1. Rosai Manwawan Paulus fyawi kaku ya?

MANWAWAN Paulus fyawi kaku ro fafisu ono na daksambraḇ ḇa. Doḇe baken ḇyedi iryar ḇa kwar, syewar kaku fa ifrur roi ḇepyum, ma roi dor ro nadi ḇyena, Yahwe kyarem imnis moḇ imarisen ya ḇa. (2 Kor. 4:16; 12:7-9; Rm. 7:21-23) Paulus ifawi kako mbroḇ ḇyesi smam ima iryar ḇa. * Imbape, imewer roi ḇeḇyeḇa snonggaku ḇese sikofen yoḇ i ḇaido sasar ḇyena nafnai fa kyara ḇye roi oḇa.​—2 Kor. 10:10-12, 17, 18.

2. Ro 2 Korintus 12:9, 10 ya, farkarkor ḇefandun kaku rosai Paulus fyarkor na?

² Paulus fyarkor farkarkor ḇefandun kaku, isoine snonggaku oso na ismai samambraḇ fafisu ḇyaḇir iryar ḇa. (Wasya 2 Korintus 12:9, 10.) Yahwe ikofen ḇe Paulus i ḇo doḇe nari ḇyuk samambraḇ faro i. Rwama komam ḇepon rosai ḇefnai fa komsor awer rofyor ḇembroḇ konsya sanonef ko.

3. Rosai ḇefnai fa na koryaḇ rofyor sonef ko?

³ Na komewer kaku snonggaku ono sanonef ko. Imbape, ḇembroḇ konsya sonef ko ḇo komsor ido, nari koḇesanekar. (Ams. 24:10) Inja, moḇsa na komam anonef sena rai? Raris Paulus i, na ’koryaḇ rofyor sonef ko’. (2 Kor. 12:10) Koryaḇ kukro? Fafisu sanonef ma sembroḇ  ko, ine fyasnai koma Yesus manfamyan ḇekaku ḇyesiko. (1 Ptr. 4:14) Yesus doḇe manfamyan ḇyesi nari sismai wayam. (Yoh. 15:18-20) Sewayam snonggaku Kristen ḇero abad randak siwara. Mura, er Yunani sya rari sena nafnai fa smam snonggaku Kristen sima sifawi roi oḇa ma sisambraḇ ḇa. Kawasa Yahudi kako soḇe snonggaku Kristen sima sakfarkor ḇa ma sakna nasan oḇa, imnis ra Manwawan Petrus ma Yohanes su. (Kis. 4:13) Ḇebor sya skara snonggaku Kristen sima siryar ḇa kukro saksowarpu ro polotik oḇa, inja na sakḇepoik ḇa. Simewer sakḇe sordade, inja sisambraḇ fa sakmamun ḇa ḇaido na sipok skadaunwarek manggunsi ḇa.

4. Snonggaku Kristen ro abad randak siwara rosai sifrur ya fafisu kawasa sya smam sasar si?

⁴ Mamam ḇesasar anna nafnai fa snonggaku Kristen ro abad randak siwara simnai siso Yesus i ma sḇaryas wer ḇa ke? Oroḇa. Imnis ra Manwawan Petrus ma Yohanes su, fafisu sewayam su kukro suso Yesus ma surwas farkarkor ḇyena, sumam roi ine ḇe syowi ḇeba kaku. (Kis. 4:18-21; 5:27-29, 40-42) Roi anna nafnai fa manfamyan ansi simai ḇa. Kawasa ḇero fafisu anya sesyowi snonggaku Kristen ansine ḇa, mboi snonggaku Kristen sine sifrur roi nabor fa sifnoḇek snonggaku ḇese. Rupa ra, syap ḇeḇeso sena nafnoḇek ma nsambraḇser snonggaku risyaran kaker. Karajan Allah sḇaryas anya dores kwar, ma kero wer nari ḇyepoik snonggaku syakam. (Mat. 24:14) Pamarenta Romawi ḇepoik kaku ro fafisu anya, ma ḇewayam snonggaku Kristen sya, skain ro swaf kawan ḇa. Imbape fafisu ine, snonggaku Kristen ḇesouser ansi sḇepoik ḇe raja ro nanggi kwar. Ḇembroḇ si ansya simar kwar, mboi meser saksmai kaḇakḇok ya kako ido, nari sḇepoik ro nanggi ḇa mboi sḇe kawasa monda ro Karajan Allah ro supswan ine. Iso angginem snonggaku Kristen sḇaryas na, mboi sayin kaku na.​—Why. 5:10.

5. Ro Yohanes 15:19, rosai ḇefnai fa smamkyof Yahwe kawasa Ḇyesi koine?

⁵ Baboine, fyorno ido smamkyof ma sonef Yahwe kawasa Ḇyesi koine ḇo soḇe koma kofawi roi oḇa ma kosambraḇ ḇa. Kukro? Kona kakara oser kuker snonggaku ḇero ris koḇedi ḇa. Inja, kosewar fa kofasnai sne ḇerun, mayaryaren, ma kosoasuser. Imbape, snonggaku ro dunya ine sararer si, sirarmomen, ma sembroḇ. Oso wer ido, kaksowarpu ro polotik ya ḇa, ma kakḇe sordade fa komamun ḇa. Kosnai ḇese ro snonggaku ḇero dunya ine. Nane naiso ḇefrur fa smamkyof ko.​—Wasya Yohanes 15:19; Rm. 12:2.

6. Fararur ḇeba rosai Yahwe ḇyuk ḇe kawasa Ḇyesi fa sifrur ya?

⁶ Snonggaku ḇero dunya ine smamkyof ko, mboi Yahwe ḇye ko fa kuf fararur ḇeba. Yahwe isya ifrur fararur ḇaḇeḇaryas ḇeba kaku ro supswan ine. Ifnoḇek manfamyan Ḇyesi ro baboine fa sifrur syap ma vidio ro wos ḇebor, sirwas na ro supswan ḇesiper, ma sḇuk Refo fa sifnoḇek kawasa ḇebor sya fa sikenem pyum syadi. Snonggaku sya smam Allah kawasa Ḇyesi sisambraḇ ḇa mboi Yahwe ḇye si fa sifrur fararur ḇeba anna. Yahwe isyus ismai sanandik faro roi nane kam. Ḇape ko oser-oser ido rariso? Yahwe na ifnoḇek ko fa kosambraḇ ke? Rarirya ido, rosai na kofrur fa kosmai fafnoḇek ro I? Rwama kawos roi rikyor na kofarkor ro Manwawan Paulus fawar ḇyena.

7. Roi ḇefandun kaku oso rosai kofarkor ro Paulus i?

⁷ Roi ḇefandun kaku oso isya kofarkor ro Paulus i. Isoine: Rofyor kofarmyan ḇe Yahwe I, kokyar awer faro samambraḇ ḇaido fawawi manggun koḇena. Ro mamam snonggaku, Paulus nya sano fa dararer i ma ikyar faro samambraḇ ḇyena. Iba ro kota ḇeba ro provinsi Romawi, isoine Tarsus. Kawasa ḇero kota Tarsus ine sikenem ro mararen ma rumfarkor ḇekaki nabor naisya ro dine. Paulus dakfarkor mnis kako ma ḇefarkor i iso manfarkin Yahudi sesyowi kaku ro fafisu anya, snoriso Gamaliel. (Kis. 5:34; 22:3) Inja, Paulus isyadi ro min ḇyesi ḇeḇe kawasa Yahudi sya ḇae. Paulus doḇe, ”Ro agama Yahudi ayaiso ḇero ḇarpon syadi ro min ḇeḇor ayesi ḇemnis kuker aya rofandu er ayedi.” (Gal. 1:13, 14; Kis. 26:4) Ḇape Paulus ikyar faro samambraḇ manggun ḇyena ḇa.

8. Ro Filipi 3:8 ya, moḇsa Paulus myam roi ḇebor ibur kwar na, ma rosai ḇefrur fa ’iryaḇ kuker samambraḇ ḇa ḇyena’ ḇesya kwar?

⁸ Paulus imarisen ibur roi ḇebor ḇefrur fa smam isyadi ro ḇesesya. Ifawi kaku roi anna kam nama papus monda nairi. (Wasya Filipi 3:8.) Paulus imbe iso Yesus i ndari ismai samswen nabore. Min ḇyesi ro er ḇyeja sayin i. (Kis. 23:12-14) Min ḇyesi ḇeḇe kawasa Romawi sya kako, smun i ma sisun i ro bui. (Kis. 16:19-24, 37) Oso wer ido, Paulus ifawi kaku ima inapes ḇa. (Rm. 7:21-25) Inja, syamswen fa ifrur roi ḇekaku. (Rm. 7:21-25) Ḇape samswen ḇeramuma ro manggundi ma snonggaku ḇese, napok nafrur i fa isusu ro iso Yesus i ḇa. Imbape ’iryaḇ kuker samambraḇ ḇa ḇyena’ ḇesya kwar kukro fafisu syambraḇ ḇa, myam kaku Yahwe isya ifnoḇek i.​—2 Kor. 4:7; 12:10.

9. Moḇsa komam roi ḇepyum ḇa ḇekur ko na?

⁹ Komarisen Yahwe ḇyuk papoik ḇe ko ido, kopok kararer awer ko snar kona baken ḇesambraḇ, farkarkor ḇekaki, moḇ korama ya, ḇaido nana arasai koḇena.  Roi nane nari nafrur fa Yahwe myam koḇesyowi ḇa. Ḇekaku ya, Allah manfamyan Ḇyesi ’ḇefawinanem, roḇa ḇesmai papoik, roḇa ḇesmai nasan ḇekaki ro mamam snonggaku’ sibor ḇa. Mboi Yahwe kyinfir kwar ’rosai supswan ine skara ḇe ḇefawi roi oḇa’ sya. (1 Kor. 1:26, 27) Inja, roi ḇepyum ḇa rosai monda ḇekur ko na, bisa kofarmyan pdef ḇe Yahwe I. Ine iso swaf fa komam moḇsa Yahwe ḇyuk papoik ḇe ko raya. Rupa ra, ono sisya sawos makak fa sifrur insama wakorwanan ḇekur rosai wakyar ya ido, ḇenadi ḇe Yahwe fa ifnoḇek Au insa wamgak ḇa fa wawoswarek kakyar Bena. (Ef. 6:19, 20) Rofyor waduf marḇak, wor ḇe Yahwe I fa ḇyuk samambraḇ insama wamyaren pdef ro fararur ḇesren ya. Fafisu mam moḇsa Yahwe ifnoḇek Au rai, kakyar Bena nari nsambraḇ syadi.

10. Rosai ḇefnai fa kofarkor fawar ro Yahwe manfamyan ḇesouser Ḇyesi ḇeyap ro Ibrani 11:32-34 ya?

¹⁰ Paulus ima imyaren fyarkor Refo. Ifawi roi ḇebor kwar, mboi fyarkor kaker ro fawar snonggaku sfas ro Refo sya. Rofyor fyas angginem ḇe min Kristen ro Ibrani sya, dor si fa skarauser fawar ḇepyum ro Yahwe manfamyan ḇesouser Ḇyesi ro awar randak sya. (Wasya Ibrani 11:32-34.) Kokarapan fawar ro Raja Daud i. Ismai roi ḇedwarek ro mbroḇ ḇyesya monda ḇa mboi ro bati ḇyesi kako. Kowasya Daud fawar ḇyena kada, na kofawi rariso Paulus ismai samambraḇ snar kyarauser Daud kenem ḇyena ma moḇsa kakfrur raris Paulus i rai.

11. Rosai ḇefnai fa smam Daud ima rya syambraḇ ḇa? (Mam sonin ḇero ḇarpon.)

¹¹ Daud ima syambraḇ raris Goliat i ḇa. Fafisu Goliat myam Daud i, myamkyof i kaku. Goliat baken ḇyeja ibamantar, nya romamun, ma dakso ro mamamun ḇebor kwar. Smam Daud ima syambraḇ ḇa kukro ḇye roma babo kaker ma dakso mamamun ro ras oso ḇaim. Ḇape, Daud ima syambraḇ kaku. Ikyar faro Yahwe I ma Yahwe ḇyuk papoik yoḇ i fa myun Goliat i.​—1 Sam. 17:41-45, 50.

12. Samswen rosai wer Daud ismai na?

¹² Daud ismai samswen ḇese wer ḇefrur i fa syambraḇ ḇa. Ifarmyan pyum snonggaku Yahwe ryem kwar ḇe raja ro Israel, Saul i. Randak ya, Raja Saul ḇyesyowi Daud i. Mboi ḇarpur mura, ararer nafnai fa Saul imarisen faro Daud i ḇa. Rarirya Saul ifrur pyum Daud i ḇa kaku, rawo imbe myun i.​—1 Sam. 18:6-9, 29; 19:9-11.

13. Rosai Daud ifrur ya rofyor Raja Saul ifrur pyum i ḇa?

¹³ Raja Saul ifrur pyum Daud i ḇa, mboi Daud fyasnai syowi pdef faro raja Yahwe ryem kwar ine. (1 Sam. 24:6) Daud ḇyuk sasar ḇe Yahwe I ḇa faro roi ḇeḇyeḇa Saul ifrur ḇe i kwar. Mboi, Daud ikyar Yahwe na ḇyuk samambraḇ fa kyamar samswen ḇekur i na.​—Mz. 18:1, ma perikop.

14. Raris Daud i, roi ḇesamswen risai Manwawan Paulus ismai na?

¹⁴ Manwawan Paulus dakro fafisu ḇesamswen raris Daud i. Ḇembroḇ Paulus i sya sisambraḇ syadi ro i. Ḇebor ro manfarkin polotik ma agama sayin i. Fyorno ido, sewayam ma sisun i ro bui. Raris Daud i, Paulus bati ḇyesi kako sifrur pyum i ḇa. Ro sidang Kristen ya dori ono sisya spampum i. (2 Kor. 12:11;  Flp. 3:18) Ḇape, roi sifrur anna napok nafrur Paulus i fa isusu ḇa. Rosai ḇefrur fa syambraḇ pdef? Ismai samswen, mboi ḇyaryas pdef. Naek srar sisya sifrur fa fyafko, mboi iswar si pdef. Ḇefandun syadi ya, isouser faro Allah Yahwe I isof imar. (2 Tim. 4:8) Ipok ifrur roi nane kam snar ikyar faro samambraḇ manggun ḇyena ḇa, mboi ikyar kaku faro Yahwe I.

15. Rariso kokafyo ḇarḇor ya rai?

¹⁵ Bati Besi ro rumfarkor, moḇ fararur, ḇaido kina ḇeḇe Saksi ḇa sya sanonef ma sewayam Au kako ke? Ro sidang, oso isya ifrur pyum Au ḇa ke? Rarirya ido, waswarepen fawar ro Daud ma Paulus su. Bisa ’kwafyo ḇarḇor ya kuker ḇaḇye ya’ pdef. (Rm. 12:21) Fafisu sembroḇ ko, nari kakmamun ḇa raris Daud myun Goliat i. Mboi kokafyo ḇarḇor ya kuker kofnoḇek snonggaku sya fa sfarkor Refo ma sifawi Yahwe I. Kofrur na kuker kofasnai ro Refo kankarem faro snonggaku sya fakfuken sena, koḇesyowi snonggaku ḇefrur pyum ko ḇa sya, ma kofrur roi ḇepyum faro snonggaku syakam, mbroḇ koḇesya kako.​—Mat. 5:44; 1 Ptr. 3:15-17.

16-17. Rosai Paulus ḇyefnder na ḇa?

¹⁶ Rofyor Manwawan Paulus ḇye manfamyan faro Yesus ḇaim, iwayam kaku snonggaku ḇeso Yesus i sya. (Kis. 7:58; 1 Tim. 1:13) Yesus manggundi iso ḇedwarek Paulus i. Fafisu ḇyewayam kaker snonggaku Kristen anya, sifawi i ḇe Saulus. Yesus dawos ro nanggi mumfes ḇe Paulus i ma ifrur i fa myam ḇa. Mura, fandun fa dor fafnoḇek ro snonggaku randak ya ḇyewayam ani insama myam kaḇer. Paulus fyasnai sne ḇerun fyor Yesus manfamyan ḇyedi oso snori Ananias, ifnoḇek i fa myam kaḇer.​—Kis. 9:3-9, 17, 18.

¹⁷ Ḇarpur mura, Paulus dakḇe snonggaku Kristen ma sifawi pyum i. Mboi, ḇyefnder ḇa farkarkor Yesus ḇyuk ḇe i ro nyan ḇeraḇe Damaskus anya. Paulus fyasnai sne ḇerun pdef, ma imarisen  kaku naek srar ḇyesi sifnoḇek i. Doḇe siso ḇeḇuk sneprei maro i.​—Kol. 4:10, 11.

18. Rosai ḇefnai fa fafisu ono ido komewer naek srar sya sifnoḇek ko?

¹⁸ Rosai kofarkor ro Paulus i? Rofyor kaksun randak fa koryur warpu Yahwe kawasa Ḇyesi, na komarisen kaku ḇesesya sifnoḇek ko snar kofawi fandun fa kofarkor nabor wer. (1 Kor. 3:1, 2) Ḇape kirine rariso? Kofarmyan ḇe Yahwe fyoro kwar ma kokir ro fararmyan ya ido, imbude na komewer ḇesesya sifnoḇek ko wer. Ḇesyadi wer, fyor kofawi oso imbe ifnoḇek ko ima insape fyawi babo kakaku ya. Imbape, fyorno ido Yahwe syambraḇser ko roro naek srar sya. (Rm. 1:11, 12) Inja, imbe kosmai papoik ro Yahwe ido, komarisen kaku naek srar sya sifnoḇek ko.

19. Rosai ḇefrur fa Paulus i syambraḇ fa ifrur roi ḇepyum nabor?

¹⁹ Fafisu Paulus dakḇe snonggaku Kristen kwar, ifrur roi ḇepyum. Kukro? Ifawi bon ḇepyum snonggaku oso ismai na ndramuma ro baken ḇesambraḇ, farkarkor, ḇaido nana arasai ḇyena ḇa. Mboi snar fyasnai sne ḇerun ma ikyar faro Yahwe papoik Ḇyena. Iḇye kada kakfrur raris Paulus i fa (1) kokyar faro Yahwe I, (2) kofarkor ro fawar snonggaku sfas ro Refo, ma (3) komarisen naek srar sya sifnoḇek ko. Rarirya, fyor koḇaḇir koryar ḇa yo, Yahwe nari ifrur fa kosambraḇ kaku!