1. Rosai ḇefrur naek srar ono sna samambraḇ werḇa fa sfarkor?

BABOINE, snonkaku ḇebor sya sifararur marḇak insa sna kumpan fa sikenem. Naek srar ono sisya sifararur ro ras ḇesiper insama sfamfon fandun ro kina sesya. Ono wer sḇuk oras nabor fa sifrur marandan ḇe moḇ ḇeḇinkwan fa sfararur, mura skoḇur wer. Ḇesesya wer sifararur marmar kaku. Sifararur marḇak raposa na naek srar ansine simbrus fafayaḇa! Ḇarpur ya, sḇaḇir sna samambraḇ werḇa fa sfarkor.

2. Fafisu risai nwa swaf fa wafarkor?

² Imbape, fandun fa kona swaf fa kofarkor kuker kakaku Allah Wos Ḇyena ma publikasi koḇena. Ḇaḇebati kuker Yahwe ma kankenem fyoro nari kosmai na neknam ro roi anna! (1 Tim. 4:15) Sia sikḇok ro arwo prim fa sakfarkor rofyor moḇ ya iknon kaker ma swaruser sena nambran pyum snar senef mnis kwar ro roḇ ya. Ḇesesya sḇuk menit riḇeso fyor simnaisu ḇaim fa sfarkor ma skarauser Wos Refo ma publikasi koḇena.

3-4. Fararwe rosai sifrur kwar na, ma rosai ḇefnai ya?

³ Kakuḇae na wakkara fandun fa kona swaf fa kofarkor. Ḇape rosai fandun fa kofarkor ya? Imbude woḇe, ’Roi nabor syadi naisya fa kowasya na. Yawasya sambraḇ naḇa.’ Naek srar ono sisambraḇ fa siwasya publikasi ma smam vidio nakam ḇeknam ro Refo na. Ḇape, ḇesesya samswen ḇe si fa sakfrur rarirya. Raryur Naek Ḇefarkin sifawi roi ine. Iso ḇefnai fa, Raryur Naek Ḇefarkin sun snemuk kwar insama roi ḇeḇecetak ḇaido ḇero internet sifrur fa nabor syadadi awer.

⁴ Imnis raris, Buku Tahunan Saksi-Saksi Yehuwa sifrur  na werḇa, snar fawar ḇeḇuk samaraḇraḇ naisya kwar ro jw.org^® ma JW Broadcasting^® paik ḇe paik na. Kirine majalah Baryas faro kawasa kam ma Sadarlah! Sifrur na rarwan rikyor monda ro taun oser. Sifrur fararwe ine insama kona swaf ḇebor fa kofrur roi eḇesena ke? Oroḇa. Fararwe sifrur nane fandun ya iso insama kona swaf fa komam pyum ”roi ḇefandun syadi na”. (Flp. 1:10) Mkorama kawos moḇsa kokinfir roi ḇefandun syadi na rai ma rariso kosmai fainda nabor ro farkarkor Refo ro mankunko.

5-6. Publikasi rosai monda fandun fa kofarkor pyum na?

⁵ Rosai fandun fa kofarkor ḇepon na? Kaku ya na koḇuk swaf ras ḇe ras fa kofarkor Refo. Kirine, mnuk-mnuk ro Refo sap kwar fa kowasya faro minggu nakam ro sidang sifrur na fa nabor werḇa. Rarirya kona swaf fa kokarauser na ma kosewar ro publikasi koḇena infa kofawi nabor syadi mnuk kowasya na. Fandun ya iso kowasya mnuk-mnuk anna monda ḇa, mboi insama roi kowasya ro Refo na nsun kaku ro kosnesna ma nafrur fa kofanam syadi ḇe Yahwe I.​—Mz. 19:14.

⁶ Rosai wer fandun fa kofarkor pyum na? Kakuḇae, na kofrur fasasos faro roi na kawos ro Farkarkor Baryas ma Farkarkor Refo ro Sidang, ma roi ḇese na kawos ro fananjur minggu fadu ya kako. Kowasya kako Baryas faro kawasa kam ma Sadarlah!

7. Na kofafko ke snar kowasya kopok ḇa roi nakam ḇero jw.org ma JW Broadcasting?

⁷ Imbude na woḇo, ’Kaku, mboi rariso kuker awawos ma vidio-vidio ḇero jw.org ma JW Broadcasting na? Nabor fafayaḇa!’ Kokarapan sarḇer ine: Koraḇe pasar ḇo komam mboi sboḇ roi ḇebor kam. Na kopok kokoḇes roi sboḇ nakam ḇa, ḇape kokoḇes monda roi kofandun na. Rarirya kako, wawasya wapok roi nakam srir kwar ro internet na ḇa ido, wafafko awer. Wawasya ḇaido wamam roi swambraḇ fa wawasya na monda. Mkorama, kawos rosai monda kofrur fafisu kofarkor ma rariso insama kosmai fainda nabor syadi ro farkarkor mankun koḇena.

8. Rosai monda na kofrur rofyor kofarkor syap Baryas koḇukifarkor, ma fainda rosai wasmai na?

⁸ Kofarkor iso kokara pyum roi kowasya na insamaido kosmai fawawi ḇefandun kaku. Inja, kofarkor ima kowasya fasaw roḇa kosrik kankarem na monda ḇa. Rupa ra, imbe wafasos Farkarkor Baryas ido, ḇepon ya wawasya ḇar ”Roi Na Kofarkor” ḇero randak farkarkor. Mura, kwarapan judul ḇepon ya, judul kasun na, ma fakfuken kaḇer na kako. Ramnai, wawasya mnis ma fawawas syos ḇe syos ḇero farkarkor ani. Mam mnis wos-wos ro randak syos na oser-oser, ḇekofenḇair roi imbe kawos na. Nane nafnoḇek au fa wafawi knam ro syos ani. Fafisu wawasya ido, kwarapan, moḇsa syos oser-oser ḇyefesepen kuker judul kasun ma judul ḇepon na. Fasepen wos ma roi imbe swewar fa wafawi nabor syadi wer.

9. (a) Fafisu kofarkor Baryas, rosai ḇefnai fandun fa ma rariso komam pyum mnuk-mnuk ro Refo na? (b) Imnis ḇeḇeyap ro Yosua 1:8, rosai wer fandun fa kofrur rofyor kowasya mnuk ro Refo na?

⁹ Fafisu kofarkor Baryas ro fananjur ya, ine ifnoḇek ko fa kofawi pyum Refo syadi wer. Rarirya, komam pyum mnuk-mnuk ro Refo na, ḇepon syadi mnuk nari  siwasya fyor sawos farkarkor anna ro sidang. Komam mnis kada moḇsa wos ḇero mnuk ani ḇyefesepen kuker knam kaku ro syos ya. Oso wer ido, rofyor kowasya mnuk na koḇuk swaf fa kokarauser na ma kokara rariso kombran mnis na ro kankenem koḇena rai.​—Wasya Yosua 1:8.

10. Imnis ḇefas ro Ibrani 5:14, rosai ḇefnai fandun fa sinan sya sḇuk swaf Nadi ro Kina fa sikofenḇair ḇe romawa sya nyan moḇsa sifarkor rai?

¹⁰ Kakuḇae, sinan sya simarisen romawa sesya sismai marisen rofyor sifrur Nadi ro Kina sena. Inja, sinan sya na skara ḇepon rosai imḇe sawos ro Nadi ro Kina sedi. Kina ḇebor simarisen sifrur roi simarisen ḇaido fararur oso, imnis raris sifrur bahtera Nuh. Mboi, roi ḇeradine fandun ḇa sifrur ro minggu nakam. Kina ono sḇuk swaf Nadi ro Kina kako fa skomam JW Broadcasting. Ḇape nane monda ḇa, fandun kako fa sikofenḇair ḇe romawa sya nyan moḇsa sifarkor rai. Imnis raris fandun fa sifawi moḇsa sifrur fasasos faro fananjur na ndraya ḇaido rariso sisewar kankarem faro fakfuken sismai ro rumfarkor ya. (Wasya Ibrani 5:14.) Rofyor ro rum sḇuk ker swaf fa sifarkor Refo ido, nari napyan ḇe si fa simnaf pyum ro fananjur, munara kebaktian, fafisu sfasnai ker vidio ya ḇa. Kakuḇae, romawa sya na sifarkor kawan ke roḇa nama ndramuma ro umur ma samambraḇ sena.

11. Rosai ḇefnai fandun fa kokofenḇair ḇe ḇefarkor Refo kuker kosya nyan moḇsa sifarkor pyum ro mankunsi rai?

¹¹ Fandun fa kokofenḇair ḇe ḇefarkor Refo kuker kosya nyan moḇsa sifarkor rai. Insape sfarkor babo ido, na komarisen fyor komam sisrik kankarem faro farkarkor Refo ḇaido fananjur ya. Ḇape, fandun fa kofarkor si nyan sisewar fawawi nabor syadi ma moḇsa sifarkor pyum ro mankunsi raya. Rarirya ido, fyor sismai samswen, na fasaw fa sor fafnoḇek ro ḇesesya ḇero sidang ya ḇa, mboi na sisewar ro mankunsi anun sifandun na ro publikasi koḇena.

12. Rosai fandun ro kofarkor ya?

¹² Auma wamarisen ḇa fa wafarkor ido, imbude na kwara jadi fa wakfarkor ḇa. Mboi, kwara radirya awer. Randak ya wafarkor kawan awer, fawas mura ido wafarkor kawan syadiwer. Kwarapan fandun ro farkarkor bena. Kakuḇae, fandun ḇepon  ro kofarkor ya iso insama kofanam syadi ḇe Yahwe I. Fandun ḇesena wer iso infa kofawi koḇuk kokarem faro fakfuken ro snonkaku oso ḇaido kosewar fafnoḇek faro samswen kosmai na.

13. (a) Wapḇair pan rosai monda romawa babo oso ifrur fa ibriwarek kakyar ḇyedi ro rumfarkor. (b) Rariso romawa babo isomnis ananun ḇero Kolose 4:6 ya?

¹³ Auma romawa babo ḇefarkor kaker ro rumfarkor ke? Imbude bati besya ro rumfarkor sifrur ras ulang taun sena. Waḇe wakofenḇair ro Refo rosai ḇefnai fa wakso wanan si ḇa, mboi wafawi rosai imbe wakofen ya ḇa. Inja, fandun fa wafarkor beri! Roi risuru ḇefnai ya iso: (1) infa wakyar kaku ras ulang taun nama Allah imarisen na ḇa, ma (2) insama wafawi nyan ḇepyum fa wakofenḇair kakaku ḇero Refo. (Mat. 14:6-11; 1 Ptr. 3:15) Randak ya, wafuken ro mankundaw: ’Sano rosai bati yesi sikofen na faro ras ulang taun sena?’ Ramnai, swewar kankarem na ro publikasi koḇena. Imbude kwara samswen fa wawoswarek kakyar bena. Mboi kaku ya rariryaḇa. Snonkaku ḇebor sifrur ras ulang taun snar skara monda snonkaku sya kam sakfrur na kako. Wasrow roi oso ke suru imbe wakofenḇair ḇe si ido, wafawi ḇa boi wafnoḇek kwar snonkaku oso ḇemarisen fa ḇefawi kakaku ro Refo na.​—Wasya Kolose 4:6.

14-16. (a) Imbe wafawi syap oso ro Refo wafawi mnis ḇaim i ido, rosai na wafrur ya? (b) Fasnaiḇair pan rariso mnuk-mnuk ono na nafnoḇek Au fa mamḇir pyum syap Amos i. (Mam kako kotak ”Mamḇir Pyum Snonkaku Sfas ro Refo Sya.”)

¹⁴ Wawasen pan, ro fananjur ḇerama ya nari wafarkor fasfas oso ro syap-syap wafawi na ḇe Nabi-Nabi Kasun *, mboi wafawi pyum i ḇaime. Fandun fa nwa marasrisen fa wafawi roi nabi ani fyasepen na. Rosai na wafrur ya?

¹⁵ Randak ya, wafuken mankundaw, ’Rosai yafawi ḇekur manḇefas syap anya? Mansei rirya, ḇyarek roryo, rosai fararur ḇyena?’ Mamḇir kaku manḇefas ani kankenem ḇyedi ido, na wafawi roi ḇewar fa fyas wos ono ḇaido ḇyuko sarḇer ono. Fafisu wawasya Refo, mam mnis wos riḇeso ḇefasnaiḇair manḇefas ani moḇ ikenem rai.

¹⁶ Mura, swewar fa wafawi fafisu risai syap ani ḇyeḇefasepen. Na mam ḇar ”Daftar Buku-Buku Alkitab” ḇero ram ḇarpur Kitab Suci Terjemahan Dunia Baru. Oso wer ido, mam sasyos nabi ma raja sya ḇero Lampiran A6. Ausya wafarkor syap ḇardadi oso ido, ipyum ya swewar fa wafawi fyor syap ani ḇyeḇefas moḇsa snonkaku sya sikenem rai. Sfasnai kenem ḇeḇyeḇa ḇaido roi ḇeḇyeḇa risai sifrur na isof ro nabi ani ḇyuk swarapepen ḇe si? Manseisi ḇekenem kayam kuker manḇefas ani? Insama wafawi mnis fafisu ya, mampan kako syap-syap ḇese ḇero Refo na. Imnis raris, imbe wafawi rosai ḇeḇesya ro Nabi Amos fafisu ḇyedi ido, wawasya mnuk-mnuk ḇero 2 Raja-Raja ma 2 Tawarikh, ḇero referensi silang faro Amos 1:1. Oso wer, na mam Hosea fasfas ḇyena, ḇekenem kayam kuker Amos i. Mam ro syap-syap ḇesena ro Refo kada, nari wafawi mnis kaku rosai ḇeḇesya ro Amos fafisu ḇyedi.​—2 Raj. 14:25-28; 2 Taw. 26:1-15; Hos. 1:1-11; Am. 1:1.

17-18. Buk conto ḇero syos ansuine ḇaido buk conto ḇese fa wafasnaiḇair rariso roi ḇeḇekasun na nafnoḇek Au fa wasmai marasrisen fyor wafarkor Refo ro mankundaw.

¹⁷ Fyor kowasya Refo, ḇepyum ya kona marasrisen ḇeba fa kofawi nabor syadi wer. Imnis ra, Ausya wawasya Zakharia ram ḇe 12 ḇekofenḇair ḇepon ḇekur ḇe Mesias marmar ḇyedi. (Za. 12:10) Rwo mnuk ḇeḇe 12 ido, na wawasya ”kina ro Natan kpu up ḇyesi” nari skanes ma sfafardun kaku fyor Mesias imar. Na wawasya rarirya monda awer, mboi wamnai ḇo wafuken, ’Rariso Natan kina ḇyesi sna fasfesepen kuker Mesias i? Rariso insama yafawi mnis roi ine rai?’ Swewar kaku fa wafawi na. Referensi silang ḇyena nun Au ḇe 2 Samuel 5:13, 14. Mnuk anya ikofenḇair Natan ima Raja Daud romawa oso ḇyediri. Referensi silang ḇesuru ya iso Lukas 3:23, 31, ḇefasnaiḇair Yesus ima Natan kpu up ḇyedi roro Maria i. (Mam Menara Pengawal, No. 3 2016, hlm. 9, par. 1-3, ”Tahukah Anda?”) Na wamarisen kaku snar wafawi sḇardi ḇepon kwar Yesus na ḇye kpu up ro Daud i. (Mat. 22:42) Ḇape, Daud nya romawa se 20 syadi. Na kokandor kaku snar Zakharia fyasnaiḇair Natan kina ḇyesi nari sefafardun snar Yesus marmar ḇyedi.

¹⁸ Kwarapan roi ḇese wer. Ro syap Lukas ram ḇeoser ya, kowasya kada malaikat Gabriel myamfar Maria i ma ikofenḇair ḇekur romawa fyadores ya. Ikofen ryadine, ”Nari romawa ani iba ma nari sapiḇe Rumkun Allah ḇekaki syadi. Ma Manseren Allah nari ḇyuk faroi, karapesa nasan Daud, kpu ḇyedi, ma nari  [ḇyepoik ḇe Raja] faro Yakub kpu ḇyesi, isof fyoro-fyoro.” (Luk. 1:32, 33) Imbude na komam beri ḇe wos ḇerandak malaikat Gabriel ikofen na. Doḇe Yesus nari sap i ḇe ”Rumkun Allah ḇekaki syadi”. Mboi Gabriel ḇyardi kako Yesus nari ”ḇyepoik ḇe Raja”. Inja na kofuken rosai Maria kyara ya fyor ryower Gabriel wos ḇyena. Kyara Yesus nari fyadwer Raja Herodes ke, oroḇaido manḇepoik ḇese ḇero Israel sya ke? Yesus dakḇe raja ido, na Maria ḇye raja snari, ma kina ḇyesi sḇarek ro istana raja. Ḇape, Refo ikofenḇair ḇa Maria dawos roi ḇeradine ḇe Gabriel i. Kokako kowasya ro Refo ḇa Maria dor nasan ḇekaki ro Karajan, raris Yesus manfamyan risuru ḇyesi. (Mat. 20:20-23) Roi ḇekasun nane nafrur fa kokyar Maria ima bin ḇena sne ḇerun kaku!

19-20. Imnis ḇefas ro Yakobus 1:22-25 ma 4:8, rosai monda fandun ro kofarkor Refo ma publikasi koḇena?

¹⁹ Iḇye kada koswarepen, fandun ḇepon kaku ro kofarkor Refo ma publikasi koḇena iso insama kofanam syadi ḇe Yahwe I. Kokako komarisen komambir mankunko ’moḇ kosnai raya’ ma rosai fandun fa kofadwer ro kenem koḇena insama nun marisen ḇe Allah. (Wasya Yakobus 1:22-25; 4:8.) Inja fafisu kofarkor ḇaim, randak kaku koḇenadi ḇe Yahwe kor fafnoḇek ro rur ḇesren Ḇyedi. Fandun fa kor Yahwe ifnoḇek ko infa kosmai fainda ro roi kofarkor na ma kofrur imnis Yahwe marisen Ḇyena.

²⁰ Rirya kada, kokame koḇe Allah manfamyan ḇesoasuser Ḇyesi. Manḇefas Mazmur fyasnaiḇair si ryadine, ”Imarisen faro Yahwe sasoser Ḇyena, ma iwasya fawas sasoser Ḇyena meser ma roḇ. . . . Roi ifrur nakam nari neḇebon.”​—Mz. 1:2, 3.