1. Rosai Adam ma Eva sufrur fa napromes kwar, ma rosai bon ya?

KAKARA bedi ido, mansei kaku na ḇeyap sasoser kuker roi ḇeḇye ma ḇeḇyeḇa na faro ko? Fafisu Adam ma Eva suyan aibon ro aiknam fawawi ḇekur roi ḇeḇye ma ḇeḇyeḇa na, sufasnai kaku roi ine: Sukyar faro Yahwe ma sasoser Ḇyena ḇa. Sukinfir fa sufrur ro mankunsu rosai ḇeḇye ma ḇeḇyeḇa na. (Kej. 3:22) Ḇape, komam kada roi susmai na. Sufrur fa ḇaḇebati suḇena kuker Yahwe I napromes kwar ma suna swaf fa sukenem fyoro werḇa. Iba syadiwer, suḇuk sasar ma marmar i ḇe romawa suḇesi. (Rm. 5:12) Adam ma Eva roi sukinfir nane, nun bon ḇeḇyeḇa kaku.

2-3. (a) Rosai ḇebarara Etiopia ifrur ya, fafisu Filipus ḇyaryas ḇe i? (b) Barakas rosai monda kosmai snar koḇebaptis? (c) Fakfuken rosai na kawos ya?

² Rosai Adam ma Eva sufrur na neḇesebur ḇebarara Etiopia roi ifrur na. Fafisu Filipus ḇyaryas ḇe i, ḇyesyowi kaku rosai Yahwe ma Yesus sufrur kwar faro i na. Eḇedari rofafisu ya beri dakḇebaptis. (Farfyar 8:34-38) Raris ḇebarara Etiopia ani, komarisen kofasnai syowi faro rosai Yahwe ma Yesus sufrur ḇe ko kwar na. Kofasnai na kuker koḇuk farsamsyom kankenem koḇena faro Allah I. Kofasnai kako kokyar faro Yahwe ma kokarem Iso monda ḇeyap sasoser ḇekur roi ḇeḇye ma ḇeḇyeḇa na.

³ Kwarapan kada barakas kosmai snar kofarmyan ḇe Yahwe I! Snar kokyar faro Yesus Kristus, Yahwe ḇyuk ampun faro sasar koḇena ma ḇyuk sneuser ḇesren ḇe ko.  (Mat. 20:28; Farfyar 10:43) Osower ido, na kakḇe Yahwe kina Ḇyedi isoine manfamyan ḇesmai kyaremso Ḇyena ma nari kosmai barakas ro fafisu iyama. (Yoh. 10:14-16; Rm. 8:20, 21) Ma ḇarpurya, kona swaf fa kosmai kaḇer roi Adam ma Eva sufrur fa napromes kwar anna, ine kako kankenem fyoro. Barakas nanekam nama napyum, ḇape snonkaku ḇeḇeso ḇefawi Yahwe I kwar skorwanan fa sakfrur imnis ḇebarara Etiopia ani. Roi risai monda ḇedwarek si fa sebaptis? Moḇsa sisaebur samswen anna rai?

4-5. Rosai ḇedwarek snonkbor oso snori Avery ma inai babo snori Hannah fa suḇebaptis?

⁴ Sikyar mankunsi ḇa. Snonkbor oso snori Avery, sinan ḇyesuya Saksi Yahwe suirya. Kmari ima kma ḇefrur pyum ma penatua ḇekir. Ḇape, Avery imkak kaker fa ḇyebaptis. Rosai ḇefnai ya? Doḇe, ”Yakara mboi na yakfrur imnis Kamami ḇa.” Avery kyara kako jadi fa duf fakamamar nari sḇuk ḇe i na ḇa. Ikofen wer, ”Yamkak nari sor aya fa yaḇenadi ro ḇarpon kawasa sya, yun faya, ḇaido yafarkin fananjur faro ḇaḇeḇaryas ya.”

⁵ Hannah ḇyeumur taun ri 18, dakyar mankundi ḇa kaku. Sinan ḇefaduru i suma Saksi Yahwe suiri. Imbape, kyorwanan nari ikenem imnis Yahwe sasoser Ḇyena ke roḇa. Rosai ḇefnai ya? Hannah myamkyof mankundi. Fyorno ido, iḇoryae rawo kyorparpar baken ḇyedi, ḇefrur fa ḇyesanekar syadiwer. Ikofen ḇo doḇe, ”Roi yafrur nane yakofen na ḇe manseirya ḇa, sinan ayesu ya kako. Yakara Yahwe na imarisen aya ḇa fa yakḇe manfamyan Ḇyedi, snar yafrur samswen baken ayedi.”

6. Rosai ḇedwarek Vanessa i fa dakḇebaptis?

⁶ Awyae ro bati sya. Vanessa, ḇyeumur taun ri 22, doḇe, ”Yana bati ḇefanam kaku. Nuḇebatiyae nu indokada swaf taun risamfur kwar.” Imbape, Vanessa bati ḇyedine imewer dakḇe Saksi ma dakfnoḇek Vanessa i ḇa fa ḇyebaptis. Iso ḇefrur fa Vanessa ḇyesneso. Ikofen ḇo doḇe, ”Samswen ḇe aya fa yana bati. Inja, yaḇebati kuker i werḇa ido, yamkak nari yakna bati noḇa.”

7. Rosai ḇefrur fa inai babo oso snori Makayla imkak ya, ma rosai ḇefnai ya?

⁷ Simkak na sifrur sasardi. Fafisu Makayla ḇyeumur taun ririm, srar ḇeba ḇyedi sisasyar i ro sidang. Fyor iba kwar, myam mboi sinan ḇyesuya suḇesaneso  kaker snar rosai srar ḇeba ḇyedi ifrur na. Makayla doḇe, ”Yamkak fyor yakḇebaptis ido, nari yafrur sasar, sisasyar aya ro sidang, ma yafrur Awin Kamam ayesuya suḇesaneso syadiwer.”

8. Rosai ḇefrur fa snonkbor oso snori Miles imkak ya?

⁸ Simkak nari spampum si. Miles sinan ḇyesuya suḇesisye kwar. Kmari ima Saksi Yahwe mboi snarima dakḇe Saksi ḇa. Miles fyar, ”Yaḇarekus Awini fafisu swaf taun ri 18. Yamkak fa yakofenḇair ḇe Awini yamarisen yakḇebaptis. Yamam ro ḇepon ya kwar moḇsa Awin pyampum kaku Kamami fyor dakḇe Saksi Yahwe. Inja, yamkak nari imsor aya kako.”

9. Fyor wafawi nabor syadi Yahwe ḇaḇekaḇaḇaḇ ma saswar ḇeba Ḇyedi ido, moḇsa na ḇaḇir rai?

⁹ Adam ma Eva sukinfir fa sufarmyan ḇe Yahwe werḇa snar suna saswar ḇesambraḇ faro I ḇa. Rarirya ido, Yahwe ḇyesu fa sukenem kawan insama suna romawa ma sukinfir ro mankunsu nyan moḇsa sufaduru romawa suḇesi raya. Sumam ro makunsu kankinfir suḇena fa sumkei ro Yahwe I nun roioḇa kaku. Romawa rak suḇedi myunbos ḇedar ḇyedi, ma ro fafisu anya kankenem snonkaku sya naser ḇaḇerarmomen ma ḇaḇefandun mankun. (Kej. 4:8; 6:11-13) Imbape, Yahwe fyasos nyan fa fyaspar Adam ma Eva romawa ḇyesikam ḇemarisen ḇefarmyan ḇe I. (Yoh. 6:38-40, 57, 58) Fyor wafawi nabor syadi Yahwe ḇaḇekaḇaḇaḇ ma saswar ḇeba Ḇyedi ido, nari waswar syadi I. Na wamewer kwinfir sasar raris Adam ma Eva su mboi buk kankenem bedi fa wafarmyan ḇe Yahwe I.

10. Rosai ḇefnai fa wawasenkara Mazmur 19:7 na ifnoḇek Au fa wakfarmyan ḇe Yahwe I?

¹⁰ Wafarkor pdef ro Yahwe I. Mambir kaku Yahwe I ido, na wakyar kaku nari wasmai bon ḇepyum snar wafarmyam ḇe I. Avery, ḇeyap ḇepon anya, doḇe, ”Yana kakakyar snar yawasya ma  yawasenkara asas ḇefas ro Mazmur 19:7.” (Wasya.) Fafisu Avery myam ro mankundi moḇsa Yahwe ifrur asas Ḇyena rai, iswar syadi Allah I. Saswar ḇyawes kakyar monda ḇa, mboi ifnoḇek ko fa kokarauser Yahwe ma roi imarisen na. Hannah, ḇeyap kwar anya, doḇe, ”Snar yawasya ma yafarkor Refo ro mankundaya, insape yafawi fafisu yakorparpar baken yedi isof yadufe, yafrur Yahwe sne ḇyedi iduf kako.” (1 Ptr. 5:7) Hannah ifrur imnis Allah wos Ḇyena. (Yak. 1:22) Rosai bon ya? Ikofen ḇo doḇe, ”Fafisu yasmai fainda snar yasouser Yahwe I, saswar yena faro I naba syadi wer. Kirine, yakyar kaku Yahwe na fyarkin aya ḇesya kwar fafisu yafandun fafnoḇek Ḇyedi.” Hannah kyorparpar baken ḇyedi werḇa. Ḇyuk farsamsyom kankenem ḇyedi ḇe Yahwe ma ḇyebaptis.

11. Rosai Vanessa ifrur fa dakna bati, ma rosai kofakor ro i?

¹¹ Kwinfir pyum bati ḇesya. Vanessa, ḇeyap kwar anya, ḇarpurya ifawi bati ḇyedi idwarek i fa fyarmyan ḇe Yahwe I. Inja, ḇyebati kuker i werḇa. Mboi, irya monda ḇa. Vanessa syewar bati ḇebabo ro sidang ya dori. Farfyar ro Nuh ma kina ḇyesi nafnoḇek i kwar. Doḇe, ”Nuh ma kina ḇyansi sikenem ro ris snonkaku ḇeswar Yahwe I ḇa sya, inja fandun fa sfanamyae si.” Vanessa ḇyebaptis raposa, dakḇe perintis. Kirine ikofen, ”Ine ifnoḇek aya fa yana bati ro sidang monda ḇa, ḇape ro sidang ḇese kako.” Na waksmai bati kako fyor wamyaren ro fararur Yahwe ḇyuk ḇe ko fa kofrur na.​—Mat. 24:14.

12. Rosai Adam ma Eva sufasnai ḇa na, ma rosai bon ya?

¹² Wasawen makak bena. Koḇesyowi kaku Yahwe I ido, na kopok kofrur roi imewerḇa na. (Mz. 111:10) Adam ma Eva sufasnai syowi ḇeradine kada, na supok suḇembroḇ faro Yahwe I ḇa. Mboi suḇembroḇ faro I kwar. Sufrur rarirya ramnai, insape sumkasna neḇas ma suḇaḇir kaku sufrur sasar kwar. Sufawi  susouser Allah sasoser Ḇyena ḇa kwar, inja sumai snar suḇaḇer ma sudwarek mankunsu. (Kej. 3:7, 21) Mura, suna romawa ma suḇuk sasar ma marmari ḇe si.

13-14. (a) Ro 1 Petrus 3:21 ya, rosai ḇefnai fandun fa komkak syadi faro marmar i ḇa? (b) Rosai ḇefrur fa koswar Yahwe I?

¹³ Koḇesyowi Yahwe I ido, na kopok komkak syadi faro marmar i ḇa. Yahwe fyasos kwar nyan insama kosmai kankenem fyoro ya. Kofrur sasar mboi kombror kaku ro sasar kofrur na ido, Yahwe nari ḇyuk ampun ḇe ko. Ifrur rarirya snar kokyar faro farsarser ro Rumkun Ḇyedi. Nyan ḇepon kaku fa kofasnai kakyar ya iso koḇuk farsamsyom kankenem koḇena ḇe Allah ma koḇebaptis.​—Wasya 1 Petrus 3:21.

¹⁴ Roi ḇebor naisya ḇefrur ko fa koswar Yahwe I. Ḇyuk kwar roi ḇepyum nabor kosmai ro ras-ras monda ḇa, mboi fyarkor ko kakaku Ḇyena ma marisen Ḇyedi. (Yoh. 8:31, 32) Ḇyuk sidang Kristen fa fyarkin ma syambraḇser ko. Ifnoḇek ko ro baboine infa kosambraḇ fa kokamar samswen na, ma ḇyuk saneraro nari koḇe snonkaku ḇemnis kaku ma kokenem fyoro ro fafisu iyama. (Mz. 68:19; Why. 21:3, 4) Yahwe ifrur kwar roi ḇebor ḇe ko fa fyasnai iswar kaku ko. Kokara mura ḇe roi nane ido, nadif ko fa koswar kaku I. Ma koswar Yahwe kada, na koḇesyowi kaku I ma komewer kofrur roi na ḇefrur fa imarisen ḇa.

15. Moḇsa Makayla isawen makak ḇyena rai?

¹⁵ Makayla, ḇeyap insanja anya, isawen makak ḇyena fafisu ifawi moḇsa Yahwe imarisen ḇyuk ampun raya. Doḇe, ”Yafawi kaku koinema konapes ḇa ma na kofrur sasar. Ḇape, yafawi kako Yahwe ima iswar ko ma neknam ro farsarser fasaspar ya ḇyuk ampun ḇe ko.” Saswar ḇyena faro Yahwe nadif i fa ḇyuk farsamsyom kankenem ḇyedi ma ḇyeḇaptis.

16. Rosai ḇefnoḇek Miles i fa isawen makak ḇyena ya?

¹⁶ Miles, imkak nari snari pyampum snemuk ḇyedi fa ḇyebaptis, inja dor fafnoḇek ro pengawas wilayah. Miles fyar, ”Naek ani kako sinan ḇyesu oso monda ḇe Saksi Yahwe. Ifnoḇek aya fa yakara rosai na yakofen ḇe Awini insama ifawi ḇaḇebaptis ima snemuk yedirya, Kamam ima idif aya fa yafrur roi ine ḇa.” Miles snari imarisen ḇa faro snemuk dun nane. Ḇarpurya, Miles ḇyarekus snari werḇa, mboi ifrur kaku snemuk ḇyedi. Doḇe, ”Snar yafarkor Yahwe ifrur roi ḇepyum faro aya kwar, ine nkuk sne yedi. Fafisu yakara pyum farsarser fasaspar ro Yesus ḇyedi, insape yafawi Yahwe iswar kaku aya. Eḇedari yaḇuk kenem yedi fa yafarmyan ḇe Yahwe ma yaḇebaptis.”

17. Kokame kona swaf fa kofasnai roi risai?

¹⁷ Rofyor Eva dan aibon ro aiknam ḇero Yaf Eden anya, isya pyampum Kma ḇyedi. Fafisu Adam daksowarpu i, dakfasnai kako ima ḇyesyowi roi ḇepyum Yahwe ifrur kwar ḇe i na ḇa. Kokame kona swaf fa kofasnai koma komnis Adam ma Eva su ḇa. Koma koḇesyowi kaku rosai Yahwe ifrur kwar ḇe ko na. Fyor koḇebaptis, kofasnai ḇe Yahwe kokyar snar I monda ḇena papoik fa ḇeyap rosai ḇeḇye ma ḇeḇyeḇa na faro ko. Kofasnai koswar ma kokyar faro Kma koḇedine.

18. Rariso insama wasmai bon ḇepyum ro fararmyan ḇe Yahwe I?

¹⁸ Fafisu koḇebaptis kwar ido, ras ḇe ras fandun fa kokenem imnis Yahwe marisen Ḇyena, mboi marisen koḇena ḇa. Allah manfamyan Ḇyesi sesyaran sikenem rarirya. Wakenem raris si fyor swewar fa wafawi kaku Allah Wos Ḇyena, Refo ya. Swewar fa ḇebati kuker naek srar sya, ma waryaḇ fa ḇaryas roi wafarkor kwar ḇekur Kma ḇesaswar bedi. (Ibr. 10:24, 25) Fafisu imbe wun snemuk, wamnaf Yahwe anun Ḇyena roro Refo ma organisasi Ḇyedi. (Yes. 30:21) Rarirya roi wafrur na nun bon ḇepyum.​—Ams. 16:3, 20.

19. Rosai fandun fa kwara ker ya, ma rosai ḇefnai ya?

¹⁹ Fyor kwara ker moḇsa Yahwe farkankin Ḇyena nḇuk fainda ḇeba kaku ḇe Au ido, na waswar syadi Yahwe ma sasoser Ḇyena. Rarirya, Setan ipok ifrur fa wamnai wafarmyan ḇe Yahwe I ḇa. Wawasen kada wakenem kaker isof ro swaf taun syaran oser ḇerama ya. Fafisu ya, na wakofen kasumasa kaku snar wun snemuk fa ḇebaptis. Ima snemuk ḇepyum wafrur kwar ro kenem bedi!