Yaḇeaḇen ro kota Amioûn ḇero Lebanon ro tanggal 19 Mei 1940. Taun riḇeso ramnai, kina nggobedi nggora nggoḇarek ro kota Tripoli, ma yaba ro diwa. Kina inggobedi neaski ma nggoswaryae inggo. Yasur yaba ro napnapes ya. Eba ayeskoya skoḇe rim ma aya iso romawa ḇepupes, inja bin rikyor ma snon risuru. Sinan ayesuya, sasewar pipi yama roi ḇefandun manggenem faro suḇa nairi. Roi ḇefandun syadi ro kina inggobedi iso nggofarkor Refo, nggoso fananjur, ma nggofnoḇek snonggaku ḇese sya fa sakmambir Allah.

Ḇeponiwara, snonggaku Kristen ḇesmai ramrem ḇeḇeso sisya ro sidang inggobedi. Oser yaiso Michel Aboud, ḇefarkin syap farkarkor sidang. Isrow ḇaḇenapnapes ro New York ma byaryas ro Lebanon ro taun 1921. Yaswarepen ima ifrur pyum kaku faro imbesrar ḇebabo ḇemnai ro farkarkor Gilead, Anne ma Gwen Beavor. Ḇyesyowi su. Inggoine kam nggoḇe bati ḇepyum. Taun ḇe taun nande mura, yamarisen kaku yasrow Anne ro Amerika Serikat. Fyoro ḇa mura, yasrouw Gwen i kako, ro fafisu ani fyarḇuk kuker Wilfred Gooch ma isya duffarmyan ro Betel London ḇero Inggris.

Ro fafisu yababo kaker ya, Saksi ḇero Lebanon sakbor ḇa. Ḇape, nggosmai roi ḇedwarek ro manfarkin agama sya raryano nggoryaḇ kaku fa nggofawar Refo na faro snonggaku ḇesesya. Fawar nasya yaswarepen kaker na.

Ro ras oso, rofyor aya ma eba yeja, Sana i, nusya nubaryas ro apartemen ya, fyoro ḇa ido pendeta oso ryama. Nukara ono sisya sikofenbadir ḇe i. Pendeta ani ryama ḇo ifyak eba yedi, ramnai irmom ma pyampum Sana i rawo isapi ro kakar ya, ḇo ḇyepar. Ḇape, oso isya ḇyetelefon polisi. Polisi srama ma smamnis sia sifnoḇek Sana i. Mura, sun pendeta ani ḇe kantor polisi, skomam ido dun pistol ya. Ḇebukor ro polisi ya ifuken i, ”Bapa pendeta aw ine manfarkin agama risaw ke ḇaido ketua geng?”

Roi ḇese wer yaswarepen kaker ya iso fyor sidang inggobedi nggoḇesewa bus fa nggokibaryas ro mnu ḇebinggwan na. Rofafisu ani nakame nambran pyum isof pendeta oso fyawi nggosya nggobaryas ro diwa. Iryur kasawa sya, ma smun inggo, ḇo sikso inggo kuker karui. Kamam yedi ḇyepar. Yaswarepen mgasi nafo rike. Mura, Kamam ma Awin sukaḇerda suyek ro bus, ma inggokame nggoso. Ras anya, nggomgak ra. Ḇape, fyor Awin ḇyensren Kamam par ḇyedi, Awin doḇe, ”Yahwe, ḇemaaf si. Sifawi roi sifrur na ḇa.” Awin wos ḇyena ine yaḇefnder na ḇaḇeri.

Roi ḇese nawer iso nggora nggomamfar karyer nggoḇesya ro mnu marin inggobedi. Ro kpu yedi rum ḇyeja, nggosrow kuker uskup oso kawasa sya sesyowi kaku. Ifawi sinan ayesuya Saksi-Saksi Yahwe suiri. Fafisu ani, yaḇeumur taun riwonem kaker. Ḇape, uskup ani ḇyesewar fa ifrur yamai inja ikofen ḇe aya, ”Ḇebaptis ḇaim kukro?” Yakarem ḇo yoḇe yabaḇa kaker inja, ma imbe yakḇebaptis ḇoi na yafawi nabor Refo ya kwar ari ma yana kakyar ḇesambraḇ diso. Imarisen faro roi yakofen ani ḇa. Inja, ikofen ḇe apus yeja ḇo doḇe ayama yafawi sopan ḇa.

Imboi kakuya, fawar ḇepyum ḇa ḇerarirya nabor ḇa. Snonggaku Lebanon ḇebor sya sima si frur pyum. Inja, bisa nggobaryas yoḇ si ma ḇebor sya simarisen sfarkor Refo.

Fafisu yafarkor kaker ro rumfarkor ya, naek ḇebabo oso ḇeraker Venezuela ryama ḇe Lebanon. Dakfanjur ro sidang nggobedi ma ḇarpur ya ḇyepacaran kuker Wafa, eḇa yedi. Ḇarpurya, sufakawin ma suḇarek ro Venezuela. Wafa fyarem ker surat ḇe aya, snar myander kaku inggo, ḇyesewar fa dawos ḇe Kamami fa nggokam  nggobur ḇe Venezuela. Imbarya, nggun snemuk fa nggobur ḇediwa.

Nggobur ḇe Venezuela taun 1953, ma nggoḇarek ro Caracas, fanam istana presiden. Snar fafisu anya yaḇabo kaker inja, yamarisen kaku yamam presiden oto ḇyedi ifrar. Ḇape, sinan ayesuya samswen ḇe su fa sufrur farawe faro roi ḇero moḇ anya, wos na, rari sena, roḇean, ma cuaca na. Ma ḇarpur mura fyor imbe sufrur fararwe anna ido, roi ḇeḇyeḇa oso ḇyejadi.

Kamami idufe. Nggokara ḇaḇeri snar Kamam ima syambraḇ ma dakduf ḇa. Yafawi ima idafduf ḇa. Ḇape kakuya, ismai kanker pankreas, inja seoperasi i. Minggu swaf oser mura Kamam ryoe.

Nggoḇe saneso kaku nggoḇor nggoḇe rari. Fafisu ya, yaḇeumur taun ri 13 kaker. Nggokara ḇaḇeri nari Kamam ryobur inggo. Nggofawi ḇaḇeri moḇsa na nggokenem rai snar ryobur nggo kwar. Ro swaf ḇeḇeso fyor Kamam ryoe, fyorno ido Awin rya ikyar kaker ḇa snar Kamam isne ḇa kwar. Ḇape, nggofawi snar nggoḇe sneso ker awer, ma Yahwe ifnoḇek inggo ro ras-ras ḇefo kandera ani. Ḇarpurya, fyor yaḇeumur taun ri 16 yamnai ro farkarkor yena ro Caracas, ma yamarisen kaku fa yakfararur fa yakfnoḇek kina inggobedi.

Ro fafisu ani, eba yedi, Sana, fyarḇuk kuker Rubén Araujo, ḇekaḇer ḇe Venezuela fyor imnai ro Farkarkor Gilead. Fyor sufakawin kwar, sukaḇer ḇe New York. Kina yedi nggun snemuk fa yara yaḇekuliah ro New York. Ro diwa, yaḇarkus eḇa yedi swari su. Sufnoḇek kaku aya fa yafanam syadi kuker Yahwe. Osower ido, naek ḇebor ḇemas ro rur sya sisya ro sidang wos Spanyol ro Brooklyn, moḇ nggofanjur roya. Ro dia naek Milton Henschel ma Frederick Franz suisya, suyuffarmyan kayam ro Betel Brooklyn.

Yaḇekuliah indokada taun oser ro New York, yakara mura ro kenem ayena wer. Ro fafisuya, yakara ker artikel ḇebor ro Baryas ḇeyawos kuker snonggaku Kristen bena cita-cita rohani. Yamam ḇoi perintis sya ma min ro kina Betel ḇero sidang nggobani seaski kaku, ma imbe yakmnis si. Ḇape, yakḇebaptis ḇaim. Yafawi fandun fa yaḇuk kenem yena faro Yahwe. Inja, yafrur roi ani, ma yakḇebaptis ro 30 Maret 1957.

Yaḇebaptis ramnai, yakara fa imbe yafarmyan ro oras nakam. Yamarisen yakḇe perintis kaku, ḇape yafawi roi ani napyan ḇa. Moḇsa na yaḇekuliah ḇoi yaḇemerintis kako? Aya ma kina yedi na nggofarem surat ḇesya kwar. Ro surat anna, yafawar ḇe si snar imbe yamnai yaḇekuliah, imbe yakaḇer ḇe Venezuela, ma imbe yakḇe perintis.

 Yakaḇer ḇe Caracas ro paik Juni 1957. Ḇape ro fafisu ani, ro kina inggobedi nggoḇe susa pipi, ma fandun oser ro inggo daksewar pipi. Ma fafisu ya sor aya fa yafararur ro bank, ḇape yamarisen kaku yakḇemerintis. Ma ine iso ḇefnai fa yakaḇer ḇe Venezuela ya. Mura, yun snemuk fa yafararur ro oras ḇesiper ro bank ḇo yaḇemerintis. Ma yafararur ro taun ḇeḇeso. Yaḇesibuk kaku, ḇape yasmai aski kako.

Yamarisen kako yasrow kuker Sylvia i, imbesrar ḇedoser ḇeraker Jerman ḇeswar kaku Yahwe I. Dakso sinan ḇyesu fa skora ḇe Venezuela. Ḇarpurya, nufarḇuk ma nuna roma oser, snori Michel (Mike), ma inai oser, snori Samira. Yamamwarek kako Awin yedi, ma ḇyarkus inggo. Imbo, yamnai yaḇemerintis snar yana fakamamar ro kina dori. Ḇape, yaryaḇ fa yabaryas. Sylvia nukako nuḇesewar fa nuḇemerintis ekstra ro fyor selibur ya.

Raris yafawar ḇepon ro artikel ine, yakara nabor kenem ayena. Ro fafisuya, romawa nuḇesuya sufarkor kaker. Nggokenem mararen, ma ḇefararur kayam kuker aya ro bank sya sesyowi aya. Ḇape kakuya, yamarisen smambir aya ḇe Yahwe manfamyan Ḇyedi. Yakara ker rosai bisa yafrur na. Inja, aya ma swa yedi nuyawos asuser barbor ro kumpan nggobena. Yamnai ro fararur ido, na sḇak pipi ḇaido pesangon na. Ma nggokenem syadadi ḇa ido, pipi nggobena nari nasrow faro fandun ras-ras ro taun ḇeḇeso snar nggakna nyaki ḇa.

Inema nyan ḇepyan risyaḇa, ḇape swa yedi ma awini sumarisen faro snemuk yun na. Inja, yana aw fa yaḇemerintis wer. Yamarisen kaku! Ḇape, nggosmai angginem nggokara ḇaḇeri.

Ras oso, dokter ikofen ḇo doḇe Sylvia fyardores nafrur fa nukandor kaku. Ma numarisen kaku, ḇape yakara wer, ’Na bisa yaḇe merintis ke?’ Imboi, nufasos nu kwar faro romawa na ḇeyaḇen babo ine. Fama ro fafisuya, yaḇeḇirḇar kaker na bisa yaḇemerintis kaker ke roḇa.

Rofyor nuyawos asuser na ramnai, nuyun snemuk faro aw nuyawos ḇepon ani. Roma nuḇedi, Gabriel, ḇyeḇeaben ro  paik April 1985. Ramnai, yamnai ro fararur yena ro bank ma yaḇemerintis ro paik Juni 1985. Ḇarpurya, yaḇe anggota Panitia Cabang. Ḇape, kantor cabang Venezuela ryoro Caracas ḇa. Inja, na yafrar ḇe diwa swaf ya indokada kilometer ri 80 na yaramura ḇe Betel ramnai yakaḇer wer ro kali risuru isof kali rikyor ro minggu oser.

Kantor cabang Venezuela isya ro kota La Victoria. Inja, nggun snemuk fa nggokam nggora nggoḇarek ro diwa insama fyanam ḇe Betel. Inema fararwe ḇeba ḇe inggo. Yakofen kasumasa nabor ḇe kina yesya, snar fafnoḇek ḇeba sbuk na. Srar eba yedi, Baha i, iso ḇemarisen ḇemamfaduru awin nggoḇani. Ro fafisuya, Mike dakfarḇuk kwar, ḇape Samira ma Gabriel suḇarkus nu kaker. Snar nggoḇarek ro La Victoria, inja subur bati suḇesya ro Caracas. Ḇesewer ido, fandun fa Sylvia i kako ifrur fararwe fa ḇyarek ro kota ḇekasun ma nggokam nggoḇarek ro rum ḇeba manggun ḇa. Imbo, fararwe nabor nasya nggofrur na fyor nggobur ro Caracas ḇe La Victoria.

Ḇape, rofyor ani fararwe nasya wer. Gabriel dakfarḇuk, ma Samira ḇyarkus nu wer ḇa. Ramnai, aya ma Sylvia sor nu fa nura ḇe Betel ro taun 2007. Ma, nuyuffarmyan ro Betel isof ro kirine. Mike, romawa rak nuḇedi, duffarmyan ḇe penatua, ma dakḇemerintis fnoḇek swari, Monica i. Gabriel i kako dakḇe penatua, ma duffarmyan ro Italia fnoḇek swari, Ambra i. Oso wer, Samira ḇyemerintis ḇo dakfnoḇek ro Betel ḇe relawan jarak jauh.

Yun snemuk ḇebor ro kenem ayena kwar. Ḇape, yafafko na ḇaḇeri. Ma snemuk yun nane nari yufepen nako pdef. Yakofen kasumasa kaku faro roi nakam yafrur faro Yahwe I. Rofyor yuffarmyan I, yafawi snar ḇefandun kaku iso yana wis ḇepyum ḇefanam kuker Yahwe I. Kun snemuk ḇeba ke kasun ke rariryano, Yahwe bisa byuk aski ”ḇesyadi ro kakara”. (Flp. 4:6, 7) Aya ma Sylvia numarisen kaku nuyuffarmyan ro Betel. Nuḇaḇir Yahwe ḇyebarakas snemuk nuḇena kam snar nusewar ḇepon I.