1-2. Rosaiso roi risuru ḇefandun kaku faro Saksi Yahwe koine?

KORO baboine kosmai parkara ḇefandun kaku. Parkara ine kyur faro fasasren snonsnon Yahwe ma nyan ḇyepoik raya. Koma Saksi Yahwe siko, inja komarisen kawos roi ḇefandun kaku ansuine. Imbape, roi risuru suine suḇesisye ke? Oroḇa!

² Kokame kofawi kwar fandun fa Allah snonsnon Ḇyedi ḇyeḇefasren ro anonef nakam. Kofarkor kwar kako Yahwe ḇaḇepapoik Ḇyedi, ḇaido moḇ ḇyepoik raya, fandun fa kakfasnai iso ḇepyum syadi. Inja, roi risuru suine sufandun kaku.

3. Snonsnon Yahwe kyur ḇe roi risai?

³ Snonsnon Yahwe kyur faro roi nakam ḇekur I na, ine kako kyur ḇe nyan ḇyepoik raya. Inja, fyor komam fasasren snonsnon Yahwe ḇe roi ḇefandun syadi ido, ine kyur kako komam nyan Yahwe ḇyepoik raya ima nyan ḇepyum syadi. Snonsnon Yahwe nya fasfes kuker nyan ḇyepoik ḇe Manḇepoik Ḇekaki Syadi.​—Mam ” Roi Ḇefasfes kuker Parkara Ḇeba Kaku.”

4. Rosai Mazmur 135:13 ikofen ḇekur Allah snonsnon Ḇyedi, ma fakfuken risai nari kokarem ro farkarkor ine?

⁴ Snonsnon Yahwe ima iḇese ro snonsnon ḇesena. (Wasya Mazmur 135:13.) Rosai ḇefrur fa Allah snonsnon Ḇyedi fyandun kaku? Rariso randak kaku snonsnon ine ismai anonef? Moḇsa Allah fyasren snonsnon Ḇyedi rai? Ma rosai kofrur fa koḇriwarek snonsnon Ḇyedine? Fakfuken nane nari neḇekarem ro farkarkor ine.

5. Rosai sia skara fafisu srower fandun fa Allah snonsnon Ḇyedi ḇyeḇefasren?

⁵ Yesus irandak nadi ḇyena ḇo doḇe, ”Iḇye kada snombri ḇyeḇefasren.” (Mat. 6:9, NW) Inja, Yesus doḇe koḇenadi faro fasasren Allah snonsnon Ḇyedi. Inema rosairya kaku? Kofasren roi oso ido, ima kofrur roi ani fa isren. Mboi sia skara, ’Yahwe snonsnon Ḇyedi ima isren kwar ḇae. Inja, rosai ḇefnai fa kofrur I fa isren wer?’ Insama kofawi roi ine ido, ipyum fa kofawi rosai ḇeḇair ro snonsnon oso resari.

6. Rosai ḇefnai fa snonsnon ima roi ḇefandun kaku?

⁶ Snonsnon ima roi ḇefandun kaku. Ima wos oso sfas ḇaido sap monda ḇa. Snonsnon ḇyeḇair faro snonggaku ani, isoine moḇ snonggaku ḇese smam i raya. Inja, ḇefandun ya iso nyan sfas ḇaido sap snonsnon ani ḇa, mboi rosai snonggaku sya skara fyor srower snonsnon ani. Iso ḇefnai fa Refo ya doḇe, ”Kona snonsnon ḇepyum ipyum syadi ro arasai ḇebor.”​—Ams. 22:1; Pkh. 7:1.

7. Moḇsa snonggaku sya sisewar fa sifrur snonsnon Yahwe iḇyeḇa?

⁷ Snonggaku ḇebor sisewar fa sifrur snonsnon Yahwe iḇyeḇa. Sifrur na kuker sikofen roi ḇekaku ḇa ḇekur Yahwe I insama snonggaku sya skara sasar I. Ine ḇyerandak ro Yaf Eden. Rwama kawos rosai kofarkor ro na.

8. Rosai Adam ma Eva sufawi kwar, ma rosai na kofuken ḇekur su?

⁸ Adam ma Eva sufawi Allah snonsnon Ḇyediso Yahwe. Ma sufawi kako roi ḇefandun kaku ḇekur ḇe Yahwe I. Imnis raris, sufawi Yahwe iso Manḇefrur, ḇeḇuk kankenem ḇe su, moḇ ḇepyum suḇarek ya, ma ḇye su fa suḇe imbeswa. (Kej. 1:26-28; 2:18) Imbape, na sukarauser ker roi ḇepyum nakam Yahwe ḇyuk kwar ḇe su ke? Na susewar kaku fa suswar ma suḇesyowi Yahwe I ke? Fakfuken nane neḇekarem fafisu Allah mbroḇ Ḇyedi ifrowes su.

9. Ro Kejadian 2:16, 17 ma 3:1-5, rosai Yahwe ikofen ḇe Adam ma Eva su, ma moḇsa Setan danggar su rai?

⁹ Wasya Kejadian 2:16, 17 ma 3:1-5.  Ibiris ifuken faro Eva i roro ikak oso, ”Kaku Allah doḇe snar mupok muyan awer aibon ro aiknam nakam ro yaf ine ke?” Ibiris isya syewar fa danggar Eva i insama kyara sasar Allah. Ḇekaku ya, Allah ḇye Adam ma Eva su fa sumkei suyan bon ro aiknam ḇero yaf ani kam, mboi aiknam oser monda Allah idwarek su fa suyan awer bon ḇyena. Inja, aibon nabor naisya fa Adam ma Eva suyan na. (Kej. 2:9) Yahwe ifrur pyum kaku su. Inja, Setan fakfuken ḇyena naser anggarkar monda. Setan ifrur fa Eva kyara Yahwe ima ifrur pyum su ḇa. Rya Eva ifuken radine, ’Allah isya idwarek roi ḇepyum oso ro aya ke?’

10. Rariso Ibiris danonef kaku Allah snonsnon Ḇyedi rai, ma rosai ḇejadi ya?

¹⁰ Fafisu anya, Eva isya isouser Yahwe I ḇe Manḇepoik kaker. Eva kyarem ḇe Ibiris i kuker dap kaḇer Allah parenta Ḇyena ḇe su. Eva ikofen kako supok supan awer ro aiknam ani. Ifawi susouser Allah ḇa ido, nari sumar. Imbape, Ibiris doḇe, ”Na mupok mumar ḇa.” (Kej. 3:2-4) Setan ikofenbos kaku Allah ima danggarkar. Danonef Allah ma ifrur fa Allah snonsnon Ḇyedi iḇyeba. Rarirya ro ras anya ḇeri, Setan nya snonsnon Ibiris, isoine manḇeanonef. Eva ikyar faro rosai Ibiris ikofen na. Rarirya, Eva ismai fafrowes. (1 Tim. 2:14) Ikyar kuf Yahwe I ḇa, mboi ikyar syadi faro Ibiris i. Inja, dun snemuk ḇesasar. Eva isouser faro Yahwe I ḇa ma dan bon Yahwe idwarek ani. Mura, ḇyuk na ḇe Adam i kako fa dakkan.​—Kej. 3:6.

11. Rosai fandun fa Adam ma Eva sufrur kaku ya, mboi rosai sufrur na ḇa?

¹¹ Kwarapan rosai fandun fa Eva ikofen kaku yoḇ Ibiris i. Kwarapan ikofen radine, ”Ayama yafawi au ḇa. Mboi yafawi kaku Kma yedi, Yahwe I. Yaswar I ma yakyar I. Ḇyuk roi nakam faro Adam nu kwar. Rosai ḇefnai au fa wawos roi ḇekaku ḇa ḇekur I? Rwa wabur ḇe diwara!” Eva isouser pdef ḇo ikofen rarirya kada, na Yahwe imarisen kaku! (Ams. 27:11) Imbape, Adam ma Eva sufasnai saswar faro Yahwe I ḇa. Naiso eḇedari rofyor Ibiris danonef snonsnon Yahwe, suḇriwarek Yahwe I ḇa.

12. Rariso Ibiris ifrur Eva i fa kyorwanan rai, ma rosai Adam ma Eva sufrur na ḇa?

¹² Imnis kawos kwar anya, Ibiris syewar kaku fa snonsnon Yahwe iḇyeba. Ifrur fa Eva kyorwanan Yahwe ima Allah ḇefrur pyum dirya ke roḇa. Adam ma Eva suḇriwarek Yahwe snonsnon Ḇyedi ḇa, inja Ibiris dawninyan su fa suḇembroḇ Kma suḇedi Yahwe I. Fafisu ine, Ibiris ḇyuk nyan ḇemnis rarirya kako fa dawninyan ko. Danonef Yahwe I insama snonsnon Ḇyedi iḇyeba. Snonggaku ḇebor sikyar faro anggarkar ḇyena, mura napyan  kaku fa Setan dawninyan si fa spampum Yahwe I ḇe Manḇepoik sedi.

13. Imnis wos ro Yehezkiel 36:23, rosaiso anun ḇeknam kaku ro Refo ya?

¹³ Yahwe fyasis monda fyor Ibiris danonef i ke? Oroḇa. Fasfas ḇero Refo nakam nakofenḇair rosai Yahwe ifrur fa fyasnai roi Ibiris dawos ro Yaf Eden nama nkaku ḇa. (Kej. 3:15) Inja, bisa kokofen anun ḇeknam kaku ro Refo ya iso: Roro Karajan ḇero baḇ papoik Yahwe Rumkun Ḇyedi, nari fyasren snonsnon Ḇyedi ma ifrur fa snonggaku ḇenapes sikenem kuker payamyum ro supswan ine. Rarirya, fafisu kowasya Refo, na kofawi moḇsa Yahwe fyasren snonsnon Ḇyedi rai.​—Wasya Yehezkiel 36:23.

14. Fafisu sembroḇ Yahwe I ro Yaf Eden raposa, rosai Yahwe ifrur fa iḇriwarek snonsnon Ḇyedi?

¹⁴ Ibiris syewar ker fa Yahwe marisen Ḇyena ndarirya ḇa. Mboi, roi ifrur nakam nun bon oḇaḇeri. Refo doḇe rosai monda Yahwe ifrur kwar nakam nfasnaiḇair Yahwe ima Kma ḇesaswar ma Manḇepoik ḇepyum kaku. Kakuḇae, Yahwe na ḇyesneso kaku fafisu myam Ibiris ma ḇeso i syakam sembroḇ I. (Mz. 78:40) Rarirya mboi, Yahwe fyasnai fawinanem, nanapes, ma kaḇaḇaḇ ro rosai ifrur nakam. Yahwe fyasnai kako papoik ḇeba Ḇyena ḇesya kwar. Ḇefandun kaku ya, fararur Ḇyena kam neknam ro saswar ya. (1 Yoh. 4:8) Yahwe syewar kaku fa iḇriwarek snonsnon Ḇyedi.

15. Rariso Ibiris danonef snonsnon Yahwe isof ro fafisu ine, ma bon rosai ismai ya?

¹⁵ Isof ro fafisu ine, Ibiris danonef Allah snonsnon Ḇyedi kaker. Syewar kaku kuker dawninyan snonggaku sya fa sikyar manggun ḇa Allah iso ḇepoik syadi, inapes, fyawinanem, ma isaswar. Rupa ra, Ibiris fyarkor ninyan si rawo sikyar Manḇefrur ima isya kaku ḇa. Mboi, fyor sino sikyar Allah ima isya ido, na Ibiris dawninyan si fa skara Allah ima inapes ḇa ma parenta Ḇyena nmarḇak kaku. Ifrur fa snonggaku sya skara  Yahwe ima Allah ḇena sawarwar ḇa ma imasasor, ryap snonggaku sya ro for ḇembrer ḇa. Snonggaku ḇekyar faro anggarkar ḇyenane, ḇarpur mura spampum kaku Yahwe I ḇe Manḇepoik sedi. Fafisu Yahwe myun Ibiris i ḇaim, nari danonef snonsnon Yahwe rarirya kwar. Ma syewar kaku fa dawninyan Au kako fa pampum Yahwe I. Roi ifrur nane dun bon ke?

16. Rosai bisa wakfrur fa wakmnis Adam ma Eva su ḇa?

¹⁶ Yahwe ḇyuk swaf ḇe snonggaku ḇenapes ḇa koine fa kakfrur snonsnon Ḇyedi fa isren. Inja, bisa wafrur roi Adam ma Eva sufrur na ḇa, isoine waḇriwarek Allah snonsnon Ḇyedi. Snonggaku ḇebor sanonef ma skoryae snonsnon Yahwe, mboi wakna swaf fa wakofenḇair yoḇ si snar Allah Yahwe ima kyaku, isren, ifrur pyum, ma isawarwar. (Yes. 29:23) Bisa fasnai waksaramper moḇ ḇyepoik raya. Nyan oser ya iso wakofenḇair ḇe snonggaku sya snar Yahwe ḇaḇepapoik Ḇyedi ima ipyum syadi ma derer monda nari ḇeyun ko fa kokenem ro kenem ḇefo aski ma payamyum.​—Mz. 37:9, 37; 146:5, 6, 10.

17. Moḇsa Yesus ikofenḇair Kmari snonsnon Ḇyedi rai?

¹⁷ Koḇriwarek Yahwe snonsnon Ḇyedi ido, ima kakso Yesus Kristus nyan ḇyena. (Yoh. 17:26) Yesus ikofenḇair Kmari snonsnon Ḇyedi kuker dap snonsnon Yahwe monda ḇa, mboi fyarkor roi ḇekaku ḇekur snonsnon ine faro snonggaku ḇese. Imnis raris, snonggaku Farisi sfarkor kawasa sya fa skara Yahwe ima irarmomen, ifrur pyum ḇa, imasasor, ma jadi fa sfanam yoḇ I ḇa. Imbape, Yesus ifnoḇek kawasa sya fa smam Kmari ima kyara asuser pyum, kyaḇaḇ, isawarwar, ma imarisen ḇyuk ampun. Yesus fyasnai kako Kmari rari ḇepyum Ḇyena ro kenem ḇyedi ras ḇe ras. Rarirya, ifnoḇek snonggaku sya fa smambir Yahwe I.​—Yoh. 14:9.

18. Moḇsa kofasnai Ibiris wos ḇyena ḇekur Yahwe I nama nkaku ḇa?

¹⁸ Raris Yesus i, na kokofenḇair ḇe snonggaku ḇese roi ḇekaku ḇekur Yahwe I. Kofarkor si fa sfawi Yahwe ima  ifrur pyum ma isawarwar kaku. Kofrur na ido, kofasnai Ibiris wos ḇyena ḇekur Yahwe I nama nkaku ḇa. Kofrur snonsnon Yahwe fa isren kuker kofnoḇek snonggaku sya fa sifawi ma sesyowi Allah snonsnon ḇesren Ḇyedi. Kakfasnai Yahwe rari ḇepyum Ḇyena kako. Konapes ḇa kaker, mboi bisa kofrur roi ine. (Ef. 5:1, 2) Ro wos koḇena ma rosai kofrur na, na kofasnai mansei kaku Yahwe I. Rarirya, kofasren snonsnon Ḇyedi. Kofnoḇek snonggaku sya fa sifawi kakaku ḇekur Yahwe I. * Kofasnai kako snar snonggaku ḇenapes ḇa bisa sisouser ḇe Allah.​—Ayb. 27:5.

19. Ro Yesaya 63:7 ya, rosai ḇepon kaku kofrur fafisu koḇuk farkarkor?

¹⁹ Roi ḇese wer bisa kofrur fa kofasren snonsnon Yahwe. Fafisu kofarkor kakaku ro Refo faro snonggaku ḇese, na kofasnaiḇair Yahwe ḇaḇepapoik Ḇyena ḇesya kwar, ima Allah ḇepoik kaku supswan ma farsyos ine. Inema roi ḇekaku nairi. Na kofarkor si kako fa sifawi Yahwe parenta Ḇyena. Mboi ḇepon kaku ya iso kofnoḇek si fa siswar ma sisouser faro Kma koḇedi, Yahwe I. Inja, ipyum fa kawos ker Yahwe rari ḇepyum Ḇyena. Komarisen kofasnai moḇsa Allah ḇena snonsnon Yahwe kenem Ḇyedi rai. (Wasya Yesaya 63:7.) Rarirya ido, ima kofnoḇek si fa siswar ma sisouser Yahwe I kukro manggunsi simarisen.

20. Rosai nari kawos ro farkarkor ḇerama ya?

²⁰ Kenem koḇena ma nyan koḇukifarkor snonggaku sya bisa smam ḇo skara Yahwe I rofyor srower snonsnon ine. Mura, na sakmarisen sfanam faro Yahwe I. Nari kawos roi ine ro farkarkor ḇerama ya.