Wos ”amin” knam ya iso ”rarirya” ḇaido ”kaku”. Ro wos Ibrani knam kaku ya iso ”soasuser”, ḇaido ”na kaku beri”. Fyorno ido wos ine sap i ro parkara hukum. Snonkaku oso ḇyesowar raposa, na ikofen ”amin” fa fyasnaiḇair rosai ikofen kwar anna nkaku ma nari ikamar wos ḇyena. (Bil. 5:22) Iba syadi fyor ikofen ”amin” ro ḇarpon kawasa sya, fandun fa ifrur kaku imnis wos ikofen na.​—Neh. 5:13.

Ro syap Ulangan ram ḇe 27, sfasḇair sarisa oso moḇsa wos ”amin” sap i rai. Fafisu ya, kawasa Israel sisun kwar ḇe Sup Ḇeḇeasas, mura sfanjur ro fandu Bon Ebal ma Bon Gerizim fa srower Allah sasoser Ḇyena siwasya na. Srower monda ḇa, mboi sikofenḇair kako simarisen sisouser na. Fandun fa skarem ”Amin!” fyor srower rosai nari sismai na fafisu sisouser ḇa. (Ul. 27:15-26) Kowasen kada, snon, bin, ma romawa sesyaran ma syaran skarem kuker mkaren naba! (Yos. 8:30-35) Na sipok sḇefnder wos sikofen ro ras anya ḇa. Er Israel sifrur imnis asas sena. Refoya ikofenḇair ḇe ko ”sifarmyan pdef ḇe Yahwe I ro Yosua fafisu ḇyedi ma ro fafisu manfarkin sya sisya kaker rofyor Yosua imar kwar ma ḇefawi roi nakam Yahwe ifrur kwar ḇe Israel sya”.​—Yos. 24:31.

Yesus dap wos ”amin” kako fa ḇyuki kyar rosai dawos nama nkaku. Ḇape, kuker nyan ḇeḇese. Snonkaku sya ido, sawos roi oso ramnai skarem ”amin”. Imbape Yesus ikofen wos ”amin” ine ro randak awawos ḇyena (ro wos Biak sefararwei wos yaḇe ”kakuḇeri”). Fyorno ido, dapkaḇer ”amin amin” (”kakubos ḇeri”). (Mat. 5:18; Yoh. 1:51) Kuker nyan ine, ḇyuk kakakyar faro ḇerower i sya snar  wos ḇyena nama wos kakaku nairi. Yesus dawos kuker kakyar snar ismai papoik ro Allah kwar fa ifrur Allah asas Ḇyena fa nkakuḇeri.​—2 Kor. 1:20; Why. 3:14.

Er Israel sikako sakkofen ”amin” fafisu sisandik Yahwe ma senadi faro I. (Neh. 8:6; Mz. 41:13) Rofyor snonkaku oso ḇyenadi ro ḇarpon kawasa, ḇerower i sya na sikofen ”amin” fa sfasnai sakna wos oser kuker rosai dor ro nadi ya. Inja, sikame saksowarpu ro samsyom ani ma sismai raryaḇ. Iso ḇeḇejadi rofyor Raja Daud dun Yahwe Burua Asas Ḇyedi ḇe Yerusalem. Ro fafisu sifrur munara ani, kuker sne ḇesiper Daud ḇyenadi roro dasdisen sanandik ḇeḇefas ro 1 Tawarikh 16:8-36. Wos ḇyena nsun kaku ro sne snonkaku ḇerama sya rawo ”kawasa ansi kam sikofen, ’amin!’ ma sisandik Yahwe”. Imbo, sikame simarisen kaku snar sekayamyam sisyom Yahwe I. 

Snonkaku Kristen ro abad randak sikako sakkofen wos ”amin” rofyor sisandik Yahwe. Manfasfas Refo sfas ker wos ine ro fasfas sena. (Rm. 1:25; 16:27; 1 Ptr. 4:11) Ro syap Wahyu, kowasya kada malaikat ḇero nanki sya kako sisandik Yahwe ḇo sikofen, ”Amin! Haleluya”. (Why. 19:1, 4) Ro abad randak ya, rofyor snonkaku Kristen sfanjur fa seari na sikofen ”amin” faro nadi sena. (1 Kor. 14:16) Ḇape, sawos kaḇer na rarirya monda ḇa.

Kofawi kwar moḇsa Allah kawasa Ḇyesya ro fafisu iwara sikofen wos ”amin” ya rai. Inja, kofawi wos ine fyandun kaku kap na ro pupes nadi ya. Kapna ro nadi mankun koḇena ido, kofasnai koḇenadi kuker kakaku. Rofyor snonkaku ḇese senadi mura komarisen kokofen ”amin” ḇaido kokofen ro kosnesna monda, kofasnaiḇair kona wos oser kuker rosai sawos ro nadi sena. Komam roi ḇesewer rosai ḇefnai fa wos ”amin” kokofen ya fyandun kaku.

 Koḇuk swaruser koḇena faro samsyom koḇena ḇe Yahwe I. Komarisen kokofen ”amin” kuker sne ḇesiper, inja kofaduru kakara ḇepyum ma koḇuk swaruser koḇena faro nadi ya. Kosyom ḇe Yahwe roro nadi kuker kona wos oser faro rosai sor na monda ḇa mboi kuker kofasna syowi fyor koisya koḇenadi.

Nun ko fa koḇeoser. Rofyor oso ḇyenadi ro fananjur ya, koro sidang yadori nari kokame koḇeoser snar korower nadi ḇemnis. (Farfyar 1:14; 12:5) Fafisu kokame kokofen ”amin” nari koḇeoser syadiwer kuker naek srar koḇesi. Kokofen ”amin” kuker mkaren naba ḇaido ro kosnesna monda, nari nadi koḇena nadif Yahwe I fa kyarem fararyor koḇena.

Kosandik Yahwe I. Roi nakam kofrur faro samsyom koḇena ḇe Yahwe, ḇeba roḇa kasun ke, Yahwe myamepen na. (Luk. 21:2, 3) Ifawi rosai ḇedif kaku ko fa kosyom ḇe I, ma roi ḇero kosnesna. Imbude jadi fa kakso ro fananjur ya ḇa inja korower monda roro telfon, mboi kokyar kaku Yahwe nari ryower wos ”amin” kokofen ya. Rarirya, kaksowarpu fa kosandik Yahwe fnoḇek naek srar koḇesi ro fananjur ya.

Wos ”amin” kokofen ya rya wos ḇepyan monda, ḇape ima fyandun kaku. Ensiklopedia Pemahaman Alkitab ikofen ”roro wos oser ḇaken ine”, Allah kawasa Ḇyesi sifasnaiḇair ”kakakyar, kakara oser sena, ma roi simarisen ḇero sisnesna”. Rirya kada, wos ”amin” kokofen na nun Yahwe imarisen.​—Mz. 19:14.