Mambir Mbroḇ Bedi
”Kofawi [Setan] aw ḇyena.”—2 KORINTUS 2:11.
1. Rosai Yahwe fyasnaiḇair kuker mbroḇ koḇedi rofyor Adam ma Eva susapi ro sasar ya?
ADAM fyawi ikak ima dakkawos ḇa. Inja, rofyor ifawi ikak oso dawos ḇe Eva i, Adam fyawi kaku ima mankun oso ḇeyawos yoḇ i. (Kejadian 3:1-6) Adam ma Eva sufawi ḇaḇeri manseiso mankun ani. Ḇape, Adam kyinfir fa ryower i ma pyampum Kma ḇesaswar ḇyedi ro nanki. (1 Timotius 2:14) Fafisuya ḇeri, Yahwe fyasnaiḇair nabor syadi wer mbroḇ ḇeḇarḇor ani ma ḇyeasas nari myunpres i. Ḇape, Yahwe ḇyuk swarapepen snar mankun rur ḇeyawos ro ikak ani nari pyampum snonkaku ḇeswar Allah sya.—Kejadian 3:15.
2, 3. Rosai ḇefnai fa Yahwe ikofenḇair roi nakam ḇa kuker manseiso Setan i rofyor Mesias ryama ḇaim?
2 Yahwe ikofenḇair ḇe ko ḇa manseiso malaikat ḇembroḇ faro I ani. * (Mam fasfas kasun ro sop.) Fanam ḇe taun ri 2.500 rofyor ḇaḇembroḇ ro Eden imnai kwar, insape Yahwe fyasnaiḇair manseiso mbroḇ ani. (Ayub 1:6) Kofawi i ḇe ”Setan”, isoine ”Manḇesampampum”. Syap Ibrani rikyor monda iso ḇeyapḇair Setan i, isoine 1 Tawarikh, Ayub, ma Zakharia. Rosai ḇefnai fa syap ḇeḇeso monda ḇefasnaiḇair mbroḇ ine rofyor Mesias ryama ḇaim?
3 Ro Syap-Syap Ibrani, Yahwe fyasnaiḇair roi nakam ḇa kuker Setan ma rosai ifrur na. Kofawi Syap Ibrani nafnoḇek snonkaku sya fa smambir ma siso Mesias i. (Lukas 24:44; Galatia 3:24) Rofyor Mesias ryama, Yahwe kyinfir i ma manfamyan ḇyesi fa sfasnaiḇair syadi manseiso Setan i ma malaikat ḇesowarpu i sya. * (Mam fasfas kasun ro sop.) Ine kaku rarirya snaro Yahwe nari kyinfir Yesus ma snonkaku ḇesmai ramrem sya fa smunpres Setan ma ḇeso i sya.—Roma 16:20; Fasasna 17:14; 20:10.
Kuker fafnoḇek ro Yahwe, Yesus, ma malaikat ḇesouser sya, bisa kopampum mbroḇ koḇedine
4. Rosai ḇefnai fa kopok komkak awer Ibiris i?
4 Manwawan Petrus fyasnaiḇair Ibiris i ḇe ”singa (aiwan ḇeyan ḇepek) ḇeaur”, ma Yohanes dap i ḇe ”ikak” ma ”korḇen”. (1 Petrus 5:8; Fasasna 12:9) Ḇape, kopok komkak awer Ibiris i snar nya samambraḇ nabor ḇa. (Wasya Yakobus 4:7.) Yahwe, Yesus, ma malaikat ḇesouser sya sisya skadaunwarek ko. Kuker fafnoḇek sena, bisa kopampum mbroḇ koḇedine. Ḇape, fandun fa kofawi kankarem ro fakfuken rikyor ḇefandun kaku nane: Rariso Setan fyasnai papoik ḇeba kaku ḇyedi rai? Rariso Setan ḇyesewar fa dawninyan snonkaku sya rai? Rosaiso Setan ipok ifrur na ḇa? Rwama kawos fakfuken-fakfuken anna ma komam farkarkor rosai kun ro na.
RARISO SETAN FYASNAI PAPOIK ḆEBA KAKU ḆYEDI RAI?
5, 6. Rosai ḇefnai fa pamarenta osoḇaḇeri ḇepok fa ḇeḇuk rosai kofandun na?
5 Malaikat ḇebor sya sḇeoser kuker Setan i fa sḇembroḇ faro Allah. Fabruḇ Ḇeba ya ḇaim, Setan ifrowes ḇeḇeso ro si fa sifrur fararur farḇuk kuker bin ḇero supswan ine. Refo fyasnaiḇair Setan imnis raris korḇen ḇesapi ro nanki kuker dawerepen ḇar ḇeḇekyor ro mak sya fa siso i. (Kejadian 6:1-4; Yudas 6; Fasasna 12:3, 4) Rofyor malaikat sya sibur Allah kina Ḇyesi, ine nfasnaiḇair skinfir Setan fa ḇyepoik faro si. Kokara awer malaikat ḇembroḇ ansya sfasos pyum si ḇa. Ro moḇ kopok fa komam ḇa na, Setan isya fyasos karajan ḇyedi imnis raris Allah Karajan Ḇyedi. Ikanow mankundi ḇe raja, fyasos rur ḇemaḇak ḇyesya, ma ḇyuk papoik ḇe si fa sḇepoik supswan ine.—Efesus 6:12.
6 Roro Setan oganisasi ḇyedi, fyara ḇaḇepapoik snonkaku syakam. Kokyar roi ine nkaku snar fyasnaiḇair ḇe Yesus i ’karajan ro supswan ine’ kam, ma doḇe, ”Nari yaḇuk ḇe au papoik faro roi nane kam ma payamyum ḇyena. Roi nane kam neḇeḇuk kwar maro aya, ma na yaḇuk na faro mansei monda yamarisen ya.” (Lukas 4:5, 6, nwt) Kakuḇae, pamarenta ḇebor simarisen sifrur roi ḇepyum faro kawasa sesya, ma manḇepoik ḇeḇeso sya simarisen sifnoḇek snonkaku ḇesesya. Ḇape, pamarenta osoḇaḇeri ḇepok fa ḇeḇuk rosai kofandun na.—Mazmur 146:3, 4; Fasasna 12:12.
7. Setan ḇyuk pamarenta snonkaku sya monda ḇa, ḇape rariso Setan fyara agama ḇekaku ḇa ma farḇaḇyan ḇero dunya ine kako? (Mam sonin ro randak artikel ine.)
7 Setan ma rur ḇemaḇak ḇyesi kako sfara agama ḇekaku ḇa ma farḇaḇyan ḇero dunya ine fa dankar ”supswan ḇesiper” ine, ḇaido snonkaku syakam. (Fasasna 12:9) Setan ḇyuk agama ḇekaku ḇa fa fyarkor roi ḇesasar kuker Yahwe I, ma ḇyesewar kako fa ipyos Allah snonsnon Ḇyedi. (Yeremia 23:26, 27) Ine naiso ḇefnai fa snonkaku ḇeḇeso skara sisyom faro Allah kwar, ḇape ḇekaku ya, sima sisyom faro rur ḇemaḇak sya. (1 Korintus 10:20; 2 Korintus 11:13-15) Setan fyara kako farḇaḇyan ro dunya ine fa dankar snonkaku sya. Imnis raris, doḇe nari snonkaku sya sismai aski rofyor sna pipi nabore, ma sna roi nakam. (Amsal 18:11) Snonkaku ḇekyar faro ankarkar ine sḇuk kankenem sena ḇesiper fa sisewar ”Arasai” syadi ro sisewar Allah. (Matius 6:24, nwt) Ma snonkaku ḇeswar Allah ro randak ya kako, snar saswar ḇyedi iba syadi faro arasai na, inja muniwara kakyar ḇyedi faro Allah napromes.—Matius 13:22; 1 Yohanes 2:15, 16.
Fandun fa kokinfir imbe kowaira faro Yahwe I ke Setan i
8, 9. (a) Farkarkor risuru risai kun ro rosai Adam, Eva, ma malaikat ḇembroḇ sya roi sifrur na? (b) Rosai ḇefnai fandun kaku fa kofawi Setan iso ḇefara dunya ine?
8 Ro rosai Adam, Eva, ma malaikat ḇembroḇ sya roi sifrur na, kosmai farkarkor ḇefandun risuru. Oser ya, kofawi kona nyan risuru monda fa kokinfir, ma fandun fa kokinfir oser monda. Kokinfir fa kowaira ḇe Yahwe I ke Setan i. (Matius 7:13) Ḇesuru ya, kofawi mansei ḇeso Setan i nari nya fainda nabor ḇa. Kaku ya, Adam ma Eva suna swaf fa sukinfir roi ḇekaku ma roi ḇesasar. Rur ḇemaḇak sya kako sakḇepoik faro pamarenta snonkaku sya. (Kejadian 3:22) Ḇape, nari kosmai bon ḇeḇyeḇa ḇesya kwar rofyor kokinfir fa kowaira faro Setan i. Roi nane nun fainda ḇaḇeri!—Ayub 21:7-17; Galatia 6:7, 8.
9 Rosai ḇefnai fandun kaku fa kofawi Setan iso ḇefara dunya ine? Ine na nafnoḇek ko fa kona mamam ḇemnis faro pamarenta sya, ma ine kako nadif ko fa koḇaryas ankankinem ḇeḇye. Kofawi Yahwe ima imarisen fa koḇesyowi pamarenta sya. (1 Petrus 2:17) Yahwe dor ko fa kosouser faro sasoser sena rofyor sasoser anna imnis kuker marisen Ḇyena. (Roma 13:1-4) Ḇape, kofawi kako kosowarpu awer faro partai polotik ḇaido manḇepoik sesya. (Yohanes 17:15, 16; 18:36) Kofawi snar Setan ḇyensewar fa iyokef ma danonef Yahwe snonsnon Ḇyedi. Iso ḇefnai fa kosewar kaku fa koḇuk farkarkor ḇe snonkaku sya kakaku kuker Allah koḇedi. Komarisen kap snonsnon Ḇyedi ma kosyom faro I. Saswar faro Allah ipyum syadi ro saswar faro pipi ma arasai nakam.—Yesaya 43:10; 1 Timotius 6:6-10.
RARISO SETAN SYEWAR NYAN FA DAWNINYAN ḆESESYA RAI?
10-12. (a) Ara rosai Setan ḇyukifrowes malaikat ḇeḇeso sya? (b) Farkarkor risai kun ro rosai malaikat sya sifrur na?
10 Setan fyawi mnis kaku nyan rariso dawninyan ḇesesya. Fafisu ono kyinfir nyan ḇesrow kaku fa ḇyukifrowes si ma ifrur samswen si insama sifrur rosai imarisen na.
11 Setan kyinfir ara ḇesrow fa ḇyukifrowes malaikat ḇebor sya. Imbude snar myamepen si fyoro kwar, inja ifawi nyan risai ḇesrow fa ḇyukifrowes si. Malaikat ḇeḇeso sisapi ro fafrowes ḇyenane ma sifrur fararur farḇuk kuker bin ḇero supswan ine. Romawa sesya sibamantar kaku ma smun snonkaku ḇesesya. (Kejadian 6:1-4) Setan ifrowes si kuker fararur farḇuk monda ḇa, ḇape imbude ḇyeasas kako faro si nari ḇyuk papoik fa sḇepoik snonkaku syakam. Kuker nyan ine, Setan ḇyensewar fa idwarek rosai Yahwe ikofen kuker ’up ro bin’ ani. (Kejadian 3:15) Yahwe myam monda i ḇa. Ifrur Fabruḇ ḇeba ya fa idwarek Setan ma rur ḇemaḇak ansya aw sena.
Setan syewar fa ḇyuk fararur farḇuk, ararer, ma fawawi faro manwen fa ḇyukifrowes ko (See paragraphs 12, 13)
12 Rosai kofarkor ro fawar anine? Fararur farḇuk ma ararer nama ara ḇesrow kaku. Malaikat-malaikat ḇeyaksowarpu Setan ansya, ro randak ya sima sḇarek kayam kuker Allah ro nanki fyoro kwar. Ḇape, sibor siso marisen ḇesasar sena monda, ma muniwara marisen ḇesasar anna nsambraḇ syadi. Koswarepen koma kofarmyan ḇe Yahwe I fyoro kwar ke roḇa, marisen ḇesasar bisa nasur ro kosnesna. (1 Korintus 10:12) Iso ḇefnai fa ro ras ḇe ras, fandun kaku fa komambir kosnesna ma kosawen kakara ḇeḇyeḇa ma ararer na!—Galatia 5:26; wasya Kolose 3:5.
13. Ara ḇese rosai Setan ḇyukifrowes ko, ma rariso koḇinkwanbur na rai?
13 Setan ifawi snonkaku sya simarisen sakfawi fawawi manwen, inja kyinfir Ibrani 5:14) Ma rofyor koswar Allah ”kuker sne ḇenapes”, nari kun snemuk ḇesasar ḇa. (Roma 12:9) Snonkaku ḇena sne ḇenapes ḇa nari dawos roi oso ḇape ifrur roi ḇese. Inja, fafisu imbe kokinfir hiburan na, ipyum ya kofuken mankunko ’Farkankin ro Refo yakofen ḇe snonkaku ḇesesya fa siso na, yakfrur kwar na ke? Ḇefarkor Refo kuker aya ma snonkaku ḇesesya, rosai na sikofen ma skara rofyor smam hiburan yakinfir na?’ Rofyor koso imnis raris rosai kokofenḇair ḇe snonkaku ḇesesya fa sakso na ido, nari napyan ḇe ko fa kopampum Setan fafrowes ḇyena.—1 Yohanes 3:18.
ara ḇese ine fa ḇyukifrowes si. Baboine, ifrur na roro agama ḇekaku ḇa ma hiburan na. Felem, game elektronik, ma roi ḇesena na nafrur fa snonkaku sya smam fawawi manwen ḇe roi ḇeyun marisen. Rariso koḇinkwanbur ara nane? Kopok kokara awer Allah organisasi Ḇyedi ikofenḇair ḇe ko hiburan rosaiso ḇepyum ma ḇeḇyeḇa na oser-oser. Fandun fa komam pyum sneuser koḇena insama kokinfir roi ḇepyum imnis kuker Yahwe marisen Ḇyena. (Setan syewar fa ifrur samswen ko kuker roi ḇedwarek ḇerama ro pamarenta, bati ro rumfarkor, ma kina koḇesi (See paragraphs 14)
14. Rariso Setan syewar fa ifrur samswen ko, ma rariso kopampum i rai?
14 Setan syewar kako fa ifrur samswen ma ifrur makakak ko insama kosouser faro Yahwe I werḇa. Imnis ra, dawninyan pamarenta sya fa sidwarek fararur ḇaḇeḇaryas koḇena. Dawninyan kako bati ro moḇ kofararur ḇaido bati ro rumfarkor sya insama koso rosai Refo ikofen na ḇa. (1 Petrus 4:4) Iba syadi wer, Setan dawninyan karyer koḇesya ḇefarkor Refo ḇa sya fa sidwarek ko insama koso fananjur ya awer. Skara roi sifrur nane ḇe roi ḇekaku nairi. (Matius 10:36) Rosai kofrurya insama kores nako pdef rofyor Setan ifrur samswen ko? Kopok kokandor awer kuker rosai Setan ifrur nane snaro kofawi kwar Setan ḇyembroḇ kuker ko. (Fasasna 2:10; 12:17) Ma fandun fa koswarepen kako rosaiso Setan safsof ḇyena: Setan kyursof ko ḇo doḇe koma kofarmyan ḇe Yahwe I rofyor roi nakam napyan ḇe ko, ma nari kopampum Allah rofyor kosmai samswen. (Ayub 1:9-11; 2:4, 5) Osower ido, ro ras ḇe ras kor Yahwe I fa syamḇraḇser ko ḇesya kwar. Komkak awer Yahwe nari ryir ko ḇa.—Ibrani 13:5.
ROI SETAN IPOK IFRUR ḆA NA
15. Setan na idif ko fa kofrur roi komarisen ḇa na ke? Fasnaiḇair na.
15 Setan na ipok idif ko fa kofrur roi komarisen ḇa na. (Yakobus 1:14) Snonkaku ḇebor ro supswan ine sifawi ḇa ḇo sewaira faro Setan i kwar. Ḇape, rofyor snonkaku oso fyarkor napnapes, fandun fa kyinfir imbe iwaira faro Yahwe I ke Setan i. (Farfyar 3:17; 17:30) Rofyor kun snemuk fa kosouser faro Allah ido, na Setan ipok idwarek soasuser koḇena ḇa.—Ayub 2:3; 27:5.
16, 17. (a) Roi ḇese rosai Setan ma rur ḇemaḇak ḇyesi sisambraḇ fa sifrur na ḇa? (b) Rosai ḇefnai fa komkak awer fa konadi kuker mkarem ḇerok naba faro Yahwe I?
16 Roi ḇesena naisya Setan ma rur ḇemaḇak ḇyesi sisambraḇ fa sifrur na ḇa. Imnis raris, Refo dakkofen ḇa Setan ifawi roi ḇero kakara ma kosnesna. Yahwe ma Yesus suiso monda ḇefawi na. (1 Samuel 16:7; Markus 2:8) Sino simkak sḇenadi kuker mkarem ḇerok naba snaro simkak Ibiris ma rur ḇemaḇak sya nari srower roi sikofen anna ma sisewar fa sifrowes si kuker rosai srower kwar anna. Ḇape, fandun fa komkak si ke? Oroḇa! Snaro? Kokarapan roi ine: Ibiris isya myam ko, mboi komkak ḇaḇeri fa kofrur roi ḇeḇye ro fararmyan koḇena faro Yahwe I. Rarirya kako, na komkak awer fa konadi kuker mkarem ḇerok naba snaro kofawi Ibiris isya ryower ko. Refoya ikofenḇair Allah manfamyan Ḇyesi kako sḇenadi kuker mkarem ḇerok naba, ma komam sfas ḇaḇeri snar simkak snaro Ibiris na ryower si. (1 Raja-Raja 8:22, 23; Yohanes 11:41, 42; Farfyar 4:23, 24) Rofyor kawos roi ḇepyum ma kofrur rosai Allah imarisen na, kokyar Yahwe myam monda ḇa Setan ifrur fa koḇekandera isof fyoro-fyoro.—Wasya Mazmur 34:7.
17 Fandun fa komambir mbroḇ koḇedi, ḇape komkak awer i. Konapes ḇa kaker, ḇape Yahwe bisa ifnoḇek ko fa kopampum Setan i! (1 Yohanes 2:14) Rofyor kopampum i, nari ifrarbur ko. (Yakobus 4:7; 1 Petrus 5:9) Baboine, Setan syewar syadi fa ifrowes roma inai babo sya. Rariso spampum Setan fafrowes ḇyena rai? Nari kofarkor na ro artikel ḇerama ya.
^ par. 2 Refoya fyasnaiḇair malaikat ḇeḇeso snonsnon mankun sena. (Hakim-Hakim 13:18; Daniel 8:16; Lukas 1:19; Fasasna 12:7) Refoya kako ikofenḇair Yahwe ḇyuk snonsnon faro mak sya. (Mazmur 147:4) Nane naiso ḇefnai fa kokyar Yahwe ḇyuk snonsnon faro malaikat syakam, ma ine faro mankun ḇembroḇ I kako.
^ par. 3 Nasan ”Setan” ro Syap Ibrani kosrow na kali ri 18 monda. Ḇape, ro Syap Yunani Kristen, nasyadi ro 30.