Awin kyapar aya ro taun 1954 ro St. Paul, Minnesota, Amerika Serikat. Kina nggoḇedi sro agama Katolik Roma. Nana nggoḇena nasrow faro kenem nggoḇena ras ḇe ras. Nggoḇe rim, mboi aya iso roma eḇe suru. Yaksun ro SD Katolik, ma yakfararur ḇe putra altar. Ayama yakna fawawi ro Refo manggun ḇa. Yakyar roi nakam naisya kukro Manseren iso ḇefrur na, mboi yakyar faro gereja ḇaḇeri.

Insape yakḇe kuliah ro ḇar hukum ro moḇ sor ḇe William Mitchell College of Law swaf taun rioser, imbeswa Saksi surama susrow aya ro rum. Mboi, ras anya yapapap sansun kaker, inja suyawos myaren ḇo suyoḇe na surama wer ro ras ḇese. Fafisu surama, yafukenḇair fakfuken risuru yoḇ su: ”Rosai ḇefnai fa snonggaku ḇefrur pyum sya sekandera syadi ro ḇeḇarḇor sya?” ma ”Rosai na kofrur kaku insama kenem koḇena naser marisen?” Mura, suḇuk syap Kebenaran yang Membimbing kepada Hidup yang Kekal ma Kitab Suci Terjemahan Dunia Baru  ḇerumek ḇesnai pyum. Yamarisen fa yakfarkor Refo kukro nafrur fa yafawi pyum kakaku. Yamarisen kaku fafisu yafawi Karajan Allah iso pamarenta nari ḇepoik faro supswan ine ḇesiper. Manggundaya yamam pamarenta snonggaku dun bon oḇaḇeri ma nafnai monda samswen, roi ḇenapes ḇa, ma kandera.

Yaḇuk kenem yena ḇe Yahwe I ro randak taun 1982, yaḇebaptis ro Munara Kebaktian ”Kebenaran Kerajaan” sifrur ro aidoram oso ro St. Paul. Minggu ḇerama ya, yakaḇer wer ḇe aidoram ine fa yaso ujian fa yakḇe pengacara. Ro randak paik Oktober, yarower soḇe yaḇe lulus. Inja, bisa yafararur ḇeri ḇe pengacara.

Ro munara ”Kebenaran Kerajaan” ine, yasrow kuker Naek Mike Richardson. Ima dakfararur ro Betel ḇero Brooklyn. Ikofen yoḇ aya ḇo doḇe sifrur ḇar hukum ro kantor pusat kwar. Yaswarepen snon Etiopia roi ikofen ro Farfyar 8:36. Mura yakara, ’Rosai ḇedwarek aya fa yor insama yakfararur ro Ḇar Hukum yandi?’ Ḇarpur mura, yor fa yakfarmyan ro Betel.

Sinan ayesu sumarisen ḇa yakḇe Saksi Yahwe. Mansar ifuken aya ḇo doḇe fararur yasmai ro Betel na nafrur fa farkarkor ayena ro ḇar hukum napyum syadi ke roḇa. Yoḇe yafrur fararur ine kuker sne ḇesiper, sḇak aya ḇa. Mboi, yoḇe nari sḇuk kumpan kerno fa nfadwer monda pipi yasasyar kwar faro paik oser. Sḇuk kumpan ine faro snonggaku ḇefararur ro Betel sya.

Ḇarpur mura, yaksun fa yakfarmyan ro Betel Brooklyn, New York, ro taun 1984. Siwan aya fa yasun ro Ḇar Hukum. Farkarkor yasmai ro kankain karkara nafnoḇek aya fa yamam parkara ḇerandak oso ro Betel.

Ro paik November 1983, organisasi kyowes Stanley Theater ro Jersey City, New Jersey. Inja, ḇar naek sya sor ijin ḇe pamarenta fa sifrur mnis kaḇer listrik ma moḇ war na nafrar ro aidoram ani. Fafisu sra sisrow kuker ḇeḇarara ro moḇ ani, soḇe imbe sepake Stanley Theater fa sifrur munara kebaktian Saksi-Saksi Yahwe. Imboi, pamarenta ḇero moḇ anya soḇe aidoram faro ari nama sifrur na fanam ro kawasa sya rum-rum sena monda. Aidoram Stanley Theater kyain ro moḇ sfarḇaḇyan, inja ḇeḇarara ro moḇ  ine simewer sḇuk ijin. Inja ḇar naek sine sek banding, mboi spampum na.

Mura, organisasi dun parkara ine ḇe kankain karkara. Fafisu anya, insape yaksun randak ro Betel. Yasun ro Betel ine ḇaim, yafararur kwar ro swaf taun risuru ro kankain karkara ro St. Paul, Minnesota, inja yafawi kwar yamam parkara ḇeradine. Pengacara koḇedi oso doḇe Stanley Theater ima sepake na ker fa sikfrur munara-munara ḇeba, raris sfasnai felem ma konser musik. Inja rosai ḇefnai fa simewer koḇepake na fa kofrur ari? Kankain karkara smam parkara ine raposa, soḇe Jersey City sifrur sasar kukro sidwarek samsyom koḇena. Kankain karkara siwan fa kota ani sḇuk ijin. Fafisu yamam roi ine, yafawi Yahwe ḇyebarakas sasewar ro organisasi fa koḇuk samambraḇ ro ḇar hukum fa kofnoḇek fararur Karajan ya. Yakofen kasumasa kukro yakna swaf fa yakfnoḇek.

Ḇarpur mura, fararur ḇeba naisya. Taun rioser ḇaim, sifrur wisuda ro Sekolah Gilead kelas ḇe 79 ro Balai Kebaktian Jersey City ro tanggal 8 September 1985. Yamarisen kaku kukro yaksmai syowi ḇeba fa yakfnoḇek ro ḇar hukum ine faro fandun Karajan. Yasmai marasrisen syadi ro fararur ayena ḇe pengacara rofyor yasun ro Betel ḇaim. Mura, Yahwe ḇye aya fa yafnoḇek ro parkara ḇese wer.

Ro taun 1980 ḇebo, dokter ma ḇesesya simewer srower Saksi Yahwe ḇeba sya fararyor sena ḇekur rik na. Ḇesamswen syadi wer iso faro bin ḇefadores sya. Mankara sia soḇe bin ḇefadores sna roi oḇa fa spampum rik na. Soḇe bin oso imewer sisun rik ḇe baken ḇyena ido, nari imarbur kapira ḇyedi ḇo kapira ani iba ro snari ḇa.

Ro tanggal 29 paik Desember 1988, Srar Denise Nicoleau rik ḇyena nsasyar ker rofyor kyapar kapira ḇyedi kwar. Hemoglobin ḇyeja dado ḇe 5 ḇe sop, inja dokter iwan i fa sisun rik ḇe baken ḇyena. Mboi, Srar Nicoleau imewer. Meser arwo ya, ḇefararur ro rumḇeduf sor ijin ro kankain karkara fa sisun rik ḇe Srar Nicoleau baken ḇyena. Mankara ani myam ḇaim parkara anya, ikofen ḇaim yoḇ Srar Nicoleau ḇaido swari ḇo ḇyuk ijin kwar.

Srar Nicoleau swari ma kina ḇyesi sia soḇe simewer kaku. Mboi ro ras Jumat, tanggal 30 paik Desember, ḇefararur ro rumḇeduf sisun rik ḇe Srar Nicoleau baken ḇyena. Roḇ anya, polisi sya srama sfor Srar Nicoleau kina ḇyesi ḇeḇeso ma penatua ḇerama ḇeyoreswarek i ro rumḇeduf. Ras Sabtu, meser arwo ya, media ḇebor ḇero  New York City ma Long Island sikofenḇair farfor ine.

Ras Senin arwo ya, yara yasrow mankara oso ḇefararur ro kankain karkara ḇekaki syadi ḇenir ḇe Milton Mollen. Yoḇe mankara sya sḇuk ijin fa dokter sya sisun rik ḇe imbesrar koḇani baken ḇyena mboi sifuken pyum resari ḇaime. Mankara ani dor fa yara yasrow i wer ro mandira insa kuyawos parkara ine ma hukum ḇyena. Pengawas ayedi, Naek Philip Brumley, iwarpu aya ḇo nura nusrow Mansar Mollen i. Dor pengacara ro rumḇeduf sya fa sakso ro awawos ine. Fyoro ḇa mura, awawos nggoḇenane nasam. Nggawos kaker ḇo Naek Brumley fyas fasfas kermgun ma isu na yoḇ aya ḇo doḇe yaknon faḇye monda. Swarapepen ḇyenane nasrow kaku kukro ro swaf anya, yawos kaku fa yafasnai pengacara ro rumḇeduf ansya sisasar bos.

Oras oser mura, Mansar Mollen doḇe parkara ine iso ḇerandak kaku inja nari smam na wer ro meser arwo ya. Nuḇe numbran nubur, Mansar Mollen doḇe pengacara ansya sna ”fararur ḇemarḇak kaku ro meser”. Yafawi ḇeri meser ine nari siḇor famfnom. Fafisu anya, yakara Yahwe isya ḇye aya fa yakyar syadi meser na nggoiso ḇekaku. Yahwe kyinfir inggo fa nggofrur marisen Ḇyena ndarirya. Inema roi ḇepyum kaku dam.

Nggofararur isof ro romfaḇru fa nggofasos rosai na imbe nggawos ro meser ya. Meser arwo ya, ḇefararur ro ḇar hukum nggobor nggombran ḇe kankain karkara kukro moḇ anya kyain fanam ro Betel Brooklyn. Fafisu mankara sya srower inggo, sun wos oser ḇo soḇe ḇeḇuk ijin ansya sisasar. Inja, kankain karkara ḇekaki ine sun wos snemuk ḇeyun payamyum faro imbesrar Nicoleau i. Soḇe mansei ḇerower ḇaim snonggaku ḇeduf oso roi dawos na ḇo sun wos snemuk ḇepon kwar, ima roi ḇesasar kaku kukro roi ine sor ḇe pelanggaran hak asasi manusia nairi.

Fyoro ḇa mura, kankain karkara ḇekaki syadi ro New York sun wos snemuk ḇo soḇe Srar Nicoleau nya hak fa pyampum rik na. Yakso wer fa yafnoḇek parkara rikyor ḇese ḇeradine, ma parkara ine dun bon ḇepyum ro kankain karkara ḇekaki ro Amerika  Serikat. (Mam ” Sismai Bon Ḇepyum ro Kankain Karkara Ḇekaki.”) Yafararur kayam kuker pengacara-pengacara ḇese wer ro Betel fa nggomam parkara ḇekur ḇe mansei ḇefaduru romawa sya, sfaspar farḇakḇuk sena, nana saprop ma ḇena ḇaḇawes.

Randak yasrow kuker swa yedi, Dawn, ima ḇye kabom ma nya romawa rikyor kwar. Isasewar faro manggundi ma romawa ḇyeskoya ma dakḇe perintis. Kenem ḇyena napyan ḇa, yamarisen yamam syewar kaku fa ifarmyan pdef ḇe Yahwe I. Ro taun 1992, nggoso munara Kebaktian Distrik ”Para Pembawa Terang” ro New York City, ma yakofen yoḇ i ḇo yoḇe imbe yafawi i wer. Taun oser mura, nufarḇuk. Isewar ḇepon Yahwe I ma ifarfnak pyum kaku. Yamam ima roi ḇepyum Yahwe ḇyuk ḇe aya diri. Ro marandan farḇakḇuk nuḇena, Dawn ifrur fa kayamyam nuḇena naser marisen.​—Ams. 31:12.

Fafisu nufarḇuk anya, Dawn romawa ḇyeskoya umur sena taun ri 11, 13, ma 16. Yamarisen smam aya ḇe kma ḇefrur pyum si, inja yawasya ma yasewar fa yaso anun ro syap-syap koḇena ḇekur ḇe roi sor ḇe orang tua tiri. Swaf ono nggosmai samswen ḇae. Mboi, yamarisen kukro Dawn romawa ḇyeskoya smam aya ḇe bati ma kma ḇefrur pyum si. Bati skoḇesi srama ḇe rum fa sifnak kuker si ro swaf risai monda. Nggomarisen kukro roma inai babo ḇena raryaḇ sya srama sifnak kuker inggo.

Ro taun 2013, Dawn nura nuḇarek wer ro Wisconsin fa nufaduru Sinan nuḇesya kukro sesinan syadi kwar. Mboi, bisa yafnoḇek kaker ro Betel. Sor aya fa yakfnoḇek ḇe sukarelawan sementara ma yafnoḇek ker organisasi ro ḇar hukum.

Ro paik September 2018, sasuri ḇye arpyarek ker. Yaraḇe dokter kwar mboi dakfawi dafduf ine ḇa. Mura, dokter oso ḇese doḇe yara yasrow dokter saraf. Ro paik Januari 2019, ḇekir ro saraf ani doḇe rya yasmai dafduf ḇebabo sor ḇe progressive supranuclear palsy (PSP). Dafduf ine nari nakyaren kenem ayena.

Ras rikyor mura, yaḇe olahraga, kurḇei yasapi ḇo ḇramin ayeja ikfis. Yaḇe olahraga ine rofyor yabaḇa mgun kwar. Inja, yafawi dafduf ḇekur aya ine na nakyaren samambraḇ ayena kwar. Yakara ḇaḇeri na dafduf ine imbran fasaw radine. Ras ḇe ras, samswen fa yawose, yambran, yan ma yinem.

Yamarisen kaku kukro bisa yakfararur ḇe pengacara fa yafnoḇek Yahwe organisasi Ḇyedi. Yamarisen kako kukro yakfas roi nabor ḇero syap-syap faro dokter, mankara, ma pengacara sya. Yana swaf nabor fa yawos ro seminar sifrur ro supswan ine ḇesiper. Ro sarawrow anya, yawoswarek Yahwe kawasa Ḇyesi fa skinfir nyan dokter smam si ḇaido se-operasi kuker rik ḇa. Mboi, bisa yakofen wos ro Lukas 17:10 kako: ’Aya ine manfyan ḇeḇe fainda ḇa; ma yafrur roi ḇefandun fa yafrur nairi.’