Rehoboam kmari, Salomo i, ḇye raja ro Israel fafisu swaf taun ri 40. (1 Raja-Raja 11:42) Salomo imar kwar raposa, Rehoboam ibur Yerusalem ḇe Syikhem fa dakḇe raja. (2 Tawarikh 10:1) Snonkaku sya sifawi kmari snar fawawinanem ḇyena, inja na Rehoboam imkak fa fyadwer kmari ḇe raja ke? Fyoro ḇa rofyor ḇye raja kwar, Rehoboam ismai samswen ḇefasnaiḇair na dakfawinanem ke roḇa.

Kawasa Israel sya sekandera fafayaḇa, inja siwan snonkaku ḇeḇeso fa sikofenḇair ḇe Rehoboam i, ”Kmami ifrur fa nkokamar roi ḇemarḇak. Ḇape wafrur fa roi ḇemarḇak nkoḇena ma fararur marḇak kmami ḇyuk ḇe inko na insama nmanan syadi ido, nari nkofarmyan ḇe au.”​—2 Tawarikh 10:3, 4.

Na samswen ḇe Rehoboam i fa dun snemuk. Ḇyuk rosai kawasa sya sor na ido, nari mankundi, kina ḇyesya, ma snonkaku ḇeḇarek ro istana syakam sismai payamyum werḇa raris sismai ro randak anya. Ḇape, imewer iso rosai sor na ido, nari sembroḇ i. Inja rosai ifrur ya? Ifuken ḇepon ḇe manfarkin ḇeḇesinan kwar ro randak ḇefnoḇek kmari ansya. Sikofenḇair ḇe i fa ifrur imnis rosai kawasa sya sor na. Ḇape, Rehoboam ifuken wer ḇe bati ḇyesya ḇena umur ḇemnis kuker i ma dun snemuk fa ifrur pyum kawasa sya ḇaḇeri. Ikofenḇair ḇe si, ”Nari yaḇuk ḇe mko kamnam ḇemarḇak syadi wer ma yaḇuk na fa nabor wer. Kma yedi iprer mko kuker ayos monda, mboi ayama nari yaprer mko kuker ayos ḇeborek.”​—2 Tawarikh 10:6-14.

Farkarkor rosai kun ro roi nane? Baboine, naek srar ḇesinan kwar ma ḇefarmyan kawan kwar ḇe Yahwe I sisya sibor rofandu ko. Na sifnoḇek ko fa kofrur snemuk ḇepyum. Inja, fandun fa korower wos anun sena.​—Ayub 12:12.

Mura, Rehoboam iryur sordade ḇyesya fa sra smun kawasa ḇembroḇ ansya. Ḇape, Yahwe iwan  nabi Syemaya i fa ikofenḇadir ḇe i, ”Mkora mkomamun awer kuker kawasa Israel naek mkoḇesi. Fandun fa mkobur ḇe rum mkoḇena oser-oser, snar Aya iso ḇefrur roi nane kam fa ndarirya.”​—1 Raja-Raja 12:21-24. *​—Mam fasfas kasun ro sop.

Napyan ḇe Rehoboam i fa isouser faro Yahwe I ke? Ikofen kwar nari iprer si kuker ”ayos ḇeborek”. Inja rofyor myam monda ḇaḇembroḇ sena ido, rosai nari kawasa ansi skara faro raja ḇebabo sedine? (Mam kako 2 Tawarikh 13:7.) Fama, fyandun faro kakara sena ḇa. Raja ma sordade ḇyesya ”sisouser Yahwe I ma skaḇer, raris rosai Yahwe ikofen na.

Farkarkor rosai kun ro na? Fandun fa kosouser faro Allah, iba syadi wer rofyor roi anna kofrur na ido nari skoryae ko. Allah nari ḇyebarakas ko ḇesya kwar rofyor kosouser I.​—Ulangan 28:2.

Allah ḇyebarakas Rehoboam i snar isouser faro I ke? Imbo. Ḇye raja pdef faro keret Yehuda ma Benyamin, ma karajan ḇyedi syambraḇ syadi wer. Ḇyawes kota-kota ḇebabo ro moḇ ḇyepoik ro na, ma ifrur kota ḇeḇeso sifrur kwar anna fa ”nako syadi wer”. (2 Tawarikh 11:5-12) Ḇefandun syadi ya iso, isouser Yahwe sasoser Ḇyena ro swaf ḇeḇeso. Snar karajan keret risamfur sisyom faro amfyanir, inja snonkaku ḇebor ḇeramaker karajan ani srama ḇe Yerusalem fa sifnoḇek Rehoboam ma sisyom ḇe Yahwe I. (2 Tawarikh 11:16, 17)

Rofyor Rehoboam karajan ḇyedi syambraḇ syadi kwar, ifrur roi ḇesnai ḇese. Isouser faro Yahwe sasoser Ḇyena werḇa ma daksyom allah ḇekaku ḇa sya! Rosai ḇefnai ya? Snari, bin Ammon anya, iso ḇeawninyan Rehoboam kakara ḇyena ke? (1 Raja-Raja 14:21) Kofawi mnis na ḇa. Ḇape, er Israel siso nyan ḇeḇyeḇa ḇyena. Inja, Yahwe myam monda Raja Syisyak ro Masir ikafyo kota ḇebor ḇero karajan Yehuda. Rehoboam ifrur kota ḇeḇeso fa nako kwar mboi jadi fa idwarek Syisyak i ḇa!​—1 Raja-Raja 14:22-24; 2 Tawarikh 12:1-4.

Fafisuya iḇyeḇa syadi rofyor Syisyak ma sordade ḇyesya srama fa smun Yerusalem, moḇ Rehoboam ḇyepoik ro ya. Ro fafisu ani, nabi Syemaya ikofenḇair Allah anun Ḇyena faro Rehoboam ma manfarkin Israel sya, ”Mkobur Aya kwar, inja yakbur mko ro Syisyak ḇrasi.” Rehoboam ryower wos anun ine ke roḇa? Imbo, ryower pyum na! Refoya doḇe, ”Raja ma manfarkin Israel sya sirun mankunsi ma soḇe, ’Yahwe ima inapes.’” Inja, Yahwe fyaspar Rehoboam i ma simkok Yerusalem ya ḇa.​—2 Tawarikh 12:5-7, 12.

Ramnai, Rehoboam ḇye raja pdef ro Yehuda. Rofyor imar ḇaim, ḇyuk sasuref nabor kaku ḇe roma snon ḇyesya. Imbude imarisen insama roma ḇyesine na sembroḇ faro ḇedar sedi Abiya i ḇa, iso nari ḇefadwer i ḇe raja. (2 Tawarikh 11:21-23) Rosai ifrur nane nfasnai fyawinanem kaku syadi ro fafisu ḇyabo kaker ya.

Rehoboam ifrur roi ḇepyum na kwar, ḇape Refo ikofen fafisu ḇyepoik ya, ”Rehoboam ifrur roi ḇeḇyeḇa na.” Rosai ḇefnai ya? Snaro ”dun wos snemuk ro sneri fa isewar Yahwe I ḇa”. Inja, Yahwe ḇyuk kyaremso faro i ḇa.​—2 Tawarikh 12:14.

Farkarkor rosai kun ro Rehoboam farfyar ḇyedine? Fyorno ido isouser Yahwe I ma ifrur roi ḇepyum faro Yahwe kawasa Ḇyesya. Ḇape, ḇyebati kuker Yahwe I ḇa, ma imarisen mankun ḇa fa ifrur Yahwe imarisen. Iso ḇefnai fa ifrur sasar ma daksyom allah ḇekaku ḇa sya. Imbude na kokara, ’Rehoboam ryower fyor Yahwe isonek i snar imbror kaku kwar ro sasar ḇyena ma imarisen ifrur Allah imarisen ke, snar snonkaku ḇesesya sidif i?’ (2 Tawarikh 11:3, 4; 12:6) Ḇarpur mura, ifrur roi ḇeḇyeḇa na wer. Ima iḇese ro kpuri, Raja Daud i. Fyorno ido, Daud ifrur sasar, ḇape fyafko ma imbror kaku ro sasar ḇyena. Ro kankenem ḇyedi ḇesiper, iswar kaku Yahwe I ma  isyom I kuker sne ḇesiper.​—1 Raja-Raja 14:8; Mazmur 51:1, 17; 63:1.

Kosmai farkarkor nabor ro farfyar ḇero Refo ine. Na koḇesyowi snonkaku ḇefamfom fandandun ro kina sesya ma sifrur roi ḇepyum faro snonkaku ḇesesya. Ḇape, insama kosmai kyaremso ro Yahwe I, fandun kaku fa kosyom I imnis kuker rosai imarisen na, ma koḇebati kuker I.

Inja, fandun fa kosambraḇser saswar koḇena faro Yahwe I. Raris for ya na isak pdef rofyor kosyun aimun na ker, rarirya kako saswar koḇena faro Yahwe I nari nsambraḇ syadi rofyor kofarkor Allah Wos Ḇyena ro ras ḇe ras, kokarauser na, koḇenadi ḇesya kwar. (Mazmur 1:2; Roma 12:12) Saswar anna nari nadif ko fa kofrur Yahwe imarisen. Nadif ko kako fa kombror kaku ro sasar koḇena. Na kopok komnis Rehoboam i ḇa, ḇape kosouser pdef fa kosyom faro Yahwe I.​—Yudas 20, 21.