) Ḇape ro snonkaku ḇekenem syakam, ono sisya Allah kyinfir si kuker nyan ḇepyum kaku fa nya si.

2. Raris rosai Refo ikofen na, mansei Yahwe kyinfir kuker nyan ḇepyum kaku fa nya si?

² Imnis raris, Mazmur 135 fyasnaiḇair Yahwe manfamyan ḇesoasuser ro Israel ḇepon siwara ḇe ”kawasa mankundi Ḇyesi”. (Mazmur 135:4) Nabi Hosea ḇyardi kako snonkaku ḇeḇe Israel ḇa sya, nari sakḇe Yahwe kawasa Ḇyesi. (Hosea 2:23) Ḇardadi ine ndarirya rofyor Allah kyinfir randak snonkaku ḇeḇe Israel ḇa sya fa sakḇepoik  ro nanki fnoḇek Kristus i. (Farfyar 10:45; Roma 9:23-26) Snonkaku ḇesmai ramrem kuker rur ḇesren ansi sap si ḇe ”er ḇesren”. Siso Yahwe ’kawasa mankundi ḇyesiri’. (1 Petrus 2:9, 10) Ḇape, rariso kuker snonkaku Kristen ḇesoasuser ḇero baboine ḇena saneraro fa sikenem fyoro ro supswan ya? Yahwe dor si kako ḇe ’kawasa Ḇyesi’ ma ’snonkaku kyinfir sya’.​—Yesaya 65:22.

3. (a) Mansei Yahwe kyinfir fa sḇe kawasa Ḇyesi ro baboine? (b) Rosai nari kawos ro artikel ine?

³ Baboine, raryur kasun siso ḇena saneraro fa sikenem fyoro ro nanki, ma ’domba ḇese’, siso ḇena saneraro fa sikenem fyoro ro supswan ine, sekayamyam ”senai oser” fa sisyom Yahwe I. (Lukas 12:32; Yohanes 10:16) Komarisen kokofen kasumasa kaku ḇe Yahwe snar kyinfir ko kwar fa koḇe kawasa Ḇyesi. Ro artikel ine, nari kawos moḇsariso na kokofen kasumasa ḇe Yahwe I faro syowi ḇeba ine.

4. (a) Moḇsa na kokofen kasumasa ḇe Yahwe I rai? (b) Rosai Yesus ifrur rofyor ḇyebaptis?

⁴ Kokofen kasumasa ḇe Yahwe I kuker koḇuk kankenem koḇena ḇe I ma koḇebaptis. Rarirya ido, snonkaku ḇese nari smam Yahwe iso ḇena konya ma komarisen kosouser I. (Ibrani 12:9) Yesus dakfrur rarirya rofyor ḇyebaptis. Rya ikofen, ”Yamarisen yafrur marisen Bena, sye Allah yedi”. (Mazmur 40:7, 8, ctk) Daksun ro er oso ḇeḇeḇuk faro Yahwe I kwar, ḇape ḇyuk mankundi wer faro Yahwe I. 

5, 6. (a) Rosai Yahwe ikofen rofyor Yesus ḇyebaptis ya? (b) Wos sarḇer rosai na ḇefnoḇek ko fa kofawi moḇsa Yahwe ḇyaḇir rai rofyor koḇuk kankenem koḇena ḇe I?

⁵ Na moḇsa Yahwe ḇyaḇir rai rofyor Yesus ḇyebaptis anya? Refoya doḇe, ”Isma masi sren kwar, Yesus Isasyar fasau bur warya ma ro fafisu ani beri nanki ḇyas ma Myam Rur Allah imnis manjawa dado faro I, ma simnaf mkaren ro boiyas ḇekofen: ’Inekada Romawa Yaswar kaku, faro I [yamarisen].’” (Matius 3:16, 17) Kakuḇae, Yesus ima Allah nya i kwar. Mboi Yahwe iryaḇ syadi fyor myam Yesus imarisen ḇyuk kankenem ḇyedi fa fyarmyan monda ḇe I. Yahwe iryaḇ kako rofyor koḇuk kankenem koḇena faro I, ma nari ḇyebarakas ko.​—Mazmur 149:4.

⁶ Ḇape, Yahwe iso ḇena roi ḇebor nakam kwar ḇae! Inja, rosai na koḇuk ḇe I? Kokarapan mandaswan oso myun in nabore. Fyor ibur ḇe rum, inai mkun ḇyedi dun in oser fa ryapi ma duni ḇe kmari. Kakuḇae, in syakam nama kmari in ḇyesiri, mboi imarisen syadi faro rosai inai ḇyani ifrur anya. Roi anna nfasnaiḇair inai mkun ani iswar kmari. Imarisen syadi faro in oser inai mkun ḇyani ḇyuk yoḇ i ani ro in ḇesena kam. Imnis rarirya, Yahwe imarisen kaku fyor koḇuk kankenem koḇena ḇe I kuker sne ḇesiper.​—Keluaran 34:14.

7. Rariso Maleakhi ifnoḇek ko fa kofawi moḇsa Yahwe myam snonkaku ḇefarmyan ḇe I kuker sne ḇesiper rai?

⁷ Wasya Maleakhi 3:16. Rosai ḇefnai fandun kaku fa buk kankenem Bedi ḇe Yahwe I ma ḇebaptis? Kakuḇae,  rofyor snami fyadores Au, Manḇedaw Bedi Yahwe I, nya Au kwar. Ḇape kwarapan kada, na Yahwe imarisen syadi rofyor wakyar kaku I ḇe Manḇepoik Bedi ma buk kankenem Bedi faro I! (Amsal 23:15) Yahwe myambir snonkaku ḇefarmyan ḇe I kuker sne ḇesiper, ma fyas sisnosna ro ”syap swarapepen”.

8, 9. Rosai Yahwe dor ro snonkaku sya insama snonsnon sena neḇefas ro ”syap swarapepen” ya?

⁸ Komarisen snonsnon koḇena isya kaker ro Yahwe ”syap swarapepen” Ḇyedi ido, roi ono naisya fandun fa kofrur na. Maleakhi ikofen fandun fa koḇesyowi Yahwe I ma kokarauser snonsnon Ḇyedi. Kosyom snonkaku oso ḇaido roi oso ḇese ido, nari snonsnon koḇena neḇepyos ro Yahwe syap Ḇyedi!​—Keluaran 32:33; Mazmur 69:28.

⁹ Inja, koḇeasas fa kofrur Yahwe marisen Ḇyena ma koḇebaptis nama namnis ḇaime. Roi ono ro kankenem koḇena kofrur na rarwan oser monda, mboi kosyom kosandik Yahwe ima nyan kankenem koḇenairi. Ro marandan koḇena kam ro ras ḇe ras, fandun fa kofasnai ro fararur koḇena koma kosouser faro Yahwe I.​—1 Petrus 4:1, 2.

10. Rosai fandun fa Allah manfamyan ḇesoasuser Ḇyesi sifrur ya?

¹⁰ Ro artikel ḇepon ya, kofarkor kwar Kain, Salomo, ma kawasa Israel sya, soḇe sisyom ḇe Yahwe I mboi sisouser I ḇa. Farfyar sena nfarkor ko snar na kopok kokofen monda ḇa kosyom ḇe Yahwe I. Fandun fa kayin roi ḇeḇarḇor na ma koswar roi ḇeḇye na. (Roma 12:9) Yahwe ikofenḇair roi ḇesisye ḇesnaibos kaku naisya ”rofandu snonkaku ḇenapes sya ma snonkaku ḇeḇarḇor sya, rofandu snonkaku ḇefarmyan ḇe Allah ma ḇefarmyan ḇe I ḇa sya”.​—Maleakhi 3:18.

11. Rosai ḇefnai fandun fa snonkaku syakam smambos koine kosyom ḇe Yahwe I monda?

¹¹ Kokofen kasumasa ḇe Yahwe I snar kyinfir ko kwar ḇe kawasa Ḇyesi! Inja, fandun fa snonkaku syakam smambos snar koine kowaira ḇe Yahwe I kwar. (Matius 5:16; 1 Timotius 4:15) Kofuken mankunko: ’Na snonkaku ḇesesya smamepen ayama yasouser ḇe Yahwe I kuker sne ḇesiper ke? Yamarisen kaku yakofen ḇe snonkaku sya snar ayama Saksi Yahwe risaya ke?’ Kokarapan kada, nari Yahwe ḇyesaneso rofyor komai kokofen ḇe snonkaku ḇesesya koine Yahwe iso ḇena konya.​—Mazmur 119:46; wasya Markus 8:38.

12, 13. Rariso naek srar ḇeḇeso sawninyan ḇesesya insa sisnai ḇesebur dunya ine ḇa?

¹² Faḇye kaku, Saksi ḇeḇeso sya siso ”rur ro supswan ine”. Inja, komam simnis kaku kuker snonkaku ḇesyom Yahwe I ḇa sya. (1 Korintus 2:12) ”Rur  ro supswan ine” nafnai fa snonkaku sya smam monda faro marisen baken sena ḇardi. (Efesus 2:3) Imnis raris, kosmai anun kwar kuker moḇsariso kosansun ko rai, ḇape sino skinfir pyum sansun sena ḇa. Sisansun sansun ḇefyos kaku ma ḇebas mankenem, iba syadi wer rofyor srama ro fananjur Kristen. Ḇaido nyan sikapnik snonburyam sena naḇyeḇa kaku. (1 Timotius 2:9, 10) Ine nafnai samswen faro ḇesesya fa smambir si ḇe Saksi Yahwe ke roḇa.​—Yakobus 4:4.

¹³ Roi ḇese wer naisya nafnai fa Saksi Yahwe ḇeḇeso sya rya siḇese mankun ḇa ro dunya ine. Imnis raris, ro munara festa, ono sisya sifyer ma moḇ sifrur si rai namnis kuker snonkaku Kristen sya ḇa. Ḇesesya, srir foto-foto ma wos sena ro media sosial ḇefasnaiḇair marisen baken sena. Imbude sidang na sisonek si ḇa snar inema sasar ḇeba risyaḇa, mboi na sawninyan naek srar ḇesewar kaku fa ḇesnai ḇesebur dunya ine.​—Wasya 1 Petrus 2:11, 12.

14. Rosai fandun fa kofrur insama kokadaunwarek ḇaḇebati koḇena kuker Yahwe I?

¹⁴ Roi ḇebor kam ḇero dunya ine sifrur na fa nafnai ko insama komam monda faro ’roi ḇeḇor ḇeyun sne, isof kormomen kona na, ma roi ḇeḇor kormomen na insa koḇuki darer mankunko’. (1 Yohanes 2:16) Koinema Yahwe kawasa Ḇyesi ko, inja na kosnai ḇese ro si. Fandun fa ”kobur ḇarḇorna ma rmomen supswan ine ma insa kokenem kuker fawawinanem, nanapes ma ḇaḇeari faro Allah ro supswan ine.” (Titus 2:12) Fandun fa snonkaku sya smam ro kankenem koḇena kam, ro awawos,  rofyor kan, kinem, nyan kosansun ko rai, ma ro fararur koḇena, koma Yahwe iso ḇena konya.​—Wasya 1 Korintus 10:31, 32.

15. Rosai ḇefnai fandun fa koswar ma kofrur roi ḇepyum faro naek srar Kristen koḇesya?

¹⁵ Kofasnaiḇair koḇesyowi ḇaḇebati koḇena kuker Yahwe I rofyor kofrur pyum naek srar koḇesya. Yahwe nya si kako, imnis raris ko. Koswarepen roi ine kada, nari koswar si ma kofrur roi ḇepyum yoḇ si ḇesya kwar. (1 Tesalonika 5:15) Roi ine fyandun kaku ke? Yesus ikofen ḇe manfamyan ḇyesi, ”Rofyor mko swar yae mko ido snonkakusya kam nari sifawi mboi manfamyan ayesi mko, rofyor mko swar yae mko kada.”​—Yohanes 13:35.

16. Rosai kofarkor ro Sasoser Moses ḇekur ḇe Yahwe saswar Ḇyedi faro kawasa Ḇyesya?

¹⁶ Roi oser ro Sasoser Moses nafnoḇek ko fa kofawi moḇsa na kofrur pyum ḇesesya ro sidang rai. Ro bait, roeḇor ono naisya sḇuk na monda faro samsyom ḇe Yahwe I. Sasoser ani ikofenbos moḇsa snonkaku Lewi smamwarek roeḇor anna rai. Siso pyum akurfasna anna ḇa ido nari sḇeḇemun. (Bilangan 1:50, 51) Yahwe I monda myam kaku faro moḇsa sḇuk roeḇor anna ro ḇaḇesamsyom, iba syadi wer na myam kaku nyan snonkaku sya sifrur pyum kawasa ḇesoasuser Ḇyesi! Imarisen kofawi snar myam koma koḇesyowi rofyor ikofen, ”Mansei monda ḇepan mko ima span mkamor ayesuine.”​—Zakharia 2:8.

17. Yahwe ’ryower ma myamepen’ faro rosai?

 ¹⁷ Maleakhi ikofen Yahwe isya ’ryower ma myamepen’ moḇsa kawasa Ḇyesi sifrur pyumyae si rai. (Maleakhi 3:16) Yahwe ”ifawi snonkaku ḇyesi”. (2 Timotius 2:19) Fararur ma wos koḇena nbas ro ḇarpon Ḇyedi. (Ibrani 4:13) Kofrur pyum naek srar koḇesya ḇa ido, Yahwe myam na. Ḇape, kokyar Yahwe na myam kako rofyor kofrur pyum, kofasnai snemura, koḇuk ampun ma kofrur roi ḇepyum.​—Ibrani 13:16; 1 Petrus 4:8, 9.

18. Rariso na kofasnai kasumasa ḇe Yahwe I snar kyinfir ko ḇe kawasa Ḇyesi kwar?

¹⁸ Komarisen kofasnai kasumasa ḇe Yahwe I snar kyinfir ko ḇe kawasa Ḇyesi kwar. Kofawi rofyor koḇuk kankenem koḇena ḇe I, nama snemuk kofrur kuker fawinanem nairi. Kokenem kaker ”rofandu snonkaku ḇeḇarḇor ma ḇesasar”, mboi na ’kofrur sasar awer, imnis Allah romawa ḇesren ḇyesi’ ma kosnaiyar supswan ine. (Filipi 2:15) Inja, kun snemuk fa kofrur awer roi Yahwe imewer na. (Yakobus 4:7) Koswar ma koḇesyowi naek srar koḇesya snar Allah nya si kako.​—Roma 12:10.

19. Rariso Yahwe ḇyebarakas kawasa Ḇyesya?

¹⁹ Refoya ḇyeasas, ”Yahwe na ipok fyanander kawasa Ḇyesi ḇa”. (Mazmur 94:14) Wos nane nbuk kakakyar ḇe ko. Rosai na ḇekur ko na, Yahwe nari ryous ko. Iba syadi wer, rofyor komar ido, na ḇyefnder ko ḇaḇeri. (Roma 8:38, 39) ”Rofyor kokenem, kokenem faro [Yahwe], ma rofyor komar, komar kako faro [Yahwe]. Inja, kankenem roḇa marmarya, [Yahwe] iso ḇenakonya.” (Roma 14:8) Kowaf fafisu Yahwe nari ḇyawes kaḇer bati ḇesouser Ḇyesya ḇemar kwar sya. (Matius 22:32) Ro kirine kako kosmai roi ḇepyum nabor ḇerama ro Kma koḇedi. Refo doḇe, ”Aski faro er Allah sediso Yahwe; aski faro kawasa kyinfir fa nya ḇe mankundi.”​—Mamzur 33:12.