1-2. (a) Rariso Yahwe dawos yoḇ snonkaku sya rai? (b) Rosai na kawos ro farkarkor inena?

YAHWE imarisen dawos yoḇ ko. Randak iwara, ikofenḇair kakara Ḇyena ḇe snonkaku sya roro nabi, malaikat sya, ma Rumkun Ḇyedi, Kristus Yesus. (Am. 3:7; Gal. 3:19; Why. 1:1) Baboine, Yahwe dawos yoḇ ko roro Wos Ḇyena, Refo ya. Ḇyuk Refo ḇe ko insama kofawi nyan kakara ma fararur Ḇyena.

² Fafisu Yesus ryo supswan, ro swaf rikyor Yahwe dawos ro nanki mumfes. Ro farkarkor ine na kawos rosai Yahwe ikofen na, farkarkor risai kun ro wos Ḇyena, ma fainda rosai kosmai ro wos Ḇyenane.

3. (a) Raris kowasya ro Markus 1:9-11 ya, rofyor Yesus ḇyebaptis rosai Yahwe ikofen ro nanki mumfes? (b) Roro wos anna roi rikyor ḇefandun kaku risai Yahwe ikofenḇair na?

³ Markus 1:9-11 fyasepen swaf ḇerandak Yahwe dawos ro nanki mumfes. (Wasya.) Yahwe doḇe, ”Au kada Rumkun saswar ayedi, faro Au yamarisen.” Roro wos anna, Yahwe fyasnai ima iswar ma ikyar kaku faro Yesus. Rofyor Yesus ryower Kmari wos Ḇyena sneri imarisen kaku! Ro wos Ḇyanine Yahwe ikofenḇair roi rikyor ḇefandun kaku ḇekur Yesus i. Oser ya, Yesus iso Rumkun Ḇyedi. Ḇesuru ya, Yahwe iswar kaku Rumkun Ḇyanine. Ma ḇekyor ya, Yahwe imarisen faro Rumkun Ḇyedi. Mkorama kawos roi rikyor anskoine oser-oser.

4. Fyor Yesus ḇyebaptis, moḇsa dakḇe Allah Rumkun Ḇyedi wer rai?

⁴ Au kada Rumkun . . . ayedi.” Fafisu Yesus ryo nanki,  ima Allah Rumkun ḇyedirya. Imbape, fyor Yesus ḇyebaptis, dakḇe Allah Rumkun Ḇyedi wer. Allah ryem i kuker rur ḇesren, ine kyurfasnai Yesus nari kyaḇer ḇe nanki ma dakḇe Raja ma Imam Ḇeba. (Luk. 1:31-33; Ibr. 1:8, 9; 2:17) Iso ḇefnai fa fafisu Yesus ḇyebaptis, Kmari ikofen ḇo doḇe, ”Au kada Rumkun . . . ayedi.”​—Luk. 3:22.

5. Moḇsa na kakso Yahwe nyan Ḇyedi rai?

⁵ ”Rumkun saswar ayedi.” Yahwe fyasnai ima iswar kaku ma imarisen faro Yesus i. Ine ḇyuk swarepen ḇe ko fandun fa kosewar swaf fa kosambraḇser ḇesesya. (Yoh. 5:20) Snonkaku koswar ya fyasnai iswar ko ma myanen roi ḇepyum kofrur na ido, na kosnesna naprei kaku. Rarirya kako, naek srar ro sidang ma kina koḇesi fandun fa koswar si ma kosambraḇser si. Fyor kosandik snonkaku ḇesesya, na kosambraḇser kakyar sena ma siryaḇ syadi fa sfarmyan ḇe Yahwe I. Ḇepon kaku ya, sinan sya fandun fa sisambraḇser romawa sesi. Sḇuk wos sanandik kuker sne ḇesiper ma sfasnai sawarwar ḇe si kada, nari romawa sesi sisur pyum.

6. Rosai ḇefrur fa na kokyar faro Yesus Kristus i?

⁶ ”Faro Au yamarisen.” Ro wos nane, Yahwe fyasnai ima ikyar kaku Yesus nari isoasuser ifrur imnis Kmari marisen Ḇyena. Allah Yahwe I monda ikyar kaku faro Yesus i. Rarirya, na ko kako kokyar kaku Yesus nari ifrur Yahwe asas Ḇyena fa nkaku beri. (2 Kor. 1:20) Kokarauser roi Yesus fyasnai kwar na ido, na komarisen syadi fa kofarkor ro i ma koso mnis wewur Ḇyena. Raris Yahwe ikyar faro Yesus, Yahwe dakkyar kako kawasa Ḇyesi nari sifarkor pdef ro Yesus.​—1 Ptr. 2:21.

7. Ro Matius 17:1-5 ya, ro fafisu risai Yahwe dawos ro nanki mumfes, ma rosai ikofen ya?

⁷ Wasya Matius 17:1-5. Swaf ḇeḇesuru Yahwe dawos ro nanki mumfes isoine fafisu Yesus ”fyadwer mankundi”. Ro fafisu ani, Yesus dor Petrus, Yakobus, ma Yohanes skora fnoḇek i ḇe bon ḇekaki. Ro diwa, skenef koper, mura skokḇok ḇo skomam fasasnai ḇeba kaku oso. Skomam mboi Yesus mkasi isnai kaku ma sansun ḇyena nasnaper. Skomam wer snonkaku risuru susnai ra Moses ma Elia su. Suyawawos kuker Yesus ḇekur ḇe marmar ma kaḇakḇok ḇyedi. (Luk. 9:29-32) Mura, mandep ḇesnai oso iswoḇer sko, ma skomnaf mkaren ro do mandep ani. Iso Allah mkaren Ḇyedirya! Imnis ra fafisu Yesus ḇyebaptis, kirine Yahwe dawos wer fa fyasnaiḇair saswar ma marisen Ḇyedi faro Yesus i. Mboi, Yahwe ikofen wer, ”Iḇye mkomnaf I.”

8. Rariso fasasnai ani syambraḇser Yesus ma manfamyan ḇyesi rai?

⁸ Fasasnai ani fyasnaiḇair ḇepon baba ma papoik Yesus ḇyena fafisu ḇye Raja ro Karajan Allah ro fafisu iyama. Kakuḇae, ine syambraḇser ma fyasos Kristus i faro kandera ma marmar nari ḇekur i na. Fasasnai ani kako syambraḇser kakyar manfamyan ḇyansi. Ine ifnoḇek si fa sḇeḇefasos faro samswennari sismai ya ma fararur nari sifrur ya. Indokada swaf taun ri 30 mura, manwawan Petrus dap kaḇer fasasnai ani. Ine fyasnaiḇair ima iswarepen kaker na.​—2 Ptr. 1:16-18.

9. Rosai ananun ḇeyun fainda Yesus ḇyuk ḇe manfamyan ḇyesi?

⁹ ”Iḇye mkomnaf I.” Yahwe imarisen insama komnaf Rumkun Ḇyedi wos ḇyena ma kosouser na. Rofyor isya ro supswan ine rosai Yesus ikofen na? Ikofenḇadir roi ḇebor fandun fa korower na! Imnis raris, fyarkor manfamyan ḇyesi moḇsa sḇaryas rai, ma iswarepenser si insama siwaren pdef. (Mat. 24:42; 28:19, 20) Danun kaku ḇe si sisewar kaku fa sifrur Allah marisen Ḇyena, ma syambraḇser si insama sisusu awer. (Luk. 13:24) Yesus ikofenbos ḇe manfamyan ḇyesi fandun fa siswaryae si, sifaduru ḇaḇeoser, ma sisouser parenta ḇyena. (Yoh. 15:10, 12, 13) Ananun Yesus ḇyuk ḇe manfamyan ḇyesi nane nun fainda kaku! Isof ro baboine ananun anna nefandun kaku.

10-11. Moḇsa na kofasnai koisya komnaf Yesus mkaren ḇyena rai?

¹⁰ Yesus ikofen, ”Snonkaku oser-oser ḇeḇeknam ro napnapesya simnaf mkaren ayedi.” (Yoh. 18:37) Kofasnai koisya komnaf Yesus mkaren ḇyena rofyor ’kokḇaḇyae ko ma koḇuk ampunyae’. (Kol. 3:13; Luk. 17:3, 4) Osower ido, komnaf mkaren ḇyedi kuker koryaḇ fa koḇaryas ankankinem ḇeḇye ”rofafisu ḇeḇye roḇa fafisu ḇesamswen”.​—2 Tim. 4:2.

¹¹ Yesus doḇe, ”Domba-domba ayesi simnaf mkaren ayedi.” (Yoh. 10:27) Yesus manfamyan ḇyesi sifasnai simnaf mkaren ḇyena kuker sifrur beri roi simnaf kwar anna. Sipok srir ”fandun-fandun ro kankenem” nawyae si ḇa. (Luk. 21:34) Smam ma skara sasouser faro Yesus parenta ḇyena nama roi ḇefandun kaku ro kankenem sena, iba syadi fyor sismai samswen. Naek srar ḇebor sismai samswen ḇemarḇak kaku, raris ḇembroḇ sya smun si, sesaḇarar kaku, ma rim  ḇeba nkur si. Rariryano, sisouser pdef faro Yahwe I. Yesus ḇyuk kakakyar faro si ḇo doḇo, ”Mansei ḇeyuf sasoser ayena ma ḇeḇeuser na, iso ḇeswar ayanya. Ma mansei ḇeswar aya, ikada nari Mami dakswari.”​—Yoh. 14:21.

12. Rosai wer nyan ḇese fa kofasnai komnaf Yesus i?

¹² Nyan ḇese isya fa kofasnai komnaf Yesus i. Kokunem faro snonkaku ḇeḇekanow fa ḇefarkin konsya. (Ibr. 13:7, 17) Allah organisasi Ḇyedi ifrur fararwe nabor kwar ro taun ḇarpur ine. Imnis raris, nyan ma roieḇor ḇebabo fa kobukiḇaryas. Fananjur minggu fadu sifadwer na kako. Osower ido, sikofenḇair akurfasnai ḇebabo moḇsa koḇawes, kofrur mnis kaḇer, ma kofaduru Balai Karajan koḇena raya. Akurfasnai sḇuk nane nun payamyum ḇe ko, ma nefasnai Allah organisasi Ḇyedi iswar ko. Koḇesyowi kaku na! Kokyar kaku Yahwe na ḇyebarakas sasewar koḇena fa koso farkankin ḇerama ro organisasi.

13. Rosai fainda snar komnaf Yesus i?

¹³ Komnaf Yesus farkarkor ḇyenakam ido, na kosmai fainda. Yesus ḇyeasas faro manfamyan ḇyesi nari sismai saneprei ro farkarkor ḇyena. Doḇe, ”Rur mkoḇesi nari sisma kananon. Snar kamnam Ayedi ifrur marisen ma kamnam Ayedi myanan.” (Mat. 11:28-30) Allah Wos Ḇyena, ine kako syap Injil rifyak ḇefawar Yesus kankenem ma fararmyan ḇyena, na nasambraḇser kakyar koḇena, ma nafrur fa kofawinanem. (Mz. 19:7; 23:3) Yesus doḇe, ”Ḇeḇe askiya siso ḇemnaf Allah wos ḇyena ma ḇeḇeuserna.”​—Luk. 11:28.

14-15. (a) Ro Yohanes 12:27, 28 ya, fafisu risai wer Yahwe dawos ro nanki mumfes? (b) Rosai ḇefnai fa wos Yahwe ikofen na nḇuk sneprei ma nasambraḇser Yesus i?

¹⁴ Wasya Yohanes 12:27, 28. Injil Yohanes fyas sarisa ḇekyor fafisu Yahwe dawos ro nanki mumfes. Ras riḇeso fyor Yesus imar ḇaim, isya ro Yerusalem fa dakso ras Paskah ḇepupes ḇyedi. Yesus ikofen ḇo doḇe, ”Knikine sneri fyafardun.” Mura ḇyenadi ḇo doḇo, ”Mami snombri isma baba.” Kmari kyarem kuker dawos ro nanki mumfes, ”Yaḇuk  baba faroi kwar, ma nari yaḇuk baba faroi wer!”

¹⁵ Yesus ḇyekandera fafayaḇa snar duf fakamamar ḇeba fa isoasuser pdef faro Yahwe. Yesus ifawi kaku nari sewayam i kuker rarmomen ma smun i fa imar. (Mat. 26:38) Ḇape, roi ḇefandun syadi faro Yesus iso ḇyuk baba ḇaido sanandik faro Kmari snori. Ḇyeḇirḇar nari marmar ḇyedi dun snandik ḇe Kmari snonsnon Ḇyedi ḇa snar skursof Yesus danonef Allah I kwar. Inja, wos Yahwe ikofen na nasambraḇser kaku Yesus i! Ikyar kaku snonsnon Yahwe nari ismai sanandik. Kmari wos Ḇyena nḇuk sneprei ma nasambraḇser Yesus i faro roi nari kerower ḇekur i na. Fafisu ya, imbude Yesus derer ḇefawi rosai Yahwe ikofen na. Ḇape, Yahwe imarisen insama wos ikofen na neḇefasepen faro fandun koḇena kam.​—Yoh. 12:29, 30.

16. Rosai ḇefnai fa fyorno ido koḇeḇirḇar nari sanonef Allah snonsnon Ḇyedi?

¹⁶ Raris Yesus, imbude koḇeḇirḇar nari sanonef snonsnon Yahwe. Fyorno ido, sifrur pyum koḇa raris Yesus i. Ḇaido korower fawar ḇekaku ḇa ḇekur ko ḇeramuma ro snonkaku ḇembroḇ konsya, ma komarisen ḇa kaku. Imbude komkakwarek snar fawar anna, na nafrur fa sanonef snonsnon Yahwe ma organisasi Ḇyedi. Roi ḇeḇesya nane ndarirya  ido, wos Yahwe ikofen ḇe Yesus nun sneprei kaku faro ko. Kopok koḇeḇirḇar syadi awer. Kokyar mboi ”saswar-ḇaḇye ro Allah, ḇesyadi ro kakara, nari nfaduru sne ma kakara [koḇena] snar Yesus Kristus”. (Flp. 4:6, 7) Yahwe nari ifrur snori ismai sanandik ḇesya kwar. Roro Karajan Ḇyedi, nari ipyosbur roi ḇeḇyeḇa ḇeramuma ro Setan ma dunya ḇyedi ḇekur kawasa Ḇyesi kam.​—Mz. 94:22, 23; Yes. 65:17.

17. Ro Yesaya 30:21 ya, moḇsa Yahwe dawos yoḇ ko ro baboine rai?

¹⁷ Ro baboine Yahwe isya dawos yoḇ ko pdef. (Wasya Yesaya 30:21.) Kakuḇae, na kopok korower Allah dawos ḇe ko ro nanki mumfes ḇa. Imbape, Wos Ḇyena neḇefasepen ro Refo. Ro Refo ya dori, Yahwe ikofenḇair parenta Ḇyena. Osower ido, Yahwe rur Ḇyedi idif ”manfamyan mansei ḇeḇeaunos” fa ḇyuk anan rur faro kawasa Ḇyansi. (Luk. 12:42) Baboine, kosmai anan rur nabor kaku roro syap ḇeḇecetakna, ḇeḇe online na, vidio, ma audio na!

18. Rariso Yahwe wos Ḇyena nasambraḇser kakyar Bena ma nafrur fa wamkak ḇa?

¹⁸ Iḇye syadi koswarepen pdef roi Yahwe dawos ḇe Rumkun Ḇyedi fyor ryo supswan ine! Rirya kada Allah wos Ḇyanane, neḇefas ro Refo, nafrur kokyar Yahwe nya papoik faro roi nakam ma nari ipyosbur kandera ḇekur ko ḇeramuma ro Setan ma dunya ḇeḇarḇor ḇyedi. Iḇyekada, kun snemuk fa komnaf kaku Yahwe mkaren Ḇyena. Kofrur rarirya ido, na kodworen pdef fafisu samswen rosai monda nkur ko ro baboine ma ro ras-ras naiwama. Refo danunepen ko, ”Mkofandun kaku kaḇaḇaḇi insa mkofrur Allah marisen ḇyedi, ma rarirya nari mkosma rosai Allah ḇyeasas kwar faro mko.”​—Ibr. 10:36.