Roi ḇefrur makakak ani nfadwer kenem yena snar inema roi randak imbe yaksewar Allah I. Ḇape rofyor yafawar roi ḇejadi ani ḇaime, imbe yafawar ḇepon fafisu yabaḇa ya ma rosai ḇefrur fa imbe yasewar Allah I.

Yaḇeaḇen ro taun 1937 ro Guesnain, kota pertambangan oso ro utara Prancis. Kamami fararur ḇyena iso daksewar batu bara, fyarkor aya roi ḇefandun ro kofararur marḇak ya. Fyarkor aya kako fa yayin faro ḇaḇenapnapes ḇa ya. Myam ḇefararur ro ḇesewar batu bara sine sifrur pyum si ḇa ma sfararur marmar kaku. Ma imbe ifnoḇek si. Inja, kamam dakso ro organisasi fa sawoswarek ḇefararur sine hak sena. Faro pendeta ḇero diansya kako kamami dakmarisen si ḇa snar sanggarkar. Myam ido pendeta sya sikenem pyum ma mararen, ma ḇefararur ro sasewar batu bara sya sesusa pipi ma roḇean ḇoi pendeta sya sor roḇean ma pipi kaker ro si. Kamam dayin kaku rari sena, inja dakfarkor aya faro agama ine ḇa. Ma nggakfawar Allah I ro ras-ras ḇa.

 Fafisu yaba muryase, yakmarisen ḇaḇeri fyor yamam snonggaku sya sifrur pyum si ḇa. Yamam snonggaku ḇebor sya sayin snonggaku mandaman ḇeḇarek ro Prancis sya. Ḇape ayama yafnak bola kaki kuker romawa mandaman sya ma yamarisen yafnakus si. Ramnai, awin yedima bin Polandia dirya, bin Prancis risya ḇa. Imbarya yamarisen snonggaku ḇeraker er syakam skain kayamyam, seoser ma sifrur pyumyae si.

Ro taun 1957 ya, pamarenta sor aya fa yaksun ro dinas militer. Inja imnis yafawar ḇepon ani yaro bon Aljazair ro roḇ ḇepanpan ani. Fyor yakofen, ”Sye Mansereno, wafnoḇek aya!” Mura ro ḇarpon yeja, yoḇoda sordade sirya, yamam murama keledai sup rirya! Sneri syasen wer ḇa! Ḇape snar roi ḇeḇesya ani ma mamamun ya inja nafrur fa yakara mura kaku ro kenem ayena ine. Rosai ḇefnai fa snonggaku koine kokenem ro supswan ine? Allah na fyandun ko ke? Nari kosmai aski kaku ke?

Ḇarpur ya, fyor yabur ḇe rum sinan ayesuya, yasrow kuker Saksi Yahwe oso. Byuk Refo oso ḇe aya, ma yawasya na fyor yakaḇer ḇe Aljazair wer. Roi oso ḇefrur yakandor iso wos ḇero Wahyu 21:3, 4. Ḇekofen, ”Allah rum kruḇen ḇyedi isya rofandu snonkakusya! . . . Nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako.” Wos nane nafrur yakandor kukro insape yakfawi na. Yakofen ḇo yoḇe ’Wos nane nari nkaku rarirya ke?’ Ro fafisu ani, ayama yakfawi ḇaḇeri Allah I ma Refo ya ḇa kako.

Fafisu yamnai ro dinas militer kwar ro taun 1959 ya, yasrow kuker Saksi Yahwe oso ḇenir François, iso ḇefarkor nabor aya kakaku ḇero Refo ya. Imnis ra, fyasnai snar Allah dakna snonsnon, isoine Yahwe. (Mz. 83:18) François ikofen ḇe aya kako Yahwe nari byuk ḇaḇenanapes ro supswan ine, ifrur supswan ine ḇe firdaus, ma wos ḇero Wahyu 21:3, 4 nari ifrur na ndarirya kaku.

Rosai fyarkor ḇe aya naine nsun ro karkara ma sneri. Ḇape roi ani kako nafrur yamsor kaku pendeta sya. Imbe yakofenḇair ḇe snonggaku sya kam snar roi pendeta sfarkor na namnis kuker Refo ya ḇa. Ro fafisu ya moḇ yakara na namnis kaker kamami ma ayama yakḇekaḇaḇaḇ ḇa. Inja imbe yafrur roi oso ḇeri!

François ma bati ḇebabo ayesya isoine Saksi Yahwe sya sifnoḇek aya fa yaḇekaḇaḇaḇ. Sikofen snonggaku Kristen koine na koḇemankara snonggaku ḇesesya ḇa ḇoi fararur koḇena iso kobaryas faro si abar ḇepyum ro Karajan Allah. Randak iwara Yesus ifrur na kwar ma iwan manfamyan ḇyesi fa sakfrur na. (Mat. 24:14; Luk. 4:43) Roi snonggaku skara na namnis kuker roi yakara na ḇa raryano fandun fa yawos pyum ma mayaryaren faro si. Refo doḇe, ”Manseren manfamyan ḇyesi nari srakrakrok ḇa, mboi sfafir faro snonkakusya kam.”​—2 Tim. 2:24.

Yafrur fararwe nabor ro kenem yena ma yakḇebaptis ḇe Saksi Yahwe ro taun 1959, ro  kebaktian wilayah oso. Rodiwa yasrow kuker imbesrar ḇebabo oso snori Angèle, yamarisen imbesrar ani. Mura yakfanjur ro sidang moḇ fyanjur roya, ḇarpurya nufarḇuk ro taun 1960. Ima bin ḇesyowi kaku rirya, swa ḇepyum rirya. Ima hadiah ḇemaeja kaku ḇerama ro Yahwe I.​—Ams. 19:14.

Ro taun ḇe taun, yafarkor nabor roi ḇefandun na ro naek ḇefawinanem ma ḇena pengalaman sya. Farkarkor ḇefandun kaku oso yasmai na isoine: Insama kosmai fainda ro fararur ḇaido tugas ḇesamswen koḇena iso, fandun fa kona sneḇerun ma koso anun ḇero Amsal 15:22 ḇekofen, ”Fararur nambran ḇa rofyor kokarapyum na ḇa, ḇape fararur nambran pyum rofyor ḇekarana sibore.”

Ro taun 1964, yamam kaku snar wos ḇero mnuk ani kyaku ḇeri. Ro taun ani, yuffarmyan ḇe pengawas wilayah, yaraḇe sidang-sidang na fa yasambraḇser naek srar insama sfanam syadi faro Yahwe I. Ḇape, ro fafisu ya yaḇe umur taun ri 27 kaker ma yana pengalaman nabor kuf ḇa. Inja yafrur sasar nabor. Ḇape, yafarkor ro sasar yafrur ani. Ḇefandun syadi ya, yana farkarkor nabor ro naek ”ḇebuk anun” ḇekir ma ḇena pengalaman sya.

Yaswarepen fafisu yaḇe pengawas wilayah ḇebabo ya. Rofyor yara yamamfar sidang oso ro Paris ramnai, naek oso ḇemas ro rur ya ifuken aya ḇo doḇe bisa demir dawos kuker aya ke. Imbarya yoḇe, ”Imbo bisa”.

Ifuken aya, ”Louis, dokter oso ryaḇe snonggaku oso rum ḇyedi fa byuk aryawin ido, mansei imbe syewari?”

Yakarem ḇo yoḇe, ”Ḇeduf ya ḇae”.

Doḇe, ”Kakuḇeri. Ḇape yamam ido mamfar monda naek srar ḇena rur ḇepyum sya monda, imnis pengawas ro sidang sya. Sidang nggobena ine naek srar ḇebor sisya sesanekar, sia insape saksun ro sidang, ḇaido sia wer sawos mangganggun ḇa. Nari sismai samambraḇ fyor rwama ḇebati kuker si, syadiwer bisa ido rwaḇe rum sena fa mgonan kayame.”

Naek ani anun ḇyena nasrow kaku. Wos ḇyena nsun ro sne kaku snar iswar Yahwe domba Ḇyesi. Inja samswen fa yakofen snar yafrur sasar kwar raryano ḇape yafrur  rosai ikofen ya. Yakofen kasumasa faro Yahwe snar naek ono ḇefrur rarirya.

Ro taun 1969 ma 1973, skinfir aya fa yakḇe pengawas faro Departemen Layanan Makanan ro munara kebaktian internasional risuru ḇero Colombes, Paris. Ro kebaktian taun 1973, indokada snonggaku se 60.000 na nggobuk anan faro si ro ras ririm! Yakara ḇoi na yapok yafrur na ḇa. Ḇape fararur ine imbran pyum ido, nyan ḇyena nasya ro Amsal 15:22 isoine yasewar ḇebuk anun sya sibore. Inja, yor fafnoḇek ro naek ḇena pengalaman sya. Yafuken tukang daging, petani sayur, tukang masak, ma ḇefawinanem ro kaḇkoḇes sya. Snar fararur kayam ine, nggombran fararur ḇemarḇak ine ra imnai.

Ro taun 1973, aya kuker swa yedi sor nufa nufarmyan ro Betel Prancis. Fararur sbuk randak kako nsamswen kaku. Yasewar nyan insamaido naek srar ḇero Kamerun ro Afrika sya bisa sismai publikasi snar fararur koḇedine sidwarek na rodiwa ro taun 1970 ma 1993. Yakara wer, roi ine myarḇak kaku. Snar smam aya ḇoi yaḇesusa rya, Naek ḇemamwarek fararur ro Prancis sisambraḇser aya, soḇe, ”Naek srar koḇansya ro Kamerun sfandun kaku anan rur ya. Mgorama kobuk anan faro si!” Inja, iso roi nggofrur na.

Rarwan riḇeso kwar yara yamamfar naek srar ro negara-negara perbatasan Kamerun sya. Sbuk nyan ḇe aya insa yafasos anan rur ine fa nsun ro Kamerun ḇesya kwar. Yahwe ḇyebarakas sasewar inggobena. Bon ḇyena iso, swaf taun ri 20 ine, Saksi-Saksi Yahwe ro Kamerun sismai ker syap Baryas ma syapram Pelayanan Kerajaan Kita, syapram koḇepake ro fananjur minggu fadu ya.

Ro randak nuḇepacaran kaker, yamam kwar snar Angèle fyanam kaku kuker Yahwe I. Fafisu nufarḇuk ya, rari ḇepyum  ḇyena ine nasnai kaku. Ine yamam naro randak munara fakawin ro roḇ ya, dor aya fa yaḇenadi ḇe Yahwe fa yakofenḇair marisen nuḇena fa nufarmyan Yahwe ḇe imbeswa kuker sne ḇesiper. Yahwe kyarem nadi nuḇena.

Angèle kako ifnoḇek aya fa yakyar nako faro Yahwe I. Imnis ra, ro taun 1973 fafisu sor nufa nufarmyan ro Betel, yaḇebirbar kukro ayama yamarisen yafarmyan ḇe pengawas wilayah monda. Ḇape Angèle danun ḇe aya ḇo doḇe nubuk kenem nuḇena ḇe Yahwe I kwar. Imbarya, fandun fa nufasos nuḇeri fa nufrur rosai rirya kam faro fararur Yahwe organisasi Ḇyedine? (Ibr. 13:17) Yapampum roi dawos ine ḇa! Inja, nuraḇe Betel. Snar swa yedine ifawinanem, swaruser ḇyena napyum, ma iswar Yahwe I inja nafnoḇek nufa nuyun snemuk ḇepyum ro farḇakḇuk nuḇena.

Ro kirine nuḇe mansar binsar kwar, ḇape Angèle ḇye swa ḇepyum kaku ma ifnoḇek aya ḇesya kwar. Imnis ra, insama nuyakso farkarkor teokratis sifrur ro wos Inggris na, nuḇesewar fa nufarkor wos Inggris. Inja ro fafisu ani nuḇe umur taun ri 70 kwar raryano nuso ro sidang wos Inggris. Ḇape, snar yuffarmyan kako ḇe anggota Panitia Cabang Prancis, inja yana swaf nabor fa yafarkor wos ḇesena ḇa. Ḇape nufnoḇek yae nu. Kirine nuḇe umur taun ri 80 kwar nufasos kaker faro fananjur ro wos Inggris ma Prancis. Nuḇesewar kako fa nubuk kankarem ro fananjur ma nubaryas kuker naek srar ro sidang nuḇedi. Yahwe ḇyebarakas kaku sasewar nuḇedi fa nufarkor wos Inggris.

Ro taun 2017 ya, aya kuker Angèle nuna barakas wer. Sor nufa nuyakso ro Sekolah bagi Anggota Panitia Cabang dan Istri, sifrur farkarkor ine ro Pusat Pendidikan Menara Pengawal ro Patterson, New York.

Yahwe ima Guru Ḇeba kaku rirya. (Yes. 30:20) Inja na kokandor ḇa snar kawasa Ḇyesi, sesinan ke sbabo kaker ke na sismai fawawi ḇepyum kaku! (Ul. 4:5-8) Imbo, yamam ro manggundaya kwar snar romawa babo ḇemnaf Yahwe ma ḇemnaf naek srar ḇepengalaman sya nari sisur ro rur ya ma sismai payamyum fafisu siba muryase. Amsal 9:9 byuk swarapepen ḇenu, ”Warwas na faro snonggaku ḇefawinanem ma nari ifawinanem syadi. Farkor snonggaku ḇekaku ma fawawi ḇyena nari nakaki.”

Fyorno ido, yaswaruser kaḇer ro roḇ oso ḇefrur makak ro bon Aljazair taun ri 60 aniwara. Fafisu ani, yakara ḇaḇeri na yasmai kenem ḇeaski radine. Yafarkor nabor ro snonggaku ḇesesya! Yahwe byuk ḇe aya ma Angèle nu kankenem ḇefo aski. Inja, nuyun snemuk kwar fa numewer numnai nufarkor ro Kma koḇedi ro nanggi ma ro naek srar ḇepengalaman sya ḇeswar Yahwe I.