RO SWAF taun ḇe taun, snonggaku Israel sya sbuk farsarser faro fararur ro ḇaḇesamsyom sena. Ḇape ro Yesus fafisu ḇyedi, snonggaku Yahudi fandun fa sḇak som rosai riryakam, ma ine nafrur kandera si.

Insamaido fararur ḇebor ḇero bait na nambran, snon Yahudi oser-oser ro Yesus fafisu ḇyedi, na sḇak som barbor ya peser ri syekel (drakhma risuru ḇaido dirham risuru). Ro Yesus fafisu ḇyedi, som ani sbuki byak aiwan sfarser na ma sbuki mamwarek kako bait Herodes ḇyawes na. Snonggaku Yahudi riḇeso sifuken Petrus i ḇo soḇo Yesus dakḇak som ani ke roḇa, ma Yesus doḇo sḇak som ima roi ḇesasar risyaḇa. Imboi, Yesus ikofen ḇe Petrus rodiso na ismai pipi fa byuki ḇak som ani.​—Mat. 17:24-27.

Ro fafisu ḇepon naiwara, Allah kawasa Ḇyesi sor si kako fa sḇak ḇar ḇeḇesamfur, isoine ḇar ḇeḇesamfur ro yaf sena ḇaido roi sismai na. (Im. 27:30-32; Bil. 18:26-28) Manfarkin agama skor kaku faro roi anine. Sor kaku ḇe snonggaku sya fa sḇak ḇar ḇeḇesamfur ro roi sinek na oser-oser, imniso roi sbuki kanggun raris sorḇe tanaman mint, adas ma jintan putih. Yesus ikofen ḇa snar sbuk ḇar ḇeḇesamfur ani nama nsasar, ḇape Yesus dawosbos ḇefawi nananem Refo Yahudi ansine ma snonggaku Farisi snar sanggarkar.​—Mat. 23:23.

Oso wer ido, ro Yesus fafisu ḇyedi, snonggaku Yahudi sya kako na sḇak som faro pamarenta Romawi, ḇepoik faro sina. Imnis ra, snonggaku bena yaf sya na sḇak som rupa ra pipi ḇaido roebor na. Ḇaḇyak som ine baba ḇyena persen ri 20 isof 25 sismai ro yaf sena. Ramnai wer ido, snonggaku Yahudi oser-oser kako sḇak som faro Kaisar. Snonggaku Farisi sya sisewar nyan fa imbe sifrowes Yesus i, inja sifuken som anine. Yesus kyarem ḇo fyasnai rariso komam ḇaḇyak som ine inja doḇo, ”Mkoḇuk faro Kaisar rosai Kaisar dor ro mko ma mkoḇuk faro Allah rosai Allah dor ro mko.”​—Mat. 22:15-22.

Roḇebor ḇesun ma ḇesasyar na ro sup oso na nari sor ḇaḇyak som na kako. Ḇaḇyak som ine sor na ro pelabuhan, jembatan, nyan farsam, kedwa ḇesun ro kota, ḇaido kedwa ḇesun ḇe pasar na.

Kawasa sya sekandera kaku kukro pamarenta Romawi sor som nabore. Manfawinanem sarisa Romawi ḇenir Tacitus doḇo rofyor Kaisar Tiberius ḇyepoik ya, ro fafisu anya Yesus isya ro supswan, Siria ma Yudea sor insama som nane sḇenafa nado.

Snonggaku sya sekandera kaku snar ḇeyor som sya sor nabor kaku. Ro fafisu ani, snonggaku sya bisa sakso fa saksmai nasan ḇe ḇeyor som. Snonggaku skinfir sya siso snonggaku ḇebak nabore. Rofyor ḇyeḇekinfir kwar, ḇeyor som ine nari dakbuk fararur ine ḇe bese fa sakkor som na. Ma snonggaku ansine saksewar untun ḇe manggunsi, isoine kuker sor nabor syadi wer. Zakheus imbude dakbuk fararur ine ḇe snonggaku ḇeraryan sya. (Luk. 19:1, 2) Iso ḇefnai fa, snonggaku sayin ma simewer sḇebati kuker ḇeyor som sya.