1. Samswen risai monda Yahwe manfamyan Ḇyesi sismai na?

AUSYA wasmai samswen ḇeba kaku ke? Imbude naek srar oso ro sidang ifrur fa ḇesanekar. (Yak. 3:2) Imbude min ro moḇ fararur ya ḇaido bati ro rumfarkor skoryaye au kukro wakfarmyan ḇe Yahwe I. (1 Ptr. 4:3, 4) Ḇaido kina ḇesi imbude sidwarek au insa wakso fananjur awer ḇaido wabaryas awer. (Mat. 10:35, 36) Snar samswen nane nafrur ḇesanekar, imbude ḇaḇir imbe wasusu mura ma wamewer wafarmyan Yahwe wer. Ḇape rosai monda samswen ḇena, wakyar kaku Yahwe nari ḇyuk fawawinanem ma samambraḇ fa wakamar samswen anna.

2. Imnis ḇeḇefas ro Roma 15:4, fainda risai kosmai fyor kowasya Allah Wos Ḇyena?

² Ro Allah Wos Ḇyena, sfas farfyar nabor ro snonggaku ḇenapes ḇa ḇekakaḇaḇaḇ fyor samswen nkur si. Rosai ḇefnai fa Yahwe myam kaku farfyar anna neḇefas ro Refo ya? Insama nfarkor ko. Imnis kuker rosai Paulus fyas ro Roma 15:4. (Wasya.) Rofyor kowasya farfyar nane, na nbuk sneprei ma saneraro. Ḇape, kowasya monda Refo ya nasrow ḇaim. Insa kosmai fainda, fandun fa roi kowasya anna nsun ro kosnesna ma nfadwer kakara koḇena. Imnis ra, rosai na kofrur rofyor kofandun farkankin faro samswen koḇena? Kofrur nyan rifyak nane: (1) Koḇenadi, (2) Kowasenpan, (3) Kokarauser, ma (4) Kosouser na. Nari kawos nyan oser-oser nane. * Raimnai, nyan rifyak nane kobuk fa kofarkor farfyar ro Raja Daud ma Manwawan Paulus su.

3. Rofyor wawasya Refo ḇaim, rosai fandun fa wafrur ya, ma rosai ḇefnai ya?

³ (1) Koḇenadi. Rofyor wawasya Refo ḇaim, wor  fafnoḇek ro Yahwe fa wasmai fainda ro roi wawasya na. Imnis ra, rofyor wasewar anun fa wafrur mnis samswen bena ido, wor fafnoḇek ro Yahwe fa wasrow wos farkin ro Refo bisa ḇefnoḇek au.​—Flp. 4:6, 7; Yak. 1:5.

4. Rofyor wawasya farfyar snonggaku oso ro Refo, rosai na wawasen na?

⁴ (2) Kowasenpan. Yahwe ḇyuk ḇe ko samambraḇ fa kowasen roi oso. Inja, fyor wawasya farfyar snonggaku oso ro Refo, wawasenpan auso ḇero farfyar ani. Wawasenpan rosai ḇeḇejadi ya, rosai myam ya, ma rosai ḇyaḇir fafisu ani. Wafrurna ido, na wasmai fainda nabor syadi ro farfyar ani.

5. Rosai fandun fa kwarauser na, ma moḇsa wakarauser roi wawasya na rai?

⁵ (3) Kokarauser. Fandun fa wakarauser ḇaido kwarapyum kaku rosai wawasya ma moḇsa wasouser na. Kukro? Fyor wakarauser roi wawasya ro Refo ḇa ido, imnis ra mam sonin ḇemukmuk srir famfnom na. Kokarauser imnis ra koḇe sonin ḇemukmuk ani fa ḇyeoser insa komam sonin ani ḇesiper. Inja, wakarauser ido, bisa wafawi kaku roi wawasya na. Insama wakarauser roi wawasya na, kwara fakfuken nane: ’Snonggaku ḇero farfyar ani rosai ifrur fa ifnoḇek manggundi? Moḇsa Yahwe ifnoḇek i rai? Moḇsa yabuk roi yafarkor na insa nafnoḇek aya fa yakaḇaḇaḇ rofyor yasmai samswen?’

6. Rosai ḇefnai fa fandun kaku kosouser roi kofarkor na?

⁶ (4) Kosouser na. Yesus doḇe kosouser rosai kofarkor na ḇa ido, nari komnis snonggaku ḇefrur rum ro karyen yabori. Fyararur marḇak kwar fa byawes rum ani, ḇoi roi ifrur nane nefromo monda. Rosai ḇefnai ya? Kukro fafisu doḇer ma daf ndrama ido, rum anya nari kyarḇaken. (Mat. 7:24-27) Rarirya kako, rofyor koḇenadi, kowasen ma kokarauser roi kowasya na, ḇoi kosouser na ḇa ido roi kofrur na nefromo monda. Rofyor samswen ḇaido ḇaḇewayam nafrowes kakyar koḇena, nari kodworen ḇa. Ḇape rofyor kosouser roi kofarkorna, na kofrur snemuk ḇepyum syadi. Nari kosmai aski ma kakyar koḇena nsambraḇ. (Yes. 48:17, 18) Kirine, mgorama kobuk nyan rifyak kawos kwar anna fa kofarkor ro Raja Daud farfyar ḇyedi.

7. Farfyar mansei ḇero Refo imbe kawos ro kirine?

⁷ Oso ro kina ḇaido bati ḇedi ifrur fa ḇesanekar ke? Rarirya ido, Raja Daud farfyar ḇyedi nari nafnoḇek au. Oser ro romawa ḇyedi, Absalom i, isouser faro i ḇa ma iḇe dun karajan bur kmari. Na wafarkor ro roi Daud ifrur ro fafisu ani.​—2 Sam. 15:5-14, 31; 18:6-14.

8. Rosai wafrur insama Yahwe ifnoḇek au?

⁸ (1) Koḇenadi. Rofyor waswaruser farfyar ani, wakofenḇair ḇe Yahwe I moḇsa sneḇaḇir ḇedi rofyor sifrur pyum au ḇa. (Mz. 6:6-9) Raimnai, wor fafnoḇek ro Yahwe insama wasrow wos farkin ro Refo ḇesrow kaku kuker samswen wasmai na.

9. Rosai ḇeḇejadi rofandu Daud ma Absalom su?

⁹ (2) Kowasenpan. Kwarapan roi ḇeḇejadi ro farfyar ani, ma wawasenpan moḇsa roi ani nawyae Raja Daud i. Ro taun ḇe taun Absalom ḇyesewar fa dun kawasa sya sisnesna. (2 Sam. 15:7) Rofyor Absalom ifawi kawasa sya siwaira i kwar, fyarem mampaf sya ḇe Israel ḇesiper fa sifrur snonggaku sisonem i  ḇe raja. Dawyae kako oser ro bati ma ḇebuk anun ḇe Daud i, isoine Ahitofel, insa ḇyeoser kuker i fa sembroḇ Daud i. Absalom ikofenḇair iso raja ḇebabo ya, raimnai ḇyesewar kaku fa sfor ma smun Daud i, ḇeduf marḇak fafisu ani. (Mz. 41:1-9) Daud ifawi roi ḇeḇyeḇa Absalom iḇe ifrur na ma ifrar ibur Yerusalem. Ḇarpur mura, Absalom sordade ḇyesi smamunmun kuker Daud sordade ḇyesi. Sikafyo Absalom sordade ḇyesi, ma smun Absalom i fa imar.

10. Sifrur pyum Daud i ḇa yo, rosai ifrur ḇa na?

¹⁰ Kirine, wawasenpan moḇsa Daud sneḇaḇir ḇyedi rofyor ismai roi anna kam. Absalom ima romawa iswar dirya, ma Ahitofel ima snonggaku ikyar kaku. Fama, sufrur sanekar Daud i. Suwaira i ḇa ma suḇesewar fa smun i kako. Raryano, Daud ikyar kaker faro bati eḇese ḇyesya ma kyara ḇa siwaira Absalom i kwar. Daud kako fyandun manggundi ḇa, ma ifrar ibur ḇa. Ma, Daud ḇyesneso raryano, isusu ḇa. Ḇape, ḇyesewar fa ifrur mnis samswen ḇyenane. Rosai ḇefnoḇek Daud i fa bisa ifrur roi ine?

11. Rosai Daud ifrur rofyor ismai fafisu ḇesamswen ani?

¹¹ (3) Kokarauser. Wos farkin risai monda wafarkor ro farfyar ani? Kwarapan fakfuken nane: ’Rosai Daud ifrur rofyor ismai fafisu ḇesamswen ani?’ Daud ḇyeḇirḇar kaku ḇa rawo nafrur i fa dun snemuk ḇa. Iboryaye ḇa kako ma ifrur snemuk fasawsaw ḇa. Ḇoi Daud ḇyenadi dor fafnoḇek ro Yahwe I. Dor kako fafnoḇek ro bati ḇyesya. Rofyor dun snemuk kwar, Daud ifrur na ḇeri. Daud ḇyesanekar raryano, nya kakara ḇesasar ḇa ma ikram masasor ḇa. Ikyar pdef faro Yahwe I ma bati ḇyesya.

12. Rosai Yahwe ifrur fa ifnoḇek Daud i?

¹² Moḇsa Yahwe ifnoḇek Daud i rai? Rofyor wafarkor nabor ido, na mam Yahwe ḇyuk samambraḇ ḇe Daud fa kyaḇaḇaḇ. (Mz. 3:1-8; superskripsi) Yahwe ḇyebarakas wos snemuk Daud ḇyedi. Yahwe ifnoḇek kako Daud bati ḇesouser ḇyesya rofyor sisewar fa skadaunwarek raja sedi, Daud i.

13. Moḇsa waso Daud nyan ḇyena rofyor snonggaku ḇese sifrur wasanekar kaku? (Matius 18:15-17)

¹³ (4) Kosouser na. Kwarapan fakfuken ine, ’Moḇsa yaso Daud nyan ḇyena?’ Rofyor snonggaku ḇese sifrur wasanekar kaku ido, ḇesewar fa wawos na fa namnai ḇeri. Samswen ya iba ke ikasun ke, waso nyan Yesus dap ro Matius fasal 18 ḇaido wasouser wos farkin ḇero Yesus anun ḇyenane. (Wasya Matius 18:15-17.) Ḇape, wafrur snemuk fasawsaw awer fyor ausya wamsore. Benadi wor fafnoḇek ro Yahwe insama waknon ma wafawi rosai fandun fa wafrur ya. Wakyar pdef faro bati besya ma sbuk fafnoḇek ido, wasouser na. (Ams. 17:17) Ḇefandun kaku iso wasouser anun Yahwe ḇyuk roro Wos Ḇyena.​—Ams. 3:5, 6.

14. Ro fafisu risai mnuk-mnuk ḇero 2 Timotius 1:12-16 ma 4:6-11, 17-22 nasambraḇser au rai?

¹⁴ Wasmai roi ḇedwarek ro kina besi ke? Ḇaido, ro sup bedi sidwarek fararur ḇaḇebaryas koḇena ke? Rarirya ido, nari wasmai samambraḇ rofyor wawasya 2 Timotius 1:12-16 ma 4:6-11, 17-22. * Paulus fyas mnuk-mnuk nane rofyor ismai ro bui.

15. Rosai na wor ro Yahwe I?

 ¹⁵ (1) Koḇenadi. Rofyor wawasya mnuk-mnuk nane ḇaim, wakofenḇair ḇe Yahwe samswen wasmai na. Wakofenḇair kako roi ḇaḇir nakam snar samswen ani. Raimnai wor fafnoḇek ro Yahwe insama wasrow wos farkin ro Paulus fawar ḇyena ḇemnis kuker samswen wasmai na.

16. Imnis rariso samswen Paulus ismai fafisu ani?

¹⁶ (2) Kowasenpan. Wawasenpan manggundaw iso Paulus i. Isya ismai ro bui ro Roma. Ismai ro bui ḇepon kwar, ḇoi kali ine ifawi nari sbuk samamyai marmar ḇe i. Bati riḇeso ḇyesya siburi kwar, ma ḇyaḇir iryar ḇa kwar.​—2 Tim. 1:15.

17. Rofyor Paulus ismai fafisu ḇesamswen, rosai ifrur ḇa na?

¹⁷ Paulus fyafko ḇa fyor dun snemuk fa ḇyesnonggaku Kristen ḇeraryaḇ ma ifawi snemuk dun ine nafrur isun ro bui. I kako imsor ker ḇa faro snonggaku ḇero Provinsi Asia ḇebur i sya. Ma kyara ḇaḇeri bati ḇese ḇesya kako na siburi. Ḇape, Paulus ikyar kaku bati ḇyesi nari sisouser i ma nari Yahwe ḇyebarakas i. Rosai ḇefnai kokyar roi ine?

18. Rosai Paulus ifrur rofyor ismai fafisu ḇesamswen?

¹⁸ (3) Kokarauser. Kwarapan fakfuken ine: ’Rosai Paulus ifrur fafisu ismai samswen nane? Paulus ifawi kerower nari ismai samamyai marmari, mboi iswarepen ḇesya kwar roi ḇefandun ifrur kaku iso isandik Yahwe I. I kako kyara ker moḇsa syambraḇser snonggaku ḇesesya raya. Ma ikyar pdef faro Yahwe kuker ḇyenadi ḇesya kwar. (2 Tim. 1:3) Paulus imewer kyara ker snonggaku ḇebur i sya. Ḇape ikofen kasumasa ḇe bati ḇesaramper ker i ma ḇefnoḇek i kuker souser. Oso wer, Paulus fyarkor Refo ya ḇesya kwar. (2 Tim. 3:16, 17; 4:13) Inja, ḇefandun kaku ḇe i iso ikyar kaku Yahwe ma Yesus suswar i. Ikyar kaku nari subur i ḇaḇeri ma nari suḇebarakas fararmyan ḇyena.

19. Moḇsa Yahwe ifnoḇek Paulus i rai?

¹⁹ Yahwe ḇyuk swarapepen kwar ḇe Paulus i snar nari ismai wayam kukro ḇyesnonggaku Kristen. (Kis. 21:11-13) Moḇsa Yahwe ifnoḇek Paulus i rai? Yahwe kyarem Paulus nadi ḇyena, ma ḇyuk samambraḇ ḇe Paulus i ras ḇe ras. (2 Tim. 4:17) Yahwe ḇyuk kakakyar ḇe Paulus snar fararur marḇak ḇyena nefromo ḇa ma ḇyebarakas i. Yahwe I kako ḇyuk Paulus bati ḇesouser ḇyesya fa sifnoḇek i.

20. Moḇsa kona kakyar raris Paulus imnis ḇeḇefas ro Roma 8:38, 39?

²⁰ (4) Kosouser na. Kwarapan fakfuken ine: ’Moḇsa yaso Paulus i rai?’ Raris Paulus i, kofawi nari kosmai wayam kukro kofarmyan ḇe Yahwe I. (Mrk. 10:29, 30) Insamaido kosouser pdef ḇe Yahwe I rofyor kosmai samswen, fandun fa koḇenadi ḇe Yahwe I pdef. Kofarkor kako Refo ro ras ḇe ras. Ma koswarepen kaku ḇesya kwar faro roi ḇefandun kaku kofrur yaiso kosandik Yahwe I. Kokyar kaku Yahwe na ipok ibur koḇaḇeri ma snonggaku osoḇaḇeri na ḇepok ḇefrur Yahwe imnai iswar ko.​—Wasya Roma 8:38, 39; Ibr. 13:5, 6.

21. Rosai ḇefnoḇek Aya ma Hector sufrur mnis samswen susmai na?

²¹ Fawar ḇero Refo na nasambraḇser ko fa kofarmku fyor kosmai samswen  sarirya monda. Iso Aya, perintis oso ro Jepang ḇyaḇir na. Doḇe, fawar Yunus ḇyedi nafnoḇek i fa imakakak wer ḇa rofyor byaryas ro moḇ snonggaku sibor rona. Mampan kako Hector i, romawa babo oso ro Indonesia. Sinan ḇyesya sfarmyan ḇe Yahwe ḇa. Ḇape, Rut fawar ḇyena nafnoḇek i fa fyarkor fa ifawi Yahwe I ma ifarmyan ḇe I.

22. Moḇsa wasmai fainda kaku ro drama ro Refo ḇaido seri artikel ”Tirulah Iman Mereka”?

²² Moḇsa wafarkor nabor syadi wer farfyar ḇero Refo na? Bisa farkor naro vidio ma drama audio organisasi koḇedi sifrur na ma ro seri artikel ”Tirulah Iman Mereka”. Roiebor sifrur fa sbukifnoḇek ko nane, smam pyum kaku na kwar ma bisa nafnoḇek au fa wawasen farfyar ḇero Refo na. * Rofyor mam, rwower ḇaido wawasya farfyar anna ḇaim, ḇenadi faro Yahwe insama wasrow farkarkor ḇepyum ḇe manggundaw. Wawasenpan manggundaw iso ḇero farfyar wafarkor ro Refo ani. Kwarauser rosai Yahwe manfamyan ḇesouser byansi sifrur ya ma moḇsa Yahwe ifnoḇek si ro samswen sismai na. Raimnai wasouser rosai wafarkor kwar na. Wakofen kasumasa faro Yahwe snar ifnoḇek au kwar. Ma fasnai kaku ḇesyowi fafnoḇek ani kuker swewar swaf fa wafnoḇek ma wasambraḇser snonggaku ḇesesya.

23. Imnis ḇeḇefas ro Yesaya 41:10, 13, rosai Yahwe ḇyeasas ḇe ko?

²³ Kosya kokenem ro dunya Setan ḇyepoik ya. Iso ḇefrur fa kosmai samswen ker, ma fyorno ido nafrur kosambraḇ ḇa. (2 Tim. 3:1) Ḇape, komgak ḇaido koḇeḇirḇar awer. Yahwe ifawi samswen koḇena kam. Rofyor kofandun fafnoḇek, Yahwe ḇyeasas nari dufepen nako bramin koḇena kuker bramin raku ḇesambraḇ Ḇyedi. (Wasya Yesaya 41:10, 13.) Kokyar kaku Yahwe nari ifnoḇek ko, ma Refo na ḇyuk samambraḇ ḇe ko fa kokamar samswen sarirya monda.