1. Rosai ḇefrur fa ko oser-oser bisa kakḇe Yahwe manfamyan Ḇyedi?

YAHWE ḇeyun ko oser-oser faro I. (Yoh. 6:44) Maksud ḇyediso? Rofyor Yahwe myamepen snonggaku miliar ḇero supswan inensya, Myam roi ḇeḇye ro Au. Fyawi wamarisen kaku fa waswar I. (1 Taw. 28:9) Yahwe myambir, fyawi, ma iswar Au. Wos ine nsun kaku ro sisnesna!

2. Rariso Yesus ifnoḇek ko fa kowasenkara Yahwe sneḇaḇir byedi faro domba Ḇyesi oser-oser?

² Yahwe ḇyefandun kaku ḇaido iswar faro manfamyam Ḇyesi oser-oser. Insama bisa kowasenkara Yahwe sneḇaḇir Ḇyedi faro roi anine, Yesus byuk sarḇer ḇekur manfarandowes oso bena domba ri 100. Fyor domba oser ḇyedi iḇor ido, rosai nari manfarandowes ani ifrur ya? Nari ”ryirḇake samfur risiw seser risiw ansi ro ḇonya ḇo rya syewar ḇeḇor ani?”. Fyor ismai domba ani, na myun i ḇa, ḇape iryaḇ kaku. Farkarkor ḇyediso? Yahwe myam domba oser-oser Ḇyesi semaeja kaku. Yesus doḇe, ”Kma mkoḇedi ro boiyas imarisenḇa fa oser ro romawa sine iḇor.”​—Mat. 18:12-14.

3. Rosai nari kawos ro farkarkor ineni?

³ Na komewer kofrur duf naek srar sya sne sena. Inja, rariso insama kofrur skarkar awer? Rosai na kofrur na fyor ono sisya sifrur duf sne koḇena? Na kawos na ro farkarkor ḇerama ya. Komam na ḇaim, mgorama kosewar ari manseiso sor ḇe ”romawa kasun sine” ro Matius fasal 18.

4. ”Romawa kasun sine” mansei kaku sirya?

⁴ ”Romawa kasun sine” sima Yesus manfamyan ḇyesi kam. Umur sena naḇeseyae rariryano, simnis ra ”romawa kasun” snar simarisen Yesus fyarkor si. (Mat. 18:3) Moḇ srama ya, adat sena, karkara sena, ma kenem sena naḇesisye yae rariryano, sikame sikyar faro Yesus Kristus.  Eḇedari Yesus iswar kaku si.​—Mat. 18:6; Yoh. 1:12.

5. Rariso Yahwe sneḇaḇir Ḇyedi fyor ono sisya sifrur duf oso ro manfamyan Ḇyedi?

⁵ ”Romawa kasun ansine” kam semaeja kaku faro Yahwe I. Kakuya, Yahwe sneḇaḇir Ḇyedi imnis ra sneḇaḇir koḇena faro romawa sya. Snar kofawi romawa sya sisambraḇ kuf ḇa ma sna pengalaman noḇa bardibur snonggaku ḇeba sya, imbe kokadaunwarek si. Inoido, na komarisen ḇa fyor komam ono sisya sifrur duf ḇaido smun snonggaku ḇesesya. Inja, snonggaku ḇesmai mamun ani romawa rirya ido, na nafrur kofafayaf ḇo kormomen. Rarirya kako, Yahwe imbe kyadaunwarek manfamyan Ḇyesi oser-oser. Na fyafayaf kako ma imsor fyor ono sisya sifrur duf ko.​—Yes. 63:9; Mrk. 9:42.

6. Raris 1 Korintus 1:26-29 ikofen na, rariso snonggaku ḇero supswan ine smam Yesus manfamyan ḇyesi?

⁶ Rosai wer ḇefrur fa Yesus manfamyan ḇyesine sikmnis si kuker ”romawa kasun sine”? Dunya ine myam snonggaku ḇekayan, bena snonsnon, ma bena nasan sya siso ḇekaki ḇaido ḇefandun sya. Imbo Yesus manfamyan ḇyesima sakfrur rarirya ḇa. Inja, snonggaku ḇero dunya sine smam siḇe ”romawa kasun” ḇefandun ḇa ḇaido seroinoḇa. (Wasya 1 Korintus 1:26-29.) Ḇape, Yahwe dakmam si rarirya ḇa.

7. Kakuya moḇsa komam naek srar sya rai?

⁷ Yahwe manfamyan Ḇyansine, sakro napnapes ine fyoro kwar ke ḇaido sbabo kaker Yahwe iswar si kame. Yahwe myam sikam sefandun. Inja, kono kakmam si kako sefandun. Fandun fa ’koswar naek srar koḇesi’ kam, ḇoi ro ḇeḇeso monda ḇa. (1 Ptr. 2:17) Fandun fa kofrur rosai riryakam fa kokadaunwarek ma kofnoḇek si. Ma, fyor kofawi kofrur min Kristen koḇesya sisnesna naduf ido, komewer kofrur ra ḇeḇefawi ḇa. Komewer kokara snar snonggaku ani iso ḇemsor fasawsaw ma iso ḇebuk maf faro koni. Inja, rosai ḇefnai fa naek srar ono sisya simsor fasawsaw? Imbude naek srar sino sḇaḇir sfandun manggun ḇa snar moḇ srama ya. Skara mura faro rosai snonggaku ḇesesya skara faro sina inja nafrur fa simsor fasawsaw. Naek srar ono kako sbabo ro napnapes ine, inja imbude skandor fyor smam ḇaḇeraryarḇa ro naek srar ḇesesya. Inja sifrur duf sne koḇena ke ḇaido koiso ḇefrur duf si ke, na koḇesewar kaku fa kawosasuser roi anine fa namnai. Ma, komasasor fasawsaw ido, fandun fa koḇesewar fa koḇe snonggaku ḇemsor fasawsaw ḇa. Kofrur rarirya ido, sne ma swaruser koḇena nari naknon, ma kona wis ḇepyum kuker naek srar sya.

8. Mamam rosaiso Yesus manfamyan ḇyesi snana?

⁸ Rosai ḇefrur fa Yesus dawos ḇekur ”romawa kasun sine”? Rofyor ani, manfamyan ḇyesi sifuken, ”Manseiso ḇeba syadi ro Ḇaḇesasoser [Karajan] Boiyaswa?” (Mat. 18:1) Ro fafisu ani, snonggaku Yahudi ḇebor sya simarisen snonggaku ḇesesya smam sefandun. Manfawinanem oso doḇe, ”Simarisen snonggaku sya sesyowi si ma sisewar snonsnon. Faro si, iso roi ḇefandun syadi ro kankenem ya.”

9. Rosai Yesus manfamyan ḇyesi na sifrur kaku na?

⁹ Yesus fyawi snar manfamyan ḇyesi na siḇesewar kaku fa sisawenbur rari  ḇefamfabri, rari ine neḇemam ro kawasa Yahudi sya. Ikofen ḇesi, ”Ḇape mkoma rariryaḇa, mboi ḇeba syadi ro mko ryun mankundi fa ibaḇa syadi ma manfarkinya imnis ḇeyuffarmyan.” (Luk. 22:26) Bisa koso Yesus anun ḇyena fa koḇe ”romawa kasun” kuker komam snonggaku ḇesesya ’sikaki syadi ro mankun ko’. (Flp. 2:3) Kofrur rarirya pdef ido, na kofrur snonggaku ḇesesya skarkar ḇa.

10. Rosai anun Paulus fandun fa koso na?

¹⁰ Naek srar koḇesya sna ḇaḇekir kosmai ḇa na. Ma, napyan fa kofawi ḇaḇekir sena ine fyor komam monda faro rari-rari ḇepyum sena. Fandun fa kokarauser ma koso Manwawan Paulus wos anun ḇyena faro snonggaku Kristen ḇero Korintus: ”Mansei ḇefrur aw fa wasyadi ro snonkaku ḇeseya? Wafawiḇake roi ḇeḇor nakam wasmana ro Allah? Snaro wamarisen wamarares mankundaw” (1 Kor. 4:7) Inja, fandun fa kosasor ko insamaido kofrur awer fa smam komande ḇaido koḇo koiso ḇesyadi ro snonggaku ḇesesya. Imnis ra, naek oso dawoskir fyor dun faya ḇaido imbesrar oso ḇyekir ro ḇaḇebaryas inja dakna ḇefarkor Refo sya sibore, rarirya byuk sanandik faro Yahwe monda.

11. Rosai kun ro Yesus sararḇer ḇyena kuker raja ma women ḇyani?

¹¹ Yesus danun faro manfamyan ḇyesi fa sifrur karkar snonggaku ḇesesya wer, byuk wos sarḇer ḇekur raja oso ma women ḇyedi. Women ani nya nyaki ḇeba kaku faro raja ani, nari ipok ḇyak na ḇa. Raja ani kuker frur pyum ipyos women ani nyaki ḇyenakam kwar. Ḇape ḇarpurya, women ani dakkor ro women ḇesesya fa dakḇak nyaki ḇyena, nyaki ḇyena ine naḇaḇa. Nafrur fa, raja isyun women ani ḇe bui. Rosai farkarkor ya? Yesus doḇe, ”Kma yedi ro boiyaswa nari dakfrur rarirya kako faro mko, rofyor mkono oser-oser ḇyuk ampunḇa faro naek ḇyedi kuker sne ḇesiper.”​—Mat. 18:21-35.

12. Komewer kobuk ampun ido, nari snonggaku ḇese serarso?

¹² Women ḇeḇarḇor roi ifrur na nafrur susa manggundi monda ḇa, ḇape snonggaku ḇesesya kako. Ḇepon ya, women ani ifrur susa women ḇenyaki faro i ani kuker ”ismai ro bui isof ḇyakpres nyaki ḇyena”. Ḇesuru ya, women ani ifrur duf women-women ḇesesya sne sena ḇefawi roi ifrur na. Fafisu ”min ḇese ḇyesi smam rarirya sisnesna nfafardun.” Rupa radiri, roi kofrur na na nawyae snonggaku ḇesesya. Komewer kobuk ampun faro snonggaku ḇefrur sasar ḇe ko ido, rosai na ḇejadi ya? Ḇepon ya, kofrur duf i, snar imbude koswar i wer ḇa ma kofandun i ḇa. Ḇesuru ya, bisa kofrur naek srar ro sidang sya skain kuker payamyum ḇa fyor sfawi kosya kona masala kuker snonggaku ani.

13. Rosai kofarkor ro Kristin fawar ḇyena?

¹³ Kobuk ampun ḇe naek srar koḇesi ido, ko ma snonggaku ḇesesya nari sḇaḇir fainda ḇyena. Eḇedari iso imbesrar perintis ḇenir Kristin ismai na. * Ro ras oso imsor kuker imbesrar oso ro sidang ya. Kristin fyawar ḇo doḇe, ”Fyorno ido dawos aya, wos ḇyenama napyum ḇaḇeri, ma nafrur sneri kar. Yamewer yaḇaryas kuker i. Roi ine ifnai ḇo, yamyaren yabaryas ḇa ma yana marisen oḇa.”  Randak ya, Kristin ḇyaḇir snar roi ifrur faro imbesrar ani nsasar ḇa. Ḇape ḇarpur ya, ḇyesewar fa isawen sne ḇefafayaf ḇyedi faro imbesrar ani ma kyara sneḇaḇir manggun ḇyena ḇa. Mura, insape bisa byuk ampun ḇe imbesrar ani. Iso anun Refo ro artikel ”Ampunilah dengan Segenap Hati Saudara”, ḇero syap Menara Pengawal 15 Oktober 1999. Kristin doḇe, ”Yafawi snar kokame fandun fa koḇesewar fa kona kenem ḇebabo ya. Yaswarepen kako wer snar Yahwe imarisen byuk ampun faro ko ro ras nakam. Kirine, yaḇaḇir yasmai sneprei.”

14. Raris Matius 18:21, 22 ya, rosai rya samswen faro manwawan Petrus fa ifrur na, ma rosai kofarkor ro Yesus kankarem ḇyena?

¹⁴ Kofawi fandun fa koḇuk ampun. Ḇape, imbude komam ine rya syamswen fa kofrur na. Komam kada Manwawan Petrus dakḇaḇir rarirya. (Wasya Matius 18:21, 22.) Inja, rosai na ḇefnoḇek koni? Randak ya, kwarauser Yahwe ima byuk ampun ker ḇe au. (Mat. 18:32, 33) Kakuya, koma kosyus ḇa fa Yahwe byuk ampun ḇe ko. Fama imbe byuk ampun ḇe ko. (Mz. 103:8-10) Ramnai ido, ’ko kako koswaryae ko. Inja, na kobuk ampun kaku faro naek srar koḇesi. Inema marisen koḇena risyaḇa. (1 Yoh. 4:11) Ḇesuru ya, kwarauser rosai monda fainda ya fyor kobuk ampun. Bisa komam pyum kabero wis kobena kuker snonggaku ḇefrur duf sne kobena, kofrur sidang ya ḇyeoser pdef, ma koḇebati pdef kuker Yahwe I. Ko kako nari komarisen ma koryaḇ. (2 Kor. 2:7; Kol. 3:14) Ḇekyor ya, ḇenadi faro Yahwe I, ḇeyor ko fa kakbuk ampun faro snonggaku ḇesesya. Setan imbe ifrur wis kobena kuker naek srar sya naḇyeḇa. Ḇape, kopok komam monda awer na fa ndrarirya. (Ef. 4:26, 27) Kofandun fanfnoḇek Yahwe insama koso awer Setan marisen ḇyena.

15. Imnis kuker Kolose 3:13, rosai bisa wafrur ya fyor min Kristen ono ifrur wamsore?

¹⁵ Rariso fyor min Kristen ono dawos ḇaido ifrur roi oso ḇefrur wamsor kaku? Rosai fandun fa wafrur ya? Ḇesewar fa bedame kukeri. Fawar roi ḇero sne bedi faro Yahwe. Ḇenadiwarek snonggaku ani, ma wor insama bisa mam rari-rari ḇepyum ro Yahwe imarisen ro snonggaku ani. (Luk. 6:28) Fyor samswen fa ḇuk maaf faro snonggaku ani ido, besewar fa wawosasuser kuker i. Kwara awer ḇo woḇe kakuya imbe ifrur kosnesna naduf. (Mat. 5:23, 24; 1 Kor. 13:7) Ḇape, imewer ḇyedame kuker Au ido? Ḇekaḇaḇaḇ faro i. Wakyar snar ras oso nari ḇyedame kuker Au. (Wasya Kolose 3:13.) Ma ḇefandun syadi iso, wafafayaf ker awer i insamaido ḇaḇebati bena kuker Yahwe namuk ḇa. Roi risai wer nafrur awer au fa wakarkar. Wafrur rarirya ido, fasnai sna waswar syadi Yahwe I ḇardibur rosai riryawer.​—Mz. 119:165.

16. Fakamamar rosai kosmai na?

¹⁶ Kokame kuffarmyan Yahwe I ḇe ’nai oser’ kuker farkankin ro ”manfarandows oser”. Na kokofen kasumasa nabor faro ḇaḇeoser anine! (Yoh. 10:16) Syap Diorganisasi untuk Melakukan Kehendak Yehuwa, ram ḇeḇe 165, fyasḇair radine, ”Snar wasmai fainda ro ḇaḇeoser ine, nwa fakamamar fa faduru na.” Inja, fandun fa ”kofarkor manggun ko fa komam snonggaku ḇesesya namnis Yahwe nyan Ḇyena”. Faro Yahwe, kokame koma ”romawa kasun” ḇemaeja. Nwa mamam ḇemnis raris Yahwe I ke? Waswarepen, Yahwe myam ma ḇyesyowi roi nakam wafrur fa wafnoḇek ma wakadaunwarek min Kristen bedi.​—Mat. 10:42.

17. Snemuk rosai imbe kun na?

¹⁷ Koswar naek sra koḇesya. Eḇedari, ”koḇesewar insa kofrur awer roi oso, ḇefrur fa naek ḇena kakyar oser isma fafrowes ma isapi ro sasar”’. (Rm. 14:13) Imbe komam sikaki syadibur ko. Imbe kobuk maf ro sne kobena. Komewer kokarkar snar snonggaku ḇesesyandi. Rarirya, mgorama ”kokenem ro ḇaḇeoser ma kofarkoryaye ko”.​—Rm. 14:19.