1-2. Samswen rosai monda naek srar sismai na?

MANWAWAN PAULUS danun Timotius ifa imbran pyum fararmyan ḇyena. (2 Tim. 4:5) Kokame fandun kaku kakso Paulus anun ḇyena ine. Ḇape fyorno ido, roi ine napyan ḇa. Naek srar ḇebor koḇansya sisewar fa simkak ḇa fyor sḇaryas. (2 Tim. 4:2) Imnis ra, kwara mura ro samswen naek srar ḇeḇarek ro sup ḇedwarek fararur ḇaḇebaryas koḇena. Sfawi snar sbaryas ido nari sismai ro bui ḇesyabo sbaryas pdef.

² Yahwe kawasa Ḇyesi sismai samswen nabore ma ine bisa nafrur sesanekar. Imnis ra, naek srar ḇebor koḇansya sfararur marḇak fa sisewar roḇean ma fandun rasras faro kina sesya. Simarisen sifrur roi nabor ro fararmyan sena, ḇape simbrus ro pupes minggu swaf ya. Sia wer sismai fafisu ḇepyum ḇa kukro siduf marḇak ḇaido sesinan kwar. Ḇeḇeso syano saksaye ro rum ḇa. Osower ido, naek srar sia sḇaḇir snar sesyowi ro ḇarpon Yahwe I ḇa. Mary, * imbesrar oso ḇeḇarek ro sup Timur Tengah, ikofen ḇo doḇe, ”Yaḇesewar kaku fa yamkuepen sneḇaḇir ḇemnis ḇa ayena ine, ma ine nafrur yapok ḇa. Ro ine nafnai ḇo oras ḇebor ma samambraḇ yena fa yabukibaryas ya yaḇepake na ḇa, inja yaḇaḇir yasasar.”

3. Rosai nari kawos ro farkarkor ineni?

³ Samswen rosai monda kosmai na rariryano, Yahwe na byuk samambraḇ fa kuffarmyan I pdef kuker payamyum. Nari kawos moḇsa Yahwe ifnoḇek ko rai. Ḇape mgorama kawos ḇepon resari moḇsa Yahwe syambraḇser Paulus ma Timotius su rai, inja susmai samswen nabor raryano suffarmyan I pdef.

4. Samswen rosai monda Paulus ismai na?

⁴ Paulus ismai samswen nabore. Fyandun syadi samambraḇ ro Yahwe fafisu sipreri, sikso i kuker karui, ma sḇeifa isyun ro bui. (2 Kor. 11:23-25) Oso wer, Paulus ikofenbos snar inoido ḇyesewar kaku fa isawen kakara ḇesasar na. (Rm. 7:18, 19, 24) Ikako ismai dafduf rya ’skuk baken ḇyedi kuker borek oso’, ma imarisen kaku Allah ikanow dafduf ani bur i.​—2 Kor. 12:7, 8.

5. Fyor Paulus ismai samswen nabore rosai ifrur na?

⁵ Snar Yahwe byuk samambraḇ ḇe i, inja ismai samswen nabor raryano, Paulus bisa imbranser fararmyan ḇyena pdef. Kwarapan rosai monda Paulus ifrur na. Imnis ra, fafisu smamwarek Paulus ro rum oso ḇero Roma, byaryas pdef kuker raryaḇ ḇe manfarkin Yahudi sya, ma imbude ḇebukor ro pamarenta sya. (Kis. 28:17; Flp. 4:21, 22) Byaryas kako faro ḇekon ro istana sya ma faro ḇerama ḇemamfar i sya. (Kis. 28:30, 31; Flp. 1:13) Oso wer ido, fafisu smamwarek Paulus ro rum kaker ya, Allah ḇyepake i fa fyasepen syap ḇesambraḇser snonggaku Kristen ro abad randak isof ro baboine. Paulus nyan ḇyena ine kako nsambraḇser sidang ḇero Roma imbarya naek srar ḇero diansya ”simsik ḇo siwawos ro Allah wos ḇyedi kuker makakak ḇa”. (Flp. 1:14) Paulus byaryas nabor kuf ḇa raris imarisen na rariryano, ḇyesewar kaker fa ifrur na kuker payamyum. Ma fafisu ḇesamswen ḇyena ine kakuya nafrur ”Ankankinem Ḇeḇye” iryewen.​—Flp. 1:12.

6. Imnis 2 Korintus 12:9, 10 ikofen na, rosai ḇefrur fa Paulus imbran pyum fararmyan ḇyena?

⁶ Paulus fyawi snar ifrur roi nabor ro fararmyan ḇyena snar Yahwe iso ḇefnoḇek i, imboi ro sasewar manggun ḇyena ḇa. Paulus doḇe fafisu syambraḇ ḇa, Allah papoik Ḇyena nasnaibos faro i. (Wasya 2 Korintus 12:9, 10.) Roro rur ḇesren Ḇyedi, Yahwe byuk samambraḇ faro Paulus i, inja ḇyekandera, ismai ro bui, ma samswen ḇebor ḇesena raryano imbran pyum fararmyan ḇyena.

7. Samswen rosai monda Timotius daksmai na?

⁷ Paulus min ḇyedi ḇeḇesnonkbor kaker anya, Timotius i, dakyar kako  samambraḇ ḇerama ro Allah insama dakbran fararmyan ḇyena. Timotius dakso Paulus i ro marandan ḇebinggwan ḇeḇeso ḇe misionaris. Oso wer ido, Paulus iwan Timotius fa myamfar ma syambraḇser naek srar ro sidang ḇeḇeso. (1 Kor. 4:17) Timotius ḇyaḇir dakḇekir kuf ḇa fa imbran fararur ḇyena. Imbude iso eḇedari Paulus ikofen ḇe i, ”Snar besnonkbor kaker, imbude snonkaku ono skara ma srun awri.” (1 Tim. 4:12) Ḇese wer iso, Timotius ikako rya skus baken ḇyedi kuker borek oso isoine idafduf ker. (1 Tim. 5:23) Ḇape Timotius fyawi snar Allah rur ḇesren Ḇyedi, nari nafrur sambraḇ i fa byaryas anggangginem ḇeḇye ma duffarmyan naek srar sya.​—2 Tim. 1:7.

8. Moḇsa Yahwe syambraḇser kawasa Ḇyesi ro kirine?

⁸ Ro kirine, Yahwe byuk ḇe kawasa Ḇyesi samambraḇ ḇeba Ḇyena insama suffarmyan I kuker souser. (2 Kor. 4:7) Mgorama kawos roi rifyak Yahwe byuk fa ḇesambraḇser ko ma ḇefnoḇek ko fa kosouser pdef ḇe I. Roi rifyak anane: nadi ya, Refo ya, min Kristen koḇesya, ma fararmyan koḇena.

9. Payamyum rosai kosmai ro nadi ya?

⁹ Kosmai samambraḇ kuker konadi. Ro Efesus 6:18, Paulus danun ḇe ko fa konadi faro Allah ”rofafisu nakam”. Kofrur na ido, Allah nari syambraḇser ko. Jonnie ḇeḇarek ro Bolivia, ḇyaḇir nya samambraḇ ro Yahwe I rofyor ismai samswen na. Fafisu ḇemnis Jonnie swari ma sinan ḇyesuyano skoduf kame. Jonnie ḇyesewar marḇak insama myamwarek skokame. Ḇarpur mura snari ryoe, ma swari ma kmari sufandun fafisu nabor fa suprei ro dafduf suḇena. Jonnie fyawar ḇo doḇe, ”Fafisu yaḇebirbar kaku ya, yaḇenadi faro Yahwe ma yakofenḇair roi ḇero sneri nakam. Roi ine nafrur yaknon.” Yahwe byuk samambraḇ faro Jonnie fa fyarmkuepen. Penatua oso snori Ronald dakḇarek ro Bolivia kako, ḇoi sikofen ḇo soḇo snari dakduf kanker. Paik ḇarpur mura, snari ryoe. Rosai ḇefnoḇek i ro susa ḇyena ine? Doḇo, ”Fafisu yaḇenadi faro Yahwe I, yafawaro roi ḇero sneridori. Yafawi Yahwe fyawinepen aya ro manseisirya monda, ma ro manggundaya kako.” Fyorno, imbude koḇaḇir samswen kosmai na nmarḇak ma koḇor rosai imbe koḇenadi ya. Ḇape, Yahwe imarisen konadi ḇesya kwar, syadiwer fafisu kofawi ḇa rosai imbe kokofenḇadir na.​—Rm. 8:26, 27.

10. Imnis Ibrani 4:12 ikofen ya, rosai ḇefnai fa kowasya ma kokarauser Refo nama roi ḇefandun kaku?

¹⁰ Kosmai samambraḇ kuker kowasya ma kokarauser Refoya. Paulus ismai samambraḇ ma sneprei rofyor iwasya Allah Wos Ḇyena. Rarirya kako, Allah Wos Ḇyena bisa nasambraḇser ko ma nafrur kona sneprei. (Rm. 15:4) Rofyor kowasya ma kokarauser Allah Wos Ḇyena ido, Yahwe bisa ifnoḇek ko fa kofawi fasfesepen ḇero mnuk-mnuk kowasya na kuker fafisu koḇedine. (Wasya Ibrani 4:12.) Ronald ḇeyap ro ḇepon ani, doḇe, ”Yakofen kasumasa snar ro fafisu ani, yawasya Refo ro roḇ ya ḇesya kwar. Yakarauser ker Yahwe rari-rari Ḇyena ma moḇ myamwarek kawasa Ḇyesi rai. Roi ani nafrur fa yasambraḇ.”

11. Rariso Refo syambraḇser imbesrar oso ḇesmai susa ya?

 ¹¹ Kokarauser Allah Wos Ḇyena ido, na kona karkara ḇekaku faro samswen kosmai na. Komam rariso Refo syambraḇser imbesrar oso swari imarburi. Penatua oso ikofen ḇe i farkarkor ḇepyum ḇeyun fainda nasya ro syap Ayub. Rofyor iwasya syap Ayub ani, imarisen ḇa faro Ayub karkara ḇesasar ḇyena. Ḇape ḇyaḇir kakuya, Ayub ima kyara mura ro samswen ḇyena monda bardi. Mura, imbesrar anine fyawi snar karkara ḇyenano imnis rarirya. Rofyor fyawi roi ani kwar mura, ifrur rarirya wer ḇa, ma ḇyesusa kaker rariryano bisa fyarmkuepen manggundi.

12. Moḇsa Yahwe syambraḇser ko ro naek srar sya rai?

¹² Kosmai samambraḇ ro min Kristen koḇesya. Yahwe ikako syambraḇser koro min Kristen koḇesya. Paulus ikofen ḇe naek srar ḇyesi ḇo doḇe, ”ibye kosonemyaeko”. (Rm. 1:11, 12) Mary, ḇeyap ḇepon ani, ismai samambraḇ fafisu ḇyebati kuker naek srar sya. Doḇo, ”Naek srar sya sakfawi samswen yasmai nane ḇa, ḇape Yahwe ḇyepake si fa sisambraḇser aya ro wos sena ḇaido sfarem kartu ucapan, ma iso roi yafandun kaku na. Ayano yawos ḇe imbesrar ḇesesya ḇena samswen ḇemnis aya, ma yafarkor ro pengalaman sena. Ine nafnoḇek aya kaku. Ma penatua syano sawos ḇe aya snar naek srar ro sidang siswar kaku aya.”

13. Rariso kosambraḇseryae ko ro fananjur ya?

¹³ Ro fananjur ya, kona swaf nabor fa kosambraḇseryae ko. Inja rofyor waso fananjur ya, wakofen roi oso ḇefasnai snar auma waswar ma ḇesyowi min Kristen Besi. Imnis ra fawar oser ine. Rofyor fananjur ya ḇaime, penatua oso ḇenir Peter ikofen ḇe imbesrar oso ḇefaduru romawa ḇyesi ro binggundi, ”Fyor yamam Imbesrar rwama ro fananjur ya, nafrur yasamambraḇ kaku. Yamam ido, mam pyum romawa riwonem ḇesya fa sisansun pyum si ma wafasos si fa sbuk kankarem.” Peter wos ḇyani nsun kaku ro Imbesrar ani sneri. Ikofen ḇe Peter i snar wos ḇyena imnis kaku faro fafisu ḇyedi ma nasambraḇser kaku i.

14. Fyor kobaryas ido fainda rosai kosmai na?

¹⁴ Kosmai samambraḇ snar kombranser fararmyan koḇedi. Rofyor kofawar kakaku ḇero Refo faro ḇesesya, ma srower na ke srower na ḇa ido, na kona raryaḇ ma kosmai samambraḇ. (Ams. 11:25) Imbesrar oso ḇenir Stacy dakḇabir ro binggundi snar fararmyan ani nasambraḇser kaku i. Rofyor kina ḇyedi oso sepecat i, ḇyesaneso rawo. Ifuken binggundi ker, ’Bisa yafrur roi nabor syadi wer fa yafnoḇek kina yedine ke?’ Kyara roi ani ker. Ḇape, rosai ḇefnoḇek i ro saneso ḇyena ine? Ḇaḇeḇaryas ya! Rosai ḇefnai ya? Snar rofyor ḇyaryas ya, kyara mura ro samswen manggun ḇyena ḇa. Kyara syadi faro fandandun ro snonggaku ḇero moḇ ḇyedi sya. Doḇe, ”Ro fafisu ani, Yahwe byuk ḇe aya ḇefarkor Refo oso ḇesur fasaw ro rurya. Yana sneprei kaku. Fararmyan ima roi ḇesambraḇser kaku aya.”

15. Rosai kofarkor ro Mary fawar ḇyena ine?

¹⁵ Snar roi ḇesena, naek srar ono sisya sḇaḇir snar sipok sifrur roi nabor ro fararmyan sena ḇa. Iso roi wakḇaḇir ido, waswarepen snar Yahwe imarisen fyor besewar kwar fa buk roi ḇepyum. Imnis ra Mary, ḇeyap ḇepon kwar ani. Rofyor  ryaḇe moḇ ḇeyawos wos ḇesena, ḇyaḇir ro binggundi rya ifrur roi nabor ḇa. Ikofen radine, ”Ro swaf ḇeḇeso, fafisu yabaryas, na yabuk kankarem ḇeknampu monda, yawasya mnuk, ḇaido yabuk syap ram.” Doḇo, dawoskir ḇa raris naek srar ḇeyawoskir wos ani sya. Ḇape, ḇyesewar fa nya karkara ḇepyum wer. Fyawi snar dawoskir ḇaim, rariryano Yahwe ḇyepake I. Ikofen ḇo doḇe, ”Napnapes ḇero Refo ḇebuk kankenem ani nama napyan ma nsamswen ḇa inja napnapes ani iso ḇefadwer kenem snonggaku sya.”

16. Rosai ḇesambraḇser naek srar ḇemarisen fa ḇebaryas ḇoi jadi fa sisae fa sbaryas ḇa?

¹⁶ Yahwe fyawi snar naek srar ḇeḇeso imbe sbaryas kaku ḇoi jadi fa sisae ḇa. Inja, Yahwe byuk swaf ḇe si fa sbaryas faro snonggaku ḇemamwarek si ro rum sena monda ḇaido faro dokter ma perawat sya. Komamkara fafisu koḇena ro kirine kuker ro ḇepon iwara, na koḇesanekar. Ḇape, komam moḇsa Yahwe ifnoḇek ko ro kirine ido, nari kosambraḇ ma koryaḇ pdef fyor kosmai samswen nabore.

17. Imnis Pengkhotbah 11:6 ikofen na, komam ḇeri bon ḇyena ḇaim ḇape rosai ḇefnai kaku fa kobaryas pdef?

¹⁷ Rofyor koḇuḇer mor napnapes, kofawi mor rosai nari ḇesur muryas ya ḇa. (Wasya Pengkhotbah 11:6.) Imnis ra, Barbara fawar ḇyena ine, imbesrar ine ḇyeumur taun ri 80. Imyaren byaryas roro telepon ma surat na. Ro surat oser ḇyedi, iser fnoḇek syap Baryas 1 Maret 2014, ḇeser farkarkor ”Apa yang Allah Beri untuk Anda”. Fyawi ḇabo, surat ani ḇesmai ya iso imbeswa ḇeḇesaksi Yahwe wer ḇa. Suwasya ker syap baryas ani. Rofyor suwasya syap ani mura, ḇesnon ya ḇyaḇir rya Yahwe isya dawos ḇeri ḇe i. Mura imbeswa ansuine suso fananjur wer. Ma ḇarpur ya, nasyadi ro taun ri 27, sukaḇer fa suḇe Saksi Yahwe wer. Imbo, surat Barbara fyarem ani nun bon ḇepyum kaku. Barbara na ismai samambraḇ kaku!

18. Rosai na kofrur kaku insamaido kosmai samambraḇ ro Allah I?

¹⁸ Yahwe byuk ḇeko roi nabore ḇesambraḇser ko, imnis ra nadi, Refo, min Kristen koḇesya, ma fararmyan koḇena. Fandun fa kobuk pyum roi Yahwe byuk ḇe ko nane. Kombranser na ido, ine nfasnai kokyar Yahwe nari imarisen ma syambraḇ fa ifnoḇek ko. Imbo, kokyar nako pdef faro Kma koḇedi ro nanggi, ḇemarisen ”ḇefasnai papoik Ḇyena faro snonggaku ḇena sne ḇesiper faro I sya”.​—2 Taw. 16:9.