KOKENEM ro dunya ḇefo kuker kandera, inja na samswen ḇe ko fa kosmai aski. Fyorno ido koḇaḇir kosmai aski kwar, ḇape nakain fyoro ḇa. Rosai Refo ikofen na nafnoḇek ko fa kosmai aski ḇekaku ma ḇekain fyoro ya ke? Ma rosai na kofrur insama snonkaku ḇesesya saksmai aski ya?

Insama kosmai aski ḇekaku ya, fandun fa koḇaḇir kosmai kananon ma fadadiren. Fandun fa kona bati ḇepyum, ma iḇye syadi ya, fandun fa kofanam faro Allah. Moḇsa na kosmaina rai?

Yahwe sasoser ma wos farkin Ḇyena nun fainda faro ko ḇesya kwar. Kosouser na ido, ima kokyar faro Yahwe ma komarisen kosmai aski snar koḇebati kuker I. (Yeremia 17:7, 8; Yakobus 2:22, 23) Rarirya ido, Yahwe na fyanam ḇe ko ma ḇyuk aski ro swaruser koḇena. Yesaya 32:17 doḇe, ”Fainda ro napnapes ḇekaku iso ḇaḇeaski, ma bon ro napnapes ḇekaku iso payamyum ma kananon ḇekain fyoro.” Na kosmai aski ḇekaku rofyor kosouser Yahwe I kuker kosnesna nasiper.​—Yesaya 48:​18, 19.

Yahwe ḇyuk kako roi ḇepyum kaku ḇe ko ḇefnoḇek ko fa kosmai aski ḇekain fyoro. Ine iso rur ḇesren Ḇyedi.​—Farfyar 9:31.

Manwawan Paulus doḇe aski iso ’rurya bon ḇyenari’. (Galatia 5:22, 23) Snar aski ryama ro Allah rur ḇesren Ḇyedi, inja insama kosmai aski ido, fandun fa koso farkankin ro rur ḇesren Ḇyedi. Moḇsa kofrurna rai?

Ḇepon ya, fandun fa kowasya Refo ras ḇe ras. (Mazmur 1:2, 3) Rofyor kokarauser rosai kowasya na, rur ḇesren na ifnoḇek ko fa kofawi mnis Yahwe mamam Ḇyeja faro roi nakam. Imnis raris, na kofawi rariso Yahwe fyaduru aski Ḇyena ma rosai ḇefnai fa myam aski ine ḇe roi ḇefandun kaku. Rofyor kofrur raris rosai kofarkor kwar ro Refoya, nari kankenem koḇena neaski syadi.​—Amsal 3:1, 2.

Ḇesuru ya, fandun fa konadi kor Yahwe rur ḇesren Ḇyedi. (Lukas 11:13) Yahwe ikofen faro snonkaku ḇeyor fafnoḇek ro I sya, ”Saswar-ḇaḇye ro Allah, ḇesyadi ro kakara, nari nfaduru sne ma kakara mkoḇena snar Yesus Kristus.” (Filipi 4:6, 7) Kofanam faro Yahwe I pdef ma kokyar faro rur ḇesren Ḇyedi kada, nari ḇyuk ḇe ko aski ḇekaku ro swaruser koḇena.​—Roma 15:13.

Refoya ifnoḇek snonkaku sibor sya fa sfadwer kenem sena kwar, ma kirine sḇeaski fnoḇek Yahwe I, sna aski ro swaruser sena, ma sḇeaski kuker snonkaku ḇesesya. Moḇsa sifadwer kenem sena rai?

Naek srar ḇeḇeso koḇesya rofyor sḇe Saksi Yahwe ḇaim, sima srarmomen ma sḇarḇor kaku. Ḇape sḇensewar kaku fa sfadwer kenem sena, ma kirine sfasnai ḇaḇenaḇye syadi wer, sekaḇaḇaḇ, ma sḇeaski kuker snonkaku ḇesesya. * (Mam fasfas kasun ro sop.) (Amsal 29:22) Kokarapan rariso manbesrar ḇenir ḇe David ma imbesrar ḇenir ḇe Rachel sufrur fararwe ḇeḇeso ro kenem suḇena kwar.

Rofyor David ḇye Saksi Yahwe ḇaim, isasurem ker faro snonkaku ḇesesya ma dawos mnis kina ḇyesya ḇa. Ḇape, fyoro mura ifawi kaku fandun fa fyadwer kenem ḇyedi. Moḇsa ismai aski ya rai? David doḇe, ”Yaso mnis wos farkin ḇero Refo ro kenem ayena, ma fainda ya iso yaḇesyowi kina ayesi.”

 Snonkaku ḇero moḇ Rachel iba roro ya sawyae kenem ḇyeja. Doḇe, ”Isof ro kirine, yaḇensewar kaker fa yasawen masasor ayena snaro yaba ro kina ḇemasasor fasawsaw.” Rosai ḇefnoḇek Rachel i fa ismai aski ya? Doḇe, ”Yaḇenadi ḇe Yahwe I ḇesya kwar.”

David ma Rachel suma fawar risuru monda ro snonkaku ḇesmai aski snar siso wos farkin ro Refo ma sikyar faro rur ḇesren ya. Kokenem ro dunya ḇerarmomen, ḇape na kona aski ro swaruser koḇena. Ine nafnoḇek ko fa kokain pyum kuker kina koḇesya ma naek srar ḇero sidang. Ḇape, Yahwe ikofen ḇe ko fa ’kokenem kuker aski faro snonkakusya kam’. (Roma 12:18) Na jadi fa kofrur roi anna ke? Ma rosai ḇefnai fa kosewar kaku insa koḇeaski kuker snonkaku ḇesesya?

Ro ḇaḇeḇaryas koḇena, koḇaryas ankinem Karajan Allah ḇeyun aski faro snonkaku sya. (Yesaya 9:6, 7; Matius 24:14) Snonkaku ḇebor simarisen sakrower ankinem ine. Fainda ya, sismai sneprei ma sfafayaf werḇa faro rosai ḇeḇejadi ro dunya ine. Kirine sismai saneraro ḇekaku faro fafisu iyama, inja simarisen ’sisewar ḇaḇeaski’ ya.​—Mazmur 34:14.

Ḇape, fyorno ido ro randak koḇaryas yoḇ snonkaku sya, sino sisya simewer srower ankinem kun anya. (Yohanes 3:19) Inja, snonkaku sya srower ke roḇa, Allah nari ḇyuk rur ḇesren Ḇyedi faro ko. Ine nafnoḇek ko fa koḇeaski ma kofasnai syowi pdef rofyor koḇaryas. Rarirya ido, koso mnis Yesus anun ḇyenane, ”Rofyor mkosun ro rum ono, mkokofen aroo faro si. Rofyor ḇena rum ya ḇyenaḇye, [aski] mkoḇena nkain faro si, ḇape roroḇaido [aski] ani kyaḇer faro mko.” (Matius 10:11-13) Inja, rosai monda snonkaku sya sikofen ḇaido sifrur yoḇ ko, rofyor kofaduru rari ine ido nari koḇeaski pdef. Ma koswarepen nari kona swaf kaker fa kofnoḇek snonkaku ansya ro swaf ḇesena.

Ko kako na koḇe snonkaku ḇeyun aski kuker kofasnai syowi rofyor kawos ḇe ḇeḇepoik sya, iba syadi wer rofyor sidwarek fararur koḇena. Imnis raris, ro sup oso ḇero Afrika, ḇena papoik sya simewer fa koḇawes Balai Karajan. Naek srar koḇesya rodiwa sifawi fandun fa sifrur samswen ine fa imnis kuker nyan ḇeyun aski. Siwan naek oso ro fafisu iwara fyarmyan ḇe misionaris ro sup ani insa rya fa isrow kuker Duta Besar ro London, Inggris. Ikofenḇair ḇe i snar Saksi Yahwe ḇero dia sya fararur sena nama fararur ḇeyun aski nairi.

Manbesrar ani doḇe, ”Rofyor yasrow kuker bin ḇefararur ḇe resepsionis, yamam moḇ syansun i nraya yafawi ḇeri ryamaker keret oso ma yafawi mnis yawos ro wos sena. Inja, yakofen aroo yoḇ i ro wos ḇyedi. Bin ani kyandor ma ifuken aya, ’Rwama ḇedine snar nwa fandun e?’ Kuker syowi yakofen faro i snar imbe yasrow kuker mansar Duta Besar ani. Mura ḇyetelfon i, fyoro ḇa Duta Besar ani syae fa isrow aya ma dakkofen aroo ḇe aya ro wos ḇero moḇ ya. Ryower mnis rofyor yakofenḇair ḇe i snar Saksi Yahwe fararur sena nama fararur ḇeyun aski nairi.”

Rofyor Duta Besar ani ryower manbesrar ani roi dawos anya, insape ifawi mnis kaku fararur koḇena ma myamfarfir ko werḇa. Fyoro ḇa mura, ḇepoik sya sfadwer snemuk sena ma sḇuk ijin ḇe Saksi Yahwe sya fa sḇawes Balai Karajan. Naek srar sya simarisen fafayaḇa! Inja, koḇesyowi snonkaku ḇesesya ido, ima koḇe snonkaku ḇeyun aski.

Baboine, Yahwe kawasa Ḇyesya sro firdaus rurya, isoine fafisu ḇefo kuker aski fa sisyom ḇe I. Ko oser-oser na kofaduru ḇaḇeaski ine kuker kosewar kaku fa kona aski ro kankenem mankun koḇena. Inja, kokyar Yahwe na ḇyuk kyaremso yoḇ ko. Ma ro dunya ḇebabo iyama, nari ḇyuk ḇe ko aski ḇekain fyoro.​—2 Petrus 3:13, 14.