1. Moḇsa Yahwe ḇyaḇir rai rofyor oso ḇyinggwanbur I kwar kyaḇer wer?

KAWOS kwar ro farkarkor ḇepondi, Yahwe ḇyair manggundi imnis raris manfarandows ḇefaduru pyum domba ḇyesi oser-oser. Oso iḇor ido, na syewar rawo isrow i. Yahwe ikofen ḇe snonggaku Israel ḇeḇinggwanbur I sya, ”Mgokaḇer muma ḇe Aya, ma nari Yakaḇer ḇe mgo.” Baboine kako, Yahwe ḇyaḇir rarirya kaker kukro doḇe ima ipok fa fyarwei ḇa. (Mal. 3:6, 7) Yesus ikofen fafisu Yahwe manfamyan Ḇyedi oser monda ḇyinggwanbur I kwar mboi kyaḇer wer ido, nari Yahwe ma malaikat sya siryaḇ kaku.​—Luk. 15:10, 32.

2. Rosai nari kawos ro farkarkor ine?

² Rwama kawos Yesus wos sarḇer rikyor ḇyena. Na kofarkor ro wos sarḇer anskoine moḇsa kofnoḇek ḇeḇinggwanbur Yahwe I kwar sya. Nari kawos rari risai monda fandun fa kona insama kofnoḇek si fa skaḇer ḇe Yahwe I. Ma komam nari koryaḇ kaku fyor kosewar fa kofnoḇek si.

3-4. Rosai ḇefnai fa bin ḇeyap ro Lukas 15:8-10 syewar pyum kaku kumpan sarak ḇyedi?

³ Na kosewar kaku fa kosrow snonggaku ḇemarisen ḇekaḇer ḇe Yahwe I. Ro Yesus wos sarḇer ḇyena ḇero Injil Lukas, doḇe bin oso kumpan sarak ḇyeja oser ryo, inja syewar marmar kaku roi ḇyemanmin kaku ine. Roi imbe komam kaku ro fawar ine iso sasewar ro bin ani.​—Wasya Lukas 15:8-10.

⁴ Ro fafisu Yesus ryo supswan ine, rofyor inai Yahudi oso imbe fyarḇuk ido rya ḇar awin-awin sya sḇuk kumpan sarak risamfur faro i. Siryur kumpan anna fa neoser. Yesus fyasnai bin ḇero wos sarḇer ani moḇ ḇyaḇir raya fyor isrow kaḇer kumpan sarak ḇyedi. Bin ani kyara kumpan  sarak ani isapi ro sop. Inja, pyam padamara ḇo syewar pyum kaku ro moḇ anya, mboi isrow na ḇa. Imbude padamara ḇyedi isnai manggun ḇa fa ḇyukimam kumpan sarak kasun anya. Mura ido, isasapu fawas rum ani ḇesiper. Fyoro ḇa mura, myam faro roi ḇesnai farawriwek ḇero fofen kukro sananai ya. Iryaḇ kaku kukro isrow kumpan ḇyedi wer. Dor bati ḇyesi ma ḇeḇarek fanam kuker i sya ḇo ikofenḇair abar ḇepyum ine.

5. Rosai ḇefnai fa kosewar kaku insama kosrow snonggaku ḇeḇinggwanbur sidang kwar sya?

⁵ Raris Yesus wos sarḇer ḇyena, kofawi imbe kosewar roi oso ḇeḇor kwar ido kosusu awer kada. Rarirya kako, fandun fa kosewar kaku fa kosrow snonggaku ḇeḇinggwanbur sidang sya. Ono sisya sḇinggwanbur sidang fyoro kwar. Ono wer sra ḇe moḇ ḇese kwar, inja naek srar ro sidang sifawi rum sena wer ḇa. Mboi roi kofawi ya iso knikinema naek srar ansine simander kaku fa skaḇer ḇe Yahwe I. Siḇe sfarmyan ḇe Yahwe fnoḇek min sesi wer, mboi sfandun fafnoḇek ro ko.

6. Ḇero sidang syakam, rosai na sifrur fa sisewar ḇeḇinggwanbur sidang sya?

⁶ Mansei na ḇeso fa ḇeyaksewar snonggaku ḇeḇinggwanbur sidang sya? Manḇaryas ḇero sidang syakam isoine penatua, perintis, ma kina sesi. Wakfawi bati ḇaido kina Bedi oso ḇyinggwanbur sidang kwar ke? Wasrow i rofyor ḇaryas ro rum ḇe rum ḇaido ro moḇ kawasa ḇebor sisya ro ya ke? Wasrow oso kwar ḇo imarisen ido, wakofen yoḇ i ḇo woḇe nari wakofenḇair moḇ ḇyarek ro ya ḇaido nomor telfon ḇyedi ḇe penatua ḇefanam ro moḇ anya fa sra smamfar i.

7. Rosai kofarkor ro penatua oso roi ikofen na?

⁷ Penatua siso ḇepon kaku ḇesewar snonggaku ḇemarisen ḇekaḇer ḇe Yahwe I. Moḇsa sifrur na rai? Kokarapan penatua oso ḇeḇarek ro Spanyol snori Thomas, * roi ifrur na. Ifnoḇek kwar Saksi ri 40 fa skaḇer ḇe sidang. Naek Thomas doḇe, ”Ḇepon ya, yafuken naek srar sya mansei ḇefawi moḇ sḇarek ro kirine. Ḇaido yafuken mansei ḇefawi naek srar ḇeso fananjur wer ḇa sya. Sibor ro sidang simarisen sifnoḇek. Mura, fyor yarakaki naek srar ḇeḇinggwanbur sidang ansine, yafuken romawa sesi ḇaido ḇero kina sesi. Fyor iwara, sun ker romawa sesi ḇe fananjur, ma sakḇe manḇaryas kako. Inja, fandun fa kofnoḇek si kako insama skaḇer ḇe Yahwe I wer.”

8. Ro wos sarḇer ḇekur romawa ḇeḇor ḇero Lukas 15:17-24, moḇsa kma ani ifrur pyum romawa ḇyedi ḇembror kwar?

⁸ Koḇe kofnoḇek ḇemarisen ḇekaḇer ḇe Yahwe ido, rari risai fandun fa kona ya? Komam rosai kofarkor ro Yesus wos sarḇer ḇyena ḇekur romawa ḇeḇor. (Wasya Lukas 15:17-24.) Yesus doḇe ḇarpur ya romawa ani fyafko faro rosai ifrur na ma kyara fa kyaḇer wer ḇe rum. Kmari myam ḇepon i mura ifrar ma fyorepen i, inja ifawi kmari iswar i kaku. Romawa ani sneri iknon ḇa ma ḇyaḇir isyus ḇa fa kmari dor i ḇe romawa ḇyedi wer. Fyor ikofenḇair roi ḇyaḇir na yoḇ kmari, kmari iswar kaku romawa ḇyanine. Ramnai, kmari fyasnai imarisen romawa ḇyedine ibur kaḇer. Myam i ḇe manfamyan ḇa mboi romawa iswar kaku, inja fyasos munara oso ma syatu ḇepyum faro romawa ḇembror kwar anine.

9. Rari rosai fandun fa kona na insama kofnoḇek ḇeḇinggwanbur sidang sya fa skaḇer ḇe Yahwe I? (Mam ” Nyan Kofnoḇek Snonggaku Ḇemarisen Ḇekaḇer.”)

 ⁹ Yahwe imnis ra kma ḇero sarḇer ani. Iswar kaku naek srar ḇeḇinggwanbur sidang kwar sya, ma imarisen insama skaḇer wer yoḇ I. Kakfrur raris Yahwe ido, na kofnoḇek si fa skaḇer. Fandun fa kokḇaḇ, koswar, ma kofrur pyum si. Rosai ḇefnai fa kofasnai rari-rari nane, ma moḇsa kofasnai na rai?

10. Rosai ḇefnai fa kokaḇaḇaḇ fyor kofnoḇek snonggaku oso fa fyanam kaḇer faro Yahwe I?

¹⁰ Fandun fa kokaḇaḇaḇ kukro snonggaku oso fyandun swaf fa kyaḇer wer ḇe Yahwe I. Naek srar ḇeḇinggwanbur Yahwe kwar mboi skaḇer wer soḇe, penatua ḇaido ḇesesya ro sidang srama smamfar ker si ḇesyandari skaḇer. Imbesrar ro Asia snori Nancy fyas, ”Yana bati ḇefanam oso ro sidang, iso ḇefnoḇek kaku aya. Ima imnis ra eba yedi, ima iswar aya. Ikofen ḇe aya roi ḇepyum nufrur kam ro fafisu naiwara. Ryower pyum fyor yakofen roi yakara na, ma imarisen ḇyuk anun ḇe aya. Ima bati ḇekaku yediri, isya ḇesya kwar fa ifnoḇek aya.”

11. Rosai ḇefnai fa kofasnai sawarwar fa kofnoḇek naek srar ḇefafayaf kwar sya?

¹¹ Rofyor snonggaku oso fyafayaf, ima imnis ra isya ḇyepar. Sawarwar imnis ra aryawin ḇefrur fa snonggaku ḇepar ani iprei. Ḇeḇeso sḇinggwanbur sidang kukro fyor iwara simsor faro snonggaku oso ro sidang. Iso ḇefnai fa simewer skaḇer ḇe Yahwe I. Imbude ono  skara sifrur pyum si ḇa. Sfandun snonggaku ḇerower pyum si ma ḇefawi pyum kaku roi sḇaḇir na. (Yak. 1:19) Srar María ḇeḇinggwanbur sidang kwar ro swaf ono doḇe, ”Yafandun snonggaku ḇerower aya, ḇeḇuk sneprei ma wos anun ḇepyum ma fafnoḇek.”

12. Buk sarḇer oso ḇefasnaiḇair Yahwe saswar Ḇyedi naiso eḇedari iyer kaḇer ḇeḇinggwanbur I sya.

¹² Refo doḇe saswar naiso eḇedari Yahwe iyer ko fa kofanam faro I. Moḇsa Yahwe ifrur na rai? Kwarapan wos sarḇer ine: Wasapi ro der ḇedo kaku ma jadi fa wek kaḇer ḇa. Nyan oser iso snonggaku oso isawen kabrai fa ḇyukiyer Au kada. Yahwe dawos ḇekur snonggaku Israel ḇeḇinggwanbur I sya, ”Yayer si maro aya kuker . . . saswar.” (Hos. 11:4) Yahwe myam rarirya kako faro snonggaku ḇeḇinggwanbur I, ḇesmai samswen ma makakwarek nabor. Yahwe imarisen fa sifawi ima iswar kaku si ma imarisen skaḇer yoḇ I. Ma Yahwe bisa ḇye Au fa wafnoḇek si insama sḇaḇir Allah iswar si.

13. Rariso Pablo fawar ḇyedi fyasnaiḇair saswar koḇena na nafnoḇek ḇesesya fa skaḇer ḇe Yahwe I?

¹³ Fandun fa kokofenḇair ḇe snonggaku ḇeḇinggwanbur sidang kwar sya snar Yahwe iswar kaku si ma kakswar si kako. Pablo, ḇeyap ro farkarkor ḇepondi, ḇyinggwanbur sidang swaf taun ri 30 kwar. Doḇe, ”Ras oso arwo ya, fyor yabur rum yedi, imbesrar ḇesinan ḇefrur pyum isrow aya ma dawos myaren asuser ḇe aya. Mura yakanes raris roma  mgun oso. Yakofen yoḇ i ḇo yoḇe rya Yahwe iso ḇewan i fa ryama dawos ḇe aya. Iso swaf fa yakara imbe yakaḇer ḇe Yahwe I.”

14. Ro wos sarḇer ḇero Lukas 15:4, 5, rosai fandun fa manfarandows oso ifrur ya fafisu isrow domba ḇeḇor oso kwar?

¹⁴ Fandun fa kofnoḇek ma kosambraḇser pdef snonggaku ḇeḇinggwanbur sidang fyor kosrow si kwar. Raris romawa ḇeḇor ḇero Yesus wos sarḇer ḇyena, na sesanekar ro swaf kawan insape siprei kaḇer. Sfanam ḇe Yahwe I raris ḇepon ya ḇa kukro Setan dunya ḇyedi ifnai si kwar. Kofnoḇek si fa sisambraḇser kakyar sena ḇe Yahwe I. Ro sarḇer ḇekur domba ḇeḇor ani, Yesus fyasnaiḇair fafisu manfarandows ani isrow domba anya kwar ido, na kyamar i ma iryaḇ ḇo dun i. Ḇyuk oras ma samambraḇ ḇyena kwar fa syewar i. Mboi ifawi domba ani fyandun fafnoḇek kaker. Domba ani iryar ḇa fa imbran ḇe nai domba ḇyedi, inja na dun pyan i fa kyaḇer.​—Wasya Lukas 15:4, 5.

15. Moḇsa kofnoḇek snonggaku ḇeḇinggwanbur sidang ḇemarisen ḇekaḇer ḇe Yahwe I? (Mam ” Roi Ḇepyum fa Koḇukifnoḇek Si.”)

¹⁵ Fandun fa koḇuk oras ma samambraḇ ḇebor fa kofnoḇek ḇeḇinggwanbur sidang kwar sya fa sifrur mnis samswen sena insama sfarmyan kaḇer ḇe Yahwe I. Mboi kofnoḇek si fa sisambraḇser kakyar sena kuker Yahwe rur ḇesren Ḇyedi, Refo ya, ma roi organisasi fyasos kwar na. (Rm. 15:1) Moḇsa kofrur roi ine rai? Penatua oso ḇefarmyan fyoro kwar ikofen, ”Sibor ḇeḇinggwanbur  sidang kwar, fandun fa sfarkor Refo wer fafisu skaḇer ḇe Yahwe I.” * Penatua oso dor Au fa buk farkarkor Refo ḇe snonggaku ḇeḇinggwanbur sidang sya ido, na wamarisen ke? Penatua ani ikofen wer, ”Manḇaryas ḇeḇuk farkarkor Refo anya fandun fa ḇye bati ḇefrur pyum, insama naek srar ḇeḇinggwanbur sidang kwar ani ikyar faro i.”

16. Rariso kofawi malaikat ro nanggi sisya sifnoḇek ko?

¹⁶ Fawar nabor naisya ḇefasnaiḇair malaikat sisya sifnoḇek ko fa kosrow songgaku ḇeḇinggwanbur sidang kwar ḇemarisen ḇekaḇer ḇe Yahwe I wer. (Why. 14:6) Imnis raris, mambesrar oso ro Ekuador snori Silvio, dor ro nadi ḇe Yahwe I insama iwan snonggaku oso ryama ifnoḇek i fa kyaḇer ḇe sidang. Rofyor isya ḇyenadi kaker, sinuk kedwa ro rum ḇyedi. Penatua risuru surama yoḇ i. Ro ras surama anya, susambraḇser i ma suḇuk fafnoḇek fyandun na.

17. Moḇsa koḇaḇir rai fyor kofnoḇek snonggaku ḇeḇinggwanbur sidang sya?

¹⁷ Na koryaḇ kaku kukro kofnoḇek snonggaku ḇeḇinggwanbur sidang kwar sya fa skaḇer ḇe Yahwe I. Mambesrar perintis oso syewar kaku fa ifnoḇek snonggaku ḇeḇinggwanbur sidang. Doḇe, ”Fyorno ido, yakain yakara ḇeḇinggwanbur Yahwe ansine skaḇer kwar ido, na yaswar si ra. Yaryaḇ kaku yana syowi ḇeba fa yafararur kayam fnoḇek Yahwe I fa yafnoḇek manfamyan iswar kaku fa isasyarbur Setan dunya ḇyedine ma kyaḇer ḇe sidang.”​—Kis. 20:35.

18. Ḇinggwanbur sidang kwar ido, rosai na wakyar kaku ya?

¹⁸ Ḇinggwanbur sidang kwar ido, wakyar kaku Yahwe iswar Au kaker. Imarisen insama kwaḇer ḇe I. Ipyum ya swewar nyan fa kwaḇer ḇe I. Imbape, imnis raris kma ḇero Yesus wos sarḇer ḇyena, Yahwe isya iwaf Au rawo kwaḇer, ma nari iryaḇ kaku isaser Au fa kwaḇer ḇe sidang wer.