1. Rosai ḇefnai fa Yahwe ḇyair manggundi imnis ra sna ḇesasus?

RO FAFISU Nabi Yesaya ikenem ya, Yahwe ḇyuk fakfuken ine ḇe kawasa Ḇyesi, ’Na awin oso ḇyefnder romawa ḇyedi ḇeyinem sus kaker ke?’ Yahwe ikofen wer, ”Ḇyefnder ido, Ayama yapok yaḇefnder au ḇaḇeri.” (Yes. 49:15) Ro Refo, mnuk kermgun monda ḇeyoḇe Yahwe ḇyair manggundi imnis ra sna oso. Mboi ro mnuk ine, Yahwe ifrur rarirya. Sna oso na iswar kaku kapira ḇyedi. Inja, Yahwe ḇye roi ine fa fyasnaiḇair ima iswar kaku manfamyan Ḇyesi. Sna sibor sya na sakkara raris bin ḇenir ḇe Jasmin, doḇe, ”Fafisu kosasus kapira, inema swaf fa kofanam yoḇ i. Ma fanamnam ḇeradine na kyain isof fyoro.”

2. Moḇsa Yahwe ḇyaḇir rai fafisu oso ro romawa Ḇyedi ḇyinggwanbur I?

² Yahwe ifawi kaku fafisu romawa Ḇyedi oso ḇyaryas wer ḇa ma dakso fananjur ya wer ḇa. Kokara kada, Yahwe na ḇyesneso kaku fafisu myam ro taun nakam manfamyan Ḇyesi sibor sḇinggwan ro sidang * kwar.

3. Rosai Yahwe imarisen kaku ya?

³ Naek ma srar ḇeḇinggwanbur sidang ansine sibor sisya skaḇer wer ḇe sidang, ma ine nafnai fa koryaḇ kaku. Yahwe imarisen fa skaḇer, ma kakmarisen. (1 Ptr. 2:25) Moḇsa na kofnoḇek si rai? Kokarem fakfuken ine ḇaim, rwama komam ḇepon rosai ḇefrur fa sia siso fananjur ma ḇaḇeḇaryas wer ḇa.

4. Rosai ḇejadi ya snar sia smam monda faro fararur sena?

⁴ Ono sisya smam fararur sena ḇe roi ḇefandun kaku ro kenem sena. Mambesrar ḇeḇarek ro Asia snori Hans, * doḇe, ”Yaḇuk oras nabor ma samambraḇ yena faro fararur ayena monda. Yakara mnis ḇa ḇo yoḇe yana arasai nabor samande bisa yaḇukifarmyan Yahwe I. Inja yafararur marmar kaku. Fawawas yaso mnis fananjur ya ḇa rawo yaso fananjur ya ḇaḇeri. Yafawi kaku Setan ḇye dunya ine fa ifrur ko insa kofarmyan ḇe Yahwe I wer ḇa.”

5. Rofyor samswen nabor nggur imbesrar oso, rosai ifrur ya?

⁵ Naek srar ḇeḇeso sesanekar kukro samswen nabor nggur si. Imbesrar ḇena romawa ririm ḇeraker Inggris snori Anna, fyar ḇo doḇe, ”Fafisu yakapar romawa eḇesuru ayeja, ismai dafduf kwar. Mura ido, inai ḇekyor ya sisasyar i bur sidang ma roma eḇefyak swaruser ḇyena namnis ḇa. Yasanekar kaku rawo yaso fananjur ma yara yaḇaryas wer ḇa. Ḇarpur mura, yaḇinggwan ro sidang.” Kakuḇae, koswar kaku imbesrar koḇanine ma kina ḇyesi ma ḇesesya ḇesmai samswen ḇeradine kako!

6. Rosai ḇefnai fa snonggaku oso na ḇyinggwanbur Yahwe kawasa Ḇyesi fyor iso mnis wos ḇero Kolose 3:13 ya ḇa?

⁶ Wasya Kolose 3:13. Naek srar ono wer sfafko kukro rosai min sesi sifrur yoḇ si. Manwawan Paulus ifawi fafisu ono bisa ’kokram masasor’ faro naek ḇaido srar oso. Imbude sifrur pyum ko ḇa kwar. Mboi kosasor ko ḇa ido, na komsore. Masasor bisa nafnai ko fa koḇinggwanbur Yahwe kawasa Ḇyesi. Kokarapan roi ḇekur naek Pablo ḇeraker Amerika Selatan. Oso ro sidang kyursof famfnom naek Pablo i ḇo doḇe ifrur roi ḇesasar. Mura, penatua sya sikyare ma sḇuk fararur fa duf ro sidang wer ḇa. Moḇsa naek Pablo ḇyerai? Doḇe, ”Yamsore, mura yaḇinggwanbur sidang.”

7. Snonggaku oso sneri ḇyuk sasar ḇe i ker ido, rosai na ḇejadi ya?

⁷ Oso ifrur sasar ḇeba ro fafisu naiwara ido, imbude sneri ḇyuk sasar kaker ḇe manggundi. Kyara Allah na ipok iswar i wer ḇa. Imbror ma Yahwe ḇyuk ampun yoḇ i kwaro, na ḇyaḇir kaker isyus ḇa fa isyom ḇe Yahwe I. Mambesrar oso snori Fransisko, dakḇaḇir rarirya kako. Doḇe, ”Yafrur roi ḇeḇyeḇa, inja sisonek kaku aya. Randak ya, yaso pdef fananjur ya, mboi mura yasanekar ma yaḇaḇir yasyus ḇa kwar fa yasyom Yahwe I wer. Sanerine ḇyuk sasar ḇe aya ker, ma yakara Yahwe ipok ḇyuk ampun ḇe aya ḇa. Ḇarpur ya, yaso fananjur ma yara yaḇaryas wer ḇa.” Mam naek srar ḇesmai samswen raris kawos insanja ido, moḇsa ḇaḇir rai? Waswar si ke? Isyadi wer, moḇsa Yahwe myam si rai?

8. Yahwe ḇyefnder snonggaku ḇefarmyan ḇe I kwar sya ke? Fasnaiḇair.

⁸ Yahwe ḇyefnder ḇaḇeri snonggaku ḇefarmyan ḇe I kwar, mboi ro swaf ono sifarmyan ḇe I wer ḇa. Fyanander rosai sifrur kwar ro fararmyan ya ḇa kako. (Ibr. 6:10) Nabi Yesaya fyas wos peper ḇefasnai pyum kaku Yahwe iswar kawasa Ḇyesi. Yesaya fyas, ”Kuker bramin Ḇyedi, nari iryur domba mgun sya, ma nari dun  si ro ander Ḇyedi.” (Yes. 40:11) Moḇsa Manfarandows Ḇeba koḇedi ḇyaḇir rai fyor domba Ḇyesi oso iḇor? Yesus fyasnai Yahwe moḇ ḇyaḇir raya fafisu ifuken manfamyan ḇyesi, ’Rariso karkara bedi? Rofyor snonggaku oso ismai domba utin oser, ma oso ro si iḇor, rariso nari ryirḇake samfur risiw seser risiw ansi ro ḇon ya ḇo rya syewar ḇeḇor ani? Ma yakofen faro mgo: Kaku ḇeri rofyor ismai, raryaḇ ḇyedi iba syadi snar oser ani, ro samfur risiw seser risiw ḇeḇor ḇa ansi.’​—Mat. 18:12, 13.

9. Moḇsa manfarandows ḇepyum myam domba ḇyesi rai? (Mam sonin ḇero ḇarpon.)

⁹ Rosai ḇefnai fa Yahwe ima imnis manfarandows oso? Snar manfarandows ḇepyum oso na iswar kaku domba ḇyesi. Imnis ra Daud i, myun singa ma beruang fa kyadaunwarek domba nai ḇyesi. (1 Sam. 17:34, 35) Manfarandows ḇepyum na ifawi kaku fyor oser monda ro domba ḇyesi isya ḇa. (Yoh. 10:3, 14) Nari ryir domba ḇesesya ro padwar yadori, ḇaido dor manfarandows oso ḇese fa myam pyan si ḇo rya fa syewar oser ḇeḇor ani. Yesus wos sarḇer ḇyedine fyarkor ko roi ḇefandun kaku ine: ’Rarirya kako Kma mgoḇedi ro boiyas imarisen ḇa fa oser ro romawa sine iḇor.’​—Mat. 18:14.

10. Ro Yehezkiel 34:11-16, Yahwe ḇyeasas rosai na ifrur faro domba Ḇyesi ḇeḇor kwar sya?

¹⁰ Yahwe iswar kokame, iswar kako ’romawa ḇeḇor’ ḇeḇinggwanbur sidang ya. Roro Nabi Yehezkiel, Allah ḇyeasas nari syewar domba Ḇyesi ḇeḇor kwar ansi ma ifnoḇek si fa sna wis ḇepyum kaḇer kuker I. Ikofenḇair mnis moḇsa na ifnoḇek si rai. Rosai Yahwe ifrur na namnis rosai manfarandows oso ifrur ya fafisu domba ḇyesi oso iḇor. (Wasya Yehezkiel 34:11-16.) Ḇepon ya, manfarandows ani na ḇyuk oras ma samambraḇ ḇyena fa syewar  domba ani. Isrow i kwar ido, na dun kaḇer i ḇe domba nai ḇyesi. Ma domba ani ḇyepar ḇaido iḇiser ido, manfarandows ani na iswar ma ifrur pyum domba ḇeryar ḇa ani kuker pyarekepen par ḇyedi ma fyan i. Penatua siso manfarandows ’domba nai Allah Ḇyesi’. Nari sifrur kaku rarirya fa sifnoḇek naek srar ḇeḇinggwanbur sidang kwar sya. (1 Ptr. 5:2, 3) Penatua na sisewar si, sifnoḇek si fa skaḇer ḇe sidang, ma sfasnai siswar si kuker sifnoḇek si fa sfanam kaḇer ḇe Yahwe I. *

11. Rosai manfarandows ḇepyum ifawi na?

¹¹ Manfarandows ḇepyum ifawi na domba ḇyesi bisa siḇor. Domba oso imbran ḇyinggwanbur nai ḇyesi ido, manfarandows ani na myun i ḇa. Kokarapan rosai Yahwe ifrur fa ifnoḇek manfamyan Ḇyedi, ro swaf ono ḇyinggwanbur I kwar.

12. Moḇsa Yahwe ifrur pyum Yunus i rai?

¹² Nabi Yunus isouser Yahwe I ḇa ma imewer rya ḇe Niniwe. Rarirya mboi, Yahwe ibur Yunus i ḇa. Raris manfarandows ḇepyum, Yahwe ifnoḇek ma syambraḇser i insama ifrur fararur ḇyedi fa imnai. (Yun. 2:7; 3:1, 2) Ramnai, Yahwe ḇye rokaker ḇesur famfnom fa ḇyukifarkor Yunus insama ḇyesyowi kankenem ro snonggaku sya. (Yun. 4:10, 11) Farkarkor rosai kosmai ya? Penatua sya spapum awer fa sifnoḇek ḇeḇinggwanbur sidang. Imbape, sisewar fa sifawi roi ḇefnai fa naek ḇaido srar oso ḇyinggwanbur sidang. Ma fafisu kyaḇer ḇe Yahwe ido, penatua sfasnai saswar faro i pdef.

13. Rosai Yahwe ifrur faro manfasfas Mazmur ḇe 73 ḇekur rosai ikofen ya?

¹³ Manfasfas Mazmur ḇe 73 ḇyesanekar kukro myam mboi ḇefrur ḇarḇor sya rya sikenem ro payamyum. Kyara snonggaku ḇefrur Yahwe marisen Ḇyena na sikenem pyum ke roḇa. (Mz. 73:12, 13, 16) Moḇsa  Yahwe myam i rai? Imsor manfasfas ani ḇa. Mboi myam kaku insama manfasfas ine wos ḇyena neḇefas ro Refo. Ḇarpur mura, ifawi ḇaḇebati kuker Allah ima roi ḇemaeja syadi ro roi ḇesena kam. (Mz. 73:23, 24, 26, 28) Farkarkor rosai kosmai ya? Penatua sya sipok semankara fasaw awer snonggaku ḇekyar manggun ḇa fararmyan sena faro Yahwe naser payamyum. Simsor si awer, mboi sifawi pyum rosai ḇefnai fa sawos ma sifrur radiri. Ramnai, penatua na sḇuk mnuk ro Refo fa sifnoḇek si.

14. Rosai ḇefnai fa Elia fyandun fafnoḇek, ma moḇsa Yahwe ifnoḇek i rai?

¹⁴ Nabi Elia ifrar ibur Ratu Izebel i. (1 Raj. 19:1-3) Kyara nabi ḇefarmyan faro Yahwe I sisya wer ḇa, ma ḇyaḇir fararur ḇyena nefromo monda. Elia ḇyesanekar kaku isof kyara imbe imar monda. (1 Raj. 19:4, 10) Yahwe imsor Elia i ḇa, mboi ḇyuk kakyar ḇe i snar demir ḇa, ma ifrur i fa ikyar faro papoik Ḇyedi snar fararur nabor naisya fandun fa ifrur na. Yahwe ryower pyum fyor Elia fyawar makakwarek ḇyena ma ḇyuk fararur ḇebabo yoḇ i. (1 Raj. 19:11-16, 18) Farkarkor rosai kosmai ya? Kokame, ḇesyadi wer penatua sya, fandun fa sifrur pyum Yahwe manfamyan Ḇyesi. Fafisu oso fyawar roi ḇyaḇir na yoḇ penatua ḇo doḇe imsor kaku ke, kyara Yahwe ḇyuk ampun faro sasar ḇyena ḇa ke, penatua na srower pyum i. Mura na sisewar fa sḇuk kakyar ḇe i snar Yahwe iswar kaku i.

15. Ro Yohanes 6:39, moḇsa Yesus myam Kmari domba Ḇyesi rai?

¹⁵ Yahwe imarisen kakmam domba Ḇyesi ḇeḇinggwanbur sidang sya imnis moḇ myam si raya. Yesus fyasnai nyan ya ḇe ko kwar. Ifawi Yahwe myam domba Ḇyesi kam sesyowi kaku, inja Yesus syewar kaku fa ifnoḇek ”domba-domba ḇeḇor ro fandu er Israel” sya fa skaḇer wer ḇe Yahwe I. (Mat. 15:24; Luk. 19:9, 10) Raris manfarandows ḇepyum, Yesus syewar insama Yahwe domba Ḇyesi oso iḇor awer.​—Wasya Yohanes 6:39.

16-17. Moḇsa na penatua smam roi sifrur na fa sifnoḇek ḇeḇinggwanbur sidang sya rai? (Mam ro ” Ḇeḇinggwanbur Sidang Sya Moḇ Sḇaḇir Raya.”)

¹⁶ Manwawan Paulus danunepen penatua ro sidang Efesus fa siso Yesus nyan ḇyena. Fyas, ”Rofyor ko fararur rarirya insa ko fnoḇek snonkaku ḇepokḇa ma ko swarepen Manseren Yesus wos ḇyedi, doḇo: ’Ipyum syadi ro koḇuk ya ro kosma ya.’” (Kis. 20:17, 35) Nasnai kaku, penatua ḇero baboine siso ḇepon kaku ḇefasnai saswar faro Yahwe kawasa Ḇyesi. Penatua ḇeraker Spanyol snori Salvador doḇe, ”Fafisu yakara Yahwe iswar kaku domba Ḇyesi ḇeḇor kwar sya, yamarisen yasewar si fa yafnoḇek si. Yafawi Yahwe imarisen insama yakswar si.”

¹⁷ Naek srar ḇeḇinggwanbur sidang ḇeyap ro farkarkor ine, sifnoḇek si kwar fa skaḇer ḇe Yahwe I wer. Kirine, sibor ḇeḇinggwanbur sidang sya simarisen fa skaḇer wer. Ro farkarkor ḇerama ya na kawos mnis nyan kofnoḇek si fa skaḇer ḇe Yahwe I.