1. Sai ḇefnai fa Kain ifrur snemuk ḇesasar, ma bon rosai ismaina?

FANDUN fa Kain ifrur snemuk ḇefandun kaku. Bisa kyinfir fa pyampum marisen ḇesasar ḇyena, insama nun ḇe roi ḇepyum. Ḇaido myam monda marisen ḇyena fyara i, fa nun ḇe roi ḇeḇyeḇa. Refo ikofenḇair ḇeko snar Kain ifrur snemuk ḇesasar. Snemuk dun ine nafnai fa ḇedar ḇyedi Habel i imar, inja Kain fasfesepen ḇyedi kuker Yahwe imuk.—Kejadian 4:3-16.

2. Sai ḇefnai fandun fa kofrur snemuk ḇepyum ya?

² Rarirya kako, kokame fandun fa kokinfir ma kofrur snemuk ro kankenem koḇena. Snemuk riḇeso nefandun kaku, ma ḇesena nefandun ḇa. Rariryano, snemuk ḇebor kunna na nawyae kankenem koḇena. Kofrur snemuk ḇepyum ido, samswen koḇena na nabor mankenem ḇa ma kosmai payamyum ro kenem koḇena. Ḇape, rofyor kofrur snemuk ḇesasar ido, na kenem koḇena nafo kuker samswen ma kofafko.—Amsal 14:8.

3. (a) Insama kofrur snemuk ḇepyum ido, fandun fa kokyar faro rosai? (b) Fakfuken-fakfuken risai nari kawos ya?

 ³ Rosai ḇefnoḇek ko fa kofrur snemuk ḇepyum? Fandun fa kokyar faro Allah, kokyar kaku nari imarisen ifnoḇek ko ma ḇyuk fawawinanem ḇefandun fa kofrur snemuk ḇepyum. Fandun fa kokyar kako faro Wos Ḇyena, ma ananun Ḇyena. (Wasya Yakobus 1:5-8.) Kofanam faro Yahwe ma koswar syadiwer faro Wos Ḇyena ido, na nafnoḇek ko fa kokyar iso ḇefawi roi ḇepyum faro ko. Ramnai nari kokara Wos Ḇyena rofyor kofrur snemuk ḇaim. Ḇape rariso bisa kofrur snemuk ḇepyum ya rai? Ma fandun fa kofadwer snemuk kofrur ḇepon kwar na ke?

4. Snemuk rosai Adam ifrurna, ma rosai bonya?

⁴ Snonkaku sya sifrur snemuk ḇefandun kaku kwar ro randak marandan kankenem sena. Snonkaku ḇerandak, Adam i, fandun fa ifrur snemuk imbe ryower Manḇefrur ḇyedi, Yahwe I, ḇaido swari Eva i. Adam kyinfir fa ryower Eva i, iso ḇedif i fa ifrur snemuk ḇesasar. Bonya iso, Yahwe iyawbur Adam i ro yaf Eden, ma ḇarpurya imar. Ro baboine, koḇekandera snaro Adam snemuk ḇesasar ifrurna.

5. Rariso komam fakamamar fa kofrur snemuk ya rai?

⁵ Sino sisya skara snar kankenem ine na napyan rofyor sifrur snemuk ḇaḇeri. Imbude wakḇaḇir rarirya kako. Imbape ipyum koswarepen snar Yahwe ifrur snonkaku sya raris robot ḇa. Robot ima dakna kakara ḇa ḇaido jadi fa kyinfir ḇa. Ḇyuk ḇeko Wos Ḇyena fa nfarkor ko nyan fa kofrur snemuk ḇepyum rai. Yahwe imarisen kofrur snemuk, ma fakamamar ine bisa nafnoḇek ko. Kwarapan fawar ḇeḇeso ine.

6, 7. (a) Snemuk risai fandun fa snonkaku Israel sifrur ya? (b) Sai ḇefnai syamswen fa snonkaku Israel sifrur snemuk anna? (Mam sonin ro randak artikel ine.)

⁶ Rofyor snonkaku Israel sikenem ro Sup Ḇaḇeasas ya, fandun fa skinfir imbe sisyom ḇe Yahwe I ḇaido sfarmyan allah-allah ḇesesya. (Wasya Yosua 24:15.) Ine rya komam na ḇe snemuk ḇepyan monda. Ḇape, roi skinfir na nari nun si ḇe kankenem ḇaido marmarya. Ro fafisu Hakim-Hakim sya, snonkaku Israel sifrur snemuk ḇesasar ker. Simnai sisyom ḇe Yahwe I ma sisyom ḇe allah-allah ḇekaku ḇa. (Hakim-Hakim 2:3, 11-23) Ḇarpurya, ro nabi Elia fafisu ḇyedi, fandun fa Allah kawasa Ḇyesi skinfir imbe sfarmyan ḇe Yahwe ke, allah ḇekaku ḇa Baal i. (1 Raja-Raja 18:21) Ine rya snemuk ḇepyan monda fa sifrurna snar fararmyan ḇe Yahwe ima roi ḇepyum ḇesya kwar. Snonkaku ḇefawinanem oso na imewer ifarmyan ḇe allah ḇekenem ḇa. Ḇape, kawasa ansine jadi  fa sifrur snemuk ḇa. Refo ikofenḇair snar snonkaku Israel ”sefisfyas rofandu kakara risuru ḇesisye”. Kuker fawawinanem, Elia syambraḇser snonkaku sya insa skinfir fa sisyom ḇe Allah ḇekaku, Yahwe I.

⁷ Sai ḇefnai syamswen fa snonkaku Israel sifrur snemuk ḇepyum ya? Oserya, sikyar faro Yahwe I ḇa, ma simewer srower I. Sikyarkuf ḇe Yahwe I ḇa, ma simewer sḇuk oras sena fa sfarkor fa sfawi I ḇaido fawawinanem Ḇyena. Mboi sifrurna kada, rosai sfarkor na nari nafnoḇek si fa sifrur snemuk ḇepyum. (Mazmur 25:12) Ḇesuruya, snonkaku ro er-er ḇesesya sawninyan snonkaku Israel swaruser sena, ma sifrurpyan snemuk faro si. Bonya iso, snonkaku Israel siso er-er sine ma sisyom ḇe allah-allah ḇekaku ḇa sesya. Ro taun-taun ḇepon ya Yahwe ḇyuk swarapepen ḇesi kwar kuker roi ine.—Keluaran 23:2.

8. Farkarkor ḇefandun risai kofarkor ro snonkaku Israel sya?

⁸ Farari ro snonkaku Israel sya nfarkor ko snar rofyor kofrur snemuk ḇepyum ido, fandun fa koḇuk Allah Wos Ḇyena. Galatia 6:5 ḇyuk swarapepen ḇeko snar snonkaku oser-oser kyamar rosai kyinfir ro mankundi. Nasnaibos kaku, kopok fa koḇuk hak ḇe snonkaku oso fa ifrurpyan snemuk ḇeko. Imbape, ko oser-oser fandun fa kofawi mnis rosai Allah ikofenna ma kokinfir fa kofrurna.

9. Rosai ḇefnai fa komam monda awer snonkaku ḇese sifrurpyan snemuk ḇeko?

⁹ Rofyor komam monda snonkaku ḇesesya sawninyan ko fa kokinfir roi ḇeḇyeḇa ido, ine kyurfasna sifrurpyan snemuk ḇeko. (Amsal 1:10, 15) Ine nun ḇe roi ḇemun. Roi ḇefandun fa kofrurya iso koso sneuser ḇeḇye koḇena ḇeḇefarkin kwar ro Refoya. Rofyor snonkaku ḇesesya sifrur snemuk ḇeko indo, ima kokinfir fa koso si kwar. Kofrur radine ido nari nun ḇe roi ḇesamswen.

10. Swarapepen rosai Paulus ḇyuk ḇe snonkaku Galatia sya?

¹⁰ Manwawan Paulus ḇyuk swarapepen ḇe snonkaku Galatia sya fa smam monda awer ḇesesya sifrurpyan snemuk ḇesi. (Wasya Galatia 4:17.) Naek ḇeḇeso ro Galatia sisewar kaku fa sifrur snemuk faro snonkaku ḇese ḇero sidang sya. Rosai ḇedif si? Naek sine simarisen naek srar ḇero sidang sya siso si ḇardibur siso manwawan sya. Sna sne ḇerun ḇa, ma naek srar sesya sna hak fa sifrur snemuk ro mankunsi mboi sesyowi hak sena ḇa.

11. Rariso kofnoḇek snonkaku ḇesesya fyor imbe sifrur snemuk?

¹¹ Kokame bisa fa kofarkor farari ḇepyum ro manwawan Paulus i. Ifawi ma  ḇyesyowi hak ro naek srar ḇyesi fa sifrur snemuk ro mankunsi. (Wasya 2 Korintus 1:24.) Ro baboine, penatua sya bisa sisofarari nyan ine kuker sḇuk anun faro naek srar sya rofyor imbe sun snemuk fa skinfir ro mankunsi. Simarisen sirwas anun ḇero Refoya faro naek ma srar ḇefandun farkankin sya. Ḇape, fandun fa penatua sya siswarepen insama snonkaku Kristen sifrur snemuk ro mankunsi snaro nari mankunsi ḇekamar bon ro snemuk sena. Ḇeuser ine farkarkor ḇefandun kaku: Bisa kofnoḇek snonkaku ḇesesya fa sfawi anun ḇero Refo ḇemnis kuker kenem sena. Ḇape, naek ma srar koḇesya sna fakamamar fa sifrur snemuk ro mankunsi. Rofyor sifrur snemuk ḇepyum ro mankunsi, nari sismai fainda ya. Kakuḇae, kokara awer snar kona papoik fa kofrurpyan snemuk kuker rosai fandun fa naek srar sya sifrurna.

12, 13. Sai ḇefnai fa kofrur awer snemuk rofyor komsor ḇaido koḇesanekar?

¹² Ro baboine, snonkaku ḇebor sya siso monda sisnesna rofyor sun snemuk. Ḇape ine bisa nun roi ḇeḇyeḇa. Refo iswarepenser ko insama snemuk kunna neknam awer ro sne ḇaido sneḇaḇir ḇesasar koḇena. (Amsal 28:26) Jadi fa kokyar faro kosnesna ḇa, snar ”sne ima dankarkar syadi ro rosairiryakam kako ma fyaḇri.” (Yeremia 17:9) Fawar nabor naisya ro Refo ḇefasnaḇair snonkaku ḇesmai bon ḇeḇyeḇa snar siso sne ḇesasar sena. (1 Raja-Raja 11:9; Yeremia 3:17; 13:10) Inja, koso monda kosnesna fa kofrur snemuk ido, rosai nari ḇebejadi ya?

¹³ Yahwe dor ko fa koswar I kuker sne ḇesiper ma koswar min koḇesi raris koswar mankunko. (Matius 22:37-39)  Ḇape fandun fa kosasor ko. Ro paragraf ḇepon ya komam kwar snar Refo ikofenḇair rofyor komam monda sneḇaḇir koḇena nfara kakara ma roi kofrurna ido, nari nun roi ḇemun ḇeko. Raris, snonkaku oso imsor ido nari syamswen fa ifrur snemuk ḇepyum. (Amsal 14:17; 29:22) Ma samswen kako ḇe snonkaku ḇesanekar oso fa kyinfir kuker payamyum. (Bilangan 32:6-12; Amsal 24:10) Fandun fa Allah parenta Ḇyena nfarkin kakara koḇena. (Roma 7:25) Rofyor kofrur snemuk ḇefandun kaku ido, sneḇaḇir koḇena nfara awer rosai kofrurna.

14. Rariso kofawi fyorno ido fandun fa kofadwer snemuk kofrur kwar na?

¹⁴ Fandun fa kofrur snemuk ḇepyum. Ḇape, snonkaku ḇefawinanem oso ifawi fandun fa kyara kaḇer snemuk ifrur kwarna ma fyadwer na. Allah Yahwe ḇyuk farari ḇepyum ḇeko. Komam rosai Yahwe ifrur ḇe snonkaku Niniwe ro Yunus fafisu ḇyedi kada, ”Ma Allah ḇenapes myam fararur sena, snar spambar kwar ro nyan ḇeḇarḇor sena; inja Allah ḇenapes fyafko faro roi ḇemun dawos kwar nari ḇyuk faro si anna, ma ḇyukna faro si ḇa.” (Yunus 3:10) Yahwe fyadwer snemuk ifrur kwar na rofyor myam snonkaku Niniwe sifadwer kenem sena kwar ma simnai fa sifrur roi ḇeḇyeḇa. Ine fyasnaḇair imayaryaren, nya sne ḇerun, ma isawarwar. Yahwe ima iḇese kaku ro snonkaku ḇebor sya rofyor ifrur snemuk, iba syadiwer rofyor imsore.

15. Sai ḇefnai ipyum ḇeko fa kofadwer snemuk kofrur kwar na?

¹⁵ Fyorno ido ipyum ḇeko fa komam kaḇer snemuk kofrur kwar na, raris rofyor fafisu koḇena nefararwe. Koswarepen fafisu oso Yahwe fyadwer snemuk ifrur kwar na. (1 Raja-Raja 21:20, 21, 27-29; 2 Raja-Raja 20:1-5) Ro fafisu ḇesena imbude na kofadwer snemuk koḇena fyor kosmai anun ḇebabo. Kokarapan Raja Daud fawar ḇyena. Ifrur snemuk kwar faro Saul kpuri isoine Mefibosyet i, ḇape ismai anun ḇesasar. Ḇarpurya, rofyor Daud ismai anun ḇemnis kaku, fyadwer snemuk ifrur kwar na. (2 Samuel 19:24-29) Inja, imbude ro ras oso ipyum fa kakfrur rarirya.

16. (a) Roi risai monda ḇefnoḇek ko rofyor kofrur snemuk? (b) Sai ḇefnai fandun fa komam kaḇer snemuk kofrur kwar na, ma rariso kofrurna rai?

¹⁶ Refoya ikofen pok fa kofasawsaw awer rofyor kofrur snemuk ḇefandun kaku. (Amsal 21:5) Fandun fa koḇuk swaf fa kokara pyum roi ḇebor kam resari insama kofrur snemuk ḇepyum. (1 Tesalonika 5:21) Ḇebukor ro kina oso imbe ifrur roi oso ido, fandun ḇyuk swaf fa fyarkor mnis kaku mnuk-mnuk ḇero Refo ma publikasi Kristen.  Ipyum kako ḇe i fa ryower ḇepon rosai kakara ro kina ḇyesi. Koswarepen Allah idif Abraham i fa imnaf swari. (Kejadian 21:9-12) Penatua sya kako fandun fa sna swaf fa sifrur riset. Rofyor anun ḇebabo fyasnaḇair fandun fa sfadwer snemuk sifrur ḇepon kwar na ido, nari simkak ḇa roi sifrur nane nafrur fa snonkaku ḇesesya sisyowi si werḇa. Penatua ḇena kakara ḇepyum ma sne ḇerun sya, fandun ido na sfadwer nyan kakara ma snemuk sena. Ma ipyum kaku ḇe kokam fa kofarari si. Nane na nafnoḇek sidang fa ḇyeaski ma ḇyeoser pdef.—Farfyar ro Manwawansya 6:1-4.

17. Rosai na ḇefnoḇek ko fa kosmai payamyum rofyor kofrur snemuk?

¹⁷ Snemuk riḇeso kunna nefandun syadi ro roi ḇesena. Imnis ra, kun snemuk ḇefandun kaku rofyor kokinfir nari kofarḇuk ke roḇa ḇaido kuker mansei na kofarḇuk ya. Osower ido, rofyor kun snemuk fa kosun ro fararmyan ro oras nakam. Kofrur snemuk kuker roi ine ḇaim ido, fandun kokara pyum resari fafisu koḇedi ma kor farfnoḇek ḇe Yahwe I ro nadi. Imbude kofandun oras nabor, ḇape komarisen kofrur snemuk ḇepyum ido, fandun fa kokyar faro Yahwe I, komnaf farkarkor Ḇyena, ma koso farkankin Ḇyena. (Amsal 1:5) Yahwe ḇyuk ananun ḇepyum kaku ro Refoya. Inja fandun fa kofrur riset ma kor Yahwe farkankin Ḇyena ro nadi. Na ḇyuk ḇeko rari-rari kofandunna fa kofrur snemuk ḇemnis kuker marisen Ḇyena. Kofrur snemuk ḇefandun kaku ḇaim, iḇye kada kofuken mankunko, ’Nari snemuk yun nane nfasnaḇair yaswar Yahwe I ke? Nari nun payamyum ma marisen faro kina ayesi ke? Ma nari nfasnai ayama yakaḇaḇaḇ ma yapyum ke?’

18. Sai ḇefnai fa Yahwe imarisen insama kofrur snemuk ro mankunko?

¹⁸ Yahwe idafdifer ko ḇa insa koswar ma kofarmyan ḇe I. Ḇape ḇyuk ḇaḇemkei ḇeko fa kokinfir ro mankunko. Ḇyesyowi hak koḇena fa kokinfir na kofarmyan ḇe I ke roḇa. (Yosua 24:15; Pengkhotbah 5:4) Ḇape imarisen insama kofrur ḇeri snemuk kun ro Refo na. Rofyor kokyar faro Yahwe farkankin Ḇyedi ma kosomnis parenta ḇyuk ḇekona ido, nari kofrur snemuk ḇepyum. Ma nari kofasnai kakyar ḇenako ro nyan kankenem koḇena kam.—Yakobus 1:5-8; 4:8.