FARKARKOR 24
Kosawen Nyan Kakara Ḇesampum Fawawi ro Allah!
”Koḇukikakok nyan kakara ḇesasar ma roi sairirya monda ḇesampampum fawawi ro Allah.”—2 KOR. 10:5, Terjemahan Dunia Baru [NW].
DOYA 124 Kosouser Pdef
ROI NA KOFARKOR *
1. Swarapepen rosai Manwawan Paulus ḇyuk ḇe snonkaku Kristen ḇesmai ramrem sya?
MANWAWAN PAULUS ḇyuk swarapepen ḇo doḇe, ”Mkoso awer nyan famfnom ro supswan ine.” (Rm. 12:2) Paulus wos ḇyenane nkur ḇe snonkaku Kristen ro abad randak sya. Rosai ḇefnai fa ḇyuk swarapepen anna ḇe snon ma bin ḇeyakfarmyan ḇe Allah ma ḇesmai ramrem rur ḇesren ya kwar?—Rm. 1:7.
2-3. (a) Rariso Setan syewar fa ifrur ko fa koḇinkwanbur Yahwe I rai? (b) Moḇsa kosawen roi ḇerares nako ḇemnis raris ”ayar mamun” ḇero swaruser koḇena rai?
2 Paulus imkakwarek snar kakara ḇeḇyeḇa ro dunya Setan nawyae snonkaku Kristen ḇeḇeso kwar. (Ef. 4:17-19) Roi ḇeradine bisa nkur ko kako. Setan, manḇepoik dunya ine, ḇyuk nyan ḇebor fa dawninyan ko insama kobinkwanbur Yahwe. Imnis raris, sasewar snonsnon ḇaido komarisen smam ko ḇe snonkaku ḇefandun kaku. Roi kofarkor ro rum, rumfakor, ḇaido snonkaku ḇero ris koḇedi, Setan ḇye nakako fa ḇyukininyan kakara koḇena infa namnis kakara ḇyena.
3 Na jadi fa kosawen roi ḇerares nako ḇemnis raris ”ayar mamun” ḇero swaruser koḇena ke? (2 Kor. 10:4) Komam kada Paulus kankarem ḇyena, ”Koḇukikakok nyan kakara ma roi sairirya monda ḇesampampum fawawi ro Allah. Nkofrur kakara nakam ro snonkaku sya fa nḇewomen infa sisouser faro Kristus.” (2 Kor. 10:5, NW) Imbo, kuker fafnoḇek ro Yahwe na kosambraḇ fa kofadwer kakara ḇesasar na. Imnis raris, fyor kan sasar roḇean ḇemamur ido, aryawin kinem na nasawen mamur ro ḇaken koḇedi. Rarirya kako, Allah wos Ḇyena nafnoḇek ko fa kopampum roi ḇeḇyeḇa ro dunya Setan.
”BUK [KAKARA BENA] FA ALLAH IFRUR BABO WER”
4. Ḇebor ro ko fararwe rosai fandun fa kofrur na fyor kofarkor randak kakaku ro Refo ya?
4 Waswarepen kaker ke fararwe rosai wafrur kaku na fyor farkor randak kakaku ro Refo ma kwinfir fa wafarmyan ḇe Yahwe I. Imbude ḇebor ro ko kofrur roi ḇeḇyeḇa ono wer ḇa. (1 Kor. 6:9-11) Kokofen kasumasa ḇe Yahwe snar ifnoḇek ko kwar fa kobur roi ḇesasar na!
5. Imnis Roma 12:2 ya, roi risuru rosai fandun fa kofrur ya?
5 Ḇape, kopok kokara awer fandun fa kofrur fararwe na werḇa. Fafisu koḇebaptis ḇaim kosewar fa komnai kofrur roi ḇesasar na. Mboi fandun kaker fa kopampum roi ḇefrowes ko fa kofrur sasar ani wer. Moḇsa kofrur na rai? Paulus kyarem, ”Mkoso awer nyan famfnom ro supswan ine. Naek buk [kakara bena] fa Allah ifrur fa babo wer, insa beḇesadwer.” (Rm. 12:2) Fandun fa kofrur roi risuru suine. Oser ya, fandun fa ’koso awer’, ḇaido dunya ine dawninyan awer ko. Ḇesuru ya, fandun fa kakara koḇena ’neḇeḇesadwer’.
6. Rosai kofarkor ro Yesus wos ḇyena neḇefas ro Matius 12:43-45?
6 Ḇaḇesadwer Paulus ikofen nane nama roi komam ro bandi monda ḇa. Ine kyur ḇe fararwei kofrur ro kankenem koḇena Matius 12:43-45. (Wasya.) Wos nane nḇuk farkarkor ḇefandun kaku ḇe ko: Kosawen kakara ḇesasar koḇena monda ḇa mboi fandun fa kofadwer na kuker Allah kakara Ḇyena.
nasiper. (Mam kotak ”Koḇefadwer Kaku Kwar ke Roḇa?”) Fandun fa kofrur fararwei beri ro kosnena, sneḇaḇir, ma marisen koḇena. Inja kokame fandun fa kofuken mankun ko, ’Fararwe yafrur na fa yaḇe snonkaku Kristen neḇemam ro bandi monda ke, ḇaido yaḇe snonkaku Kristen ḇekaku ro sne ma kakara yedi?’ Insama koḇefadwer beri, Yesus ikofenḇair rosai fandun fa kofrur ya. Yesus wos ḇyenane neḇefas ro”MKOSNEMNA MA KAKARA ḆEḆOR MKOḆENA NBABO KAM”
7. Na bisa fa kofadwer rari ḇeknam kaku ro kakara ma kosnesna ke?
7 Na bisa fa kofadwer rari ḇeknam kaku ro kakara ma kosnesna ke? Refo kyarem, ”Insama mkosnemna ma kakara ḇeḇor mkoḇena nbabo kam, inja mkokenem babo, imnis raris Allah ifrur kwar ma marisen ḇyedi isoine kankenem ḇenapes, ma ḇesren.” (Ef. 4:23, 24) Imboḇae, bisa kofadwer kosnesna ma kakara koḇena, mboi ine napyan ḇa. Snar inema kopampum marasrisen ḇesasar ma komnai kofrur roi ḇesasar na monda ḇa. Fandun fa kofadwer ’kakara ḇeḇor koḇena nbabo kam.’ Ine kyurfasnai kofadwer marisen, kakara koḇena, ma roi ḇefnai ko fa kofrur roi ono. Inema roi fandun fa kofrur na pdef.
8-9. Rariso farfyar ro manbesrar oso fyasnai fandun kaku fa kofrur fararwe ro kakara ma kosnesna?
8 Rwama kawos farfyar ro manbesrar oso ro randak iwara nya kenem ḇeḇyeḇa. Fyarandinem ma myamunmun kuker snonkaku ḇesesya. Ḇape, ifrur rarirya werḇa insape ḇyebaptis. Fararwe ifrur nane nḇuk kesaksian ḇepyum faro snonkaku ḇero moḇ ḇyarek ro na. Fyoro ḇa fafisu ḇyebaptis raposa, ro roḇ oso ismai roi ḇefrowespan kakyar ḇyedi. Snon ḇemser oso ryama ḇe rum ḇyedi ḇo dor i fa sumamunmun. Randak ya, manbesrar koḇanine imewerndi. Mura snon ḇemser ani kyoryae Yahwe snonsnon Ḇyedi, inja manbesrar anya imsor fafayaḇa. Syae ro rum ḇyedi ma kyuk i. Rosai ḇewar fa ifrur rarirya? Farkarkor Refo ifnoḇek i kwar isawen marasrisen faro mamunmun na. Mboi fyadwer kenem ḇeknam kaku ro kakara ma sneri ḇaime.
9 Imbape, manbesrar ine isusu ḇa. (Ams. 24:16) Kuker fafnoḇek ro penatua sya ifrur fararwe ḇepyum syadi. Ḇarpur ya isyus fa duf farmyan ḇe penatua. Ramnai, roḇ oso ro Balai Karajan bandi ya, ismai fafrowes ḇemnis daksmai kwar ro fafisu taun naiwara. Snon ḇemser oso kero myun penatua oso. Rosai manbesrar koḇanine ifrur ya? Fyasnai sne ḇerun ma dawos myaren ḇe snon ḇemser ani insama imasasor ḇa ma ifnoḇek i fa ibur ḇe rum ḇyedi. Rosai ḇefnai fa ifrur raris randak ya ḇa? Snaro fyadwer kakara ma sneri kwar. Ḇye snonkaku ḇeyun aski ma nya sne ḇerun kwar. Nane nun sanandik kaku faro Yahwe I!
10. Rosai fandun fa kofrur insama kofadwer kakara ma kosnesna?
10 Fararwe ḇeradirya na kofrur beri na ḇa, mboi kofandun sasewar ma oras. Imbude fandun fa ’koḇesewar kaku ḇeri’ ro swaf taun ḇe taun. (2 Ptr. 1:5) Fararwe kofrur na ndarirya ḇa snar kofarmyan ḇe Yahwe fyoro kwar. Fandun fa kosewar kaku beri fa kofrur fararwe ro kakara ma kosnesna. Roi ḇeḇeso naisya fandun fa kofrur na. Rwama kawos na.
NYAN KOFADWER SNE MA KAKARA KOḆENA
11. Rariso nadi na ifnoḇek ko fa kofrur fararwe ro kakara ma kosnesna?
11 Nyan ḇerandak ḇepon kaku ya iso koḇenadi. Fandun fa kakḇenadi raris manḇefas Mazmur ḇekofen, ”Wafrur kada sne yedi fa isren, sye Allah, ma rwir ro aya rur ḇebabo, ḇedworen.” (Mz. 51:10) Ipyum ya kofawi fandun fa kofrur fararwe ro kakara ma kosnesna ma kor Yahwe fa ifnoḇek ko. Rosai ḇefnai fa kokyar Yahwe na ifnoḇek ko? Yahwe asas Ḇyedi faro snonkaku Israel ḇena sne ḇepakrek ro fafisu Yehezkiel sya, syambraḇser ko. Doḇe, ”Nari yafrur sikame fa sḇeoser, ma yafrur si fa sna kenem ḇebabo . . . yaḇuk ḇe si sne ḇemayar [isoine, sne ḇemarisen ḇeso Allah farkankin Ḇyena].” (Yeh. 11:19; catatan kaki.) Yahwe imarisen ifnoḇek snonkaku Israel ansi fa sifrur fararwe ro kenem sena, ma imarisen dakfnoḇek ko kako.
12-13. (a) Imnis ḇefas ro Mazmur 119:59, rosai fandun fa kowasenkara na? (b) Fakfuken risai fandun fa wafuken ḇe mankundaw?
12 Nyan ḇesuru ḇefandun kaku iso kowasenkara. Fafisu kowasya pyum Refo ro ras ḇe ras, fandun fa kona swaf fa kowasenkara na, rarirya na kofawi kakara rosai fandun fa kofadwer na. (Wasya Mazmur 119:59; Ibr. 4:12; Yak. 1:25) Fandun fa kofawi kaku kakara dunya rosai ḇeawyae swaruser ma sne koḇena. Fandun fa kokofen kaku koma konapes ḇa ma kosewar kaku fa kosawen kenem ḇeḇyeḇa na.
13 Imnis raris, wafuken mankundaw: ’Ro sne yedi, yana sne dosam kermkun kaker ke?’ (1 Ptr. 2:1) ’Yakara yapyum syadi ro ḇesesya snar moḇ yarama ya, farkarkor, ḇaido nana arasai yasmanai ke?’ (Ams. 16:5) ’Yamamkyof snonkaku ḇesesya snar sakna raris aya ḇa ma sramaker moḇ ḇeḇese ke?’ (Yak. 2:2-4) ’Yamarisen roi dunya Setan ḇyuk na ke?’ (1 Yoh. 2:15-17) ’Yamarisen kaku yamamo hiburan ḇeḇyeḇa ma ḇefasnai mamunmun na ke?’ (Mz. 97:10; 101:3; Am. 5:15) Kankarem faro fakfuken nane na nfasnaibos, roi risai fandun fa wafrur fararwe. Kokakok ḇaido kopasbur kakara ḇesasar ḇemnis ”ayar mamun” ḇero swaruser koḇena ido, na kofrur Yahwe, Kma koḇedi ro nanki imarisen.—Mz. 19:14.
14. Rosai ḇefnai fandun fa kokinfir bati ḇepyum sya?
14 Nyan ḇese ḇefandun ya wer iso kokinfir bati ḇepyum. Koḇaḇir ke roḇa, bati kokinfir sya na sawyae kaku ko. (Ams. 13:20) Snonkaku ro ris koḇedi ḇero moḇ kofararur ma ro rumfarkor sya na sipok sifnoḇek ko ḇa fa kona Allah kakara Ḇyena. Ḇape, bati ḇepyum na kosrow si ro fananjur Kristen koḇedi. Ro diwa, na kodifyae ko fa ”kofrur roi ḇeḇye ma kofasna saswarya”.—Ibr. 10:24, 25.
IḆYE ”KAKYAR MKOḆENA NADWOREN SYADI”
15-16. Rosai Setan ifrur fa fyadwer nyan kakara koḇena?
15 Ḇape, koswarepen Setan syewar kaku fa fyadwer nyan kakara koḇena. Ḇye farkarkor ḇebor fa fyarkorninyan ko rawo kopampum roi ḇepyum ro Refo koser kwar ro swaruser koḇena anna.
16 Setan ifuken ker fakfuken ḇemnis raris ifuken ḇe Eva ro Yaf Eden, ’Kaku ke Kej. 3:1) Ro dunya Setan ḇyepoik ine, fyorno ido sifuken ko fakfuken ḇefrur fa kokorwanan faro roi kokyar ya. Imnis ra: ’Kaku ke Allah imewer faro farḇakḇuk sapsaper ya? Kaku ke Allah imewer wafrur ras ḇeba Natal ma ras ulang taun? Kaku ke Allah dor Au fa wasma awer transfusi rik ya? Kaku ke Allah ḇesaswar iwan Au fa ḇinkwanḇur snonkaku waswar sisae si ro sidang kwar sya?
Allah ikofen . . . ?’ (17. (a) Rosai fandun fa kofrur ya rofyor sifuken ko fakfuken ḇefnai fa kokorwanan kakyar koḇena? (b) Rosai bon kosmai na imnis ḇeyap ro Kolose 2:6, 7?
17 Fandun fa kosamḇrabser kakyar koḇena. Kosmai kankarem noḇa faro fakfuken ḇefandun kaku ḇekur kakyar koḇena ido, na nafnai fa kokorwanan roi kokyar nama nkaku ke roḇa. Ḇaḇaḇir ḇeradine na nawyae kakara ma nafrur fa kakyar koḇena nasambraḇ werḇa. Rarirya ido, rosai fandun fa kofrur ya? Refo dor ko fa kofadwer kakara koḇena insama na kofasnai ḇe mankunko ”rosai ḇeḇye ma ḇefrur sneprei Allah ma ḇemnis”. (Rm. 12:2) Kofarkor myaren ido, na kokyar kaku roi kofarkor ro Refo na nama nkaku. Ma na kokyar kaku Yahwe farkankin Ḇyena napnapes nairi. Rarirya, raris aiknam ḇerares nako, nari koḇerares nako snar ’kakyar koḇena nadworen syadi’.—Wasya Kolose 2:6, 7.
18. Rosai na ḇefnoḇek ko fa kosawen roi ḇeḇyeḇa ḇeramuma ro Setan dunya ḇyedi?
18 Mankunko iso na ḇefrur kakyar koḇena fa nadworen. Inja, wafrur pdef kakara ma sne Bena fa nbabo kam. Ḇenadi faswef. Wor ḇesya kwar fafnoḇek ro Yahwe rur Ḇyedi. Wawasenkara, ma mam mnis roi wakara ma roi ḇewarfa wafrur roi ono. Swewar bati ḇepyum sya, na ḇefnoḇek Au fa fadwer nyan kakara Bena. Wafrur rarirya ido, na wasawen roi ḇeḇyeḇa ḇeramuma ro Setan dunya ḇyedi ma wakadaunwarek Au ro ”nyan kakara ma roi sairirya monda ḇesampampum fawawi ro Allah”.—2 Kor. 10:5.
DOYA 50 Nadi Farsamsyom Ayena
^ par. 5 Kankenem koḇena ro fafisu iwara, moḇ korama ya, ma farkarkor kosmai na nari nawyae kakara koḇena fa napyum syadi ke naḇyeḇa syadi. Imbude kofawi roi ḇeḇyeḇa ono neknam kaku ro kakara ma kosnesna. Farkarkor ine na fyasnai ḇe ko moḇsa kosawen rari ma kakara ḇesasar koḇena rai.