1-3. Rosai knam ro wos kuker ”sne ḇesiper” kofarmyan ḇe Yahwe I? Buk contoh.

KOINEKAM snonkaku ḇenapesḇa ma kofrur sasar kako. Kokofen kasumasa snar Yahwe ḇyuk fasaspar ma imarisen ḇyuk ampun ḇeko. Inja, rofyor kona sne ḇerun ma kombror ro sasar koḇena ido, bisa kor ro Yahwe fa ḇyuk ampun ḇeko. Kokyar nari Yahwe dor fakamamar ro ko ”imnis kuker sasar koḇena” ḇa. (Mazmur 103:10) Ḇape, fandun fa ’kofarmyan ḇe I kuker sne ḇesiper’. (1 Tawarikh 28:9) Koinema snonkaku ḇenapesḇa raryano, rariso na kofrurna rai?

² Insama kofrurna, na komam ro kankenem Raja Asa ma Raja Amazia. Sukam sufrur roi ḇepyum, ḇape sukako sufrur sasar snar suma snonkaku ḇenapesḇa kako. Ḇeponya, Refo ikofen snar ”Asa mankundi ḇyuk sne ḇyedi ḇesiper faro Yahwe ro kankenem ḇyedi.”  (2 Tawarikh 15:16, 17; 25:1, 2; Amsal 17:3) Ḇyensewar kaku fa ifrur Yahwe imarisen ma ”ḇyuk sne ḇyedi ḇesiper” faro I. (1 Tawarikh 28:9) Ḇape, Amazia fyarmyan kuker ”sne ḇesiper” faro Yahwe I ḇa. Fyor myunpres Allah mbroḇ ḇyesi, dun amfyanir sena ma isyom si.—2 Tawarikh 25:11-16.

³ Snonkaku ḇefarmyan ḇe Yahwe kuker ”sne ḇesiper” na iswar kaku Yahwe ma imarisen isyom I ḇesya kwar. Ro Refo, wos ”sne” kyurfasnai faro mansei kaku koine. Ine kako faro nyan kakara koḇena, rosai koswar ya, rosai komarisen kofrur ro kankenem koḇena, ma sai ḇefnai fa kofrur roi oso. Koḇe snonkaku ḇenapesḇa raryano, bisa kosyom ḇe Yahwe I kuker sne ḇesiper. Kofarmyan ḇe Yahwe snar koswar kaku I, ine snar dafdiferḇa ḇaido snar kofrur roi ine ro ras-ras kwar.—2 Tawarikh 19:9.

4. Rosai na kofarkor ro kirine?

⁴ Bisa kofawi mnis kaku rosai knam ro wos kofarmyan ḇe Yahwe kuker sne ḇesiper, kuker kowasenkara kankenem Asa ma raja ḇesouser rikyor ḇese ro Yehuda. Isoine Yehosyafat, Hizkia, ma Yosia. Raja rifyak sine sifrur sasar raryano, sifrur Yahwe imarisen kaker. Myam sifarmyan ḇe I kuker sne ḇesiper. Sai ḇefnai Allah kyaremso si, ma rariso kofarari si?

5. Rosai Asa ifrur rofyor ḇyeraja ya?

⁵ Asa ima raja ḇekyor ro Yehuda rofyor sirwas er Israel ḇe karajan Israel ma karajan Yehuda. Rofyor Asa ḇyeraja ro Yehuda, dun snemuk fa ipyos agama ḇekaku ḇa ma amoral seksual ḇefrur ayin kaku ro karajan ḇyedi. Imerdawdiwer amfyanir snonkaku sisyomna ma iyawbur pelacur bait sya. Asa i kako ḇye kpuri fa dado ro nasan ḇyeja ḇe ”ibu suri [raja snari], snar ifrur amfyanir ḇefrur makakak”. (1 Raja-Raja 15:11-13) Asa i kako danun ḇe kawasa ḇyesya ”insa sisewar Yahwe I” ma sisouser ”Sasoser ma parenta Ḇyena.” Asa ifrur nakam insa ifnoḇek snonkaku ḇesesya saksyom ḇe Yahwe I.—2 Tawarikh 14:4.

6. Rosai Asa ifrurya rofyor Etiopia imbe smun Yehuda?

⁶ Fyor Asa ḇyepoik ro taun risamfur randak ya, karajan Yehuda smamunmun ḇa. Ḇarpur ya snonkaku Etiopia srama imbe smamunmun kuker Yehuda sun sordade yuta rioser ma kereta kuda utin rikyor. (2 Tawarikh 14:1, 6, 9, 10) Rosai Asa ifrurya? Asa ikyar nari Yahwe ifnoḇek kawasa ḇyesi. Ḇyenadi dor farfnoḇek ro Yahwe insama simkei ro mamamun ani. (Wasya 2 Tawarikh 14:11.) Fyorno ido, Yahwe ḇyuk ḇaḇemkei ḇe kawasa  ḇyesi ro mbroḇ sesya, iba syadiwer fyor raja ansi sisouser faro I ḇa. Ifrur radine fa fasnaḇair ima Allah ḇekaku. (1 Raja-Raja 20:13, 26-30) Fafisu anya, Yahwe ifnoḇek kawasa ḇyesi snar Asa ikyar faro I. Yahwe kyarem Asa nadi ḇyena, inja sikafyo mbroḇ sesya. (2 Tawarikh 14:12, 13) Ḇarpur ya Asa ifrur sasar ḇeba rofyor dor farfnoḇek ro raja Siria, ḇape ro Yahwe I ḇa. (1 Raja-Raja 15:16-22) Ifrur rarirya, ḇape Yahwe myam Asa iswar I. Sne ḇyedi ”ḇesiper faro Yahwe ro ras-ras kankenem ḇyedi”. Rariso kofarari contoh ḇepyum Asa i?—1 Raja-Raja 15:14.

7, 8. Rariso wafarari Asa i?

⁷ Rariso na kofawi kofarmyan ḇe Yahwe kuker sne ḇesiper? Bisa kofuken mankunko: ’Yasmai roi ḇesamswen ido, nari yasouser pdef ḇe Yahwe i ke? Yun snemuk ro mankundaya fa yamamwarek saranden ro sidang ke? Kwarapan ḇaḇebri Asa ḇyedi fyor ḇye kpuri fa dado ro nasan ḇyeja ḇero karajaan! Fyorno ido, ko kako fandun fa koḇebri raris Asa i. Imnis raris, rariso fyor min ro kina ḇaido bati koḇedi ifrur sasar, imbror ḇa, ma sisae i ro sidang? Wun snemuk fa ḇebati werḇa kuker snonkaku ani ke? Rosai ḇedif au fa wafrurna?

⁸ Raris Asa i, fyorno ido koḇaḇir snonkaku oso imbe pyampum ko. imbude bati ro rumfarkor ḇaido guru bedi kyoryae Au snar auma oser ro Saksi-Saksi Yahwe sya. Ḇaido bati ro moḇ wafararur ya skara swaruser bena namnisḇa snar wun cuti fa wakso kebaktian ḇaido wamarisen wafararur syadi ḇa. Ro fafisu riḇeso fandun fa kokyar ḇe Allah raris Asa i. Ḇenadi ḇe Yahwe I, ḇebri, ma wafur rosai ḇeḇye ya. Waswarepen Allah syambraḇser Asa i ma I kako na syambraḇser Au.

9. Rariso na kofrur Allah imarisen rofyor koḇaryas?

⁹ Asa kyara faro mankundi ḇa; danun snonkaku ḇesesya ”insa sisewar Yahwe I”. Ko kako kofnoḇek snonkaku ḇesesya fa sisyom Yahwe I. Yahwe myam fyor kawos ḇe snonkaku ḇesesya kuker I. Imarisen kaku fyor myam kofrur roi anna snar koswar I, koswar snonkaku ḇesesya ma komarisen sakkenem ro dunya babo!

10, 11. Rariso kofarari Yehosyafat i?

¹⁰ Yehosyafat iso Asa roma ḇyedi ”imbran pdef imnis kmari, Asa nyan ḇyena”. (2 Tawarikh 20:31, 32) Ifrurna rarso? Imnis kmari Yehosyafat danun ḇe kawasa ansi fa sisyom Yahwe I. Iwan snonsya fa sramura ḇe mnu beba Yehuda fa sifarkor kawasa ansi ro “syap Sasoser Yahwe.” (2 Tawarikh 17:7-10) Iḇa syadiwer rya ḇe karajan  bar wambrur ro Israel, faro kawasa ansi ro urek bon efraim, ”dun kaḇer si ḇe Yahwe”. (2 Tawarikh 19:4) Yehosyafat iso raja ”ḇesewar Yahwe kuker sneri ḇesiper”.—2 Tawarikh 22:9.

¹¹ Baboine, Yahwe imarisen snonkaku ro supswan ḇesiper sfarkor fa sfawi I, ma ko kame bisa kofnoḇek fararur ine. Au kako wamarisen wakso ro fararur ine paik ḇe paik ke? Wamarisen buk farkarkor Refo faro ḇesesya insama saksyom ḇe Yahwe I ke? Inema roi wun ro nadi bena ke? Rofyor bensewar kaku ido, Yahwe na ifnoḇek Au fa wafrur farkarkor Refo. Wamarisen buk farkarkor Refo ḇe snonkaku oso kuker buk oras mankun bedi ke? Ma raris Yehosyafat ḇefnoḇek snonkaku ḇesesya fa saksyom ḇe Yahwe I wer, ko kako bisa koḇensewar fa kofnoḇek snonkaku ḇeaktif ḇa sya. Penatua sidang sfasos fa sramura ḇe snonkaku ḇesae kwar ro sidang kristen sya, ḇape simbror kwar ro sasar sena ro fafisu iwara.

12, 13. (a) Rofyor Yehosyafat imkak, rosai ifrur ya? (b) Sai ḇefnai fa koso Yehosyafat contoh ḇyedi?

¹² Raris kmari Asa i, Yehosyafat ikyar faro Yahwe rofyor sordade beba kaku srama imḇe smun Yehuda. (Wasya 2 Tawarikh 20:2-4.) Imkak ma dor farfnoḇek ro Yahwe I. Ro nadi ḇyena, ikofenḇadir jadi fa ikafyo si ḇa. Ikofen kako i kuker kawasa ḇyesya sifawiḇa rosai imbe sifrur ya. Yehosyafat ḇyeḇirḇar ḇa snar Yahwe nari ifnoḇek si. Ikofen, ”Nkomkasna mam yoḇ Au.”—2 Tawarikh 20:12.

¹³ Raris Yehosyafat i, fyorno ido, kofawiḇa rosai imbe kofrur faro samswen kosmana, ma ko kako imbude komkak. (2 Korintus 4:8, 9) Ḇape koswarepen rosai Yehosyafat ifrurna. Ro ḇarpon kawasa ansi, ḇyenadi ḇe Yahwe I ma ikofenḇair sisambraḇ ḇa. (2 Tawarikh 20:5) Ḇebukor ro kina bisa sakfarari Yehosyafat contoh ḇyedi. Mkor Yahwe ifnoḇek mko ma kina mkoḇesya fa mkofrurmnis samswen mkoḇena ma insama mkofawi rosai nari mkofrur ya. Mkomai awer fyor kina mkoḇesi srower nadi mkobena. Nari sfawi snar wakyar kaku faro Yahwe I. Ifnoḇek Yehosyafat kwar ma I kako nari ifnoḇek Au.

14, 15. Rariso Hizkia ikyar kaku faro Allah I?

¹⁴ Hizkia ima raja ḇesewer ’ḇesnefer pdef faro Yahwe I’. Kmari ḇyuk farari ḇeḇyeḇa ma isyom amfyanir raryano, Hizkia isouser pdef. Hizkia ”Iso ḇemkokpres moḇ-moḇ ḇekaki ma imerdawdiwer pilar-pilar ḇesren ma kyar adir ḇesren ma ifrurkerker ikak tembaga Moses ifrur ani”, ifrur radirya snar snonkaku Israel sisyom ikak tembaga ani. Hizkia fyarmyan kuker sne ḇesiper ḇe Yahwe I. ”Imbranser pdef parenta Yahwe iwan ḇe Moses i.”—2 Raja-Raja 18:1-6.

¹⁵ Fyor Hizkia ḇyeraja ya, sordade Asiria ḇesambraḇ imbe siyarwarek  Yehuda ma sḇuk wos makakak fa simkok Yerusalem. Sanherib, raja Asiria, danonef Yahwe ma ḇyensewar insama Hizkia isusu. Ro swaf ḇefrur makak ani, Hizkia ikyar kaku faro Yahwe ma ḇyenadi dor farfnoḇek ro I. Ifawi Yahwe syambraḇ syadi ro Aziria ma na fyaspar kawasa ḇyesi. (Wasya Yesaya 37:15-20.) Yahwe kyarem Hizkia nadi ḇyena kuker iwan malaikat oso fa myunpres sordade Asiria ri 185.000.—Yesaya 37:36, 37.

16, 17. Rariso kofarari Hiskia i?

¹⁶ Ḇarpur ya, Hizkia iduf ma imbe imar. Ro fafisu ḇesamswen ani, dor kaku faro Yahwe insama iswarepen soasuser ḇyedi ma ifnoḇek i. (Wasya 2 Raja-Raja 20:1-3.) Yahwe ryower Hizkia nadi ḇyena ma ḇyuk pararei ḇe i. Refoya ikofenḇair snar Allah ifrur mujisat ḇa insa koprei ro dafduf koḇena ḇaido na kokenem kawane. Ḇape raris Hizkia i, na kokyar faro farfnoḇek Yahwe ḇyena. Na kokofen ḇe I, ”Yor kaku ḇe au, sye Yahwe, waswarepen rariso yambran kwar ro ḇarpon bedi kuker soasuser ma kuker sne ḇesiper.” Na wakyar Yahwe myamwarek Au ker, iba syadi rofyor waduf ke?—Mazmur 41:3.

¹⁷ Rariso na kofarari Hizkia i? Imbude roi oso nasya ḇedwarek ḇaḇebati koḇena kuker Yahwe ḇaido ḇefrur kofarmyan ḇe Yahwe I ḇa. Imnis raris, ro baboine sino sisya smanen syadi snonkaku sya imnis sisyom amfyanir. Smanen syadi artis ma snonkaku ḇese sifawimnis ḇaim sya. Sḇuk oras nabor fa siwasya kuker artis ansya ma smam sonin sena. Ḇaido sḇuk sosial media ma roi ḇesena fa sawos kuker snonkaku ḇese ro Internet. Kakuḇae, ko kako imbude komarisen kawos kuker kina koḇesya, ḇaido bati kuker sosial media ma Internet ya. Ḇape na roi nane nafrur oras koḇena nadawer monda. Imbude komanenko rofyor snonkaku simarisen sonin koḇena ḇaido rosai kofas kwar ro Internet. Ḇape, fyor kofawi snonkaku simewer smam sonin anna, imbude na komsore. Na kofarkor ro manwawan Paulus, Akuila ma Priskila sko. Na kwara sḇuk oras sena rasnakam fa smam roi ḇekasun snonkaku sifrurna, iba syadiwer faro ḇefarmyan ḇe Yahwe ḇa sya ke? Refo ikofen snar Paulus ”kuker sne ḇesiper ḇyaryas wosya”. Akuila ma Priskila sufasos oras suḇena fa subaryas ma sukofen fasnai ”kuker ḇaḇeaunos Allah Nyan ḇyena” ḇe snonkaku ḇesesya. (Farfyar 18:4, 5, 26) Kofuken ro mankunko, ’Yasasor aya fa yamanen syadiḇa snonkaku sya imnis ḇaḇesamsyom amfyanir ke? Yabuk oras yena nabro fa yafrur roi ḇefandun mankunḇa ke?’—Wasya Efesus 5:15, 16.

18, 19. Rariso na kakfrur raris Yosia i?

¹⁸ Raja Yosia i kako isouser Yahwe parenta Ḇyena ”kuker sne ḇesiper”. (2 Tawarikh 34:31) Yosia ima Hizkia kpu ḇeba ḇyedi. Rofyor ḇyabo kaker  ”syewar Daud Allah ḇyedi”. Ma fyor ḇyeumur 20, isawenpres amfyanir ro Yehuda. (Wasya 2 Tawarikh 34:1-3.) Yosia ḇyensewar kaku fa ifrur Yahwe imarisen ḇardibur raja-raja ḇebor ḇese ro Yehuda. Ramnai ras oso, imam ḇeba isrow syap Sasoser Allah ro bait. Imbude Ine iso syap Moses fyas ro mankundi! Rofyor manfasfas ani iwasya pyan ḇe Yosia i, fyawimnis snar fandun fa ifrur nabor fa fyarmyan ḇe Yahwe kuker sne ḇesiper. Yosia danun ḇe snonkaku ḇesesya insama sakfrur roi ḇemnis. Inja, ro fafisu ikenem ya, kawasa ansi ”simbran sasarḇa ma siso pdef Yahwe I”.—2 Tawarikh 34:27, 33.

¹⁹ Ḇe romawa babo ido, bisa wafarari Yosia i ma wafawi pyum Yahwe I. Yosia imbude ryower kwar ro kpuri Raja Manasye ḇaḇembror ḇyeja, snar Yahwe imarisen ḇyuk ampun. Nari Au kako bisa wafarkor ro snonkaku ḇesinan kwar ro kina bedi ma sidang. Nari sikofenḇair ḇe Au kuker roi ḇepyum nabor Yahwe ifrur kwar ḇesi. Ma koswarepen rariso Yosia sneḇaḇir ḇyedi fyor fyarkor rosai Refo ikofenna. Imarisen kaku ifrur Yahwe imarisen, ma ifrur fararwe ḇeri ro kankenem ḇyena. Kuker wawasya Refo, nari Au kako wun snemuk fa wasouser Yahwe I. Bonya iso, ḇaḇebati bedi kuker Yahwe nari syambraḇ kaku ma wasmai aski. Ramnai nari wamarisen wakofen ḇe snonkaku ḇesesya mansei Yahwe i. (Wasya 2 Tawarikh 34:18, 19.) Rofyor farkor Refo ro mankundaw, nari Au kako bisa wafawi nyan-nyan ḇebabo nasya fa wafrur nabor ro fararmyan bena ḇe Allah I. Inja, ḇensewar pyum kaku fa wafrur fararwe raris Yosia ifrurna.

20, 21. (a) Rosai ḇemnis ro raja rifyak ansine? (b) Rosai nari kawos ro artikel ḇeuserya?

²⁰ Rosai na kofarkor ro raja rifyak ḇero Yehuda ḇefarmyan ḇe Yahwe I kuker sne ḇesiper ansi? Snon ansya sun snemuk fa sifrur Yahwe imarisen ma sisyom ḇe I ro kankenem sena ḇesiper. Sikyar faro I fyor mbroḇ ḇesambraḇ kaku srama imbe smun si. Ḇefandun syadi ya, sifarmyan ḇe Yahwe snar siswar I.

²¹ Raja rifyak ansi sinapesḇa ma sifrur sasar raryano, Yahwe kyaremso si. Yahwe myam rosai ḇero sne sena ma ifawi snar siswar kaku I. Ko kako snonkaku ḇenapesḇa ma kakfrur sasar. Ḇape Yahwe nari imarisen faro ko, fyor myam kofarmyan ḇe I kuker sne ḇesiper. Ro artikel ḇeuserya, nari kawos rosai na kofarkor ro sasar raja ansi sifrurna.