1. Imnis wos ḇero 3 Yohanes 3, 4, rosai ḇefrur fa komarisen?

KWARAPAN Manwawan Yohanes moḇsa ḇyaḇir rai fafisu ryower snonggaku ifnoḇek kwar fa sifawi kakaku ya, sfarmyan pdef ḇe Yahwe I. Yohanes myam snonggaku Kristen ḇesoasuser ansya simnis ra romawa ḇyesi. Inja, rofyor sismai samswen nabore, syewar kaku fa syambraḇser kakyar sena. Rarirya kako, na komarisen rofyor komam romawa koḇesi ḇaido snonggaku kofnoḇek kwar fa sifawi kakaku ya, sḇuk kenem sena fa sfarmyan pdef ḇe Yahwe I.​—Wasya 3 Yohanes 3, 4.

2. Rosai ḇefnai fa Yohanes fyas syapram rikyor anskoya?

² Ro taun 98 Masehi, rya Yohanes ḇyarek ro Efesus ḇaido moḇ ḇefanam mnu anya. Imbude rya ḇe diwa rofyor imkei kwar ro bui ḇero myos Patmos. Rya ro taun anya, Yahwe fyarkin i kuker rur ḇesren fa fyas syapram rikyor. Yohanes fyas syapram anskoya insa nafnoḇek snonggaku Kristen ḇesoasuser sya fa sisambraḇser kakyar sena ma simbran pdef ro kakaku.

3. Fakfuken risai nari kokarem ya?

³ Yohanes iso manwawan ḇepupes ḇekenem kaker ro fafisu anya. Imgakwarek kukro snonggaku ḇebur kakaku sya sfarkor ninyan sidang-sidang kwar. * (1 Yoh. 2:18, 19, 26) Soḇe sifawi Allah kwar, mboi sisouser Yahwe parenta Ḇyena ḇa. Rwama kawos Yohanes anun ḇyena. Rarirya, na kokarem fakfuken rikyor anskoine: Rosai na kofrur kaku insama kombran ro kakaku ya? Rosai na ḇedwarek ko fa kombran ro kakaku ya? Ma rariso kofnoḇek ḇesesya fa kokam kombran pdef ro kakaku ya?

4. Imnis wos ḇero 1 Yohanes 2:3-6 ma 2 Yohanes 4, 6, rosai fandun fa kofrur insama kombran ro kakaku ya?

⁴ Insama kombran ro kakaku ya, fandun fa kofawi kakaku ḇero Refo ya dori. Oso wer ido, fandun fa kosouser Yahwe sasoser Ḇyena. (Wasya 1 Yohanes 2:3-6; 2 Yohanes 4, 6.) Yesus fyasnai nyan ḇepyum kuker isouser faro Yahwe I. Inja, nyan oser ḇepon kaku fa kosouser Yahwe iso koso pyum raris moḇ Yesus imbran raya.​—Yoh. 8:29; 1 Ptr. 2:21.

5. Rosai fandun fa kokyar kaku ya?

⁵ Na kombran pdef ro kakaku ya rofyor kokyar kaku Yahwe iso Allah ḇekaku ma rosai ikofen ḇe ko ro Refo nama nkaku. Kokyar kako Yesus ima Mesias dirya. Snonggaku ḇebor ḇero baboine sikyar manggun ḇa Allah ryem Yesus i kwar fa ḇye Raja ro Karajan nanggi. Yohanes ḇyuk swarapepen ḇo doḇe ’ḇeanggarkar sibor’ sfarkor ninyan snonggaku ḇekyar nako ḇa faro kakaku ḇekur Yahwe ma Yesus su. (2 Yoh. 7-11) Yohanes fyas, ”Mansei ḇeḇeankarkar ani? Ḇeḇeankarkar isoine snonkaku ḇekofen ḇo ḇeyoḇo, Yesus Wairek Ḇeyun koreri raris Allah asas ḇyedi ḇa.” (1 Yoh. 2:22) Nyan oser insama sanggar ko ḇa iso kofarkor Refo. Kofrur roi ine monda nafrur fa komambir Yahwe ma Yesus su. (Yoh. 17:3) Rarirya nari kokyar kosmai kakaku ya kwar.

6. Rosai bisa ḇedwarek roma inai babo sya fa simbran ro kakaku ya?

⁶ Snonggaku Kristen fandun fa skadaunwarek si insama farkarkor ḇeramuma ro snonggaku sfarkor ninyan awer si. (1 Yoh. 2:26) Ḇepon syadi roma inai babo sya. Imbesrar ḇeraker Prancis ḇeumur taun ri 25 snori Alexia, * doḇe, ”Fyor yafarkor kaker ro rumfarkor, sfarkor inggo ḇekur evolusi ma kakara snonggaku. Roi sfarkor nane nafnai fa yakmome. Fyorno ido, yamam rya farkarkor anna napyum. Mboi yafawi yakyar famfnom awer faro roi sfarkor na ḇo ipyum fa yamam rosai Yahwe fyarkor na.” Alexia fyarkor syap Kehidupan—Bagaimana Asal Mulanya? Melalui Evolusi atau Penciptaan? Swaf minggu riḇeso mura, ikmom wer ḇa. Alexia doḇe, ”Yakyar kaku Refo iser kakaku. Ma yafawi yakenem  imnis Yahwe marisen Ḇyena kada, na dun marasrisen ma payamyum.”

7. Rosai komewer kaku fa kofrur na, ma rosai ḇefnai fa komewer kofrur na?

⁷ Snonggaku Kristen koine kam, kobabo ke koḇesinan kwar ke, komewer kaku kona nyan kankenem risuru isoine kofarmyan ḇe Yahwe I mboi kofrur roi ḇesasar kako. Yohanes ikofen bos kopok kombran awer ro kakaku ya ḇo ro fafisu anya kako kofrur roi ḇepyum ḇa na. (1 Yoh. 1:6) Insama Yahwe imarisen faro ko ro fafisu ine ma ras ḇarpon iyama ido, koswarepen kaku Yahwe isya myam roi kofrur nakam. Inja, snonggaku sya smam roi kofrur na ḇa yo, Yahwe ifawi na.​—Ibr. 4:13.

8. Rosai kofrur awer na?

⁸ Kofrur awer raris moḇ dunya ine myam sasar ya. Manwawan Yohanes fyas, ”Rofyor kokofen ḇo koḇo, kosasar ḇa, koḇeankar mankun ko.” (1 Yoh. 1:8) Ro fafisu Yohanes ikenem ya, snonggaku ḇebur kakaku sya soḇe snonggaku oso bisa ifrur roi ḇesasar ḇo ḇyebati pdef kuker Allah. Baboine, kokenem ro fandu snonggaku ḇena mamam ḇeradine. Ḇebor sya soḇe sikyar faro Allah, mboi moḇ smam sasar ya iḇese ro moḇ Yahwe myam na rai, ḇepon syadi roi ḇekur ḇe fararur farḇuk ya. Yahwe myam fararur farḇuk ono ḇe roi ḇesasar, mboi snonggaku ansi soḇe oser-oser ifrur marisen ḇyena.

9. Payamyum rosai na roma inai babo sya sismai snar sisouser wos ḇero Refo na?

⁹ Roma inai babo Kristen siso ḇepon kaku ḇesmai dafdifer ro bati ro rumfarkor ḇaido moḇ sfararur fa sakna mamam ḇesasar ḇekur fararur farḇuk ya. Ine iso roi Aleksandar daksmai na. Doḇe, ”Ro rumfarkor, inai ḇeḇeso sidif aya fa  yafrur farḇuk kuker si. Yamewer, kurḇei soḇe ayama yamarisen faro snon sya.” Wasmai fafrowes ḇeradine ido, wasouser rosai Refo ikofen na insama kwadaunwarek kenem Bedi, waduf ḇa, waknon, ma nari fanam pdef faro Yahwe I. Pampum farawrowes na kwar ido, na napyan syadi fa wafrur roi ḇekaku. Waswarepen kako, Setan iso ḇefarkor ninyan snonggaku ḇero dunya ine fa sna mamam ḇesasar ḇekur fararur farḇuk ya. Inja, pampum ḇeri mamam ḇesasar anna ido, Au isya ’wakafyo Ibiris ya kwar’.​—1 Yoh. 2:14.

10. Rariso 1 Yohanes 1:9 nafnoḇek ko fa kofarmyan ḇe Yahwe I kuker sneuser ḇesren?

¹⁰ Kofawi kaku Yahwe derer monda na ḇekofenḇair rosaiso fararur ḇesasar ani. Kosewar kaku monda fa kofrur sasar awer. Imbape kofrur sasar ido, kokofen sasar koḇena ḇe Yahwe I ro nadi. (Wasya 1 Yohanes 1:9.) Kofrur sasar ḇeba ido, kor fafnoḇek ro penatua sya kukro Yahwe ikanow si kwar fa smamwarek ko. (Yak. 5:14-16) Imbape, kopok kokara ker awer faro sasar kofrur kwar ro fafisu naiwara. Kukro? Kma koḇedi iswar kaku ko, inja iwan Roma Ḇyedi fa imarwarek ko insama kosmai payasyos ro sasar koḇena. Fafisu Yahwe ikofen nari ḇyuk ampun faro snonggaku ḇembror sya, na ifrur kaku rarirya. Yahwe ḇyuk sneuser ḇesren ḇe ko kwar, inja roi oḇaḇeri ḇedwarek ko fa komnai kofarmyan faro I.​—1 Yoh. 2:1, 2, 12; 3:19, 20.

11. Rariso kokadaunwarek manggunko ro farkarkor na ḇekakok kakyar koḇena?

¹¹ Fandun fa kopampum farkarkor ḇekakok kakyar ya. Rofyor sidang Kristen dores randak anya, Setan syewar kaku fa ifrur snonggaku Kristen sya kakyar sena nsambraḇ ḇa. Iso ḇefnai fa komambir kaku roi ḇekaku ma roi  ḇesasar na kada. * Ḇembroḇ konsya sḇuk Internet ḇaido media sosial fa sawninyan ko insama kokyar faro Yahwe I wer ḇa ma koswar naek srar sya ḇa. Komewer kokyar faro anggarkar senane kukro ndramuma ro Ibiris i!​—1 Yoh. 4:1, 6; Why. 12:9.

12. Rosai ḇefnai fa kosambraḇser kakyar koḇena faro kakaku kofarkor kwar na?

¹² Insama kopampum farawrowes ḇeramuma ro Setan i, fandun kaku fa kokyar faro Yesus i ma rosai ifrur kaku insama Allah marisen Ḇyena ndarirya. Kokyar kako faro snonggaku Yahwe kyur kwar fa sfarkin organisasi Ḇyedi ro baboine. (Mat. 24:45-47) Kosambraḇser kakyar koḇena kuker kofarkor myaren Refo ras ḇe ras. Rarirya, kakyar koḇena imnis aiknam oso rares ḇyena nsun ḇedo kaku ro saprop ya dori. Paulus ikofen roi ine kako fafisu fyas syapram ḇyedi ḇe sidang ḇero Kolose. Doḇe, ”Mkona Yesus Kristus, Manseren koḇedi kwar. Inja nari mkokenem faswef kuker i. Ma mkoḇerares ro i ma mko ḇeḇeḇawes roi, ma kakyar mkoḇena.” (Kol. 2:6, 7) Kosewar fa kosambraḇser kakyar koḇena ido, Setan ma ḇesowarpu i sya na sipok sifrur fa kosasyarbur kakaku ya ḇaḇeri.​—2 Yoh. 8, 9.

13. Rosai kofawi kaku ya, ma rosai ḇefnai fa kofawi roi ine?

¹³ Kofawi kaku dunya ine na dayin ko. (1 Yoh. 3:13) Yohanes ḇyuk swarapepen ḇe ko ḇo doḇe ’supswan ḇesiper ine isya ro papoik Ibiris i’. (1 Yoh. 5:19) Snar papupes dunya ine fyanam kwar, inja Setan imsor syadi wer. (Why. 12:12) Syewar fa ifrowes ko ro farḇakḇuk famfnom ḇaido anggarkar ḇeramuma ro snonggaku ḇebur Yahwe kwar sya. Setan ḇyewayam naek srar koḇesi kako. Ifawi swaf ḇyena nabor ḇa kwar fa idwarek fararur ḇaḇeḇaryas ma kyakok kakyar koḇena. Inja, na kokandor ḇa fyor komam ro sup ḇeḇeso sidwarek fararur koḇena kwar. Rarirya mboi, naek srar koḇesya ḇero diansya sisusu ḇa. Roi nane nḇeḇair rosai monda Setan ifrur yoḇ Yahwe kawasa Ḇyesi koine, na kopok kosusu ḇa isof papupes!

14. Moḇsa kofnoḇek naek srar koḇesi fa simbran pdef ro kakaku ya?

¹⁴ Imbe kofnoḇek naek srar koḇesi fa simbran pdef ro kakaku ya ido, fandun fa kofasnai sawarwar. (1 Yoh. 3:10, 11, 16-18) Kofasnai saswar ine ro fafisu ḇepyum monda ḇa, mboi ro fafisu ḇesamswen kako. Rupa ra swewar fa wafawi naek ḇaido srar ḇefafardun snar snonggaku iswar ya imar. Imbude fyandun wos sneprei ḇaido fafnoḇek. Ḇaido wafawi min Kristen Bansi ono rim ḇeba kyur si rawo robebor sena napromes. Imbude sifandun fafnoḇek fa sḇawes kaḇer Balai Karajan ḇaido rum senandi. Kofasnai koswar kaku naek srar koḇesine ro wos koḇena monda ḇa, mboi ipyum syadi kofasnai na ro fararur koḇena.

15. Imnis wos ro 1 Yohanes 4:7, 8, rosai fandun fa kofrur ya?

¹⁵ Koswaryae ko ido, koisya koso Kma koḇedi ro nanggi saswar Ḇyena. (Wasya 1 Yohanes 4:7, 8.) Nyan ḇepyum oso kofasnai saswar iso koḇuk ampun. Imnis raris, snonggaku oso ifrur fa kosnesna naduf kwar, mura ido dor maf ro ko.  Kofasnai saswar kuker koḇuk ampun ḇe i ma koḇefnder roi ifrur yoḇ ko na. (Kol. 3:13) Mambesrar ḇenir ḇe Aldo, fyafayaf kaku fyor ryower naek ḇyesyowi kaku oso ikofen roi ḇemnis ḇa ḇekur snonggaku ḇeramaker keret ḇyedi. Aldo doḇe, ”Yaḇenadi ker ḇe Yahwe I fa ifnoḇek aya insama yakara sasar awer naek anine.” Mura, Aldo ifrur roi oso ḇese wer. Dor naek ani fa suḇaryas kayamyam. Fafisu suḇaryas ya, Aldo ikofenḇair fafayaf ḇyena yoḇ naek ani. Naek Aldo doḇe, ”Fafisu naek ani fyawi wos ḇyena nafrur fa sne yedi iduf kaku, dor maf kaku ro aya. Ro moḇ dawos raya yafawi fyafko kaku faro roi ikofen kwar na. Ḇarpur mura, nuḇebati fanam kaḇer.”

16-17. Rosai imbe kofrur kaku ya?

¹⁶ Manwawan Yohanes iswar kaku naek srar sya ma imarisen insama kakyar sena nsambraḇ pdef. Fyasnai roi ḇyaḇir nane ro anun fyas ro syapram rikyor anskoya. Komarisen kaku kukro kofawi snon ma bin nari ḇepoik kayam kuker Yesus ro nanggi sya, sakswar ko raris Yohanes i.​—1 Yoh. 2:27.

¹⁷ Iḇye kada koswarepen ker anun kawos kwar nane. Mgorama kombran pdef ro kakaku ya kuker kosouser Yahwe I ro nyan kenem koḇena kam. Kofarkor myaren Refo ya, ma kokyar faro roi ḇero dori na. Kosambraḇser kakyar koḇena faro Yesus i. Kopampum kakara ḇesasar ro snonggaku sya ma farkarkor ḇekakok kakyar koḇena. Komewer kofarmyan ḇe Yahwe I mboi ro fafisu anya kako kofrur roi ḇesasar. Kokenem imnis Yahwe farkankin Ḇyena. Inja, mgorama kofnoḇek naek srar koḇesi fa sna kakyar ḇesambraḇ kuker koḇuk ampun faro snonggaku ḇefrur fa kosnesna naduf ma kofnoḇek ḇefandun fafnoḇek sya. Inja, roi ḇedwarek ko nabor ke, komarisen kombran pdef ro kakaku ya.