1. Rosai ḇefnai fa Setan sbukimnis ra ḇesamsam oso?

SNONGGAKU ḇesamsam oso nya fandun oso monda, isoine ifor ḇaido myun aiwan syewar ya. Raris Refo fyasnai na, na byuk denem nabor fa ifrur marisen ḇyena. (Ayb. 18:8-10) Mboi, rariso snonggaku ḇesamsam oso ifrur aiwan iḇe ifor ya syun ro denem ḇyedi rai? Ḇepon ya, fyarkor fa fyawi aiwan iḇe ifor ya. Imnis ra, syewar fa fyawi rodiso aiwan ani isya rona, rosai imarisni, ma denem ḇemnis rariso ḇesrow fa byukifori. Setan i kako fyarkor fa fyawi ko. Myamepen kaku rosai kofrur ro rasras na ma rosai komarisni, mura ryir denem ifawi ḇesrow kaku fa byukifrowes ko. Rariryano, Refo byuk kakakyar ḇeko snar kosun ḇe denem ani, ḇoi na koperbur rona. Refo fyarkor ko kako moḇsa komkeibur ro denem ya.

2. Denem risuru risai Setan byukifrowes ko na?

² Denem risuru Setan byukifrowes iso ararer ma ḇemarisen ḇena syadi. * Ro Taun syaran ri syaran kwar, Setan ifrur snonggaku sya kwar fa sna rari-rari ḇeḇye ḇa ḇerarirya. Ima imniso ḇefor man ḇebuk ara ḇaido pam fa ifor aiwan iḇe ifor ya. (Mz. 91:3) Ḇape, na komkeibur Setan denem ḇyena. Snaro? Snar Yahwe ikofenḇair kwar fafrowes risai monda Setan byukifrowes kona.​—2 Kor. 2:11.

3. Rosai ḇefnai fa fawar riḇeso ro Yahwe manfamyan Ḇyesi ḇeararer ma ḇemarisen ḇena syadi sifas ro Refo ya?

 ³ Yahwe byuk fawar riḇeso ro manfamyan ḇyesi fa nbuk swarapepen ḇe ko faro roi ḇeḇye ḇa ro rari ararer ma ḇemarisen ḇena syadi. Nari kawos fawar riḇeso sena. Rodia, na komam Setan ifrowes kwaro Yahwe manfamyan Ḇyesi ḇefarmyan fyoro kwar sya. Rarirya ido, nari kaksapi ro denem ya kako ke? Aroḇa. Yahwe myam kaku fawar sena neḇefasepen ro Refo fa nḇe ’swarapepen maḇeko’. (1 Kor. 10:11) Ifawi kaku snar fyor kofarkor denem Setan ḇyukifrowes kona, na komkeibur Setan denem ḇyena.

4. Rofyor kararer ko ido, rosai ḇejadi ya?

⁴ Setan imarisen kararer ko. Ifawi fyor kararer ko, nari komnis i ma kosmai kankenem fyoro ya ḇa. (Ams. 16:18) Manwawan Paulus byuk swarapepen kako ḇe snonggaku Kristen snar na sararer ḇaido simarares si ma sismai samamyai imniso Ibiris ismai na. (1 Tim. 3:6, 7) Inja kobabo kaker ro kakaku ya ke ḇaido kofarmyan fyoro kwar, fandun fa kokam kosasor pyum ko kaku.

5. Imnis Pengkhotbah 7:16, 20, snonggaku ḇeararer ya imnis rariso?

⁵ Snonggaku ḇeararer ima fyandun manggundi. Setan imarisen kofandun manggunko syadiburo Yahwe, syadiwer rofyor kosmai samswen. Imnis ra, ras oso ausya sanonef ḇaido sifrur mnis au ḇa ke? Fafisu ndarirya, Setan imarisen wabuk sasar ya ḇe Yahwe I ḇaido organisasi Ḇyedi. Ibiris imarisen wafrur mnai pyan samswen ḇyena kuker nyan mangun ḇena, ḇape waso farkankin Yahwe byuk ro Wos Ḇyena ḇa.​—Wasya Pengkhotbah 7:16, 20.

6. Farkarkor risai wasmai ro imbesrar oso ro Belanda fawar ḇyena?

⁶ Mampan fawar ro imḇesrar oso ro Belanda ḇefafayaf kuker ḇaḇeraryar ḇa ro naek srar ro sidang ḇyedi. Dawos ḇo  doḇe ipok ḇa kwar kuker si. Fyawar, ”Ḇarpur ya ḇyero manggundi ma ifafayaf ker. Inja, ikofen ḇe swari fa sura ḇe sidang ḇese.” Mura imḇesrar ani myam munara, JW Broadcasting^® paik Maret 2016. Rodia, fyarkor nyan moḇsa myam ḇaḇeraryar ḇa ro snonggaku ḇesesya. Doḇe, ”Ifawi kaku fyandun sne ḇerun. Fandun fa fyadwer kenem ḇyedine, ḇoi dor naek srar ḇesesya sifrur fararwei ḇa. Rofyor myam munara ani, nafrur i fa myam monda faro Yahwe. Iso ḇena hak fa dap rosai na ifrur kaku na.” Inja, rosai farkarkor ya? Fyor samswen naisya ido, mam monda faro Yahwe I pdef. Wor fafnoḇek ḇyedi insama mam snonggaku ḇese imnis nyan myam si raya. Kma koḇedi ro nanggi kako myam sasar sena, ḇoi imarisen byuk ampun ḇe si. Ikako imarisen kofrur rarirya.​—1 Yoh. 4:20.

7. Fawarpan Raja Uzia farfyar ḇyedi.

⁷ Uzia iso raja Yehuda bena payamyum nabor. Kyafyo mbroḇ ḇesya ro mamamun ḇebor, ḇyawes kota ma manara nabor, kuker nya yaf ma rofanfan nabor snar ’Allah ḇekaku byuk payamyum ḇe i’. (2 Taw. 26:3-7, 10) Mboi Refo doḇe, rofyor syambraḇ kwar, sne ḇyedi dararer isof ro ifrur manggundi isapi. Nafnai fa, Uzia fyasnai sne ḇekaki syadi ma imewer sbuk anun ḇe i. Uzia syun ḇe bait ma fyarser dupa, Yahwe dap kwar ḇe imam sya monda fa siso ḇefrur nandi. Yahwe imarisen ḇa ma byuk dafduf pado ḇe Uzia i.​—2 Taw. 26:16-21.

8. Imnis 1 Korintus 4:6, 7, rariso komam kaku manggun ko rai?

⁸ Bisa kakḇe ararer ko ma kofrur sasar raris Uzia i ke? Mgorama komam fawar ro José. Ima snon ḇenana rirya ma ḇye penatua fyoro kwar. Dun ker faya ro munara sarawrow wilayah ma regional. Pengawas wilayah fyorno ido ifuken karkara ḇyena kako. Manggundi ikofen, ”Yakyar manggundaya ma pengalaman yena. Nafrur fa yaḇefnder Yahwe. Snar yakara yasambraḇ, inja yamewer yarower anun ma swarapepen ro I.” Ḇarpur mura, José ifrur sasar ḇeba ma sisasyar i. Taun riḇeso mura, kyaḇer wer ḇe sidang. Doḇe, ”Yahwe fyarkor aya snar ḇefandun kaku ya iso soasuser koḇena faro Yahwe I, fararur koḇena ro organisasi ya ḇa.” Koswarepen, samambraḇ ma fakamaman risai monda  kosmai ro sidang ndramuma ro Yahwe I. (Wasya 1 Korintus 4:6, 7.) Rofyor kararer ko ido, Yahwe na dunbur ko roi byuk ḇeko na.

9. Snar ḇemarisen ḇena syadi, rosai Setan ma Eva sufrur ya?

⁹ Kawos ḇemarisen bena syadi, imbude kokara ḇeri ḇe Setan Ibiris i. Randak, Setan nya fararur ḇepyum syadi nabore snar iso oser ro Yahwe malaikat ḇyedi. Ḇape kyara roi nya nane nasrow ḇaim. Inja samsyom ḇebuk monda faro Yahwe, imarisen fa sbuk samsyom ani ḇe i. Naiso ḇefrur fa, Setan byesewar fa kakmnis i, kokara roi kona na nasrow ḇaim. Ifrur roi ine rofyor ifrowes Eva i ro Yaf Eden. Komam ido, Yahwe fyasnai saswar ḇyena kuker byuk roḇean nabor ḇe Eva ma swari. Byuk fa suyan aibon ”ro aiknam nakam ḇero Yaf ine”, ma oser monda idwarek ya. (Kej. 2:16) Fama, Setan ifrur Eva kyara snar fandun fa Eva dan aibon ro aiknam Allah idwarek anya. Eva ḇyaḇir roi ismai na nasrow ḇaim. Imarisen ismai nabor syadi. Kofawi kaku, roi ḇeḇye ḇa iso ismai na. Eva ifrur sasar ma ḇarpur ya imar.​—Kej. 3:6, 19.

10. Rosai ḇejadi ya fafisu Raja Daud iḇe imarisen nya syadi?

¹⁰ Raja Daud sismai barakas nabor ro Yahwe. Ḇyekayan, nya nasan ḇekaki, ma kyafyo mbroḇ ḇyesi ro mamamun ḇebor. Daud manggundi ikofen snar barakas ḇyena nabor fafayaḇa fa fyawar na, ma ikofen kasumasa. (Mz. 40:5) Mboi, Daud fafisu oso ḇyefnder snar Yahwe byuk roi nabor ḇe i kwar. Ḇyaḇir roi ismai na nasrow ḇaim ma imarisen nya syadi wer. Imnis ra, Daud nya binswa sibor kwar, ḇoi imarisen kaker snonggaku ḇese siswasi, isoine Bat-syeba, Uria snon Het swari. Inja, Daud denefus kuker Bat-syeba i, ma Bat-syeba fyadores. Ḇeḇye ḇa syadi wer iso, Daud nya wos kwar fa ifrur fa Uria imar. (2 Sam. 11:2-15) Ryani, rosai ḇefnai fa Daud denefus Uria swari? Kyara Yahwe myam roi ifrur na ḇa ke? Daud ḇerandak isouser faro Yahwe ḇoi isapi kukro imarisen nya syadi wer, ma nun bon ḇeḇyeḇa ḇe i. Infama, Daud manggundi ikofenḇair sasar ḇyena ma imbror. Daud ismai sneprei  kukro Yahwe imarisen byuk ampun ḇe i.​—2 Sam. 12:7-13.

11. Ro Efesus 5:3, 4, rosai kofrur kaku insama kona marisen ḇesyadi ḇa wer?

¹¹ Rosai kofarkor ro Daud fawar ḇyena? Kofarkor insama kona marasrisen ḇesyadi ḇa, fandun fa kokofen kasumasa ḇesya kwar faro ḇarakas bebor Yahwe byuk na. (Wasya Efesus 5:3, 4.) Kokofen kasumasa faro rosai kosmai na. Kanun ker ḇe ḇefarkor Refo ḇebabo kaker fa kyarauser barakas oser Yahwe byuk fa ikofen kasumasa kuker na. Rofyor kofrur roi ani ras ḇe ras ro minggu oser ido, ikofen kasumasa kwar faro roi rifik. (1 Tes. 5:18) Manggundaw wakfrur rarya kako ke? Fyor kwarauser roi nakam Yahwe ifrur ḇe Au kwar na, nari wakofen kasumasa ḇesya kwar. Rofyor wakofen kasumasa ḇesya kwar, nari wasmai marasrisen. Ma nari nafrur nwa marasrisen ḇesyadi ḇa.

12. Snar marasrisen ḇesyadadi, rosai Yudas Iskariot ifrur ya?

¹² Yudas Iskariot iso snon ḇesouser ḇa ḇeḇyeḇa kaku. Imboi, randak ya ryarirya ḇa, snar Yesus kyinfir i fa ḇye manfamyan ḇyedi. (Luk. 6:13, 16) Smam ido, randak Yudas ima snonggaku sikyar dirya. Inja sbuk fararur ḇe i fa ikram pipi Yesus ma manwawan sya sismai na. Pipi nane sbuk fa sbukḇak mararan sena ro ḇaḇebaryas ya. Imnis ra baboine, pipi organisasi koḇedi sismai na nesonem fararur ro supswan ḇesiper. Ma, ḇarpur mura Yudas imarisen nya syadi nafrur kyaraw. Yesus byuk swarapepen ker ḇe manfamyan ḇyesi kwar faro marisen ḇena syadi. (Mrk. 7:22, 23; Luk. 11:39; 12:15) Ḇape, Yudas imewer iso wos swarapepen anna kam.

13. Rosai ḇefasnai kaku snar Yudas kaku ima imarisen nya syadi?

¹³ Rari ḇemarisen bena syadi Yudas fyasnai na neḇemam fyoro ḇa fyor Yesus sbuk samamyai marmar ḇe i ḇaim. Ras ani Yesus ma manfamyan ḇyesi, iso Maria ma Marta srar ḇyedi kako, sor siḇe Simon rum ḇyedi randak ḇeduf pado ya. Ro diwa, Maria isḇawer mani ḇespum ḇekakur kaku ḇe Yesus bukor ḇyedi. Smam roi ani, Yudas ma manfamyan ḇesesya simsor fafayaḇa. Manfamyan ḇesesya imbude skara snar ipyum ya pipi sya sbuk faro snonggaku ḇesaḇarar sya. Ḇape Yudas iyokef roi oso ro swaruser ḇyedi. Snar ima ”kyarawraw”, imarisen pipi ansya sisun naro farser burua duf na insama dun na. Ḇarpur mura snar nya mararisen ḇesyadadi ya, Yudas syewar fa ḇyoḇ Yesus snar myam baba ro pipi ani imnis ḇaḇyak ro women oso.​—Yoh. 12:2-6; Mat. 26:6-16; Luk. 22:3-6.

14. Rariso imḇeswa oso susouser anun ro Lukas 16:13?

¹⁴ Yesus byuk swarapepen ḇe manfamyan ḇyesi: ”Mko fararur faro Allah ma faro arasai awer.” (Wasya Lukas 16:13.) Imbeswa oso ro Rumania susouser Yesus anun ḇyana. Suna nyaki ḇeba ro bank. Ras oso sbuk fararur ro swaf riḇeso ro sup ḇeba oso. Sukara inema barakas ro Yahwe dirya. Ḇape samswen yaiso, rofyor suyun fararur ani, na subuk nabor ḇa raris randak sufarmyan ḇe Yahwe I. Mura suwasya artikel ro Menara Pengawal 15 Agustus 2008, ”Pertahankan Loyalitas dengan Kebulatan Hati”, inja suyun snemuk ḇepyum kaku. Sukofen ḇo suyoḇo, ”Fyor suyun fararur ro sup bondi fa susmai pipi nabor syadi ido, inema kyurfasnai wis suḇena kuker Yahwe ima nefandun kaku wer ḇa, ma ḇaḇerur nuḇena na namar.” Inja, supampum fararur sbuk anna. Fyoro ḇa ramnai, swari ismai  fararur ro sup suḇarek ya, ma pipi susmai na namnis kuker fandun suḇena. Swari doḇe, ”Kaku ḇeri Yahwe ḇramin Ḇyedi iknampu ḇa.” Imbeswa suine susmai aski kukro sukinfir fa sufarmyan ḇe Yahwe I syadiburo pipi ya.

15. Rosai ḇefnai fa kokyar kaku snar na koḇeperbur Setan denem ḇyedi?

¹⁵ Rariso fyor imbe kararer ḇaido komarisen kona syadi? Na kofrur fararwei. Paulus doḇe snar snonggaku ḇesapi ro denem Ibiris ḇyena na sḇeḇeperbur ro denem ani. (2 Tim. 2:26) Imnis raris Daud. Imarisen ryower anun ḇepakrek ro Natan, imbror, ma ifrur mnis wis ḇyena kuker Yahwe I. Koswarepen kaku, Yahwe syambraḇ syadiburo Setan. Inja kuker fafnoḇek ro Yahwe, na koḇeperbur ḇaido komkeibur ro denem rosai rirya Setan byukfrowes kona.

16. Rariso kobinggwanbur Setan denem ḇyena rai?

¹⁶ Rofyor ro randak kaku kobinggwanbur Setan denem ḇyena ido, ima roi ḇepyum syadi kaku. Roi ine kofrur monda kuker kokyar faro Allah. Kopok kokofen awer na kararer ko ḇa ḇaido komarisen kona syadi ḇa. Snar Yahwe manfamyan ḇyesi ḇe farmyan I fyoro kwar simonda sisapi kukro rari risuru suine. Inja ro ras nakam, wor ḇe Yahwe I fa ifnoḇek Au fa mam kaku rari ararer ḇaido ḇemarisen ḇena syadi naisya nawyae kakara ma rosai wafrur kwar na ke roḇa. (Mz. 139:23, 24) Wapok mam awer rari-rari ḇeḇyeḇa anna nasur ro Au.

17. Fyoro wer ḇa, rosai nari ḇeḇejadi kuker Setan Ibiris i?

¹⁷ Setan ḇyesamsam ro taun risyaran syaran kwar. Ḇape fyoro wer ḇa, nari ḇyeḇeyaḇek ma ḇyeḇemun bos. (Why. 20:1-3, 10) Kosya kowaf kaku ras ani. Imbape kirine, kosasor ko pdef ro Setan denem ḇyena. Ḇesewar kaku insama wararer Au ḇa ḇaido wamarisen nwa syadi ḇa. Wun snemuk fa ’wasampum Ibiris i, ma nari ifrarbur Au’.​—Yak. 4:7.