Syap Ḇeniw Ḇekwar Oso ”Ḇyeḇebas” Kwar
Syap Ḇeniw Ein Gedi ḇeyarus kwar jadi fa siwasya na ḇa fyor sisrow i ro taun 1970. Ḇape teknologi baboine, scanner 3-D, fyasnaiḇair ḇe ko syap ḇeniw ani iser mnuk-mnuk ro syap Imamat, ma Allah snonsnon mankun Ḇyedi kako
RO 1970, arkeolog sya sisrow syap ḇeniw oso ḇyeḇekun rawo iruse. Sisrow i ro Ein Gedi, Israel, fanam ḇe Soren Ḇemar ḇar wambarek. Sisrow syap ḇeniw ani fafisu sḇai sinagoga oso ḇeḇerap kwar fyor sikun pres mnu anya, indokada abad ḇewonem Masehi. Syap ḇeniw anya irus fafayaḇa, inja jadi fa sḇas ma siwasya roi sfas ro dori na ḇa. Imbape, ipyum kaku snar teknologi baboine, isoine scanner 3-D, syap ḇeniw ani ”ḇyeḇebas” kwar. Kuker nyan ine bisa smamkir syap ḇeniw ḇeyarus ani ma bisa siwasya roi sfas ro dori na.
Rosai neḇefasnai ro roi sifrur nane? Syap ḇeniw anya ima fasfas Refo. Fasfas ḇesya kaker nama mnuk-mnuk ḇerandak ro syap Imamat. Mnuk anane nefasepen Tetragramaton, iso Allah snonsnon mankun Ḇyedi ro wos Ibrani. Syap ḇeniw ani ryamuma indokada rofandu taun 50 Masehi ma 400 Masehi. Rarirya ido, ine iso syap ḇeniw Refo Ibrani ḇekwar kaku sisrow ya, rofyor sisrow Syap Ḇeniw Soren Ḇemar (Qumran) ya kwar. Gil Zohar fyas ro The Jerusalem Post ryadine, ”Fyor syap ḇeniw Imamat ro Ein Gedi jadi fa sḇas ḇaido siwasya na ḇaime, indokada swaf taun ri 1.000 naisya ro ras sisrow Syap Ḇeniw Soren Ḇemar isof ro sisrow Kodeks Aleppo. Syap Ḇeniw Soren Ḇemar, ḇyeumur taun ri 2.000, ryamuma ro fafisu Bait Ḇesuru (indokada taun 100 M), Kodeks Aleppo ḇeḇefas ro abad ḇe 10 Masehi (taun 930 M).” Manḇefawinanem sya soḇe syap ḇeniw Ein Gedi ine fyasnai kaku fasfas Taurat ”neḇefadwer ḇaberi ro fafisu swaf taun risyaran, ma sasar manḇefas kaḇer sifrur na napok nafadwer roi ḇero do na ḇa”.