1, 2. (a) Rosai Yesus ikofenḇair ḇe manfamyan ḇyesi ro roḇ rofyor imar ḇaim? (Mam sonin ro randak artikel ine.) (b) Rosai ḇefnai fandun fa koswarepen roi ḇefnai fa koḇaryas ya? (c) Rosai nari kawos ya?

RO ROḆ rofyor Yesus imar ḇaim, fyawar kawan kuker manwawan ḇyesi. Ḇyuk kakyar ḇe si snar iswar kaku si. Ikofenḇair kako wos sarḇer ḇekur ḇe anggur knam kawos kwar ro artikel ḇepon ya. Yesus imarisen danun ḇe manfamyan ḇyesi fa ’sḇuk bon nabor’ pdef, isoine kuker sfarmku ro ḇaḇeḇaryas ankankinem Karajan.​—Yohanes 15:8.

² Yesus ikofenḇair monda ḇa rosai fandun fa manfamyan ḇyesi sifrur na, ḇape ikofen kako rosai ḇefnai fandun fa sifrur roi anna. Ikofenḇair roi ḇefnai fandun fa sḇaryas pdef. Inja, fandun kako fa kakswarepen roi ḇefnai fa koḇaryas pdef. Kokarauser roi ine ido nari nafnoḇek ko fa kofarmku fafisu koḇaryas ”faro er sya kam”. (Matius 24:13, 14) Ro artikel ine, nari kawos ro Refo roi rifyak ḇefnai fa koḇaryas ya. Nari kawos kako Yahwe ḇyuk roi rifyak ḇefnoḇek ko fa koḇuk bon pdef.

3. (a) Ro Yohanes 15:8 ya, roi ḇefandun kaku rosaiso ḇefnai fa koḇaryas ya? (b) Ro Yesus wos sarḇer ḇyena, anggur kyur ḇe rosairiri, ma rosai ḇefnai fa wos sarḇer ḇyukiḇair nane nasrow kaku?

³ Roi ḇefandun kaku ḇefnai fa koḇaryas iso komarisen kosandik Yahwe ma kofasren snonsnon Ḇyedi. (Wasya Yohanes 15:1, 8.) Rofyor Yesus ikofenḇair wos sarḇer kuker ḇe anggur knam, ḇyair Yahwe ima imnis raris ḇefrur yaf ḇaido ḇeker anggur. Yesus ikofenḇair mankundi iso anggur knam ani, ma manfamyan ḇyesi siso snaw ḇyena. (Yohanes 15:5) Inja, ro wos sarḇer ine, anggur kyur ḇe Yesus manfamyan ḇyesi bon sḇuk na, ḇaido fararur ḇaḇeḇaryas sisya sifrur kaker na. Yesus ikofen ḇe manwawan ḇyansi, ’Rofyor mkoḇuk bon nabor pdef, Mami isma baba’. Fafisu anggur knam ḇyuk bon ḇepyum ido, ine nun sanandik faro ḇefrur yaf anya. Rarirya kako, rofyor kosewar fa koḇaryas ankankinem Karajan ido, na nun sanandik ḇaido baba faro Yahwe I.​—Matius 25:20-23.

4. (a) Rariso kofasren Allah snonsnon Ḇyedi rai? (b) Moḇsa ḇaḇir rai snar nwa syowi ḇeba fa wakfasren Allah snonsnon Ḇyedi?

⁴ Allah snonsnon Ḇyedi isren kwar. Na kopok kofrur roi osoḇaḇeri fa ifrur I insama isren syadi wer. Inja, moḇsa kofasren Allah snonsnon Ḇyedi rofyor koḇaryas rai? Mam rosai nabi Yesaya ikofen na, ”Yahwe ḇena sordade derer monda fandun fa mkomam ima isren.” (Yesaya 8:13) Kofasren Allah snonsnon Ḇyedi, Yahwe, rofyor komam snonsnon ḇyedine iba syadi ro snonsnon nakam, ma rofyor kofnoḇek ḇesesya fa sifawi ima isren kaku. (Matius 6:9) Imnis raris, rofyor kofarkor snonkaku ḇesesya kuker Allah rari-rari ḇepyum ma marisen Ḇyena insama snonkaku sikenem fyoro ro Firdaus ido, koisya kofnoḇek si fa sifawi snar roi ḇeḇyeḇa Setan kyur ḇe Yahwe, nama nkaku ḇa. (Kejadian 3:1-5) Kofasren Allah snonsnon Ḇyedi kako rofyor kofnoḇek snonkaku ḇesesya fa sifawi Yahwe ima ’isyus fa ismai sanandik, syowi ma papoik’. (Fasasna 4:11) Rune, ḇye perintis kwar ro swaf taun ri 16, doḇe, ”Yakofen kasumasa snar yana syowi ḇeba fa yaḇe saksi faro Manḇedaw supswan ma farsyos. Ine nafrur aya fa yamarisen kaku yaḇaryas pdef.”

5. (a) Imnis wos ḇero Yohanes 15:9, 10 ya, rosai ḇefnai ko fa koḇaryas ya? (b) Rariso Yesus ifnoḇek manfamyan ḇyansi fa sifawi fandun fa sfarmkuepen?

⁵ Wasya Yohanes 15:9, 10. Roi ḇesuru ḇefnai fa koḇaryas ankankinem Karajan ya iso koswar Yahwe ma Yesus su. (Markus 12:30; Yohanes 14:15) Yesus ikofenḇair manfamyan ḇyansi fandun fa ’skain [pdef] ro saswar ḇyedi’. Rosai ḇefnai fa Yesus ikofen radine? Snar ifawi manfamyan ḇyansi na sfandun ḇaḇefarmku fa sikenem ḇe snonkaku  Kristen ḇekaku. Ḇekaku ya, ro Yohanes 15:4-10, komam Yesus dap wos ’pdef’ rarwan riḇeso fa ifnoḇek manfamyan ḇyansi fa sifawi fandun fa sfarmkuepen.

6. Rariso kofasnai komarisen kokain pdef ro Yesus saswar ḇyedi rai?

⁶ Rariso kofasnai komarisen kokain pdef ro Yesus saswar ḇyedi ma kosmai kyaremso ro i? Kosouser I kada. Yesus dor fa kofrur raris mankundi moḇ ifrur ndraya. Ikofen ḇo doḇe, ”Yaḇeuser Mami sasoser ḇyena rarirya yakain [pdef] ro saswar ḇyedi.” Yesus fyasnai nyan ḇepyum ḇe ko.​—Yohanes 13:15.

7. Rariso soasuser nya fasfes kuker saswarya rai?

⁷ Yesus fyasnai kaku snar soasuser nya fasfes kuker saswarya rofyor ikofen, ”Mansei ḇeyuf sasoser ayena ma ḇeḇeuser na, iso ḇeswar ayanya.” (Yohanes 14:21) Yesus parenta ḇyena ndamuma ro Kmari. Inja, rofyor kosouser parenta fa koḇaryas ido, kofasnai koswar Yahwe I. (Matius 17:5; Yohanes 8:28) Ma rofyor kofasnai ḇe Yahwe ma Yesus snar koma koswar su ido, na kokain pdef ro saswar suḇena.

8, 9. (a) Roi oso ḇese rosai ḇefnai fa koḇaryas ya? (b) Rariso Yahwe wos Ḇyena ro Yehezkiel 3:18, 19 ma 18:23 nadif ko fa koḇaryas pdef?

⁸ Roi ḇekyor ḇefnai ko fa koḇaryas iso komarisen koḇuk swarapepen ḇe ḇesesya kuker Yahwe ras Ḇyedi na ḇerama ya. Refo fyasnaiḇair Nuh i ḇe ”manḇaryas” oso. (Wasya 2 Petrus 2:5.) Fafisu Faḇruḇ ḇeba ryama ḇaim, anun Nuh ḇyaryas anya kako nama swarapepen kuker ras samamyai ḇerama ya. Rosai ḇefnai ya? Kukro Yesus doḇe, ”Snar imnis raris kawasa ro awar faḇruḇ ya ḇaim, sanan ma sinem, sekawin ma sfakawin si, isof ro ras Nuh syun ro wai ya, ma sifawi royoḇa beri ḇepon ro faḇruḇ ya ryama myun sikam, rarirya kako nari roi ḇerarirya ndama ro fafisu rarama Rumkun Snonkaku ya.” (Matius 24:38, 39) Snonkaku ḇebor sya sfandun faro Nuh i ḇa, ḇape kuker soasuser ḇyaryas pdef anun swarapepen ro Yahwe I. 

⁹ Baboine, koḇaryas anun Karajan fa koḇuk swaf faro si insama sakfawi rosaiso Allah marisen Ḇyena faro snonkaku ro fafisu naiwama. Raris Yahwe I,  komarisen kaku insama snonkaku sya sḇuk swaruser sena faro anun anna insama sikenem pdef. (Yehezkiel 18:23) Rofyor koḇaryas ro rum ḇe rum ma ro moḇ snonkaku sibor sisya rona, koḇuk swarapepen ḇe snonkaku ḇebor syadi wer snar Karajan Allah nari ryama ma myunpres snonkaku ḇeḇarḇor sya.​—Yehezkiel 3:18, 19; Daniel 2:44; Fasasna 14:6, 7.

10. (a) Ro Matius 22:39 ya, roi risai ḇefnai ko fa koḇaryas? (b) Rariso Paulus ma Silas sufnoḇek mananir bui ro mnu Filipi rai?

¹⁰ Roi ḇefyak ḇefnai ko fa koḇaryas pdef iso koswar snonkaku sya. (Matius 22:39) Saswar ḇeradine nafnoḇek ko fa koḇaryas pdef snar kofawi snonkaku sya nari sfadwer kakara sena rofyor samswen nkur si. Imnis raris, ḇembroḇ sya sisun Paulus ma Silas su ḇe bui ro mnu Filipi. Ḇape, ro romfawru, saprop ya imer ma kedwa na nḇase. Mananir bui imkak fafayaḇa snar doḇerada nari ḇesmai bui sya sifrar kam, inja imbe myun mankundi. Ḇape, Paulus idwarek i ma dor naba kaku ḇo doḇe, ”Mun mankundaw awer!” Mananir ani ifuken, ”Rosai nari yafrur, insa yasma [fasaspar?]” Paulus ma Silas sukarem, ”Wakyar faro Manseren Yesus Kristus ma nari wasma [fasaspar]”.​—Farfyar 16:25-34.

11, 12. (a) Farkarkor risai kosmai ro farfyar kuker mananir bui ani faro fararur ḇaḇeḇaryas koḇena? (b) Rosai ḇefnai fa komarisen koḇaryas pdef?

¹¹ Farkarkor risai kosmai ro farfyar kuker mananir bui ani faro fararur ḇaḇeḇaryas ya? Mam kada, fafisu saprop ya imer raposa insape mananir bui ani fyadwer kakara ḇyena ma dor fafnoḇek. Rarirya kako, snonkaku ḇemewer ḇerower anun ro Refoya imbude nari sfadwer kakara sena ma sisewar fafnoḇek rofyor samswen nkur si. Imnis raris, sino sisya sfafardun snar sismai fararur werḇa ḇaido farḇakḇuk sena namuk. Ḇesesya sḇesneso snar dafduf ḇemarḇak nkur si ḇaido snonkaku siswar sya simar. Snonkaku sya simewer skara kankenem sena, mboi rofyor roi ḇeḇesya anna nkur si insape skain skara kankenem sena. Imbude sifuken, ’Rosai fandun fa yafrur insama yaksmai fasaspar ya?’ Imbude na simarisen snar ro kankenem sena insape randak kaku srower anun ḇeḇuk saneraro.

¹² Inja, kuker myaren koḇaryas pdef ido, nari kofasos ko rofyor snonkaku ono simarisen sismai anun ḇeḇuk sneprei koḇuk faro si na. (Yesaya 61:1) Charlotte, ḇye perintis ro swaf taun ri 38 kwar, doḇe, ”Snonkaku ḇero baboine sya siḇoryae kuker kankenem sena. Fandun fa srower ankankinem ḇeḇye.” Ejvor, ḇye perintis ro swaf taun ri 34 kwar, doḇe, ”Baboine snonkaku sibor syadi sisya sefafardun. Yamarisen kaku fa yafnoḇek si. Naiso ḇedif aya fa yaḇaryas ḇe si.” Inja, nasnai kaku, saswar faro snonkaku sya naiso roi ḇefandun kaku insama koḇaryas pdef!

13, 14. (a) Ro Yohanes 15:11 ya, roi ḇepyum risai Allah ḇyuk ḇe ko na? (b) Rariso na kosmai Yesus raryaḇ ḇyena rai? (c) Moḇsa raryaḇ nafnoḇek ko ro ḇaḇeḇaryas koḇena rai?

¹³ Ro roḇ ya ḇesiper rofyor Yesus imar ḇaim, dap kako snar Allah ḇyuk roi ḇepyum nari ḇefnoḇek manwawan ḇyansi  fa sḇuk bon pdef. Roi ḇepyum rosairiri, ma rariso na nafnoḇek ko ro baboine?

¹⁴ Raryaḇ. Ḇaḇeḇaryas iso roi ḇemarḇak ḇe ko ke? Oroḇaḇeri. Rofyor Yesus dawos wos sarḇer ḇekur ḇe anggur knam ramnai, ikofen ḇo doḇe fafisu koḇaryas ido, nari kosmai raryaḇ ḇyena. (Wasya Yohanes 15:11.) Moḇsa na ndariri? Koswarepen, ro Yesus wos sarḇer ḇyena, kyur mankundi ḇe anggur knam ani ma manfamyan ḇyansi siso snaw ḇyena. Rofyor snaw-snaw ansya sḇeoser faswef kuker anggur knam ya mande insape na sismai war ma roḇean. Rarirya kako, rofyor koḇeoser faswef kuker Yesus ma koso mnis wewur ḇyena monda ido, insape na kosmai raryaḇ. Inja, na kosmai Yesus raryaḇ ḇyena isoine raryaḇ ḇeramuma ro kofrur Allah marisen Ḇyena. (Yohanes 4:34; 17:13; 1 Petrus 2:21) Hanne, ḇye perintis ro swaf syadi ro taun ri 40, ikofen ḇo doḇe, ”Raryaḇ yasmai ro ḇaḇeḇaryas nadif aya fa yafarmyan pdef ḇe Yahwe I.” Raryaḇ ḇeradirya syambraḇser ko fa koḇaryas pdef fafisu snonkaku ḇebor sya simewer srower ko.​—Matius 5:10-12.

15. (a) Ro Yohanes 14:27 ya, roi ḇepyum risai Allah ḇyuk ḇe ko na? (b) Rariso aski ya nafnoḇek ko fa kofrur roi ḇeyun fainda ḇe snonkaku sya?

¹⁵ Aski. (Wasya Yohanes 14:27.) Randak kaku ro roḇ rofyor Yesus imar ḇaim, ikofen ḇe manwawan ḇyansi, ”Aski ayena yaḇuk na faro mko.” Rariso Yesus aski ḇyena nafnoḇek ko fa koḇaryas pdef? Koḇaryas pdef ido, na kosnesna neaski snar kofawi kofrur Yahwe ma Yesus sumarisen. (Mazmur 149:4; Roma 5:3, 4; Kolose 3:15) Ulf, ḇye perintis ro swaf taun ri 45, doḇe, ”Fararur ḇaḇeḇaryas nafrur fa yambrus, ḇape nun marasrisen ḇeba kaku, ma yasmai fainda ro kankenem ayena.” Kokofen kasumasa snar kona aski ḇekain fyoro!

16. (a) Ro Yohanes 15:15 ya, roi ḇepyum risai Allah ḇyuk ḇe ko na? (b) Rariso insama manwawan sya sḇebati pdef kuker Yesus i?

¹⁶ Ḇaḇebati. Yesus ikofen ḇe manwawan ḇyansi snar imarisen fa sismai raryaḇ. Ramnai, fyasnaiḇair rosai ḇefnai fandun kaku fa sfasnai saswar ḇefandun mankun ḇa. (Yohanes 15:11-13) Ramnai ikofen wer, ”Yor mkoḇe bati”. Sḇebati kuker Yesus ima syowi ḇeba kaku nairi! Ḇape, rariso insama manwawan sya sḇebati pdef kuker Yesus i? Yesus  ikofenḇair insama fandun fa sra ma sḇuk bon pdef. (Wasya Yohanes 15:14-16.) Ine kyurfasna sḇaryas pdef. Taun risuru rofyor ikofen roi anna ḇaim, ikofen ḇe manwawan ḇyesi, ”Mkora ma mkoḇaryas: [Karajan nanki] fyanam kwar.” (Matius 10:7) Inja, ro roḇ rofyor Yesus imar ḇaim, ikofen faro manfamyan ḇyansi fa sfarmku pdef ro fararur ḇaḇeḇaryas. (Matius 24:13; Markus 3:14) Kakuḇae, Yesus ifawi nari napyan faro si fa sifrur parenta ḇyena ḇa. Ḇape, bisa sifrur roi anna ma sḇebati pdef kuker i. Moḇsa sifrur na rai? Nyan ḇese wer isya.

17, 18. (a) Ro Yohanes 15:7 ya, roi ḇepyum risai Allah ḇyuk ḇe ko na? (b) Moḇsariso roi ḇepyum ani ifnoḇek Yesus manwawan ḇyesi rai? (c) Roi ḇepyum risai na ḇefnoḇek ko ro baboine?

¹⁷ Kankarem faro nadi koḇena. Yesus doḇe, ”Rosai mkor ro Kmaya kuker snonsnon ayedi, Mami ḇyuk na faro mko.” (Yohanes 15:7, 16) Rosai Yesus ikofen nane nsambraḇser manwawan ḇyesi! * (Mam fasfas kasun ro sop.) Manwawan sya sifawi ḇaḇeri snar kero wer nari Yesus imar. Ḇape, rofyor imar kwar kako nari sismai fafnoḇek kaker kukro Yahwe isya fa kyarem nadi sena, ma ifnoḇek si ro fararur ḇaḇeḇaryas. Rofyor Yesus imar anya, manwawan sya sor ḇe Yahwe I fa ḇyuk samambraḇ faro si, ma Yahwe kyarem nadi sena.​—Farfyar 4:29, 31.

¹⁸ Baboine kako rarirya. Na kakḇebati pdef kuker Yesus i rofyor kofarmku ro fararur ḇaḇeḇaryas. Na kokyar snar Yahwe kyarem nadi koḇena rofyor kosmai samswen ro ḇaḇeḇaryas. (Filipi 4:13) Kokofen kasumasa snar Yahwe kyarem nadi koḇena ma koḇebati kuker Yesus i. Roi ḇepyum ḇerama ro Yahwe I nsambraḇser ko fa koḇuk bon pdef.​—Yakobus 1:17.

19. (a) Rosai ḇefnai fa koḇaryas pdef? (b) Rosai na ḇefnoḇek ko fa kofrur fararur Allah ḇyuk ḇe ko na?

¹⁹ Ro artikel ine, kofarkor kwar roi rifyak ḇefnai fa koḇaryas pdef: insama kosandik ma kofasren Yahwe snonsnon Ḇyedi, kofasnai saswar koḇena faro Yahwe ma Yesus su, koḇuk swarapepen ḇe snonkaku sya, ma kofasnai koma koswar snonkaku sya. Kofarkor kwar roi ḇepyum rifyak: raryaḇ, aski, ḇaḇebati, ma kankarem faro nadi koḇena. Roi ḇepyum anna kam nafnoḇek ko fa kofrur fararur Allah ḇyuk ḇe ko na. Yahwe na imarisen fafayaḇa rofyor myam kofararur sambraḇ fa ’koḇuk bon nabor’!