1. Sai ḇefnai fa snonkaku ḇeḇeso sḇenaḇye fa sesyowi si, ma rosai nari kofarkor ro artikel ine?

RARISO kofasnai syowi faro snonkaku sya? Kuker kofasnai koma kofandun si ma koḇeaḇaḇen si. Fyorno ido, na koḇesyowi snonkaku oso ḇefrur roi ḇepyum ḇaido snonkaku ḇena fararur ḇaido nasan ḇepyum. Ro artikel ine, nari kofarkor manseiso ḇenaḇye fa ḇesmai syowi ma sai ḇefnai ya.

2, 3. (a) Sai ḇefnai fa Yahwe iso ḇepon kaku fa kofasnai syowi? (Mam sonin ro randak artikel ine.) (b) Manseiso Rumkun Domba ḇeḇeyap ro Fasasna 5:13, ma sai ḇefnai fa koḇesyowi I?

² Fasasna 5:13 ikofen snar ”I ḇekain ro karapesa ḇaḇesasoser” ma ”Rumkun Domba ani” sukada suḇenaḇye fa susmai syowi. ”I ḇekain ro karapesa ḇaḇesasoser” kyurfasna ḇe Yahwe I. Ro Fasasna fasal ḇeḇe 4 ya, ḇekenem ro nanki sya sikofenḇair sai ḇefnai fa Yahwe ima ḇyenaḇye fa koḇesyowi I, isoine snar iso ”ḇekenem isof fyoro-fyoro”. Soḇe, ”O, Manseren, o, Allah nkobedi! Aw monda kada wasyus  fawasma sanandik, syowi ma papik. Snar aw ḇefrur roi ḇeḇor kam, ma snar marisen ḇedi kako roi ḇeḇor anna neḇefrur kwar ma nakenem.”—Fasasna 4:9, 11.

³ ”Rumkun Domba” ḇeḇeyap ro Fasasna 5:13 isoine Yesus Kristus i. Kofawi na ro? Rofyor isya ro supswan, sap Yesus i ḇe ”Allah Domba Mkun ḇyedi, ḇepyos sasar supswan ine.” (Yohanes 1:29) Raja ḇese isya ḇemarwarek kawasa ḇyesi ke? Kakuḇae ine iso ḇefnai fa koḇesyowi i. Yesus ima fandun kofasnai syowi ḇe i snaro ima ”Wairek robo waireksya kam ma Tuan robo tuansya kam.” (1 Timotius 6:14-16) Imbude ḇaḇir raris ḇekenem ro nanki sya ḇedisen, ”Rumkun Domba skawuk kwar ani, isyus faisma papoik, ḇaḇekayan, ḇaḇefawawi ma ḇaḇesamambraḇ; i syus fasesyowi i, isma baba ma sisandik i.”—Fasasna 5:12.

4. Sai ḇefnai fa koḇesyowi Yahwe ma Kristus ima roi ḇepyum?

⁴ Yohanes 5:22, 23 ikofen snar Yahwe ḇye Kristus i fa ḇyemankara snonkaku syakam. Iso ḇefnai fandun kaku koḇesyowi Yesus i. Ma kofrur roi ine ido, inema koḇesyowi Yahwe I kako. Rofyor kokinfir fa koḇesyowi Yesus ma Kmari, na kosmai kankenem fyoro.—Wasya Mazmur 2:11, 12.

5. Sai ḇefnai fa snonkaku syakam sḇenaḇye fa koḇesyowi si?

⁵ Snonkaku sya sḇeḇefrur imnis ”Allah nin ḇyedi” (Kejadian 1:27) Ine kyurfasna sna samambraḇ fa sfasnai rari-rari ḇemnis raris Allah I. Imnis ra, bisa sfasnai saswar, ḇaḇenaḇye, ma sawarwar. Allah ifrur snonkaku sya kuker ḇyuk ḇesi sneuser, samambraḇ fa sḇukimambir roi ḇekaku ma ḇesasar, roi ḇenapes ḇaido ankarkar, roi ḇepyum ḇaido ḇeḇyeḇa. (Roma 2:14, 15) Snonkaku ḇebor simarisen roi ḇesren ma ḇepyum ma simarisen sikenem aski kuker snonkaku ḇesesya. Ine kokandor na ḇa, snaro Yahwe iso Allah ḇenapnap ḇa ma ḇyeaski. Kakuḇae, snonkaku syakam sḇeḇefrur kuker samambraḇ fa sfarari Yahwe I ro nyan oser monda ḇa. Snar roi ine iso, sḇenaḇye fa kofasnai syowi faro si.—Mazmur 8:5.

6, 7. Rariso Saksi-Saksi Yahwe siḇese ro snonkaku ḇebor sya fyor sfasna syowi ḇe ḇesesya?

⁶ Kofawi snar snonkaku ḇesesya fandun fa koḇesyowi si, ḇape na samswen fa kofawi mnis rariso ma isof rodiso kofasnai syowi faro si. Roi ḇefnai ya iso dunya Setan rari ḇyena nawyae kankenem snonkaku sya. Snonkaku ḇebor sya smanen kaku snon ḇaido bin fa sisyom si. Snonkaku sya sesyowi Yahwe I ḇa, mboi sesyowi syadi snonkaku ḇesesya, sifrurpyum si raris allah. Imbude sfarari manfarkin politik, manfarkin agama, atlet, bintang felem, ma artis sya moḇ sisansun si, ma kenem sena raya.

⁷ Snonkaku Kristen ḇekaku sfawi snar sesyowi syadi snonkaku sya ima roi ḇesasar. Ro snonkaku ḇekenem kwar sya, Yesus demir monda ḇebuk farari ḇepyum fa kofarari na. (1 Petrus 2:21) Koswarepen snar ’kosasar kwar ma koḇinkwanbur Allah ḇebuk  koreri ḇeko’ na. (Roma 3:23) Snonkaku osoḇaḇeri ḇenaḇye fa sisyom i. Rofyor koḇuk syowi syadadi faro snonkaku sya ido, ine na nafrur fa Yahwe imarisen ḇa.

8, 9. (a) Rariso Saksi-Saksi Yahwe sya smam snonkaku ḇena papoik sya rai? (b) Fafisu risai na kosouser faro si ḇa?

⁸ Snonkaku sisya siḇye fa koḇesyowi si snar nasan sena. Imnis ra, kokarapan snonkaku ḇena papoik ma rosai sifrur yoḇ ko na. Sifnoḇek ko fa kokain pyum ro moḇ koḇena ma sḇuk fandandun faro kawasa sya. Fararur sena nun fainda ḇebor kaku. Manwawan Paulus ikofen ḇo doḇe fandun fa komam snonkaku ḇena papoik sine ḇe ”ḇesasoserya” ḇaido pamarenta sya. Ikofen kako fa kosouser sasoser sena, ”Bak faro ḇesasoserya, rosai nari bak faroi. Bak som, rofyor sor som ro naek srar mko”, ma ”mkoḇesyowi faro mansei ḇesma syowisya.”—Roma 13:1, 7.

⁹ Koḇe Saksi-Saksi Yahwe, kokame bisa kosewar kaku fa kofasnai syowi faro snonkaku ḇena papoik sya. Kakuḇae, ro sup oser-oser sasoser sena namnis kam ḇa, inja rosai snonkaku ḇena papoik sya sor ro oso iḇese kuker moḇ ḇesena. Kofararur kayam pdef kuker si. Imbape, rofyor sor ko fa kofrur roi oso ḇefrur fa kosouser faro Yahwe I ḇa ido, na komewer kofrur na. Ro fafisu ḇeradine, komarisen kosouser ma kosyowi syadi Yahwe I ḇardibur snonkaku sya.—Wasya 1 Petrus 2:13-17.

10. Rariso Yahwe manfamyan Ḇyesi ro fafisu iwara sḇuk farari ḇepyum ḇeko ro baboine?

¹⁰ Na kofarkor ro Yahwe manfamyan Ḇyesi ḇefasnai syowi faro pamarenta ma ḇena papoik ro fafisu iwara sya. Yusuf ma Maria suma suḇefarari ḇepyum. Ro fafisuya, pamarenta Romawi sya imbe sifawi barbor ro snonkaku ḇekenem ro sup ya. Maria fanam imbe kyapar kwar, ḇape iso Yusuf i fa sura ḇe Betlehem fa sufasepen su. (Lukas 2:1-5) Manwawan Paulus iso farari ḇese ḇefasnai syowi faro snonkaku ḇena papoik. Fyor skursof i ḇe snonkaku ḇefrur sasar, kuker syowi ḇyesanowarek mankundi ro ḇarpon Raja Herodes Agripa ma Festus, gubernur Roma faro provinsi Yudea.—Farfyar ro Manwawasnya (Kisah) 25:1-12; 26:1-3.

11, 12. (a) Sai ḇefnai fa kofasnai syowi ḇesyadi faro manfarkin agama sya ḇa? (b) Rosai ḇebejadi rofyor Saksi oso ḇeramaker Austria fyasnai syowi faro politikus oso?

¹¹ Rariso komam manfarkin agama sya rai? Fandun fa kofasnai syowi ḇesyadi faro si ke? Kofasnai syowi faro si imnis moḇ kofasnai ḇe snonkaku ḇesesya raya. Ḇape inema roi ḇesasar fyor kofasnai syowi ḇesyadi ḇesi, iba syadiwer fyor sor ko fa kofrurna. Snar agama ḇekaku ḇa sḇuk farkarkor ḇenapes kuker Allah ma Wos Ḇyena, Refoya ḇa. Yesus isonek guru-guru agama ḇekakuḇa ma dap si ḇe snonkaku ḇeankarkar ma manfarkin ḇeḇarḇor. (Matius 23:23, 24) Ḇape na kosasar ḇa fyor kofasnai syowi ḇesyadi faro ḇena papoik sya. Snar kofrur rarirya ido, fyorno ido nari sifnoḇek ko.

¹² Snonkaku ḇena papoik ḇeradirya iso Doktor. Heinrich Gleissner, ima politikus ro Austria. Ro swaf Perang Dunia II ya, sordade Nazi sya sfori. Fyor suni ro kereta ḇe kamp konsentrasi,  isrow kuker Leopold Engleitner, iso Saksi oso ḇeryaḇ ḇeramaker Austria. Kuker syowi naek Engleitner fyasnai kakyar ḇyedi faro Doktor Gleissner i, ryower pyum i. Mamamunya imnai, Gleissner ḇyuk nasan ḇyenane fa ifnoḇek ker Saksi-Saksi ḇero Austria sya. Imbude wakfawi fawar ḇepyum ḇese snar snonkaku Kristen sya sfasnai syowi ḇe ḇena papoik sya.

13. Mansei ḇefandun syadi fa kofasnai syowi ya, ma sai ḇefnai ya?

¹³ Naek ma srar koḇesi sḇenaḇye fa kofasnai syowi ḇe si. Ḇefandun syadi naek ḇefarkin ko sya raris penatua, pengawas wilayah, anggota Panitia Cabang, ma anggota Badan Pimpinan. (Wasya 1 Timotius 5:17.) Sikame smam fandandun ro Allah kawasa Ḇyesi, ma sima Allah ḇyuk si ḇe ”roi ḇeḇor ḇeḇye faro snonkaku.” (Efesus 4:8) Iso ḇefnai fa srama ro keret risai, fawawi, status sosial, ḇaido ḇaḇekumpan sena moḇsa ndraya, fandun fa koḇesyowi si. Snonkaku Kristen ro abad randak sya sḇuk farari ḇepyum ḇeko. Sesyowi snonkaku ḇefarkin si ro fafisu iwara, ma ko kako kofrur rarirya ro baboine. Rofyor koisya kuker naek ansine, na kofrur awer si rya sima malaikat, ḇena papoik ḇeba kaku. Ḇape koḇesyowi si snar fararur marḇak ma ḇaḇerandun sne sena.—Wasya 2 Korintus 1:24; Fasasna 19:10.

14, 15. Rariso penatua Kristen sya siḇesebur kaku ro manfarkin agama ḇebor sya?

¹⁴ Penatua ḇeradine sya simnis manfarandows ḇena sne ḇerun. Simewer kofrur si imnis artis sya. Inja sima  siḇesebur kaku ro manfarkin agama ḇebor ro baboine ma ro Yesus fafisu ḇyedi sya. Yesus ikofen sima, ”simarisen skain ro moḇ ḇekaki ro munara ma ro ḇarpon rum nadi; simarisen sisma syom ro pasar”.—Matius 23:6, 7.

¹⁵ Penatua Kristen sya sisouser Yesus wos ḇyena, ”Sap awer mkoḇe Rabi; snar mkosma Rabi oser monda ma mko kam mkoḇe mambekanaek. Ma mkap awer mansei ryakaker ḇe kma ro supswan ine, snar Kma oser monda faro mko, isoine Allah ro boiyaswa. Sap awer mko kako ḇemanfarkin, snar Manfarkin oser monda faro mko, isoine Wairek. Mansei ḇeba syadi ro fandu mko, iḇye wer duf farmyan mko. Ma mansei ḇekanow mankundi, nari ḇyeḇepandun ma mansei ḇerun mankundi, nari ḇyeḇekanow.” (Matius 23:8-12) Rofyor penatua ro sidang ḇero supswan ḇesiper sna sne ḇerun ma sisouser Yesus wos ḇyenane ido, nari naek srar sesya siswar ma sesyowi si.

16. Sai ḇefnai fandun fa koḇesewar kaku pdef fa kofasnai syowi ya?

¹⁶ Imbude kofandun swaf fa kofarkor rariso koḇesyowi snonkaku ḇesesya rai. Snonkaku Kristen ḇero abad randak sya sismai roi ḇeradine kako. (Farfyar 10:22-26; 3 Yohanes 9, 10) Ḇape nane nefandun sasewar. Koḇesyowi snonkaku ḇese ro nyan Yahwe imarisen ḇeko na ido, nari kosmai barakas nabor kaku.

17. Barakas rosai monda kosmai snar koḇesyowi snonkaku ḇena papoik sya?

¹⁷ Koḇesyowi snonkaku ḇena papoik ro moḇ koḇena ido, na simarisen fa sḇuk mkei ḇeko fa koḇaryas. Syadiwer nari sna mamam ḇepyum kuker fararur ḇaḇeḇaryas koḇena. Ine iso ḇebejadi ro taun ḇeḇeso aniwara ro Jerman rofyor perintis oso ḇenir ḇe Birgit rya fa myamfar inaikir ḇyedi ro rumfarkor. Guru-guru sikofen ḇe Birgit i snar simarisen sna romawa Saksi ro kelas sena ro taun ḇe taun. Smam mboi romawa Saksi sya sima sifrur rumfarkor ya ḇe moḇ ḇepyum kaku. Birgit ikofen ḇesi, ”Romawa nkoḇesi nkofarkor si fa sisouser faro Allah farkankin Ḇyena ro kenem sena, ma ine kako infa sfasnai syowi ma skunem faro guru sesya.” Guru oser ikofenḇair rofyor romawa syakam simnis raris Saksi sya kada, nari napyan fa sfarkor si. Snar sna mamam ḇepyum kuker romawa Saksi sya, inja minggu ḇeḇeso ramnai, guru oser dakso ro munara kebaktian.

18, 19. Rosai fandun fa koswarepen rofyor kofasnai syowi faro penatua sya?

¹⁸ Wos farkankin ḇero Refoya na nafnoḇek ko fa kofawi rariso koḇesyowi penatua ḇero sidang sya. (Wasya Ibrani 13:7, 17.) Fandun fa koḇuk  wos sandik faro fararur marḇak sena ma ine bisa kofrurna. Koso farkankin sḇukna ido, nari nafnoḇek penatua sya fa sfarmyan kuker marisen. Refoya ikofen fandun fa kakfarari kakyar sena. Ḇape inema kyurfasna kosewar fa koso mnis kaku nyan penatua sya sisansun si, moḇ sawos, ma sḇuk farkarkor ya ḇa. Kofrur rarirya ido, ima imnis raris koso snonkaku ḇardibur koso Kristus i. Kopok koḇefnder awer snar penatua sya kako snonkaku ḇenapesḇa raris ko.

¹⁹ Koḇesyowi penatua sya ma kofrur si raris artis ḇa ido, ine nari nafnoḇek si. Kuker nyan risai? Ine na napyan ḇesi fa sna sne ḇerun pdef ma sisawen kakara snar sipyum syadi ro snonkaku ḇesesya ḇaido rosai sifrurna iso ḇepyum rarirya kwar.

20. Barakas rosai na kosmana snar koḇesyowi snonkaku ḇesesya?

²⁰ Koḇesyowi snonkaku ḇesesya ido, nari nafnoḇek ko fa koswar mankunko ḇa ma kona sne ḇerun pdef rofyor snonkaku ḇese sḇuk syowi ḇesyadadi yoḇ ko. Ine nafnoḇek ko kako fa kokarkar ḇaido komsor ḇa fyor snonkaku kosyowi oso ifrur kofafko. Barakas ḇesena iso na koḇeoser kuker Yahwe organisasi Ḇyedi. Organisasi ine ḇyuk syowi ḇesyadadi faro snonkaku mansei monda ḇa, ine kako faro ḇesyom Yahwe I ḇaido ḇesyom ḇe I ḇa sya.

21. Barakas ḇepon rosai kosmaina snar kofasnai syowi faro snonkaku ḇesesya?

²¹ Barakas ḇepon kosmana snar kofasnai syowi faro snonkaku ḇese isoine kofrur Yahwe imarisen. Nari kofrur rosai imarisen na ma na kosouser pdef ḇe I. Inja na Yahwe ḇyuk kankarem ḇe Setan ḇekofen snar snonkaku osoḇaḇeri na ḇesouser pdef faro I. (Amsal 27:11) Snonkaku ḇebor ḇero dunya ine sfawi ḇa rariso sfasnai syowi ḇe snonkaku kuker nyan ḇekaku. Koḇuk kasumasa kaku snar kofawi nyan fa kofasnai syowi imnis Yahwe nyan Ḇyena!