1. Rosai ḇefnai fa naek ḇebabo sya sifandun si ro sidang?

NAEK ḇebabo mgoya, sifandun mgo ro sidang. Ḇebor ro mgo mgodafduf ḇa ma mgosambraḇ kaker. (Ams. 20:29) Mgofrur roi nabor fa mgofnoḇek naek srar ro sidang kwar. Ma mgomarisen ras oso nari mgoḇe hamba pelayanan. Ḇape snonggaku ḇese imbude skara mgobabo kaker ḇaido mgofasos mgo ḇaim faro fararur ḇefandun kaku ro sidang. Mgobabo kaker raryano, mgoḇesewar kaku ro kirine insama naek srar sesyowi mgo ma sikyar kaku mgoma na mguf pyum fararur mgoḇena. Rosai monda na mgofrur kaku ya?

2. Rosai monda nari kawos ro farkarkor ine?

² Ro farkarkor ine, na kawos Raja Daud fawar ḇyedi. Na kawos kako raja risuru ḇepoik ro Yehuda, isoine Asa ma Yehosyafat fawar suḇena. Na kawos samswen ro snon rikyor anskoya skosmai na, rosai skofrur kaku fa skofrur mnis samswen skoḇena, ma rosai naek ḇebabo sya sfarkor ro fawar senane.

3. Nyan oser risai naek ḇebabo sya sbukifnoḇek ḇeḇesinan kwar ro sidang sya?

³ Rofyor Daud ḇyabo kaker, ḇyekir ro roi nabor ḇebuk fainda faro snonggaku ḇesesya. Imnis ra, ifnak pyum musik, ma ḇyuk ḇaḇekir ḇyedine fa ifrur sneprei Saul, raja Allah ryem ani. (1 Sam 16:16, 23) Naek ḇebabo mgoya, mgona ḇaḇekir nari ḇebuk fainda faro naek srar ro  sidang sya ke? Ḇebor ro mgo mgona ḇaḇekir ḇeradirya. Imnis ra, mgoḇekir fa mgoḇepake tablet ma HP ido, mgakfnoḇek naek srar ḇeḇesinan kwar ro sidang sya fa sakfawi sepake roiebor anna. Mgofnoḇek si ido, na sifawi sbuk roiebor anna fa sbukifrur farkarkor manggun sena ḇaido sikso fananjur na. Na sesyowi kaku fafnoḇek mgoḇena.

4. Raris Daud i, rari risai fandun fa naek ḇebabo sya sfasnai na? (Mam sonin ḇero ḇarpon.)

⁴ Ro Daud kankenem ḇyena, fyasnaiḇair ima duf pyum fararur ḇyedi ma bisa sikyari. Imnis ra, fyor ḇyesnonkbor kaker anya, imyaren myamwarek pyum kaku kmari domba ḇyesya. Ine fararur ḇesamswen dirya kukro roi ḇemuni nasya nabore. Daud dawos ḇe Raja Saul i, ”Ayama yaḇe manfarandows domba ḇe kma yedi. Fyor singa ḇaido beruang oso darek ḇo dun domba ro nai sya, na yayaw i, yamun i, raimnai yapamperbur domba ani ro swadon ḇyedi.” (1 Sam. 17:34, 35) Daud ifawi payamyum ro domba ansi sisya ro ḇramin ḇyena, ma iso ḇefrur fa imgak ḇa fa kyadaunwarek pyum si. Naek ḇebabo sya kako bisa sakso Daud nyan ḇyena kuker suf pyum fararur ro sidang sbuk ḇe si na.

5. Imnis ḇeḇefas ro Mazmur 25:14, roi ḇefandun kaku risai naek ḇebabo sya sifrur na?

⁵ Rofyor byabo kaker, Daud fyaduru pyum wis ḇyedi kuker Yahwe I. Wis ḇyedi nefandun syadi ro ḇaḇeḇri ḇaido ḇaḇekir ḇyena fa ifnak musik. Yahwe ima Daud Allah ḇyedi monda ḇa, ḇape Bati ḇyedirya kako. (Wasya Mazmur 25:14.) Naek ḇebabo mgoya, roi ḇefandun kaku mgofrur yaiso mgosambraḇser wis mgoḇena kuker Yahwe I. Mgofrur rarirya ido, nari mgosmai fararur nabor ro sidang.

6. Rosai snonggaku riḇeso kakara sena faro Daud i?

⁶ Daud ismai samswen nabor ro kankenem ḇyedi. Imnis ra, snonggaku riḇeso skara sasari snar soḇe byabo kaker. Rofyor Daud dor fa manggundiso na ḇemamunmun kuker Goliat i, Saul syewar fa idwareki kuker ikofen yoḇ i, ”Auma romawa kasun kaker.” (1 Sam. 17:31-33) Ḇepon kaku, Daud eba ḇyedi kyursof Daud i ḇo doḇe ima duf pyum fararur ḇyena ḇa. (1 Sam. 17:26-30) Ḇape Yahwe myam Daud i rarirya ḇa. Myam i  ḇe romawa babo kaker ḇa ḇaido na duf pyum fararur ḇyena ḇa. Yahwe myambir pyum Daud i. Ma Daud bisa myun Goliat i snar ikyar faro samambraḇ ro Bati ḇyedi, Yahwe I.​—1 Sam. 17:45, 48-51.

7. Rosai mgofarkor ro Daud fyawar ḇyenane?

⁷ Rosai mgofarkor ro Daud fawar ḇyenane? Fandun fa mgokaḇaḇaḇ. Imbude ḇemambir kaku mgo sya sfandun swaf fa sifawi mgosur mgoba muryas kwar. Ḇape mgokyar kaku Yahwe myam padakduk mgoḇena ro bandi monda ḇa. Myambir kaku mgo ma ifawi rosai mgosambraḇ fa mgofrur na. (1 Sam. 16:7) Mgakfrur rarirya kako fa mgosambraḇser ḇaḇebati mgoḇena kuker Yahwe I. Daud ifrur na kuker myam pyum Yahwe braur ḇramin Ḇyena. Daud i kako kyarauser rari-rari rosai ḇefasnai ro braur Ḇyena kam. (Mz. 8:3, 4; 139:14; Rm. 1:20) Roi ḇese fandun fa mgofrur iso mgor samambraḇ ro Yahwe I. Imnis ra, bati mgoḇesi ro rumfarkor sonef mgo snar mgoma Saksi-Saksi Yahwe ke? Rarirya ido, mgoḇenadi mgor fafnoḇek ro Yahwe I. Ma mgoso anun ḇepyum mgosmai ro Wos Ḇyedi, syap na ma vidio ḇeknam ro Refo. Ras mgoḇaḇir Yahwe fafnoḇek Ḇyedi ḇe mgo ido, kakyar mgoḇena faro I nari syambraḇ kaku. Oso wer ido, rofyor naek srar smam mgokyar faro Yahwe I nari sikyar kaku mgoma snonggaku ḇeyuf pyum fararur mgoḇena.

8-9. Rosai ḇefnoḇek Daud i fa iwaf kuker kaḇaḇaḇ isof ro ḇye raja ya, ma rosai naek ḇebabo sfarkor ro Daud fawar ḇyenane?

⁸ Samswen risai wer Daud ismai na? Rofyor srem i fa ḇye raja kwar, fandun fa Daud iwaf kaku isof ro taun ḇe taun nawas insape ḇyepoik ḇe raja Yehuda. (1 Sam. 16:13; 2 Sam. 2:3, 4) Rosai ḇefnoḇek Daud i fa iwaf kuker kaḇaḇaḇ? Daud myam monda faro roi ḇefrur ḇyesanekar ya ḇa. Mboi myam monda faro roi bisa ifrur na. Imnis ra, rofyor ifrar ibur Saul i ma ḇyarek ro sup Filistin, Daud ḇyuk swaf ine fa myamunmun kuker ḇembroḇ er Israel sya. Roi ifrur anna nggadaunwarek snonggaku Yehuda moḇ sena.​—1 Sam. 27:1-12.

⁹ Rosai naek ḇebabo sfarkor ro Daud fawar ḇyenane? Mgobuk swaf ḇepyum mgosmai kaker na fa mgofarmyan ḇe Yahwe ma naek srar sya. Mampan fawar ro naek Ricardo ḇyenane. * Randak ḇyeumur taun risamfur ya, imarisen kaku fyarmyan ḇe perintis biasa. Ḇape penatua sya soḇe fyasos i ḇaim fa dakḇe perintis. Nane nafrur ḇyesanekar ḇa ḇaido irmom ḇa. Mboi Rocardo ḇyuk oras nabor ḇyena kam ro fararmyan ya. Ikofen ḇo doḇo, ”Rofyor yawasen kaḇer ido yafawi snar fyor anya kaku roi isya fandun fa yafrur nabor wer. Yamam kaku samaido yarama kaḇer ḇe snonggaku ḇemarisen ḇerower sya ma yafrur fasasos pyum fyor yarama ḇe si ḇaim. Ma ineiso randak bisa yakna PAR. Inja rofyor yabaryas pdef ine nafrur fa yamgak ḇa kwar.” Kirine Ricardo ifarmyan ḇe perintis biasa ḇekir syadi ma ḇye hamba pelayanan.

10. Ro ras oso, rosai Daud ifrur ya rofyor ifrur snemuk ḇefandun kaku ḇaim?

¹⁰ Mampan roi ḇese ḇekur Daud i wer. Ras oso rofyor Daud ma sordade ḇefnoḇeki sya sḇarek ro sup Filistin fa siyokefbur Saul i, sibur kina sesya ro rum fa sra smamunmun. Fafisu snonggaku ansine sramura, mbroḇ sya sisun ro rum sena ma sfor kina sesya bur si.  Daud na kyara ima mambri dirya, inja napyan ḇe i fa fyaspar si. Fama Daud ifrur rarirya ḇa. Ḇape dor fafnoḇek ro Yahwe I. Dor imam oso ḇenir Abiatar fa dun efod ḇe i, raimnai Daud ifuken ḇe Yahwe I, ”Ipyum kaku ya yayom manfasyar ansine ke?” Yahwe ikofenḇair ḇe Daud i fa iyom manfasyar sine ma nari Daud fyaspar si. (1 Sam. 30:7-10) Rosai mgofarkor ro roi ḇeḇejadi inera?

11. Rosai mgofrur kaku ya rofyor mgofrur snemuk ḇaim?

¹¹ Rofyor mgofrur snemuk ḇaim, mgor anun ro snonggaku ḇesesya. Mgofuken ḇe sinan mgobansi. Mgo kako bisa mgosmai anun ḇepyum ro penatua ḇefarmyan fyoro kwar sya. Snar Yahwe myam si ḇe hadiah faro sidang. (Ef. 4:8) Yahwe ikyar snon ryem ansine, inja mgo kako bisa mgokyar si. Rofyor mgoso kakyar sena ma mgorower anun sbuk na, bisa mgofrur snemuk ḇepyum. Mgorama kawos rosai nari kofarkor ro Raja Asa i.

12. Rofyor Raja Asa insape ḇyepoik babo rari ḇemnis rariso fyasnai na?

¹² Rofyor raja Asa insape ḇyepoik babo fa fyadwer kmari, Abia i, ima snon ḇena sne ḇerun ma ḇemgak ḇa. Raja Asa ifrur sren sup ani buro amfyanir na. I kako ”iwan snonggaku Yehuda sya sisewar Yahwe Allah ro up sesya ma sisouser sasoser ma parenta Ḇyena.” (2 Taw. 14:1-7) Rofyor Zerah ḇerama ro Etiopia imbe myun Yehuda kuker dun sordade ri 1.000.000, Asa fyasnai fawawinanem kuker dor fafnoḇek ro Yahwe I. Ḇyenadi ḇo doḇe, ”Yahwe, faro Au samswen noḇa fa wafnoḇek snonggaku ḇebor sya ḇaido snonggaku ḇeryar ḇa sya. Wafnoḇek inggo, sye Yahwe Allah nggoḇedi, snar nggokyar kaku faro Au.” Asa wos ḇepyum ḇyana nfasnaiḇair ikyar kaku Yahwe syambraḇ fa fyaspar i ma er ḇyesi. Asa ikyar faro Kmari ro nanggi, ma Yahwe myun ḇeri snonggaku Etiopia ansya.​—2 Taw. 14:8-12.

13. Rosai ḇarpur Asa ismai ya, ma rosai ḇefnai fa ikyar faro Yahwe I ḇa?

¹³ Rofyor sordade ri 1.000.000 siḇe smun Asa er byansi imgak kaku. Ḇape snar ikyar faro Yahwe, ryani samswen ḇemarḇak ismai anna nandebur i. Ḇape faḇye kaku, rofyor ismai samswen  ḇesena, Asa ikyar faro Yahwe I ḇa kwar. Rofyor Raja Baasya ro Israel imbe myun Yehuda, Asa pyambar fa dor fafnoḇek ro Raja Siria. Snemuk dun anna nun samswen ḇe i! Ro ras anya myamunmun ker kuker Baasya i. Roro nabi Hanani, Yahwe ikofenḇair roi ḇefnai ya: ”Snar wakyar raja Siria, ḇoi Yahwe Allah ḇedi ḇa.” (2 Taw. 16:7, 9; 1 Raj. 15:32) Rosai farkarkor ya?

14. Moḇsa mgokyar Yahwe I rai ma imnis ro 1 Timotius 4:12, rosai mgosmai ya rofyor mgofrur roi ani?

¹⁴ Rofyor mgoḇe baptis, mgofasnaiḇair mgokyar faro Yahwe I. Ma Yahwe imarisen kaku dun mgo ḇe kina babo Ḇyedi. Kirine fandun fa ngona sne ḇerun ma mgokyar faro Yahwe I pdef. Rofyor mgofrur snemuk ḇefandun kaku, mgokara ḇeri fa mgosewar fafnoḇek ro Yahwe I. Ḇape rariso kuker snemuk ḇesena? Fandun fa mgokyar kaku pdef faro Yahwe rofyor mgofrur snemuk sarirya monda, isoine snemuk faro hiburan ḇaido fararur ma cita-cita mgoḇena. Mgokyar manggun mgo awer. Ḇape mgosewar wos farkin ḇefnoḇek mgo fa mgofrur snemuk ḇepyum, ma mgosouser wos farkin ro Refo ani. (Ams. 3:5, 6) Mgofrur rarirya ido, nari Yahwe imarisen, ma naek srar ro sidang nari sesyowi mgo.​—Wasya 1 Timotius 4:12.

15. Ro 2 Tawarikh 18:1-3; 19:2, sasar risai monda Raja Yehosyafat ifrur na?

¹⁵ Kokame konapes ḇa ma na kofrur sasar kako. Ḇape roi ani napok nafrur mgo fa mgokara na mgofarmyan pyum ḇe Yahwe I ḇa. Mgomampan Raja Yehosyafat fawar ḇyedi. Nya rari ḇepyum nabore. Rofyor byabo kaker, ”syewar Allah kmari isyom ya ma isouser parenta Ḇyena.” Oso wer ido, iwan ḇebarara sya fa sramura ḇe mnu ḇero Yehuda nakam ma sfarkor snonggaku sya fa sakfawi Yahwe I. (2 Taw. 17:4, 7) Yehosyafat ima snon ḇefrur pyum dirya, ḇoi fyorno ido ifrur snemuk ḇeḇyeḇa. Ras oso Yehosyafat ismai wos sonek ḇepakrek kaku ro nabi oso kukro snemuk ḇeḇyeḇa ifrur na. (Wasya 2 Tawarikh 18:1-3; 19:2.) Rosai mgofarkor ro Yehosyafat fawar ḇyenane?

16. Rosai mgofarkor ro Rajeev fawar ḇyena?

 ¹⁶ Rofyor sbuk anun ḇe mgo, fandun fa mgorower ma mgofrur na. Imnis ra romawa babo ḇebor sya, imbude samswen ḇe mgo fa mgofakapon fararmyan ḇe Yahwe I. Raryano mgoḇe sanekar awer. Mampan fawar ro naek ḇebabo ḇenir Rajeev. Rofyor byabo kaker anya, nya cita-cita rohani ḇaim. Fyawar ḇo doḇe, ”Imnis ra romawa babo ḇesesya, yamarisen syadi yaḇeolahraga ma yamam hiburan bardibur yaso fananjur ma yabaryas.” Penatua ḇefrur pyum oso ḇyuk wos anun ḇe i. Rajeev doḇe, ”Penatua ani ifnoḇek aya fa yakarauser wos farkin ḇero 1 Timotius 4:8.” Kuker sne ḇerun Rajeev ryower anun ani ma kyarauser rosai fyakapon ro kankenem ḇyedi. Doḇe, ”Yun snemuk fa yafakapon roi Yahwe imarisen na.” Barakas ismai yaiso? Rajeev doḇe, ”Taun riḇeso fyor yasmai wos anun ani raimnai, sinanggow aya ḇe hamba pelayanan.”

17. Moḇsa ḇeḇesinan kwar ro sidang sya smam naek ḇebabo ḇefarmyan Yahwe sya?

¹⁷ Naek ḇebabo mgoya, naek srar ḇeḇesinan kwar ro sidang sya sesyowi fararur marḇak mgoḇena snar mgofarmyan ḇe Yahwe kayam kuker si! (Zef. 3:9) Simarisen smam mgofrur fararur mgoḇena ro sidang kuker raryaḇ kaku. Smanen kaku mgo.​—1 Yoh. 2:14.

18. Imnis ḇeḇefasnaiḇair ro Amsal 27:11, moḇsa Yahwe sneḇaḇir Ḇyedi faro naek ḇebabo ḇefarmyan ḇe I sya?

¹⁸ Naek ḇebabo mgoya, mgoswarepen Yahwe iswar mgo ma ikyar faro mgo ḇesya kwar. Ḇyardi kwar snar ro ras-ras ḇepupes, nari sordade oso ro romawa babo sya simarisen sbuk manggunsi fa sfarmyan ḇe I. (Mz. 110:1-3) Ifawi mgoswar I ma mgomarisen mgofarmyan ḇe I kuker sne ḇesiper. Inja, rofyor snonggaku ro sidang skara mgobabo kaker kaku ḇaido rofyor roi oso isya fandun fa mgofrur mnis ido, fandun fa mgoḇe kaḇaḇaḇ. (Ibr. 12:6) Mgomyaren mgofrur fararur sbuk ḇe mgona. Ma ḇesyadi ya, roi mgofrur nakam nafrur Kma mgoḇedi ro nanggi imarisen.​—Wasya Amsal 27:11.