1-2. Ro Farfyar 8:27-31, 35-38, rosai ḇedif mananir Etiopia ani fa imarisen ḇyebaptis?

WAMARISEN wakḇebaptis ḇe Kristus manfamyan ḇyedi ke? Snonkaku ḇebor sya simarisen sebaptis snaro siswar Yahwe I ma sikofen kasumasa faro roi ḇepyum ḇyuk ḇe si. Imnis raris, mananir oso ḇefararur faro ratu Etiopia.

² Fyor mananir ḇeraker Etiopia ani fyarkor fa ifawi rosai Refo ikofen na, imarisen fa ḇyebaptis. (Wasya Farfyar 8:27-31, 35-38.) Rosai ḇedif i fa imarisen ḇyebaptis? Ḇyesyowi kaku Allah wos Ḇyena. Kofawi na ro? Filipus isrow mananir ani ifrur marandan ro Yerusalem ḇe Etiopia kuker dek kereta ḇo kyain iwasya syap Nabi Yesaya. Fyor Filipus fyasnaiḇair ḇe i fa ifawi pyum mnuk anna, ḇyesyowi kaku rosai Yesus ifrur faro i kwar na. Oso wer ido, mananir ani iswar kaku Yahwe I. Kofawi na ro? Snaro insape iso ari ro Yerusalem ḇo ibur. Ine fyasnai fyadwer agama ḇyedi kwar ma isyom Allah ḇekaku fnoḇek kawasa kyinfir sya. Inja, saswar faro Yahwe iso ḇefnai kaku i ra dun snemuk fa dakḇebaptis ḇe Kristus manfamyan ḇyesi.​—Mat. 28:19.

3. Rosai ḇedwarek snonkaku oso fa ḇyebaptis? (Mam kotak ” Sne Bedi Imnis Saprop Ḇemnis Rariso?”)

³ Wakswar Yahwe I kako ido, na nadif Au fa wakḇebaptis. Mboi, saswar faro roi ḇese na nadwarek Au fa ḇebaptis. Rwama kawos roi ḇeḇeso nane. Imbude waswar kaku kina ma bati Besi, inja wamkak ḇebaptis kukro nari  simarisen Au ḇa. (Mat. 10:37) Ḇaido wamarisen kaker fa wafrur roi Allah imewer na, ma kwara samswen fa wabur na. (Mz. 97:10) Ḇaido fyor waḇaḇa ya waso ker ras ḇeba ro agama ḇekaku ḇa. Inja, waswarepen ker marasrisen wasmai ro ras ḇeba ani. Iso ḇefnai fa, wafawi kwar Yahwe imarisen faro ras ḇeba ani ḇa, mboi samswen fa wamnai waso na. (1 Kor. 10:20, 21) Inja, fandun fa kofuken mankunko: ”Rosai ḇaido mansei yaswar syadi ya?”

4. Roi risai na ḇedif kaku Au fa ḇebaptis?

⁴ Rofyor wafarkor Refo kuker Saksi Yahwe sya ḇaim, imbude ḇesyowi Refo ma waswar Yesus i kwar. Ḇape kirine, ḇesyowi syadi Refo ma Yesus i. Osower ido, snar wafawi Saksi Yahwe sya kwar, wamarisen ḇebati kuker si. Na waswar ma ḇesyowi roi ḇepyum anna kam ḇae. Imbape, insama wun snemuk fa buk kenem ḇedi ḇe Yahwe ma ḇebaptis, roi nane nasrow ḇaime. Roi na ḇedif kaku Au fa ḇebaptis isoine snar waswar syadi Yahwe I. Waswar syadi Yahwe ro roi nane kam ido, na wapok rwir roi sairirya ḇaido manseirirya ḇa fa idwarek Au wafarmyan ḇe Yahwe. Saswar Bena faro Yahwe na nadif Au fa ḇebaptis ma nafnoḇek Au fa wasoasuser pdef ḇe I fafisu ḇebaptis kwar.

5. Fakfuken rosai na kawos ya?

⁵ Yesus ikofen fandun fa koswar Yahwe kuker sne, kakara, kenem, ma samambraḇ koḇena nasiper. (Mrk. 12:30) Rosai na kofrur insama koswar ma koḇesyowi kaku Yahwe I? Fafisu kokarauser moḇsa Yahwe iswar ko raya, na komarisen kaku kakswar I kako. (1 Yoh. 4:19) Saswar faro Yahwe nasur kwar ro snembri ido, rosai na ḇaḇir ma wafrur ya? *

6. Ro Roma 1:20, rosai nyan oser wafarkor fa wafawi Yahwe I?

⁶ Wafarkor fa wafawi Yahwe I ro ḇraur Ḇyena. (Wasya Roma 1:20; Why. 4:11) Kwarauser Yahwe fawinanem Ḇyena ro nyan ifrur rokaker ma aiwan sya. Wafarkor kako moḇ ifrur baken koḇena kuker nyan ḇepyum kaku. (Mz. 139:14) Oso wer ido, kwarapan samambraḇ ḇeba ro ori ya. Ima mak oser ro mak ḇebor sya. * (Yes. 40:26) Kwarauser roi nane kam ido na ḇesyowi syadi Yahwe I. Ḇape, wafawi Yahwe fawinanem ma samambraḇ Ḇyena monda nasrow ḇaim. Insama bisa bebati kuker Yahwe I, fandun fa wafarkor nabor syadi fa wafawi I.

7. Insama waswar syadi Yahwe I, rosai fandun fa wakyar ya?

⁷ Fandun fa wakyar Yahwe iswar Au kaku. Kwara mboi samswen fa wakyar Manḇedaw supswan ma farsyos ine fyandun Au kaku ke? Rarirya ido, waswarepen Yahwe ima ḇyinkwan ro ko oser-oser ḇa. (Kis. 17:26-28) Yahwe myam kosnesna, ma ḇyeasas faro Au, raris rosai Daud ikofen yoḇ Salomo i, doḇe, ”Swewar I nido, nari ḇye mankundi fa wasrow I.” (1 Taw. 28:9) Roi oser ḇefnai fa wakfarkor Refo iso snar Yahwe imarisen iyer Au fa fanam faro I. (Yer. 31:3) Fyor wafawi mnis kwar roi Yahwe ifrur faro Au na, na waswar syadi I.

8. Rariso fasnaiḇair kasumasa Bena faro Yahwe saswar Ḇyena rai?

 ⁸ Rariso fasnaiḇair kasumasa Bena faro Yahwe saswar Ḇyena rai? Nyan oser ya iso ḇenadi. Fyor fawar makakwarek Bena ḇe Yahwe I ma wakofen kasumasa faro roi ifrur kwar na, nari saswar Bena faro I nasambraḇ syadi. Ma rofyor mam Yahwe kyarem nadi Bena, nari fanam syadi kuker Yahwe I. (Mz. 116:1) Nari wakyar Yahwe ifawi pyum Au. Ḇape, infa fanam syadi ḇe Yahwe ido, fandun fa wafawi nyan kakara Ḇyena. Ipyum kako fa wafawi rosai imarisen ro Au na. Nyan oser wafawi na iso wafarkor Wos Ḇyena, Refo ya.

9. Rariso fasnai ḇesyowi kaku Refo ya?

⁹ Ḇesyowi kaku Allah Wos Ḇyena, Refo ya. Refo derer monda ḇekofenḇair kakaku ḇekur Yahwe I ma marisen Ḇyena ḇe Au. Fasnai syowi kuker wawasya Refo ras ḇe ras, wafrur fasasos fyor farkor Refo ḇaim, ma wambran mnis rosai wafarkor kwar na. (Mz. 119:97, 99; Yoh. 17:17) Wakna jadwal fa wawasya Refo ya ke? Waso mnis jadwal anya ma wawasya Refo ras ḇe ras ke?

10. Refo iser roi ḇepyum rosai?

¹⁰ Roi ḇepyum kaku ro Refo iso iser fawar ma fasfas ro snonkaku ḇemam kaku Yesus i sya. Refo monda ḇefawar mnis kaku rosai Yesus ifrur kwar ḇe Au na. Wafarkor ma wafawi kwar rosai Yesus ikofen ma ifrur na ido, na wamarisen bebati fanam kuker i.

11. Rosai wafrur ya insama waswar Yahwe I?

¹¹ Waswar Yesus i insama waswar Yahwe I kako. Rosai ḇefnai ya? Snaro Yesus iso mnis kaku Kmari rari-rari Ḇyena. (Yoh. 14:9) Farkor nabor fa wafawi Yesus i ido, na mambir pyum ma waswar syadi Yahwe I. Wawasenpan sawarwar Yesus fyasnai faro snonkaku smamkyof sya snar sisaḇarar, siduf, ma sisambraḇ ḇa. Kwarapan kako Yesus ḇyuk anun ḇepyum faro kankenem Bena ras ḇe ras  ma wasmai payamyum snar wasouser na.​—Mat. 5:1-11; 7:24-27.

12. Wafawi roi Yesus ifrur kwar na ido, na wamarisen wafrur rosai?

¹² Saswar Bedi faro Yesus i syambraḇ syadi rofyor kwarauser farsarser Yesus ḇyuk insa sasar koḇena neḇepyos. (Mat. 20:28) Wafawi kwar Yesus imarisen imarwarek Au ido, nari wamarisen fa wambror ro sasar Bena ma wor ampun ro Yahwe I. (Kis. 3:19, 20; 1 Yoh. 1:9) Waswar syadi Yesus ma Yahwe su ido, na wamarisen wakfanam kuker snonkaku ḇeswar su kako.

13. Rosai Yahwe ḇyuk kwar ḇe Au?

¹³ Waswar snonkaku ḇeswar Yahwe I sya. Kina ma bati Bedi ḇemambir Yahwe ḇa sya na sifawi ḇa rosai ḇefnai buk kenem Bedi fa farmyan ḇe Yahwe I. Imbude na sisampum Au. Ḇape, Yahwe nari ifnoḇek Au kuker ḇyuk naek srar ro sidang fa sḇe kina Bedi. Fanam pdef kuker si ido, na siswar Au ma sḇuk roi wafandun na. (Mrk. 10:29, 30; Ibr. 10:24, 25) Imbude ras oso insape kina besi na sakfarmyan ḇe Yahwe fnoḇek Au ma sakkenem imnis farkankin Ḇyena.​—1 Ptr. 2:12.

14. Raris 1 Yohanes 5:3 ikofen ya, rosai wasmai ya snar wasouser Yahwe farkankin Ḇyena?

¹⁴ Ḇesyowi ma wasouser Yahwe farkankin Ḇyena. Rofyor mambir Yahwe I ḇaim, kwinfir roi ḇekaku ma ḇesasar na ro mankundaw. Ḇape, kirine fyor wafarkor Refo ya kwar, wafawi Yahwe farkankin Ḇyena iso ḇepyum syadi. (Mz. 1:1-3; wasya 1 Yohanes 5:3.) Kwarapan wos anun ro Refo faro snonswa, binswa, sinan, ma romawa sya. (Ef. 5:22–6:4) Fyor waso mnis wos anun anna, mam kina Besi sismai payamyum syadi ke? Fyor waso Yahwe wos anun Ḇyena fa kwinfir bati ḇepyum, mam kenem Bedi ipyum syadi ke? Wasmai marisen syadi ke? (Ams. 13:20; 1 Kor. 15:33) Na kwarem imbo ḇae.

15. Rosai na wafrur ya fyor samswen fa wafawi moḇsa waso pyum wos anun ro Refo na?

¹⁵ Fyorno ido samswen fa wafawi moḇsa waso pyum wos anun ro Refo wafarkor kwar na raya. Iso ḇefnai fa Yahwe organisasi Ḇyedi fyasos syap-syap ḇeknam ro Refo ḇefnoḇek Au fa mambir pyum roi ḇesasar ma ḇekaku na. (Ibr. 5:13, 14) Fafisu wawasya ma wafarkor syap-syap anna, nari mam wos anun ro Refo nun payamyum kaku ḇe kankenem Bedi. Rarirya, na fanam syadi ḇe Yahwe organisasi Ḇyedi.

16. Rariso Yahwe fyasos kawasa Ḇyesi rai?

¹⁶ Waswar ma wasaramper Yahwe organisasi Ḇyedi. Yahwe fyasos kawasa Ḇyesi fa siryur ro sidang jemaat na. Roma Ḇyedi, Yesus i, iso ḇebukor ro sidang nakam. (Ef. 1:22; 5:23) Yesus kyanow snon ḇeḇeso ḇesmai ramrem fa smam pyum fararur imarisen sifrur ro baboine. Yesus dap snon ansine ḇe ”women ḇesouser ma ḇefawinanem”. Sna fararur ḇefandun kaku fa sḇuk anan rur ma skadaunwarek Au insama fanam pdef ḇe Yahwe I. (Mat. 24:45-47, Terjemahan Dunia Baru) Nyan oser women ḇesouser ansine sifnoḇek Au iso skinfir manbesrar ḇesrow fa skanow si ḇe penatua. Penatua ansine bisa sfarkin ma skadaunwarek Au. (Yes. 32:1, 2; Ibr. 13:17; 1 Ptr. 5:2, 3) Penatua ansine sisewar kaku fa sḇuk sneprei ma sifnoḇek Au insama fanam syadi ḇe Yahwe I. Imbape ḇefandun syadi ya iso, sifnoḇek Au fa farkor snonkaku ḇese insama sakfawi Yahwe I.​—Ef. 4:11-13.

17. Imnis ḇefas ro Roma 10:10, 13, 14 ya, rosai ḇefnai fa kofarkor snonkaku ḇese fa sakfawi Yahwe I?

 ¹⁷ Wafnoḇek snonkaku ḇesesya fa siswar Yahwe I. Yesus iwan manfamyan ḇyesi fa sfarkor snonkaku ḇese fa sakfawi Yahwe I. (Mat. 28:19, 20) Kosouser parenta ani snar kofawi iso roi fandun fa kofrur ya. Ḇape, koswar syadi Yahwe ido na kakḇaḇir raris Manwawan Petrus ma Yohanes moḇ suḇaḇir raya. Sukofen, ”Nari inkomnai ḇaḇeri fa inkawawos ro roi inko mam ma inko mnaf kwar.” (Kis. 4:20) Na komarisen kaku fyor kofnoḇek snonkaku oso fa dakswar Yahwe I. Kowasen kada, na Filipus imarisen kaku fyor ifnoḇek kwar mananir Etiopia ani fa ifawi kakaku ḇero Refo ma ḇyebaptis! Wakfrur raris Filipus i ma wasouser Yesus parenta ḇyena fa rwa waḇaryas ido, fasnaiḇair wamarisen wakḇe Saksi Yahwe. (Wasya Roma 10:10, 13, 14.) Ḇarpur mura, imnis ra mananir Etiopia ani nari wafuken, ”Rosai ḇedwarek aya fa [yaḇebaptis]?”​—Kis. 8:36.

18. Fakfuken risai na neḇekarem ro farkarkor ḇeuser ya?

¹⁸ Fyor wun snemuk fa ḇebaptis, Ausya wafrur roi ḇefandun kaku ro kenem Bedi. Kukro ine roi ḇefarfnak risyaḇa, fandun fa kwara pyum na. Rosai fandun fa wafawi ḇekur ḇaḇebaptis ya? Rosai fandun fa wafrur fafisu ḇebaptis ḇaim ma ḇebaptis kwar? Fakfuken suru suine na suḇekarem ro farkarkor ḇeuser ya.