1. Anun rosai komam ro Filipi 2:3 ya, ma payamyum rosai na kosmai snar kosouser na?

KOFAWI Yahwe ima ifawi syadi roi ḇepyum faro ko. Inja, korun kosnesna fa kosouser parenta Ḇyena. (Ef. 4:22-24) Sne ḇerun nafrur fa komam Yahwe marisen Ḇyena nefandun syadi ro marisen koḇena ma komam snonggaku ḇese sikaki syadi ro ko. Payamyum ya, na kofanam syadi ḇe Yahwe I ma naek srar koḇesya.​—Wasya Filipi 2:3.

2. Rosai Manwawan Paulus ifawi kaku na, ma rosai nari kawos ro farkarkor ine na?

² Snonggaku ḇero Setan dunya ḇyedine, sararer si ma sfaḇri manggunsi. Kosasor ko ḇa ido, na kenem koḇena namnis ra si. * Rya roi ḇeradine dun samswen faro naek srar ḇero abad randak Masehi siwara kako. Inja, Manwawan Paulus fyas syapram ḇe naek srar ḇero Roma sya ḇo doḇe, ”Yanun naek srar mkokam: Mkoḇaḇir mankunmko mkokaki syadi awer ro roi ḇekakuna. Iḇye syadi naek kwara ma rwun mankundaw.” (Rm. 12:3) Paulus ifawi kaku na komarisen snonggaku ḇese sesyowi ko. Imbape, sne ḇerun nafnoḇek ko fa komam manggunko kuker nyan ḇemnis. Ro farkarkor ine, nari kawos roi rikyor ro kenem koḇena ḇekur sne ḇerun, ine na nafnoḇek ko fa kararer ko ḇa. Naiso nane (1) farḇakḇuk koḇena, (2) fararur ḇesren koḇena, ma (3) roi korir ro Internet raris foto, vidio, ma anun.

3. Rosai ḇefnai fa ḇefarḇuk kwar sya na sismai samswen, ma rosai sia sifrur fa simkei ro samswen anna?

³ Yahwe imarisen insama imbeswa susmai marasrisen ro farḇakḇuk suḇena. Mboi suma snonggaku ḇenapes ḇa kako, inja fafisu ono na suna kakara oser ḇa. Rarirya, Paulus fyas ḇo doḇe ḇefarḇuk kwar sya nari saksmai samswen. (1 Kor. 7:28) Sino sisya sfamfaḇri ker kuker siswasi, inja imbude skara ipyum syadi sfarḇuk awer kada. Nyan kakara dunya ine dawninyan si kwar ido, nari skara fa simuk farḇakḇuk sena. Skara manggunsi ma soḇe sibur siswasi kada na simarisen syadi.

4. Rosai kokara awer na?

⁴ Kokara awer farḇakḇuk koḇena naser marisen oḇa kwar. Kofawi Refo doḇe roi ḇefnai kaku fa imbeswa suḇesisye iso oso ifrur farḇuk ḇese kada. (Mat. 5:32) Inja, fafisu kosmai samswen ro farḇakḇuk koḇena raris rosai Paulus ikofen na, kararer awer ko ḇo kokara: ’Swa yedine dakfandun aya ḇa. Iswar aya ḇa. Yasewar oso ḇese mura kada, imbude na yamarisen syadi.’ Kokara radine ido, ima kokara manggunko ḇardi ḇo kokara koswasi ḇa. Fawawi dunya ine na fyarkor Au fa waso monda snembri, ḇefnder swambri isoine roi ḇefrur Au fa wamarisen, mura idif Au fa wabur i. Refo doḇe kosewar fandun manggun koḇena awer, ḇape snonggaku ḇese fandun sena kako. (Flp. 2:4) Yahwe imewer fa rwir wabur swambri, mboi imarisen kwainus i pdef. (Mat. 19:6) Imarisen kwara ḇepon marisen Ḇyena syadi ro marisen Bena ḇardi.

5. Ro Efesus 5:33, rosai fandun fa imbeswa sufasnai ya?

 ⁵ Fandun fa imbeswa suswar su ma suḇesyowi su. (Wasya Efesus 5:33.) Refo fyarkor ko fa kosmai monda awer ḇoi komarisen koḇuk. (Kis. 20:35) Rari rosai na ḇefrur fa imbeswa suswar ma suḇesyowi su? Iso sne ḇerun. Imbeswa ḇefasnai sne ḇerun nari sisewar fandun sena ḇardi ḇa, mboi snonggaku ḇese fandun sena kako.​—1 Kor. 10:24.

6. Rosai kofarkor ro Steven ma Stephanie roi sukofen na?

⁶ Sne ḇerun nafnoḇek imbeswa Kristen ḇebor sya fa sismai payamyum ḇeba ro farḇakḇuk sena kwar. Imnis ra snon oso ḇenir ḇe Steven, doḇe, ”Fandun fa imbeswa sufararur kayam, isyadi wer ro fafisu susmai samswen. Sumin ya kyara awer ’roi ḇepyum rosai na yasmai ya?’ mboi ipyum ya kyara ’roi ḇepyum rosai na nusmai ya?’” Swari, Stephanie, dakkara rarirya. Doḇe, ”Na komewer kaku koḇarekus snonggaku ḇefamfaḇri ker kuker ko. Fafisu nuna kakara oser ḇa, nusewar fa nufawi roi ḇefnai ya. Mura nuḇenadi, nufarkor kaku na, ma nuyawos asuser na. Nusewar fa nufamfaḇri ḇa, mboi nufrur samswen nuḇena fa namnis.” Imbeswa nari sukain pyum syadi rofyor oso kyara manggundi ikaki syadi ro sumin ya ḇa.

7. Rofyor mambesrar oso ismai fararur ḇesren ido, rosai fandun fa ifrur ya?

⁷ Komam fararmyan koḇena ḇe Yahwe I ro fararur rosai monda ḇe syowi ḇeba kaku. (Mz. 27:4; 84:10) Mambesrar oso imarisen ifrur nabor syadi ro fararur ḇesren ido, ima ipyum kwar. Refo doḇe, ’Snonggaku ḇemarisen ḇe manfarkin ro jemaat imarisen snar fararur ine iḇye kaku.’ (1 Tim. 3:1) Imbape, fyor sḇuk fararur fa duf, ipok kyara awer ima ipyum syadi ro ḇesesya. (Luk. 17:7-10) Ipyum fa kyara imbe duffarmyan snonggaku ḇesesya kuker sne ḇerun.​—2 Kor. 12:15.

8. Rosai kofarkor ro Diotrefes, Uzzia, ma Absalom fawar skoḇena?

⁸ Refo naser fawar ḇekur snonggaku ḇekara syadi manggunsi. Imnis raris, Diotrefes fyasnai sne ḇerun ḇa ḇo syewar fa iba syadi ro jemaat. (3 Yoh. 9) Uzzia dararer i, inja fararur Yahwe ḇyuk ḇe i fa duf na, ifrur na ḇa. (2 Taw. 26:16-21) Absalom imarisen fa dakḇe raja, inja syewar fa dun kawasa sya sisnesna insama sisaramper i. (2 Sam. 15:2-6) Fawar ro Refo nane nfasnaibos Yahwe ima imewer kaku snonggaku ḇesewar sanandik faro manggunsi. (Ams. 25:27) Ḇarpur ya, ḇeararer sya sismai roi ḇesamswen.​—Ams. 16:18.

9. Rari rosai Yesus fyasnai kwar ḇe ko na?

⁹ Komam kada, Yesus ima iḇese ro snon rikyor anskoya. Refo ikofen ḇekur Yesus i radine, ”Ima imnis Allah, mboi ipok kyara ḇaḇeri fa dun Allah nasan Ḇyena ḇaido ifrur i raris Allah.” (Flp. 2:6, NW) Yahwe iso ḇena papoik ḇeba syadi ma Yesus iso ḇesuru ya, mboi Yesus ipok kyara manggundi iba syadi ḇa. Ikofen ḇe manfamyan ḇyesi, ”Snar ḇebaḇa syadi rofandu mkokam, iso ḇeba syadiya.” (Luk. 9:48) Kofarmyan kayam fnoḇek perintis, hamba pelayanan, penatua, ma pengawas wilayah ḇefasnai sne ḇerun raris Yesus i, na kosmai barakas kaku! Kona sne ḇerun ido, na koswar syadi snonggaku  ḇesesya. Ma Yesus doḇe snonggaku sya na smambir Allah manfamyan ḇekaku Ḇyesi kukro sima siswaryae si.​—Yoh. 13:35.

10. Rosai na wafrur rofyor mam parkara naisya ro sidang ya dori ma kwara penatua sya smam pyum parkara anya ḇa?

¹⁰ Rosai na wafrur rofyor mam parkara naisya ro sidang ya dori ma kwara penatua sya smam pyum parkara anya ḇa? Ipyum ya wawos nabor awer, mboi fasnai sne ḇerun kuker waksaramper penatua sya. (Ibr. 13:17) Inja, kwarapan radine: ’Yamam parkara anine nmarḇak kaku inja fandun fa smam pyum na ke? Ine swaf ḇesrow fa smam na ke? Ima fararur ayenairi ke? Yasewar kaku fa sidang ḇyeoser ke, yasewar fa smam aya iso ḇefandun syadi?’

11. Ro Efesus 4:2, 3 ya, bon rosai na kosmai rofyor kofarmyan ḇe Yahwe I kuker sne ḇerun?

¹¹ Yahwe myam kofasnai sne ḇerun iso roi ḇefandun syadi ro kona samambraḇ, ma koḇeoser ipyum syadi ro kofrur roi nabor. Inja, swewar fa wafarmyan ḇe Yahwe I kuker sne ḇerun. Rarirya, na wafrur fa sidang ḇyeoser. (Wasya Efesus 4:2, 3.) Wamyaren ro ḇaḇeḇaryas. Swewar fa wafarmyan snonggaku ḇese kuker wafrur roi ḇepyum yoḇ si. Fasnai frur pyum faro snonggaku syakam, faro ḇeyuf fararur ro sidang ḇa sya kako. (Mat. 6:1-4; Luk. 14:12-14) Fasnai pdef sne ḇerun ma wafararur kayamyam fnoḇek naek sra sya ido, nari smam Auma nwa samambraḇ, mboi isyadi wer nari smam nwa sne ḇerun.

12. Refo danun ḇe ko fa kona bati ke? Fasnaiḇair na.

¹² Yahwe ḇye ko fa kosmai marasrisen fafisu koḇuk swaf fa kokainus bati ma kina koḇesya. (Mz. 133:1) Yesus dakna bati kako. (Yoh. 15:15) Refo doḇe kona bati ido, na kosmai payamyum kaku. (Ams. 17:17; 18:24) Refo ikofen kako ḇo doḇe kokain ro manggunko nama napyum ḇa. (Ams. 18:1) Sino skara Internet iso nyan fa sna bati, rarirya kada na skain ro manggunsi ḇa. Mboi fandun fa kosasor ko fafisu kofnak Internet na.

13. Rosai ḇefnai fa snonggaku ḇefnak ker Internet, sḇaḇir sḇero manggunsi ma sesanekar?

¹³ Sifawi kwar snonggaku ḇefnak oras nabor fa siwasya anun ma smam sonin snonggaku ḇese srir ro Internet na, kaku ya sima sḇaḇir sḇero manggunsi ma sesanekar. Kukro? Roi oser ya iso snonggaku sya srir ker sonin ro Internet ḇefasnai moḇ sikenem raya, sfasnai sonin ḇepyum sena, bati sesi, ma moḇ ḇepduk sra ro na. Fafisu oso myam sonin anna, na ḇyukikara kenem ḇyedima iḇese kaku. Imbesrar oso ḇeumur taun ri 19, ikofen radine, ”Yamam ḇesesya rya simarisen ro minggu pupes kukro simbran farma ḇo ayama yemir yakain ro rum ido, rya yafafayaf ra.”

14. Moḇsa wos anun ro 1 Petrus 3:8 nafnoḇek ko fa kofnak pyum Internet na?

¹⁴ Na kosmai payamyum ro Internet ḇae. Rupa ra, koḇukidawos yoḇ kina ma bati koḇesi. Mboi mam ido, sino sisya srir anun, sonin, ma vidio ro Internet na fa sisewar sanandik faro manggunsi. Rya imbe sisewar ker insama ḇesesya smam si. Ono sisya sfas wos ḇeḇyeḇa ro sonin sena ḇaido snonggaku ḇese srir na. Yahwe dor snonggaku Kristen koine fa kofasnai sne ḇerun ma sawarwar. Inja, kopok kofnak awer Internet kuker nyan ḇeradirya.​—Wasya 1 Petrus 3:8.

15. Moḇsa na Refo ifnoḇek ko fa kokara awer kopyum syadi ro ḇesesya?

¹⁵ Imbe rwir roi oso ro Internet ido, wafuken resari: ’Anun, sonin, ḇaido  vidio yarir nane nari nafnai fa snonggaku sya skara ayama yararer aya ke? Na yafrur fa ḇesesya sfafayaf aya ke?’ Refo doḇe, ”Roi nakam ḇero dunya ine, raris marasrisen baken ḇesasar, marasrisen ro mgamor, ma marasrisen fa sḇukidarer nana arasai, nama ryamuma ro Mami ḇa, mboi ro dunya ine.” (1 Yoh. 2:16, NW) Snonggaku Kristen skara awer sima sipyum syadi ḇaido simarisen ḇesesya smanen si. Siso anun ro Refo ḇeyoḇe, ”Inja komararesḇa, kosampumyae ḇa ma kayinyae awer ko.” (Gal. 5:26) Kona sne ḇerun ido, na kosnai ḇese ro snonggaku ḇero dunya ḇeararer ma ḇemarisen ḇesesya smam sefandun syadi.

16. Rosai ḇefnai kaku fa koḇinggwanbur ararer ya?

¹⁶ Kofasnai sne ḇerun kukro snonggaku ḇeararer sima simewer ’skara ma sirun manggunsi’. (Rm. 12:3) Snonggaku ḇeararer sima sfamfaḇri ma sfaḇri manggunsi. Roi skara ma sifrur na nafnai samswen si ma ḇesesya. Sisasor si ḇa ido, na ararer nakyaren swaruser sena, mura Setan idwarek ma dawninyan kakara sena. (2 Kor. 4:4; 11:3) Imbape, snonggaku ḇena sne ḇerun na kyara ma irun manggundi. Na myam manggundi kuker kakara ḇemnis, ifawi snonggaku ḇesesya sna samambraḇ syadi ro i. (Flp. 2:3) Oso wer ido, ifawi ’Allah isampum ḇemarares sya, ḇape iswar ḇerun sne sya’. (1 Ptr. 5:5) Snonggaku ḇena sne ḇerun sya, simewer Yahwe myam si ḇe mbroḇ.

17. Rosai kofrur kaku insama kofasnai pdef sne ḇerun ya?

¹⁷ Insama kofasnai sne ḇerun pdef ido, fandun fa koso wos anun ro Refo fa kobur kenem ḇekwar koḇena ma rari ḇyena ma kona kenem babo. Inema roi ḇepyan risyaḇa. Kofarkor ma kosewar kaku fa koso pyum moḇ Yesus imbran raya. (Kol. 3:9, 10; 1 Ptr. 2:21) Kofrur roi ine kada, na kosmai payamyum kaku. Kofasnai sne ḇerun ido, na kina koḇesi skain pyum, sidang ḇyeoser, ma kofawi nyan fa kofnak pyum Internet na. Ḇesyadi wer, nari Yahwe imarisen faro ko ma ḇyebarakas ko.