”Swaf oso, napirman ayedi imbe myun aya. Mura, yamk i ro sasukor ḇyeja ḇo imbe yamun i fa imar.”​—Paul.

”Ro rum, ayama yamsor fasawsaw kaku. Roi kasun monda nafnai fa yamsor. Yamsor ido, yamerdawdiwer robebor ḇekain fanam aya.”​—Marco.

Imbude na kakmnis ra snon ansuine ḇa. Mboi, kokam samswen fa kofasnai ḇaḇefarmku mankun. * Kukro? Roi ḇefnai kaku ya iso kokam kosmai sasar ro sinan ḇepon koḇedi, Adam i. (Rm. 5:12) Sia simnis ra Paul ma Marco su. Samswen kaku fa simkuepen si. Sia wer samswen fa sfara kakara sena. Imnis ra, skara monda ker roi ḇefnai si fa simgak ma sesanekar. Sia wer simku si ḇa ro marasrisen fararur farḇuk, farandinem swan, ḇaido san aryawin ḇepyum ḇa na.

Kofara pyum kakara koḇena ḇa, marisen, ma rosai kofrur na ido, nari kosmai roi ḇepyum ḇa. Mboi, nyan ḇepyum iso komkuepen ko kada. Rwama kawos fakfuken rikyor nane insama kona rari ine: (1) Farmkuepen ido rosairiri? (2) Rosai ḇefnai fa farmkuepen ima rari ḇefandun nairi? (3) Moḇsa kofaduru rari ḇeramuma ro bon rur ḇesren ine rai? (Gal. 5:22, 23) Ramnai, nari kawos rosai na kofrur kaku rofyor kopok fa komkuepen ko ḇa.

Snonggaku ḇemkuepen nari iso marisen ḇyena monda ker ḇa. Mboi, nari imku manggundi insama dawos wos oḇa ḇaido ifrur roi ono fa Allah imarisen ḇa.

Yesus fyasnai nyan ro roi ine. Refo ya doḇe, ’Rofyor sonef-sifyak i, ima dakonef-dakfyak ḇa; rofyor ismai kandera, iḇriwarek i ḇa, ḇape ḇyuk manggundi faro Allah, Mankara ḇenapes ya.’ (1 Ptr. 2:23) Imnis ra, rofyor spai Yesus i ro ai kandera, mbroḇ ḇyesi skoryae i ḇesyaḇo imku ḇo ḇyedosam si ḇa. (Mat. 27:39-44) Fafisu manfarkin agama sya sifakfuken i fa imbe sifrowes i, imku manggundi. (Mat. 22:15-22) Ma fafisu snonggaku Yahudi simsor ḇo imbe sikso Yesus i kuker karui, imsor kaḇer si ḇa. Mboi, iyokef bur si ’ma ibur Allah rum ḇyedi’.​—Yoh. 8:57-59.

Koine konapes ḇa, mboi bisa kakfrur raris Yesus i ke? Imbo. Manwawan Petrus fyas, ’Kristus ḇyekandera faro mgo kwar ma ḇyuk fasasna faro mgo kwar insa mgoso wewur ḇyena.’ (1 Ptr. 2:21) Inja, bisa koso Yesus wewur ḇyena fa komku manggunko. Roi ine fyandun kaku kukro?

Komku manggunko kada, nari Yahwe imarisen. Kofarmyan ḇe Yahwe I fyoro kwar ke, kosasor ko ro fararur ma wos koḇena ḇa ido, nari wis koḇena kuker Yahwe napyum ḇa.

Kwarapan Moses i. Fafisu ikenem ya, ima snon ḇemyaren asuser syadi, iḇese kaku ro snonggaku ḇero supswan ine. (Bil. 12:3) Ro swaf taun ḇe taun, Moses kyaḇaḇ fafisu kawasa Israel sisasurem ker. Mboi ro ras oso, Moses ipok imku i wer ḇa kwar. Ras anya, kawasa Israel sya sawos nabor kukro sananjar war. Mura, Moses imsor ḇo dawos naba yoḇ si, ”Ḇesampampum mgoya, mgorower! Inja na nusasyar war ḇero karui fofen ine faro mgo ke?”​—Bil. 20:2-11.

Fafisu anya, Moses ipok fa imku i wer ḇa. Ikofenḇair ḇa Yahwe iso ḇeḇuk war anya kuker mujisat. (Mz. 106:32, 33) Nane nafnai fa Yahwe imewer daksun ro Sup Ḇaḇeasas. (Bil. 20:12) Rya Moses fyafko faro sasar ḇyenane isof ro imar.​—Ul. 3:23-27.

Farkarkor rosai kun ro fawar ine? Kofarmyan ḇe Yahwe I fyoro kwar ke, kopok fa kawos masasor awer faro snonggaku ḇefrur fa kofafayaf ḇaido rofyor koḇuk wos anun. (Ef. 4:32; Kol. 3:12) Rofyor koḇe umur kwar ido, imbude kokara rya samswen fa komkuepen ko. Imbape, koswarepen mura ro Moses i. Komewer kofrur fa Yahwe myam snonsnon koḇena napyum ḇa. Inja, moḇsa na komam pyum fa kona rari ḇefandun kaku ine pdef?

Konadi fa kor rur ḇesren. Kukro? Rari farmkuepen ima dakro ḇar bon ro Allah rur ḇesren Ḇyedi. Yahwe imarisen ḇyuk rur ḇesren ine faro ḇeyor sya. (Luk. 11:13) Rofyor kofandun samambraḇ, Yahwe ḇyuk rur ḇesren Ḇyedi insama kosambraḇ. (Flp. 4:13) Ifnoḇek ko kako fa kona pdef ḇar ḇese ro bon rur ḇesren ya, raris saswar. Saswar ya ifnoḇek pyan ko fa komkuepen ko.​—1 Kor. 13:5.

Ḇinggwan ro roi ḇefnai fa wapok wamkuepen Au ḇa. Rupa ra, mam awer situs web ma hiburan ḇeser roi ḇemnis ḇa na. (Ef. 5:3, 4) Isyadi wer, koḇinggwan rosai monda ḇefrowes ko fa kofrur sasar. (Ams. 22:3; 1 Kor. 6:12) Rupa ra, snonggaku oso kyara  na napyan fa ifrur farḇuk ido, imewer myam felem ma iwasya fawar ro syap ḇeser fawar kabrai saswar.

Imbude samswen fa komku manggunko. Mboi, kosewar kaku ido nari Yahwe ḇyuk samambraḇ fa komku ko rofyor kosmai fafrowes. (2 Ptr. 1:5-8) Na ifnoḇek ko fa komkuepen kakara, wos, ma fararur koḇena. Nane naiso Paul ma Marco suyakḇaḇir na. Fafisu ine sumasasor fasawsaw wer ḇa. Mambesrar oso isya dakmsor fasawsaw rofyor dun oto. Fafisu ono, imasasor kuker snonggaku ḇese ḇeyun oto. Rosai ifrur fa fyadwer rari ḇepyum ḇa ḇyenane? Doḇe, ”Ras nakam, yanadi sambraḇ kaku. Yafarkor kako fawar ro Refo ḇekur snonggaku ḇemkuepen si ma yaswarepen mnuk riḇeḇeso. Yafrur roi ine kawan kwar. Mboi ro arwo nakam, na yaḇuk ker swarapepen yoḇ manggundaya fa yaknon monda ḇesya kwar. Ma fafisu yakofen roi oso kwar, na yara ḇepon kaku insama yasawsaw ḇa.”

Fafisu ono, na koisya kopok fa komku manggunko ḇa. Rarirya ido, na komai fa konadi ḇe Yahwe I. Mboi kokara rarirya awer kukro swaf ḇeradine iso isrow fa koḇenadi. Inja, koḇenadi ḇeri ḇo kor fa Yahwe ḇyuk ampun ma ifnoḇek ko. Mura kosewar kaku fa kofrur awer sasar ine wer. (Mz. 51:9-11) Yahwe na ryower kaku nadi ḇesasyar ro sne ḇesiper. (Mz. 102:17) Manwawan Paulus doḇe Allah Roma Ḇyedi rik ḇyena ”nfasren sasar ḇeḇor koḇena kam”. (1 Yoh. 1:7; 2:1; Mz. 86:5) Waswarepen Yahwe danun faro snonggaku ḇesyom faro I sya fa sḇuk ampun faro snonggaku ḇesesya ḇesya kwar. Inja, kokyar Yahwe imarisen ḇyuk ampun ḇe ko kako.​—Mat. 18:21, 22; Kol. 3:13.

Fafisu Moses ipok fa imku i wer ḇa ro marandan sena, Yahwe imarisen ḇa. Mboi, Yahwe ḇyuk ampun ḇe i. Refo ya dapḇair Moses i ḇe snonggaku ḇekyar kaku ma koso kakyar ḇyenane. (Ul. 34:10; Ibr. 11:24-28) Yahwe imewer Moses syun ro Sup Ḇaḇeasas, mboi Yahwe imarisen nari Moses ikenem fyoro ro Firdaus ro supswan ine. Komku manggunko pdef ido, nari kokenem fyoro-fyoro kako.​—1 Kor. 9:25.