YASWAREPEN ro arwo ḇepnunek kaku ro taun ḇeḇeso aniwara ro Brookings, South Dakota, U.S.A. Yaḇaḇir snar pananunek ya nari ndrama ḇeri. Aya isya ro gudang kuker snonkaku ḇeḇeso ro moḇ sbarek ma sifrur yaf rona. Nkokame nkosyuf bose snaro moḇ sḇukidapen nasyaḇa. Nkores fanam bak beba ḇeser war ḇepnunek kaku! Mkorama yafawar ḇemko kankenem yedi ma nari mkofawi sai ḇefnai fa nkoro moḇ iwa.

Saben aya ro 07 Maret 1936. Sinan ayesu suna romawa rifyak, ma aya iso ḇekasun ya. Nkobarek ro perkebunan ḇekasun ro bar wamurem South Dakota. Yaf nkoḇedine ima roi ḇefandun ḇe inko, ḇape ḇyefandun kaku syadiḇa. Sinan ayesu suḇe baptis ḇe Saksi-Saksi Yahwe ro 1934. Suḇuk kankenem suḇena ḇe Yahwe I, inja sufrur marisen ḇyena ima roi ḇefandun kaku ḇesu. Kamam yedi, Clarence, ma barpur ya imem yedi Alfred i, sufarmyan ḇe pelayan sidang (kirine sap siḇe kordinator badan penatua) ro sidang kasun nkoḇedi ro Conde, South Dakota.

Kina nkoḇedi nkoso fananjur ḇesyakwar ma nkobaryas ro rum ḇe rum saneraro ḇepyum ḇero Refo kuker fafisu iyama ḇe ḇesesya. Sinan ayesu suḇuk farari ma sufarkor nkofa nkoswar Yahwe I. Eba yedi, Dorothy, ḇyepenyiar Karajan rofyor ḇyeumur taun ri wonem, aya kako rarirya. Ro 1943, yaso randak ro Sekolah Pelayanan Teokratis.

Kebaktian distrik ma wilayah nama bar ḇefandun kaku ro kankenem nkoḇena.  Yaswarepen kebaktian distrik ro 1949 ro Sioux Falls, South Dakota. Naek Grant Suiter dun faya ḇyedi ”Ryama fasaw kaku fyor kokara baimna!” Fyasnaḇair snar snonkaku Kristen ḇebuk farsamsyom sena kwar fandun sḇuk kankenem sena fa sbaryas ankankinem ḇeḇye Allah Karajan ḇyedi. Ramnai, yaḇuk kankenem yedi ḇe Yahwe I. Yaḇe baptis ro kebaktian wilayah ḇepur ya, ro Brookings, ro 12 November 1949. Iso ḇefnai fa yaro moḇ ḇepnunek insanja yafawar ḇepon ani. Nkoḇe fyak nkowaf fa imbe nkoḇebaptis ro bak ḇeḇefrur ro mankarmom.

Ramnai yamarisen yaḇe perintis. Yaḇe perintis ro 1 Januari 1952, fyor yaḇe umur 15 ya. Refoya doḇe, ”Mansei ḇembran kuker snonkaku ḇefawinanem nari dakfawinanem kako,” ma snonkaku ḇebor ḇefawinanem nasya ro kina yesi ḇesaramper aya fa yafrur snemuk ḇeperintis. (Amsal 13:20) Yamarisen yabaryas kuker imem yedi Yulius i, ḇyeumur taun ri 60. Ḇyeumur syadi aya raryano, numarisen nufararur kayam ro ḇaḇebaryas. Yafarkor nabor syadiwer ro i ma pengalaman ro kankenem ḇyena. Dorothy dakḇe perintis kako.

Rofyor yaḇeromawa kaker, sinan yesu sumarisen suyor pengawas wilayah ma swa sesya fa sḇarek ro rum nkoḇedi. Imbeswa oso, Jesse ma Lynn Cantwell, subuk farfnoḇek ḇebor ḇe aya. Suswar ma susaramper aya. Rofyor sufarmyan ḇe sidang ḇefanam, suyor ayafa yakso kayamsu ro fararmyan. Yamarisen kaku yafararur kayam kuker su! Yamarisen yafararur nabor wer ro Yahwe fararur ḇyena raris su ma yakḇe perintis.

Pengawas Wilayah ḇeuser nkoḇedi isoine Bud Miller. Rofyor swari, Joan i surama ḇe sidang nkoḇedi, yaḇeumur taun ri 18. Ro fafisu ani, fandun fa yarama ḇe panitia wajib militer. Simarisen yafrur fararur yafawi neḇese kuker Yesus parenta ḇyena fa koḇenetral ro politik. Ḇape, yamarisen yabaryas ankankinem ḇeḇye Karajan ya. (Yohanes 15:19) Inja, yor insama sḇuk aya fa yakḇe rohaniwan.

 Yamarisen kaku fyor Naek Miller imarisen iso aya ḇe panita ani. Ima snonkaku ḇebri. I kako fyawi kaku Refoya. Snar nuḇekayamyam ker inja nafrur yaḇebri kaku! Fafisu wampasi samsamya imḇe imnai ro 1954, panitia ansi skarem fararyor yena ḇe rohaniwan. Inja kirine yana swaf nabor fa yafarmyan ḇe Yahwe I.

Fyoro werḇa, sor aya fa yafarmyan ro Betel, fafisu ani sor na ḇe Perkebunan Watchtower, ro Sup Staten, New York. Yafarmyan ro diwa swaf taun rikyor. Yasmai pengalaman ḇepyum snar yasrow kuker naek srar ḇefawinanem ma yafarur kayam kuker si.

Ro perkebunan ḇero Sup Staten stasiun radio WBBR nasya kako. Ḇeyuf na iso Saksi-Saksi Yehuwa ro 1924 isof ro 1957. Kina Betel ri 15 isof 20 monda ḇefararur ro perkebunan ani. Romawa babo siso ḇebor rodia ma sḇekir kaku. Ḇape naek oso ḇesma ramrem ḇyeumur syadi inko isoine Naek Eldon Woodworth, fyararur kayam kuker nko. Ima imnis kamam nkoḇedi ma fyarkor roi nabor ḇe nko. Fyor nkona samswen ro fandu nko, Naek Woodworth ikofen, ”Fararur Yahwe ḇyena naba kaku, mboi ikyar snonkaku ḇenapes ḇa sya fa sifrurna.”

Naek Frederick W. Franz iwarpu nko ma ifnoḇek nko. Nya fawawinanem ma fyawimnis kaku Refoya. Ifrurpyum nko oser-oser. Ḇekankun ḇe inko iso Harry Peterson. Snonsnon ḇyedi ine ipyan fa nkobuki dori, bardibur snonsnon ḇekaku ḇyedi, Papargyropoulos. I kako naek ḇena ramrem ma iswar kaku fararmyan ya. Naek Peterson ifrur fararur ḇyena ro Betel kuker pyum kaku, ḇape ryir fararmyan ḇyena ḇa. Ro paik oser irwas majalah utin ma utin. I kako fyawimnis Refoya ma kyarem fakfuken-fakfuken nkoḇena.

Ro perkebunan ani, nkofasos aibon ma weina ma nkorir na ro toples. Ro taun oser, nkoser toples ri 45.000 kuker aibon ma wei ḇe kina Betel sya. Yafarur kuker Etta Huth,  imbesrar oso ḇefawinanem. Iso ḇefrur resep fa nkoḇuki fasos aibon ma weina. Imbesrar ḇero moḇ ansya srama sfararur kayam kuker inko, ma Etta iso nari ḇefnoḇek fararur sena. Etta ifawi nabor kuker proses pengalengan ine raryano, ḇesyowi pdef manbesrar ḇe pengawas ro perkebunan ani. Ḇyuk farari ḇepyum faro nkokame.

Angela Romano ima imbesrar ḇebabo ḇerama ḇefnoḇek fararur ro perkebunan ani. Etta iso ḇefnoḇek i rofyor fyarkor napnapes ya. Angie nufarbuk ro April 1958, ma numarisen kaku snar nufarmyan kayam ḇe Yahwe I taun ri 58. Ro taun-taun ani, soasuser Angie faro Yahwe nafrur farḇakbuk nubena nsambraḇ. Ima ifawinanem ma samswen rosai monda nusmana yakyar kaku i.

Fyor sboḇ fasilitas WBBR ro Sup Staten ro 1957, yafarmyan ro Betel Brooklyn fafisu ḇeḇeso monda. Aya ma Angie nufarbuk kwar, inja yasae ro Betel. Swaf taun rikyor, nuḇeperintis ro Sup Staten. Fafisu oso, yafararur ḇe ḇena babo stasiun radio ani, sab iḇe WPOW.

Angie ma aya nufaduru kenem nubedi napyan insama bisa nura ḇe moḇ ḇefandun farfnoḇek. Inja, ro 1961 nusmai undangan fa nufarmyan ḇeperintis istimewa ro Falls City, Nebraska. Fyor nusya ro moḇ anya, nusmai undangan fa nura ḇe South Lansing, New York, swaf paik rioser fa nuso Sekolah Pelayanan Kerajaan. Numarisen kaku faro farkarkor nusmana, ma nukara fyor farkarkor ya imnai nari nukaḇer ḇe Nebraska. Inja nukandor kaku rofyor nusmai fararur ḇebabo. Nari nufarmyan ḇe misionaris wer ro Kamboja! Ro sup bepduk ḇero Asia Tenggara, numam, nurower, ma nuḇaḇir roi ḇeḇabo ḇe nu. Numarisen kaku fa nukofenḇair ḇe snonkaku sya abar ḇepyum kuker Karajan.

Ḇape situasi politik nawyae Kamboja, inja fandun fa nuraḇe Vietnam Selatan. Ro swaf taun risuru ramnai yaduf marḇak, ma ine nafrur fa nukaḇer wer ḇe Amerika Serikat. Yafandun fafisu ḇeḇeso insama yaprei. Fyor yaprei kwar, nari nuḇemerintis kaḇer.

Ro Maret 1965 nufarmyan ḇe sidang-sidang ro fararur keliling. Ro swaf taun ri 33, Angie ma Aya numarisen nufararur ḇe pengawas keliling ma pengawas distrik, ma nufnoḇek kako kebaktian anna. Yamarisen kaku faro fararur nane, rofyor yafnoḇek fararur nane, ima oras beyun marisen beba kaku ḇe aya. Ro swaf taun bebeso nurama be sidang ḇero New York City, ma kebaktian ḇebor sifrurna ro Yankee Stadium.

Angie ma aya nusmai fararur ḇebabo naḇor ma ḇesamswen fafisu ani. Ro 1995, sor aya fa yaḇuk farkarkor ro Sekolah Pelatihan Pelayanan. Taun rikyor ramnai, sor aya ḇe Betel. Yamarisen snar taun ri 40  ḇyenande ramnai yakaḇer ḇe Betel wer, fafisu randak yaksun ro dinas sepenuh waktu khusus. Fafisu oso, yafararur ro Departemen Dinas ma yakḇe instruktur ro farkarkor ḇeḇor anna. Ro 2007, Badan Pimpinan sifrur Departemen Sekolah-Sekolah Teokratis fa sifasos farkarkor-farkarkor sḇuk ro Betel na, ma ro taun ḇeḇeso yakḇe pengawas.

Ro taun-taun ḇarpur ine, fararwei nabor sifrurna faro farkarkor-farkarkor ro Betel. Sekolah bagi Penatua Sidang sifrurna ro 2008. Ma ro swaf taun risuru ḇeuser ya, penatua syadi ri 2000 sismai farkarkor ine ro Patterson ma ro Betel Brooklyn. Farkarkor nane sifrurna ro moḇ besena wer. Ro 2010, snonsnon ro Sekolah Pelatihan Pelayanan sifadwerna ḇe Sekolah Alkitab bagi Saudara Lajang, ma farkarkor ḇebabo sifrurna wer sapna ḇe Sekolah Alkitab bagi Pasangan Kristen.

Ro September 2014, farkarkor risuru suine sfanjurna ḇeoser ma sapna ḇe Sekolah bagi Penginjil Kerajaan. Ḇefarkor sya bisa imbeswa, naek ḇaido srar ḇefarḇuk ḇaim sya. Naek srar ḇero supswan ḇesiper skandor kaku fyor srower snar farkarkor nane nari sifrurna kako ro moḇ sena. Ine nun marisen ḇeba snar komam naek srar ḇebor sisma swaf fa siso farkarkor nane. Yamarisen kaku yasrow kuker naek srar ḇefrur fararwei ro kenem sena insama sakso farkarkor nane.

Rofyor yakara kankenem yedi fyor yaḇebaptis ḇaim ro tangki ani isof kirine, yakofen kasumasa faro snonkaku ḇefawinanem yasrow kwar ansya. Snar sifnoḇek aya kwar fa yasmai fawawi naḇor kuker Yahwe I ma yafarmyan pyum ḇe I. Ḇeḇeso sya sbabo syadi aya ma ḇesesya sḇeumur syadi aya. Ḇebor rosi srama ro budaya ḇeḇese kuker aya. Ḇape yamam kwar ro kenem ma rari sena, siswar kaku Yahwe I. Yamarisen kaku snar yasmai bati ḇefawinanem naḇor rofandu Yahwe kawasa ḇyesi ma bisa yafarkor rosi.