Ono ro snonggaku Kristen sepake aplikasi pesan singkat fa sbukidawos kuker kina ma naek srar sesya. Mboi, snonggaku Kristen ḇefawi pyum farkankin ro Refo sya nari siswarepen anun ine, ”Snonggaku ḇefawinanem iyokefi fyor myam roi ḇemun, ḇape snonggaku ḇefawi royoḇa imbran pdef ma ismai roi ḇeḇyeḇa.”​—Ams. 27:12.

Kofawi Yahwe ḇyuk anun anine kukro imbe kyadaunwarek ko. Inja, na koḇebati kuker ḇefrur pakpef ro sidang ḇa, sisaebur ro sidang sya, ḇaido ḇefarpampam farkarkor ḇekaku ḇa na. (Rm. 16:17; 1 Kor. 5:11; 2 Yoh 10, 11) Ḇese wer iso, ono ro sidang sna kenem ḇeḇyeḇa ḇemnis kuker farkarkor ḇero Refo ya ḇa. (2 Tim. 2:20, 21) Inja, komarisen kaku fa kosasor ko rofyor kokinfir bati. Ḇoi, kokinfir bati ḇepyum ine napyan ḇa fyor kawos kuker si ro pesan singkat.

Ḇefrur imbe kosasor kaku ko iso rofyor koḇebabti kuker grup chat ḇeba na. Faḇye kukro snonggaku Kristen ono sismai roi ḇeḇyeḇa snar sakso raryur ḇeradirya. Ḇeso ro raryur ansya seutin ḇaido sesyaran. Naek ḇaido srar oso iryur kuker grup ḇeba ani ido, na samswen fa isasori fyor ḇyebati kuker si. Na myambir pyum kenem ro ḇeso ro grup ansya ḇa ḇaido wis sena kuker Yahwe moḇsa nerai. Mazmur 26:4 doḇe, ”Yaḇebati kuker snonggaku ḇeankarkar sya ḇa, ma yaḇinggwanbur snonggaku ḇeyokef manggundi.” Inja, imbe kawos roro pesan singkat ido, kawos kuker komambir sya monda.

Ro raryur kasun kako, snonggaku Kristen sisasor kaku si faro roi sawos na ma oras sena. Na komarisen fa kofnak oras koḇena ḇa rofyor kawos ro pesan singkat. Oso wer ido, kokara awer fa kofarem kaḇer roi sfarem na fyor sisya sawos roi oso. Paulus danun ḇe Timotius insama isasori faro ’ḇepambarḇar snonkaku ḇese wawos sena ma ḇekofen roi ḇenapes ḇa.’ (1 Tim. 5:13) Koso wos anun ine kako fyor koḇepake pesan singkat.

Snonggaku Kristen ḇemas kwar sya na simewer sfarpampam ḇaido srower wos ḇeḇyeḇa roḇaido informasi ḇekur naek srar sesi. (Mz. 15:3; Ams. 20:19) Simarisen faro fawar ḇesyadadi na ḇa ḇaido roi sifawi kaku ḇaim na, ma sakfawar ḇe ḇesesya ḇa. (Ef. 4:25) Komam ido, anan rur ma abar ḇepyum nabor nasya ro situs web jw.org ma acara ro paik ḇe paik ḇero JW Broadcasting^®.

Naek srar sino sisya sepake pesan singkat ine fa sbaḇoḇ, skaḇkoḇes, ma sikofenḇair roiebor ḇaido fararur na. Nakame roi ḇekur ḇe bisnis nairi, nefesepen kuker samsyom faro Yahwe I ḇa. Snar simewer siswar ’pipi’, inja snonggaku Kristen na sifrowes naek srar sesya ḇa fa sna pipi.​—Ibr. 13:5.

Mboi fyor min koḇesi sismai susa roḇa rim ḇeba ido rarso? Fandun fa koryur roiebor ḇaido pipi faro si roro pesan singkat ine ke? Koswar naek srar koḇesi ma kofandun si. Inja, imbe kofnoḇek si ma kosambraḇser si fyor sismai samswen. (Yak. 2:15, 16) Ḇape, koḇepake grup chat ine fa koryur roi sfandun na ido, kokyaren fasasos ḇero kantor cabang ḇaido sidang koḇedi sifrur kwar na. (1 Tim. 5:3, 4, 9, 10, 16) Komewer kofasnai snar koiso skur fa ḇefnoḇek naek srar koḇesi.

Komarisen fa kobuk sanandik ḇe Allah ro roi kofrur nakam. (1 Kor. 10:31) Inja, fyor koḇepake aplikasi pesan singkat ke, teknologi ḇese ke, kokara pyum resari samswen ḇyena ma kosasor kaku ko.