1-2. Rosai nari kawos ro farkarkor ine ya?

BABOINE komam roi nabor kaku naisya nfasnai kaku koisya kokenem ro papupes rasras ḇepupes ro dunya ḇeḇarḇor ine kwar. Kero wer, Yahwe ma Yesus Kristus nari sumunpres pamarenta nakam ḇembroḇ Karajan Allah. Mboi roi ine ryarirya ḇaim, raja ḇar wambrur ma raja ḇar wamires nari sufamfaḇri ker ma suwayam Allah kawasa Ḇyesi resari.

² Ro farkarkor ine, nari kawos ḇardadi ḇero Daniel 11:40–12:1. Na kofawi manseiso raja ḇar wambrur ro baboine ma rosai ḇefnai fa kopok komgak awer faro rosai nari ḇejadi ma kokyar Yahwe na kyadaunwarek ko.

3-4. Manseiso raja ḇar wambrur ro baboine? Fasnaiḇair na.

³ Fafisu Uni Soviet isapi ro taun 1991, ro swaf ono Allah kawasa Ḇyesi ḇeḇarek ro moḇ ḇero baḇ papoik ḇyedi sismai ḇaḇemkei. Daniel dapḇair na ḇe ”fafnoḇek kermgun”. (Dan. 11:34) Nafnai fa simkei fa sḇaryas, ma fyoro ḇa mura manḇaryas ḇero sup randak Uni Soviet sḇepoik ro na, barbor sedi dek syadi wer. Ḇarpur ya, Rusia ma ḇesowarpu i sya sḇe raja ḇar wambrur. Imnis kawos kwar, pamarenta oso na dakḇe raja ḇar wambrur ḇaido raja ḇar wamires kukro ifrur roi rikyor nane: (1) ḇyepoik ro moḇ Allah kawasa Ḇyesi sḇarek ro na ḇaido ḇyewayam si, (2) roi ifrur ḇe Allah kawasa Ḇyesi nfasnai dayin kaku Yahwe I, ma (3) fyamfaḇri kuker raja ḇese.

 ⁴ Rosai ḇefnai fa kokofen raja ḇar wambrur ro baboine iso Rusia ma ḇesowarpu i sya? (1) Sḇepoik ro moḇ Allah kawasa Ḇyesi sḇarek ro na ḇaido sewayam si. Sidwarek fararur ḇaḇeḇaryas ma sewayam naek srar sibor kaku. (2) Roi sifrur anna nfasnai sayin kaku Yahwe I ma kawasa Ḇyesi. (3) Sfamfaḇri kuker raja ḇar wamires, isoine Inggris-Amerika. Rwama komam moḇsa Rusia ma ḇesowarpu i sya sḇepoik ḇe raja ḇar wambrur.

5. Rosai Daniel 11:40-43 ikofen ya?

⁵ Wasya Daniel 11:40-43. Ḇardadi ine ikofenḇair ḇepon rosai nari ḇekur ro awar ḇepupes. Fyasnaiḇair moḇsa raja ḇar wambrur ma raja ḇar wamires sufamfaḇri rai. Raris Daniel ḇyardi na, ro awar ḇepupes, raja ḇar wamires ma raja ḇar wambrur nari ”sufamfaḇri” ḇaido sumamun kuker knapur suḇena.​—Dan. 11:40; fasfas kasun.

6. Moḇsa raja ansuya sufamfaḇri ker rai?

⁶ Raja ḇar wambrur ma raja ḇar wamires sufamfaḇri ker kukro oso syewar fa ḇyepoik syadi ro sumin ya. Komampan rosai ḇeḇejadi rofyor Mamun Dunya II imnai kwar, Uni Soviet ma ḇesowarpu i sya sḇepoik ro moḇ ḇebor ḇero sup Eropa. Ine nadif raja ḇar wamires i fa ḇyeoser kuker er ḇese insama sna militer ḇesambraḇ syadi ma sifrur organisasi oso sor ḇe NATO. Raja ḇar wambrur ma raja ḇar wamires susasyar pipi nabor fa susambraḇser militer suḇena. Sumamun kako kuker susaramper raryur ḇembroḇyae ro Afrika, Asia, ma Amerika Selatan. Taun ḇarpur ine, Rusia ma ḇesowarpu i sya papoik sena neryewen isof supswan ine ḇesiper. Oso wer ido, raja ḇar wambrur ma raja ḇar wamires sumbroḇ su roro program komputer. Oso kyursof sumin ya ḇyuk kwar program komputer fa kyaraw pipi ma ifrur napnap polotik na. Raris Daniel ḇardadi ḇyena, raja ḇar wambrur iwayam ker Allah kawasa Ḇyesi.​—Dan. 11:41.

7. ”Sup Ḇepduk” kyurfasnai ḇe rosai?

⁷ Daniel 11:41 doḇe raja ḇar wambrur nari syun ro ”Sup Ḇepduk”. Ine kyur ḇe? Ro fyor iwara, smam sup Israel ḇe ”sup ḇepduk kaku”. (Yeh. 20:6) Imbape, roi ḇefrur kaku fa sup ani ipduk iso kukro ro dia samsyom ḇekaku ya isya. Ro swaf ras Pentakosta taun 33 M, ”sup” anya kyur kaku ḇe sup oso wer ḇa kukro Yahwe kawasa Ḇyesi sro supswan ḇesiper. Inja ro baboine, ”Sup Ḇepduk” ine kyur ḇe roi Allah kawasa Ḇyesi sifrur nakam, imnis raris siso fananjur ma ḇaḇeḇaryas ya.

8. Rosai ḇefasnai raja ḇar wambrur syun ro ”Sup Ḇepduk”?

⁸ Ro rasras ḇepupes, raja ḇar wambrur syun ker ro ”Sup Ḇepduk”. Imnis raris, ro fafisu mamun dunya ḇesuru fyor Nazi Jerman ḇye raja ḇar wambrur, syun ro ”Sup Ḇepduk” kuker iwayam ma myun Allah kawasa Ḇyesi. Mamun Dunya II posa, fyor Uni Soviet ḇye raja ḇar wambrur, syun ḇe ”Sup Ḇepduk” kuker iwayam Allah kawasa Ḇyesi, ma isawen si ḇe moḇ ḇebinggwan.

9. Taun ḇarpur ine, moḇsa Rusia ma ḇesowarpu i sya sisun ro ”Sup Ḇepduk” rai?

⁹ Taun ḇarpur ine, Rusia ma ḇesowarpu i sya sisun ro ”Sup Ḇepduk”. Rariso?  Ro taun 2017, raja ḇar wambrur ine idwarek fararur ro Allah kawasa Ḇyesi ma sisun naek srar koḇesi ḇe bui. Sidwarek syap-syap koḇena, Refo Terjemahan Dunia Baru kako. Ḇeḇye ḇa syadi wer, sun kantor cabang koḇedi, Balai Karajan ma Balai Kebaktian ro Rusia. Sifrur roi nane raposa, ro taun 2018, Raryur Naek Ḇefarkin sfasnaiḇair Rusia ma ḇesowarpu i sya sḇe raja ḇar wambrur. Sewayam kaku Yahwe kawasa Ḇyesi, mboi Yahwe kawasa Ḇyesine simewer sisowarpu fa spampum pamarenta ḇaido imbe sifadwer na. Siso wos anun ro Refo fa senadiwarek ’raja ma manḇepoik syakam’, fafisu snonggaku ansine sna wos oser fa sifrur roi na ḇekyaren samsyom koḇena.​—1 Tim. 2:1, 2.

10. Raja ḇar wambrur nari kyakok raja ḇar wamires ke? Fasnaiḇair na.

¹⁰ Ḇardadi ro Daniel 11:40-45 fyasnai kaku raja ḇar wambrur fararur ḇyena. Inja, ine kyurfasnai raja ḇar wambrur nari kyakok raja ḇar wamires ke? Oroḇa. Fafisu Yahwe ma Yesus sumunpres pamarenta snonggaku syakam ro Armagedon, raja ḇar wamires isya pdef. (Why. 19:20) Kofawi na ro? Komam ḇardadi ro syap Daniel ma Wahyu kada.

11. Rosai knam ro Daniel 2:43-45? (Mam sonin ḇero ḇarpon.)

¹¹ Wasya Daniel 2:43-45. Nabi Daniel dapḇair amfyanir ḇeba oso baken ḇyeja ḇyeḇefrur ro manggarmom, kansai, sarak, ma saprop ḇerik. Oser-oser kyur ḇe pamarenta ḇepoik kwar ro moḇ Allah kawasa Ḇyesi sḇarek ro na. Pamarenta ansine sḇepoik ro swaf ḇesisye. Wapirew ḇe wempin ro manggarmom ma saprop ḇerik ḇyeḇair ḇe pamarenta ḇepupes. Ine kyur ḇe Kuasa Dunya Inggris-Amerika. Ḇardadi ine fyasnai ḇe ko Kuasa Dunya Inggris-Amerika ḇyepoik kaker rofyor Karajan Allah myunpres pamarenta snonggaku syakam.

12. Bukor ḇefik ro aiwan ḇeyan ḇepek kyur ḇe mansei, ma rosai ḇefnai fandun fa kofawi na?

¹² Manwawan Yohanes kako fyasnaiḇair kuasa dunya ḇepoik Yahwe kawasa Ḇyesi. Ro Yohanes ḇardadi ḇyena, ḇyair pamarenta nane imnis aiwan ḇeyan ḇepek ḇena bukor rifik. Bukor ḇefik kyur ḇe Kuasa Dunya Inggris-Amerika. Fandun fa kofawi roi ine kukro ine iso bukor ḇepupes ro aiwan ani. Bukor ḇefik ine ḇyepoik kaker rofyor Kristus ma sordade ḇero nanggi sya skakokpres i ma ḇar ḇese ro aiwan ḇeyan ḇepek ani. *—Why. 13:1, 2; 17:13, 14.

13-14. Manseiso ”Gog ro sup Magog”, ma rosai ḇefnai fa imbe myun Allah kawasa Ḇyesi?

¹³ Ḇardadi ro syap Yehezkiel fyasnaiḇair rosai na ḇejadi fyor raja ḇar wambrur ma raja ḇar wamires suḇekakok ḇaim. Komampan ḇardadi ro Yehezkiel 38:10-23; Daniel 2:43-45; 11:44–12:1; ma Fasasna 16:13-16, 21. Ḇardadi nane nakofenḇair sarisa ḇejadi ro swaf ḇemnis kam. Inja, kokyar roi ḇeuser nane na ndarirya kaku.

¹⁴ Kandera ḇeba ḇyerak fyoro ḇa mura, ’raja syakam ro supswan ḇesiper’ ine nari sfanjur fa sḇeoser. (Why. 16:13, 14;  19:19) Er-er ḇeoser ansine Refo dap si ḇe ”Gog ro sup Magog”. (Yeh. 38:2) Nari sisewar fa smun kaku Allah kawasa Ḇyesi. Kukro? Ro Yohanes ḇardadi ḇyena ḇekur ḇe fafisu anya, doḇe myam mekem karui ḇemarḇak kaku nasapi ro nanggi fa nmun Allah mbroḇ Ḇyesi. Rya mekem karui nane nḇeḇair ḇe anun ḇekur Allah ras mankara Ḇyedi, iso kawasa Ḇyesi sḇaryas na. Anun ḇepakrek ine iso ḇefnai fa Gog ro sup Magog imbe myunpres Allah kawasa Ḇyesi.​—Why. 16:21.

15-16. (a) Sarisa rosai ḇefas ro Daniel 11:44, 45 ya? (b) Rosai nari ḇekur raja ḇar wambrur fnoḇek Gog ro sup Magog?

¹⁵ Anun ḇepakrek ma mamun ḇepupes ro Allah mbroḇ Ḇyesi rya imnis kuker sarisa ḇefas ro Daniel 11:44, 45. (Wasya.) Daniel doḇe ”kafkofen ḇeramuma ro ḇar wamurem ma ḇar wambrur” nakyaren raja ḇar wambrur, inja isasyar ḇo ”imsor kaku”. Raja ḇar wambrur kyara kaku ”fa myun snonggaku ḇebor”. Rya wos ”snonggaku ḇebor” kyur ḇe Allah kawasa Ḇyesi. * Daniel imbude isya fyasnaiḇair mamun ḇepupes ḇekur Allah kawasa Ḇyesi.

¹⁶ Rofyor raja ḇar wambrur ma pamarenta ḇese siḇe smunpres Allah kawasa Ḇyesi, nane nafnai fa Allah Ḇepoik Syadi imsor ma ras mamun Armagedon ryama. (Why. 16:14, 16) Fafisu anya, raja ḇar wambrur fnoḇek Gog ro sup Magog isoine raryur ro er-er sya, nari Allah myun si ma ’oso ḇaḇeri nari ḇefnoḇek si’.​—Dan. 11:45.

17. Manseiso Mikhael ”manfarkin ḇeba” ḇeyap ro Daniel 12:1 ani, ma rosai na ifrur ya?

¹⁷ Wasya Daniel 12:1. Mnuk ine ikofen mnis rariso raja ḇar wambrur ma ḇesowarpu i sya nari seḇemun, ma moḇsa kosmai fasaspar ya rai. Raja koḇedi, Yesus Kristus, isya ḇyepoik, ma nya snonsnon oso ḇese iso Mikhael. Taun 1914 fyor ḇyepoik ro Karajan Allah ro nanggi, iḇriwarek Allah  kawasa Ḇyesi kwar. Kero wer, nari ifrur roi oso, ḇaido myun mbroḇ ḇyesi ro ras Armagedon ya. Raris Daniel ḇardadi ḇyena, mamun ani iso papupes ro ”fafisu ḇesamswen” ro sarisa marandan snonggaku sya. Ro syap Fasasna, Yohanes ḇyardi kwar ḇekur fafisu fanam ḇe ras Armagedon ya ḇe ”kandera ḇeba”.​—Why. 6:2; 7:14.

18. Rosai ḇefnai fa na komgak ḇa fyor kandera ḇeba ryama?

¹⁸ Nabi Daniel ma Manwawan Yohanes sukofenḇair ḇe ko kwar Yahwe ma Yesus nari suḇe Allah manfamyan Ḇyesi fa sfasparbur kandera ḇeba ya. Inja, rosai monda ḇekur ko nari kopok komgak ḇa. Daniel ikofen ḇo doḇe snonggaku snonsnon sena ’sfas ro syap anya’ nari sismai fasaspar. (Dan. 12:1) Rosai na kofrur kaku insama snonsnon koḇena neḇefas ro syap anya? Kokyar kaku faro Yesus i, isoine Allah Domba mgun Ḇyedi. (Yoh. 1:29) Fandun fa koḇuk kenem koḇena fa kofarmyan ḇe Allah ma koḇebaptis. (1 Ptr. 3:21) Fandun kako fa kosaramper Karajan Allah kuker kofnoḇek snonggaku ḇese fa sakmambir Yahwe I.

19. Rosai fandun fa kofrur ro fafisu ine, ma rosai ḇefnai ya?

¹⁹ Fafisu ine iso swaf fa kosambraḇser kakyar koḇena faro Yahwe I ma organisasi Ḇyedi. Ine iso fafisu fa kosaramper Allah Karajan Ḇyedi. Kofrur na ido, nari koḇye rofyor Karajan Allah myunpres raja ḇar wambrur ma raja ḇar wamires.