Taun ḇarpur ya ido, kafkofenḇair faro kina Betel sya nasya. Sfandun sukarelawan ḇebabo fa sfarmyan ro cabang Afrika Selatan kukro mesin cetak ḇebabo nari nasya rodiwa. Inja yor fa yakḇedaftar, ma skinfir kako aya. Yamarisen fafayaḇa! Yemir monda ḇa, naek rikyor ro Betel Kanada skosya kako, isoine naek Ken Nordin, Bill McLellan, ma Dennis Leech. Sikofen ḇe inggo nari nggofarmyan fyoro ro Afrika selatan diwa!

Yaḇetelfon ḇeri awini ma yakofen nari yara ḇe Afrika Selatan. Awin ima bin ḇefasasis diri. Inja fyor yaḇetelfon anya, dawos kermgun monda. Mboi, yafawi Awin ima bin ḇeswar Yahwe diri, inja nari isaramper Aya. Yafawi Awin ma Kamam na suswar Aya kukro yara binggwane, ḇoi sudwarek aya fa yafarmyan rodiwa ḇa.

Nggora ḇe Afrika Selatan ḇaim, nggora ḇepon ḇe Betel Brooklyn. Rodiwa, sfarkor nggo paik rikyor fa nggofawi ngguf mesin cetak ḇeba na. Ramnai, nggek kapal kargo fa nggora ḇe Cape Town, Afrika Selatan. Fafisu ya, insape yaḇeumur taun ri 20. Nggora ro Cape Town kwar ramnai, ro mandira ya, nggek bus wer ḇe Johannesburg. Ine swaf ḇebinggwan kaku, ma ro arwo prim kaku, nggomnai fasaw ro kota kasun oso ro gurun pasir Karoo. Kota ani isam kaku ma fyafafen. Fyor nggomam mundi ro jendela, nggokandor kaku kukro nggakmam ḇaim moḇ ḇeradine. Inja nggomgak moḇsa nari nggofararur ya. Fafisu ngorama kaḇer ḇe kota ani wer, insape nggofawi kota ani moḇ ḇepyum diri ma snonggaku sya sifrur pyum kaku.

Ro taun riḇeḇeso, yafararur fa yuf mesin Linotype. Mesin ine ipyum ḇoi syamswen, sepake fa sikrir huruf-huruf ro majalah Sadarlah! ma Menara Pengawal nari imbe secetak na. Kantor cabang ro Afrika Selatan secetak majalah faro negara-negara ḇero Afrika. Nggomarisen kaku kukro mesin cetak nggun binggwan ḇe Afrika Selatan ine ḇyefainda kaku faro snonggaku ḇebor sya!

 Ḇarpur ido, yafarmyan ro kantor Percetakan. Rodiwa, fararur Yena nabore, imnis ra yakfnoḇek fararur ḇero percetakan, penerjemahan, ma faramrem publikasi. Roi yafrur na nabore, ḇoi yaḇeaski kaku.

Ro taun 1968, yafarbuk kuker srar perintis oso ḇenir Laura Bowen, byarek fanam ro Betel. Fyararur ḇe juru ketik ro Departemen Penerjemahan. Fafisu anya, ḇefarbuk babo sya sfarmyan ro Betel ḇa. Inja, senu fa nuḇe perintis istimewa. Imboi rya yaḇeḇirḇar kero. Taun risamfur ḇarpur fyor yafarmyan randak ro Betel, yasmai anan ma moḇ fa yabarek rona. Mboi, kirine nusmai penggantian ongkos ri 25 rand (indokada rupia ribu ri 500) ro paik oser. Bisa nusmai na rofyor nusmai jam, rarama kaḇer, ma syap na fa nasrow kada. Pipi anna, na nuḇepake fa nubak rum sewa, nukoḇes roḇean, ma trasnportasi, ramnai wer faro obat ma fandun ḇese nuḇena oser-oser.

Siwan nu fa nuraḇe raryur kasun ro kota Durban. Snonggaku India sibor kaku ro kota ani, kukro taun 1975, snonggaku India sino sibor srama ḇe Afrika Selatan fa sfararur ro yaf tebu. Imboi, kirine fararur sena nabore ma naḇesisye. Snonggaku India ḇebarek ro Afrirka Selatan suf budaya sena kaker ma roḇean sena kako, rupa ra roḇean sor ḇe kari ḇeyanggir. Si kako bisa sawos wos Inggris inja nupok nufarkor wos ḇebabo wer ḇa insa nubaryas ḇe si.

Fafisu ya, sor perintis istimewa sfarmyan indokada jam ri 150 ro paik oser. Inja, Laura ma aya nuyun snemuk fa nubaryas ras oser jam ri wonem. Cuaca ḇero dia isam ma ipnunek. Nuna snonggaku fa nurama kaḇer yoḇ si ḇaime ma ḇefarkor Refo sya kako, inja fandun fa nubaryas ro rum ḇe rum jam ri wonem. Nubaryas fyoro kaku ido, yamam jam tangan yedi. Yamam ido insape nubaryas menit ri 40 monda! Yakara, ’Moḇsa na nusmai jam dinas ḇesrow radia rai?’

Inja, nufarkor moḇsa nufrur fasasos faro manggun nu rai. Ras nakam nuyun anan ma kopi fa nrik nuro ḇaḇebaryas nuḇena. Fafisu numnaisu, nurir oto VW Kodok nuḇedi ro aifuar oso. Fyorno ido, romawa India ḇeḇeso sya srama ḇenu kukro skandor kif nuḇena nasnai ḇese ro si. Ras riḇeso ramnai, numarisen nubaryas rodine kwar. Ma nukara ido oras nambran fasaw kaku.

Numarisen nufawar kakaku ḇero Refo kuker snonggaku ḇero moḇ nubarek ine. Sifrur pyum, sfasnai syowi, simyaren seari ma sfasnai kasumasa. Snonggaku Hindu sibor simarisen faro roi nukefon na. Simarisen sfawi kuker Yahwe, Yesus, Refo, dunya babo, ma saneraro faro snonggaku ḇemar kwar sya. Nufarmyam taun oser posa, nuna ḇefarkor Refo ri 20. Ras nakam, nggofadadwer nggonan kayam kuker kina ḇefarkor Refo kuker nunsya. Numarisen kaku.

Fyoro ḇa ido, nusmai fararur ḇebabo fa nura nufarmyan ḇe pengawas wilayah. Nufarmyan ro moḇ yendisare Samudra Hindia. Inja minggu nakam, nuyenef ro kina oser rum sena, nufarmyan kayamyam kuker manbaryas sya, ma nusambraḇser naek srar ḇero diansya. Smam nuḇe karyer sesi. Numarisen kaku nusya kayam kuker si ma romawa sesi, numarisen nufnak kayam kuker rofanfan sesi kako. Nuḇaḇir ḇa, taun risuru nenande kwar. Fyoro wer ḇa ido, kantor cabang sor nu fa nukaḇer ḇe Betel. Mboi numarisen kaku nufarmyan ḇe perintis. Ḇape, numarisen fa nufarmyan ro moḇ sarirya monda.

Fyor nukaḇer ḇe betel, yafarmyan ro Bagian Dinas. Yamarisen yafarmyan kayam kuker naek srar ḇefyoro kwar sya. Fafisu ya, pengawas wilayah ryaḇe sidang oso ramnai kwar ido, na fyarem surat ḇeser laporan ḇekur sidang ani ḇe kantor cabang. Ramnai, Bagian Dinas nari sfarem surat oso ḇe sidang  ani. Fyorno ido laporan ro pengawas wilayah ansya sfas na ro wos Xhosa, Zulu, ḇaido wos ḇese ḇebor ro Afrika. Inja, sekretaris ḇero Bagian Dinas sya sfararur marḇak fa sefarwei laporan anna ḇe wos Inggris. Ramnai, fandun fa sfarwei surat nari sfarem ḇe Bagian Dinas ḇe sidang oso ro wos Inggris ḇe wos nari sepake ro sidang ani. Yaḇesyowi kaku ḇefararur ḇe sekretaris ansine. Ma snar si kako, yafawi kaku naek srar koḇesi ḇekif ḇepaisem sya samswen sena.

Fafisu anya, ro Afrika Selatan, sistem apartheid nasya kaker rodia. Snonggaku ḇero er ḇese sḇarek awer ro moḇ oser. Inja, snonggaku oso na ḇyebati kuker snonggaku ḇese ḇerama ro er ḇesesya. Naek srar koḇesi ḇekif ḇepaisem sya sawos, sbaryas, ma siso fananjur ari ro wos manggun sena.

Fafisu anya, yamambir naek srar ḇekif ḇepaisem sya sibor ḇa kukro yafarmyan ro sidang ḇeyawos wos Inggris. Ḇape baboine, yamambir nabor naek srar ḇekif ḇepaisem sya ma bisa yafarkor budaya ma adat sena. Sidif si fa siso tradisi ma kakyar ḇemnis kuker Refo ya ḇa, imnis ra ḇefesepen kuker ilmu gaib na. Sipampum nanja, karyer sesi ma snonggaku ḇebarek ro ris sesi sawos pampum si. Sismai roi ḇeradine raryano, simgak ḇa. Ḇese wer ido, snonggaku ḇekif ḇepaisem ḇebarek ro mnu sya sesabarar kaku. Ḇebor sya saksun ro rumfarkor ḇa. Ḇape, sesyowi kaku Refo ya.

Yasmai tugas fa yafnoḇek pyan kasus hukum ḇeḇeso ḇefesepen kuker kenetralan ma kebebasan beragama. Romawa Saksi sibor sisasyar si ro rumfarkor kukro simewer senadi kayam ma sidisen doya keagamaan. Kakyar yedi syambraḇ snar yamam sfasnai soasuser ma ḇaḇebri.

Ro Eswatini, negara kasun ro Afrika sap ḇe Swaziland fafisu iwara, naek srar fyor anya sismai roi ḇedwarek nabore. Fyor Raja Sobhuza II imar, snonggaku ḇero diwansya siwan si fa sakso ritual oso. Siwan snon sya kam fa sikapnik sibrusna, ma siwan ḇarbin sya fa skaruk pik sena fa naknampu. Sewayam ḇebor ro naek srar koḇesi kukro skurpum fa siso ritual ḇefesepen  kuker ḇaḇesamsyom faro sinan ḇepon anine. Soasuser sena faro Yahwe nafrur sneprei kaku nu. Naek srar ḇebor ro Afrika sya sfasnai conto ḇepyum ro ḇaḇefarmku ma soasuser ya.

Ro taun 1981, siwan kaḇer aya fa yafararur ro percetakan. Fafisu anya, percetakan ipyum syadi kwar. Seles oso ikofen ḇe kantor cabang fa secoba mesin phototypesetter ḇoi sbak ḇa. Nyan ine ifnoḇek fararur percetakan isamberen syadi. Inja, ḇarpur mura nggofadwer siw ro mesin Linotype kuker mesin phototypesetter ḇebabo ri rim. Inja, nggoḇe cetak publikasi nabor syadi wer.

Kukro kemajuan teknologi nasya, bisa nggoḇepake Sistem Penerbitan Elektronik Multibahasa (MEPS) fa nggorir huruf-huruf ro publikasi imbe secetak na. Nyan ine isamberen syadi ro mesin Linotype ma mesin cetak sepake fyor aya ma bati rikyor yedi nggorama babo ro Afrika Selatan anya. (Yes. 60:17) Fafisu serandak fa sepake MEPS ine, nggokame nggofarḇuk kwar kuker srar perintis ḇena wis ḇepyum kuker Yahwe I. Aya kuker Bill nufarmyan kaker ro Betel. Ken ma Dennis sukame suna romawa kwar.

Fafisu ya, fararur nabor nasya ro kantor cabang. Seterjemahkan ma secetak publikasi ro wos ḇebor syadi. Ma, na nggofarem na ḇe cabang-cabang ḇese. Inja, sfandun kompleks Betel ḇebabo ḇeba syadi wer. Iso ḇefnai fa naek sya sbawes babo kompleks Betel ḇefanam kuker Johannesburg. Ma ro 1987, setahbiskan kompleks Betel anine. Yamarisen kukro bisa yakfnoḇek ro sarsur ḇero Afrika Selatan ma yafarmyan taun ḇe taun ḇe Panitia Cabang rodiwa.

Ro 2001, nukandor kaku kukro nusmai roi oso. Sor aya fa yakfarmyan ḇe oser ro Panitia Cabang Amerika Serikat, serandak babo fafisu anya. Nuḇesneso kukro nubur bati nubesya ma fararur nuḇena ro Afrika Selatan. Ḇape, numander kaku imbe nufarmyan kayam kuker kina Betel Amerika Serikat sya.

Kaku ya, nuḇeḇirḇar kako kukro na nuḇarek binggwan ro Laura snari, ḇeḇebinsar kwar. Fyor nuḇarek ro New York, nufnoḇek nabor i ḇa. Mboi numarisen kukro Laura ḇedar rikyor ḇyesya skomarisen skomamwarek pyan snari. Skokofen, ”Na nggakfarmyan ro oras nakam ḇa. Mboi nggomamwarek pyan Awin ido, bisa nggosaramper mu fa mufarmyan pdef ro oras nakam.” Numarisen kaku fafnoḇek skoḇena.

Nukofen kasumasa kako faro eba yedi ma swari, ḇeḇarek ro Toronto, Kanada. Sumam faduru pyan awini, ḇeḇe kabom kwar. Awin ḇyarek kuker su taun ri 20 syadi isof ro awin ryoe fyoro ḇa fyor nuraḇe New York. Nukofen kasumasa kaku kukro kina nuḇesya sifrur fararwe fa smamwarek pyan sinan nggoḇesi, ma ine napyan ḇa!

Ro taun riḇeso ro Kantor Cabang Amerika Serikat, yakfarmyan ro bagian percetakan, ma kirine, yafarmyan ro Departemen Pembelian. Yamarisen kukro 20 taun ḇarpur ine, bisa yakfarmyan ro kantor cabang ḇeba kaku ine. Ro dine, indokada ḇero kina Betel sya se 5.000, ma indokada komuter ri 2.000 sisya!

Taun samfur ri wonen aniwara, yakyar ḇaḇeri bisa yasmai barakas nane kam. Swa yeja, Laura, isaramper ker aya kuker sne ḇesiper. Yasmai raryaḇ kaku ro kankenem yedi. Bisa nusmai fararur ḇeyun doryaḇ ma nufararur kayam kuker naek srar ḇeḇerohani nuḇesya, faro ḇefarmyan ro kantor cabang ḇese nura yoḇ sya kako. Kirine, umur yeja taun ri 80 syadi kwar, inja fararur yena nabor ḇa kukro naek ḇebabo sibor sisya ḇefrur pyan fararur anna.

Ḇefas Mazmur fyas ḇo doḇo, ”Aski faro kawasa ḇena Yahwe ḇe Allah sedi.” (Mz. 33:12) Manggundaya yaḇaḇir wos anya kyaku. Yamarisen kaku yakfarmyan Yahwe fnoḇek kawasa ḇeḇeaski Ḇyesi.