Yahwe imarisen snon ma bin ḇefarḇuk suya suna aski ma suḇekayamyam isof fyoro. (Mat. 19:4-6) Imbe wakfarḇuk ido, moḇsa na wakna swa ḇepyum rai? Snar Yahwe iso Manbefrur koḇani, Ifawi rosai na ḇefnoḇek snon ma bin bena kabrai saswar ma ḇefarḇuk kwar sya. Eḇedari, wasouser farkankin ro Yahwe ido, nari wasmai aski kaku. Mamuser farkakin ḇeḇeso naine.

Ḇepon ya, koswarepen kaku roi anine. ”Sne ya dankarkar syadi ro rosai monda ma idafdif.” (Yer. 17:9) Rofyor snon ma bin nari ḇefarḇuk susrow su ma suḇepacaran ya, na napyan fa suso marisen ro sne suḇena monda. Roi ine ḇyejadi ido, nari samswen ḇe su fa suyun snemuk ḇekaku na. Ma imbe sufarḇuk snar roi ḇero susnesna monda ido, nari muniwara suḇesanekar roḇaido sufafko. (Ams. 28:26) Iso ḇefnai fa snon ma bin susya suḇepacaran ido iḇye kada sumambir pyum yae su ari fyor sukofen ḇaim sne marisen ḇaido anun suḇena.

Amsal 22:3 doḇe, ”Snonkaku ḇefawinanem ḇemam roi ḇeyun marmar iyokef mankundi, ḇape snonkaku ḇena fawawi syadi ḇa imbran pdef ma nari ismai samamyai.” Inja, roi ḇeḇyeḇa rosai kosmai na fyor koḇepake situs cari jodoh ḇaido internet anine? Snonggaku ḇeḇeso smambir snonggaku ḇese ro Internet, mura sḇepacaran. Ḇape muniwara, sfafko snar snonggaku ani danggar monda. Osower ido, ono sisya simewer sikofenbadir manggunsi ma sanggar ḇesesya faro pipi monda. Inoido, snonggaku ansya sanggar ḇo soḇo sima Saksi Yahwe sirya.

Kwara pan roi ḇeḇyeḇa ḇesena wer. Situs ḇero internet ḇeḇeso sepake program komputer fa sbuki fasfesepen snon ma bin smam na ḇesrow ya. Ḇape, bukti noḇa ro program komputer ḇerariya na kokyar na. Iḇye kada kokyar awer faro program komputer snonggaku sifrur na fa ḇefnoḇek kun snemuk ḇefandun raris kofrur snemuk fa kosewar kabrai saswar koḇena. Farkankin Refo napyum syadiburo program komputer ḇerarirya na.​—Ams. 1:7; 3:5-7.

Farkankin Refo ḇero Amsal 14:15 doḇe, ”Snonkaku ḇefawi royoḇa ikyar famfnom faro wos nakam, mboi snonkaku  ḇefawinanem na kyara pyum wewur ḇyena kam.” Rofyor wun snemuk ḇaim snonggaku oso bisa ḇyeswa ḇepyum faro Au, fandun fa mambir pyum i resanari. Ḇape, roi ani nari syamswen fyor wafrur na ro Internet. Bisa komam yae informasi koḇena oser-oser na ma kofarfyar ker kuker snonggaku ani roro internet rariryano, nane nfasnaiḇair ḇa snar komambir pyum i kwar. Ono sisya sḇaḇir snar sisrow snon baido bin siswar kwar, fama skandor kaku fyor sisrow beri kuker snonggaku ani.

Manfasfas Mazmur doḇe, ”Yaḇebati kuker snonkaku ḇeankarkar sya ḇa, ma yaḇinkwanbur snonkaku ḇeyokef mankundi.” (Mz. 26:4) Snonggaku ḇebor sya sḇaḇir sasar oḇa fyor sfasepen informasi ḇekakuḇa ro profil sena soḇo insama napyum. Imbude simewer sfanai rari ḇeḇyeḇa senandi, ḇaido imbude rari sena neḇemambos fyor sfarem roi oso kuker ḇesesya. Snonggaku ḇeḇeso imbude sap si ḇe Saksi-Saksi Yahwe. Ḇape, sima snonggaku Kristen ḇebaptis kwar ke? Sima snonggaku ḇemas ro rur ya ke? Sḇebati fanam kuker Yahwe I ke? Sakna kenem ḇepyum ro sidang ke? Sima snonggaku Kristen befasnai rari ḇepyum ke, ḇaido sima bati ḇepyum ḇa? (1 Kor. 15:33; 2 Tim. 2:20, 21) Ma, sna ḇaḇemkei fa sfarḇuk imnis farkankin ḇero Refo ya ke? Fandun kaku mam mnis roi anna resari. Ma, ine nari napyan fa wafrur na fyor wasmai informasi ro min Kristen sya ḇefawi pyum snonggaku ani. (Ams. 15:22) Imbo ḇae, Yahwe manfamyan ḇesouser Ḇyedi oso na kyara fa fyarḇuk kuker snonggaku bena kakyar oser kuker i ḇa.​—2 Kor. 6:14; 1 Kor. 7:39.

Nasnai kwar, snar koḇepake situs cari jodoh ine nun ḇe roi ḇeḇyeḇa. Kakuya, nyan ḇese nasya ḇepyum syadi fa wabuki sewar snonggaku oso nari ḇe swa Bedi. Imnis raris, fafisu koryur kam kaker anya, bisa komambir pyum Saksi ḇesesya ro fananjur ya, munara sarawrow wilayah, sarawrow regional, ma munara ḇesena.

Ḇape fyor koryur kam wer ḇa, imnis ra fafisu kosmai dafduf virus corona anine, koso fananjur ari na kuker koḇepake video-conference. Ine swaf ḇepyum kako fa kokmambir Saksi ḇese ḇefarḇuk ḇaim sya. Bisa wamam i ro fananjur ya fyor ikofenḇair kakyar ḇyena roro kankarem ḇyena. (1 Tim. 6:11, 12) Bisa wakawos kuker i ro breakout room fyor fananjur ya imnai. Osower ido, rofyor mgoryur kayamyam roro online, bisa wafawi rari ḇekaku ro snonggaku wamarisen ya kuker mam moḇ dawos kuker snonggaku ḇesesya rai. (1 Ptr. 3:4) Fandun fa mambir pyum snonggaku ani resanari, insape bisa wafawi kaku cita-cita mubedi namnis ke roba ḇaido rari mubena nasrow ke roḇa.

Rofyor snonggaku ḇefarḇuk ḇaim ḇyepake farkankin Refo fa ḇyukifnoḇek i fa syewar snonggaku imbe fyarḇuk kuker i ido, imbude kakuya farḇakḇuk suḇena nun aski marisen. Ine namnis kuker wos Refo ḇekofen radine, ”Snonggaku ḇesmai binswa [ḇaido snonswa] ḇepyum ya ismai kwar roi oso ḇekakur, ma Yahwe iswar snonggaku ani.”​—Ams. 18:22.