Yesus ḇye Imam Ḇeba rofyor ḇyebaptis ro taun 29 Masehi. Kofawi na ro? Rofyor Yesus ḇyebaptis, fyarser kenem ḇyedi ro rokef farsarser ḇeḇair ḇe Allah ’marisen Ḇyedi’. (Gal. 1:4; Ibr. 10:5-10) Rokef farsarser ima ḇar ḇefandun ro bait. Inja kofawi bait ḇeba syadi isoine fasasos faro samsyom ḇekaku, insape isya ro ras Yesus ḇyebaptis. Bait ḇeba syadi Yahwe Ḇyedine fyasnaiḇair ḇe roi Yahwe fyasos nakam neknam ro Yesus farsarser ḇyedi insama kosyom faro I ro nyan ḇekaku ya.​—Mat. 3:16, 17; Ibr. 5:4-6.

Bait rur ine isya kwar, inja fandun fa imam ḇeba isya kako fa fyararur ro diwa. Iso ḇewar fa Yahwe ryem Yesus i fa ḇye Imam Ḇeba. (Kis. 10:37, 38; Mrk. 1:9-11) Ḇape, moḇsa kofawi Yesus ismai ramrem kwar ḇe Imam Ḇeba fyor imar ma ismai kaḇakḇok ḇaim? Na kofawi roi ine fyor kowasenkara Harun ma ḇefarmyan ḇe imam ḇeba ro fafisu naiwara, moḇ sfararur raya.

Imnis sor ro Sasoser Moses, imam ḇeba derer monda na ḇesun ro Sim Ḇesren Syadi ro tabernakel, ḇarpur ya ro Sim Ḇesren Syadi ro bait. Sim Ḇesren Syadi ma Sim Ḇesren sipandwas na kuker kruḇen. Imam Ḇeba na syun ro kruḇen ani ro Ras Payasyos. (Ibr. 9:1-3, 6, 7) Harun ma ḇefarmyan ḇe imam ḇeba ḇesesya na srem si resari insape sisunuk kruḇen ḇero tabernakel ani. Rarirya kako, Yesus na ismai ramrem ḇepon ḇe Imam Ḇeba ro Yahwe bait Ḇyedi, ḇaido fasasos faro samsyom ḇekaku ya, insape imar ma syun ro nanggi kuker ’dunuk kruḇen eruk, isoine Yesus manggundi baken ḇyedi’. (Ibr. 10:20) Iso ḇewar fa Manwawan Paulus doḇe Yesus ryama kwar ”imnis Imam Ḇeba” ma syun ro ’rum kruḇen ḇeba syadi ma ḇemnis syadi, snonggaku sifrur ḇa’ isoine nanggi.​—Ibr. 9:11, 24.

Inja fafisu risai ḇaḇeasas babo irandak fa imbran kwar? Rofyor Yesus syun ro nanggi ma ḇyuk ḇaḇyak ro kankenem ḇemnis kaku fyarser kwar anya faro fandun koḇena, isya ifrur roi ḇerandak kaku ro roi rikyor insama ḇaḇeasas babo irandak fa imbrane. Rosaiso roi rikyor anskoya?

Randak ya, Yesus kyaḇer ḇe nanggi. Ḇesuru ya, Yesus dor ḇe Yahwe I fa imarisen dun farsarser ḇyedi. Ma ḇekyor ya, Yahwe ismai farsarser ḇemaeja ro Yesus i. Yesus ifrur ḇepon roi anskoine ḇa ido, ḇaḇeasas babo na imbran ḇaim.

Refo ikofenḇair snai kaku ḇa fafisu risai Yahwe ismai kwar Yesus farsarser ḇyedi. Inja, na kofawi mnis ḇa fafisu risai ḇaḇeasas babo irandak imbran ma fyararure. Rarirya mboi, kofawi Yesus syun ro nanggi ro ras risamfur fanam ḇe munara Pentakosta. (Kis. 1:3) Rya ro swaf anya, Yesus ḇyuk kankenem ḇyedi ḇe farsarser faro Yahwe I, ma Yahwe imarisen ismai na. (Ibr. 9:12) Roi ine neḇemam bos ro ras Pentakosta taun 33 Masehi. (Kis. 2:1-4, 32, 33) Inja, ḇaḇeasas babo irandak fa imbran kwar.

Farkarkor kun ya iso fafisu Yahwe ismai Yesus farsarser ḇyedi, ḇaḇeasas babo irandak fa imbran kwar. Ma ḇaḇeasas anya fyararur fafisu Yesus, Imam Ḇeba ya, ifarmyan ḇe Manfandu faro ḇaḇeasas ani.​—Ibr. 7:25; 8:1-3, 6; 9:13-15.