Imbesrar oso ḇenir ḇe Sara, * doḇe, ”Ayama yamamyai, ma yakorwanan kero. Inja, yamam snonggaku ḇesoso manggenem ma ḇeyawos fasawsaw ido, yabur ḇinggwan si. Yamarisen syadi yaḇebati kuker snonggaku ḇena ḇaḇerandun sne * ma ḇeararer si ḇa. Bati ayesi kam sradiri. Inja, yawos ḇeri roi yakara ma samswen ayena yoḇ si.”

Raris rosai Sara ikofen na, kofawi kofasnai myaren asuser kada, nari snonggaku sya simarisen sḇebati kuker ko ma Yahwe na dakmarisen. Refo danun fa kofasnai myaren asuser. (Kol. 3:12) Myaren asuser ido rosairiri? Moḇsa Yesus dakfasnai myaren asuser rai? Ma moḇsa rari ine ifnoḇek ko fa kosmai marasrisen syadi?

Rari ine ryamuma ro snonggaku ḇena sne ḇemarisen. Snonggaku ḇeradine nari ifrur pyum snonggaku ḇese, ma rofyor roi ḇemnis ḇa nkur i nari kyorwanan ḇa.

Ro Refo, wos Yunani sfarwei ḇe ”myaren asuser” nfasnai kako ḇe aiwan kuda ḇerarmomen, mboi sfarkor i fa fyafir kwar. Fyafir kwar ido, na koḇe syambraḇ ḇa ke? Roḇa, fyafir mboi syambraḇ kaker ḇae. Imnis radiri, snonggaku ḇemyaren asuser ima snonggaku ḇesambraḇ. Kukro? Syambraḇ fa fyarmku rari ḇepyum ḇa ḇyena ma syewar kaku fa kyain pyum kuker snonggaku ḇesesya.

Imbude kokofen, ’Ayama yakmyaren asuser ḇa.’ Ono wer ido, na samswen fa kofasnai rari ine kukro snonggaku ro baboine simasasor ma sisawsaw ker. (Rm. 7:19) Rarirya, kosewar sambraḇ kaku mande insape bisa kona myaren asuser. Mboi, Yahwe ḇyuk rur ḇesren fa ifnoḇek ko insama kona rari ine. (Gal. 5:22, 23) Kosewar kaku fa kona myaren asuser kukro?

Komyaren asuser snonggaku sya ido, na simarisen sḇebati kuker ko. Raris rosai Sara ikofen ya, koḇebati kuker snonggaku ḇemyaren asuser ido, nari kokain pyum kaku. Fawar ḇepyum fa koso na iso Yesus i. (2 Kor. 10:1) Kokarapan, romawa kasun sima simewer sfanam kuker snonggaku sifawi ḇaime, kurḇei sifawi pyum Yesus i ḇaim ḇesyaḇo simarisen sfanam yoḇ i.​—Mrk. 10:13-16.

Komyaren asuser ido, nari kokam kosmai payamyum. Kukro? Nari kofafayaf oroḇaido komsor  fasawsaw ḇa. (Ams. 16:32) Rarirya, nari kofrur fa snonggaku ḇesesya ma karyer koḇesya sisnesna naduf ḇa, mura nari koḇuk sasar faro manggunko ḇa.

Yesus nya fararur nabor kaku ma nmarḇak, mboi imyaren asuser. Fafisu anya, snonggaku ḇebor sananjar ma sekandera. Inja, sfandun roi ḇefrur si fa sismai sneprei. Rarirya, fafisu Yesus dawos yoḇ si nanya, na sisnesna naprei kaku. Yesus doḇe, ’Mgoramuma faro aya, snar aya yamyaren asuser ma sneri ikaki ḇa.’​—Mat. 11:28, 29.

Moḇsa na kakmyaren asuser raris Yesus i? Kofarkor ro Refo fa kofawi moḇsariso Yesus ifrur pyum snonggaku ḇesesya ma moḇsa ḇyerai rofyor ismai samswen. Rarirya, fafisu samswen fa kofasnai myaren asuser, kosewar kaku fa kofrur raris moḇ Yesus ifrur raya. (1 Ptr. 2:21) Rwama kawos roi rikyor ḇefrur fa Yesus fyasnai myaren asuser.

Yesus nya sne ḇekaki ḇa. Yesus doḇe ima ’imyaren asuser ma sneri ikaki ḇa’. (Mat. 11:29) Refo dapḇair rari suine kayamyam kukro mayaryaren imnis fanam kuker sne ḇekaki ḇa. (Ef. 4:1-3) Rosai kofawi ro rari suine?

Kona sne ḇekaki ḇa ido, nari komam snonggaku ḇese sfandun syadi ro ko ḇaido komsor fasawsaw ḇa. Fafisu sia soḇe Yesus ima snonggaku ḇeyandafdafer ma ḇefarandinem anggur, moḇsa ḇyerai? Yesus dawos myaren yoḇ si ḇo doḇe rosai snonggaku oso kyara na nasnai ro fararur ḇyena.​—Mat. 11:19.

Fafisu wamsor kukro sia sawos Au, keret Bena, ḇaido moḇ rwama ro ya, kwara myaren asuser na. Penatua oso ḇeraker sup Afrika ḇar Wamires, doḇe, ”Rofyor oso dawos roi ono fa yafafayaf ido, na yakain yakara ker, ’Rosai nari Yesus ifruri?’” Ikofen wer, ”Yafarkor fa yamam ayama yasyadi ro ḇesesya ḇa.”

Yesus fyawi snonggaku koinema konapes ḇa. Yesus manfamyan ḇyesi sisewar fa sifrur roi ḇekaku. Mboi sinapes ḇa rya, fafisu ono sifrur sasar. Imnis ra, ro roḇ fafisu smun Yesus i ḇaim, dor fa Petrus, Yakobus, ma Yohanes senef awer ḇo skain siwaren, kurḇei senef. Mboi, Yesus fyawi roi ḇefnai fa senef ya. Doḇe, ”Rur ya kada imyaren user, ḇape kraf ya ma ipok ḇa.” (Mat. 26:40, 41) Yesus ifawi pyum manfamyan ḇyesi, inja fyafayaf faro si ḇa.

Imbesrar oso ḇenir ḇe Mandy, randak ya dawos nabor ker snonggaku ḇesesi. Mboi, baboine syewar kaku fa dakfasnai myaren asuser raris Yesus i. Doḇe, ”Yasewar ker fa yaswarepen koine kam konapes ḇa. Yasewar kako fa yamam monda snonggaku ḇesesya rari-rari ḇepyum sena raris Yahwe I.” Imboḇae, kokara pyum snonggaku sya raris Yesus moḇ dakfrur raya kada, na komyaren asuser si.

Yesus ikyar kaku monda faro Allah. Fafisu Yesus ikenem ro supswan ine, snonggaku sya sifrur pyum i ḇa ker. Sibor skara sasar i, sayin i, ma sewayam i. Mboi, fyasnai myaren asuser kukro ḇyuk kam na faro Mankara ḇenapes, isoine Yahwe I. (1 Ptr. 2:23) Yesus ifawi Kmari ro nanggi nari isaramper i fa imku ma nari myun snonggaku ḇefrur pyum i ḇa.

Fafisu sia sifrur pyum ko ḇa, kofrur awer roi ḇefnai fa payamyum ya fyadwer ḇe roi ḇepyum ḇa. Imbude komsor, mboi konapes ḇa ndari, na kofrur roi ḇesasar. Naiso eḇedari Refo doḇe, ”Masasor [snonggaku] nafrur roi ḇenapes ono ro Allah ḇarpon ḇyedi ḇa.”​—Yak. 1:20.

Imbesrar oso ḇeraker sup Jerman ḇenir ḇe Cathy, doḇe, ”Fyor iwara yakara fa yaḇriwarek manggundaya kukro na oso iḇriwarek aya ḇa.” Ḇarpur mura, syewar fa ikyar faro Yahwe I, muniwara fyadwer kenem ḇyena. Doḇe, ”Fafisu ine, yaḇriwarek ker aya ḇa. Yamyaren asuser kukro yafawi nari Yahwe ipyos kenem ḇeḇye ḇa ro dunya ine kam.” Sifrur pyum Au ḇa ido, fandun fa wakyar faro Yahwe I raris moḇ Yesus ifrur raya. Rarirya, nari nwa myaren asuser.

Swaf oso Yesus ikofen radine, ”Marisen faro snonggaku ḇemyaren asuser.” (Mat. 5:5, NW) Inja, imbe kosmai marisen ido, fandun fa kofasnai myaren asuser kada. Rwama kawos payamyum rosai monda na kosmai ro rari ine.

 Myaren asuser nbuk payamyum faro imbeswa ḇena kakara ḇesisye. Mambesrar oso ḇeraker sup Australia ḇenir ḇe Robert, doḇe, ”Rofyor yamsor, na yakara ḇa boi yawos wos ḇefrur fa swa yedi kyanes. Mboi, yawos na fa nawarai kwar, inja na yapok yayer kaḇer na ḇa. Yafafko kaku kukro yafrur i fa sneri iduf kwar.”

Kokam na koisya kawos sasar, ma wos ḇesam koḇena nafnai fa wis koḇena kuker koswasi naḇye ḇa. (Yak. 3:2) Inja kona wos oser ḇa ido, myaren asuser nari nafnoḇek ko fa koknon ma kawos syadadi ḇa.​—Ams. 17:27.

Mambesrar Robert ismai bon ḇepyum kukro syewar kaku fa iknon monda ma fyarmku i. Doḇe, ”Fafisu ine, nuna wos oser ḇa ido, na yakain yarower pyum i resari, yawos myaren, ma yafafayaf fasawsaw ḇa. Yamam mboi wis nuḇena napyum syadi wer.”

Komyaren asuser ido, wis koḇena kuker snonggaku ḇese napyum. Snonggaku ḇemsor fasawsaw bati sesi sibor ḇa. Mboi, komyaren asuser ido, na koḇeoser ma kokain pyum kuker snonggaku ḇese. (Ef. 4:2, 3) Imbesrar Cathy ḇeyap ḇepon ani, doḇe, ”Yafasnai myaren asuser ndari, yaḇebati kuker manseisirya kam, ma ḇena rari ḇepyum manggun ḇa kako.”

Komyaren asuser ido, na koḇeaski. Refo ya doḇe ”fawawinanem ḇerama ro boiyaswa” nafrur fa komyaren asuser ma koḇeaski. (Yak. 3:13, 17) Komyaren asuser ido, na kosnesna naknon. (Ams. 14:30) Mambesrar oso ḇenir ḇe Martin, syewar marmar kaku fa dakmyaren asuser. Doḇe, ”Fafisu ine yor fa siso marisen ayena monda ḇa ma yadafdif wer ḇa. Yaḇeaski ma yamarisen syadi.”

Fafisu ono rya samswen kaku fa kofasnai myaren asuser. Mambesrar oso doḇe, ”Yanggar ḇa boi, isof rasine, yamsor ido rya imbe yar naba kaku.” Mboi waswarepen, Yahwe iso ḇeyor ko fa kofasnai myaren asuser. Inja, kokyar na ifnoḇek ko fa kofasnai rari ine. (Yes. 41:10; 1 Tim. 6:11) Na ifnoḇek ko fa kombran ro nyan kakyar koḇena isof papupes, ma na ifrur ko fa kosambraḇ. (1 Ptr. 5:10) Ro fafisu ḇesrow ya, raris Manwawan Paulus i, nari kakmyaren asuser ma kona syowi raris Kristus i.​—2 Kor. 10:1.