1-2. (a) Imnis ḇekofen ro Efesus 6:16, rosai ḇefnai fa kofandun ”adai kakyar [ḇeba]”? (b) Fakfuken risai na kawos ya?

AUMA nwa ”adai kakyar [ḇeba]” ke? Kaku rarirya ḇae. (Wasya Efesus 6:16.) Adai ḇeba na kyadaunwarek sordade oso ḇaken ḇyeja. Rirya kako, kakyar bena na nakadaunwarek Au ro roi ḇeḇyeḇa ro dunya ine, raris fararur farḇuk, mamamun, ma roi ḇeḇesebur rosai Allah ikofen na.

² Ḇape, koisya kokenem ro ”ras ḇepupesna”, ma nari roi ono naisya nefrowespan kakyar koḇena. (2 Tim. 3:1) Moḇsa na wafawi mnis adai kakyar bena nako pdef rai? Ma rariso wufepen nako adai kakyar bedi pdef? Na kawos kankarem ro fakfuken ansuine.

3. Rosai fandun fa sordade sya sifrur faro adai senane, ma rosai ḇefnai ya?

³ Ro awar Refo, sordade sya adai sḇukna sisowerna kuker aiwan kif. Sordade sya na sipyos mani ro adai senane insama kifna namuk fasaw ḇa ma mankarmomna nepraf ḇa. Smam mboi adai sena napyum ḇa kwar ido, sisewar fa sifrur mnis kaḇerna insama sun na wer ro mamamun ya. Rariso roi ine imnis kuker kakyar bena rai?

4. Rosai ḇefnai fandun fa mam mnis adai kakyar bedi, ma rosai fandun fa kofrur ya?

⁴ Snonkaku Kristen koine komnis ra sordade, kakmamunmun  kuker mbroḇ koḇesi, rur ḇeḇarḇor sya kako. Inja, fandun fa mam mnis ma faduru pyum adai kakyar bedi insama wafasos faro mamamun ya. (Ef. 6:10-12) Na snonkaku osoḇa ḇefrur pyan na ḇe Au. Rariso na wafawi kaku nwa kakyar ḇenako ro fafisu wasmai fafrowes? Ḇepon kaku, fandun fa wor fafnoḇek ro Allah. Ramnai, buk Refo ya fa mam mnis kakyar bena namnis Allah marisen Ḇyena ke roḇa. (Ibr. 4:12) Refo doḇe, ”Wakyar faro Yahwe I kuker snembri ḇesiper, ma wakyar awer faro fawawi mankun bena.” (Ams. 3:5, 6) Kwarapan, ras ḇarpur ine rosai ḇekur kankenem Bedi ma rosai wafrur ya? Imnis raris, wakna samswen ro kumpan na ke? Fyor ya wakswarepen Yahwe asas Ḇyena neḇefas ro Ibrani 13:5 ke? Mnuk ani ikofen, ”Nari yarir aw ḇa ma nari yabur aw ḇa.” Raris asas anya, wakyar kaku Yahwe nari ifnoḇek Au ke? Kwarem imbo ido, nfasnaiḇair wafaduru pyum adai kakyar bedi kwar.

5. Fafisu mam mnis kakyar bena, rosai insape wafawi na?

⁵ Fafisu mam mnis kakyar bena, na wakandor kaku snar insape wafawi wakna raryarḇa kako. Imnis raris, ḇaḇir mboi kakyar bena nasambraḇ werḇa snar ḇaḇeḇirḇar, ankarkar, ḇaido sanekar. Roi nane nkur Au ido, moḇsa faduru pyum kakyar bena insama nako pdef rai?

6. Koḇeḇirḇar ido nama nsasar ke? Buk conto.

⁶ Fyorno ido koḇeḇirḇar nama nsasar ḇa. Imnis ra, koḇeḇirḇar nari roi kofrur na nun marisen ḇe Yahwe ma Yesus su ke roḇa. (1 Kor. 7:32) Kofrur sasar ḇeba ido, na koḇeḇirḇar snar wis koḇena kuker Allah namuk, ma komarisen kofrur mnis kaḇerna. (Mz. 38:18) Koḇeḇirḇar na kofrur koswasi sfafko ke, ḇaido koḇeḇirḇar snar jadi fa kofamfon fandun ro kina koḇedi ḇaido kofnoḇek naek srar koḇesi ḇa.​—1 Kor. 7:33; 2 Kor. 11:28.

7. Imnis ḇekofen ro Amsal 29:25, rosai ḇefnai kopok komkak faro snonkaku sya awer?

⁷ Ḇape, koḇeḇirḇar syadi ido na nafnai fa kakyar koḇena nasambraḇ werḇa. Imnis raris, koḇeḇirḇar ker nari kan mnis ma kosansun mnis ke. (Mat. 6:31, 32) Inja mura ido na komam monda faro sasewar nana ma koswar syadi pipina. Nane nafrur fa kakyar koḇena faro Yahwe nsambraḇ werḇa ma wis koḇena kuker I namuk. (Mrk 4:19; 1 Tim. 6:10) Oroḇaido, na koḇeḇirḇar rariso snonkaku ḇese smam ko rai. Eḇedari komkak ḇembroḇ konsya na skoryae ko ḇaido sewayam ko. Insama nane ndarirya awer, fandun fa koḇenadi pdef ḇe Yahwe kor kakyar ma ḇaḇebri fa kosawen makakak faro snonkaku.​—Wasya Amsal 29:25; Luk. 17:5.

8. Fyor ono sikofenḇair ankarkar ḇe ko ido, rosai na kofrur ya?

⁸ Setan iso ”kma ro ankarkar na kam”, ma ḇye snonkaku ḇyesya fa sikofen ankarkar ḇekur Yahwe ma naek srar koḇesi. (Yoh. 8:44) Rupa ra, snonkaku ḇebur Yahwe I kwar sya sḇe situs web, telefisi, ma roi ḇesena fa sirwasḇair ankarkar ma sawos roi ḇekaku ḇa ḇekur Yahwe organsiasi Ḇyedi. Ankarkar nane iso oser ro ”ikoi ḇesak” ḇeramuma ro Ibiris i. (Ef. 6:16) Fyor ono sikofenḇair ankarkar ḇeradine ḇe ko ido, rosai na kofrur ya?  Komewer korower na! Rosai ḇefnai ya? Snar kokyar kaku faro Yahwe ma naek srar koḇesi. Iba syadiwer, na komewer kaku kawos kuker snonkaku ḇebur Yahwe I kwar sya. Koḇe kofawi rosai sikofen na ke ḇaido roi ḇesena ke, mboi kopok kofamfaḇri kuker si ḇa.

9. Rariso sanekar nawyae ko rai?

⁹ Sanekar na nafnai fa kakyar koḇena nasambraḇ werḇa. Fyorno ido, koḇe sanekar fafisu kosmai samswen. Kakuḇae, na komewer komamkyof samswen anna, mboi kopok kokara ker na awer. Snaro na nafnai ko fa koḇefnder roi ḇepyum Yahwe ḇyeasas kwar ḇe kona. (Why. 21:3, 4) Faḇye mura, sanekar nafrur fa kakyar koḇena nsambraḇ werḇa ma kofarmyan ḇe Yahwe werḇa. (Ams. 24:10) Ḇape kakuya, bisa koḇinkwanbur na.

10. Rosai wafarkor ro syapram imbesrar oso fyas ya?

¹⁰ Komam kada fawawar ro imbesrar oso ro Amerika Serikat. Myamfaduru swari ḇeduf marḇak, ḇape fyaduru kakyar ḇyedi fa syambraḇ pdef. Fyas syapram ḇe kantor pusat ḇo doḇe, ”Snar samswen nusmai na, fyorno ido nuḇesanekar ma nukandera. Ḇape, saneraro nuḇena nako. Yakofen kasumasa faro Yahwe snar roi nakam ḇyuk kwar fa nun sneprei nu ma nasambraḇser kakyar nuḇena. Nufandun kaku ananun ma wos saneprei anna. Nane nafnoḇek nu fa nufarmyan pdef ḇe Yahwe ma nufarmkuepen ro samswen Setan ḇyukna fa nafrur nu fa nusambraḇ ḇa.” Ro roi imbesrar ani ikofen na, kofawi bisa kokrenbur sanekar ya! Nyan ya rariso? Waswarepen samswen wasmai na nama farawrowes ro Ibiris i. Wakyar kaku Yahwe nari ḇyuk sneprei ḇe Au. Osower ido, ḇukmnis roi Yahwe fyasos kwar fa syambraḇser kakyar bedi.

11. Insama kofawi kakyar koḇena nasambraḇ ke roḇa, fakfuken risai fandun fa kokara na?

¹¹ Mam ido kakyar bena nasambraḇ kwar ke? Kwarapan fakfuken ḇeuser nane: Ro swaf paik ḇeḇeso ḇarpur ine, binkwanbur ḇaḇeḇirḇar ḇesyadina ke?  Pampum fa rwower ḇaido famfabri kuker snonkaku ḇebur Yahwe I kwar sya snar ankarkar sikofen na ke? Ma swambraḇ pdef fyor ḇesanekar ke? Kwarem imbo ido, kyurfasnai adai kakyar bedi ipyum. Ḇape, Setan nya romamun ḇesena fa ḇyukimun ko, inja fandun fa kosasor ko pdef. Mkorama kawos romamum oser ḇyeja.

12. Komarisen syadi faro arasai ido rosai na kosmai ya?

¹² Komarisen syadi faro arasai na nafnai fa kakyar koḇena nasambraḇ werḇa ma komam monda faro fararmyan ḇe Yahwe I ḇa. Manwawan Paulus doḇe, ”Rofyor sordade oso ḇyesewar ro fararur ma ḇyefandun ḇaḇefandun mankundi ḇyena ḇa, rarirya mananir ro sarar ḇyedi imarisen.” (2 Tim. 2:4) Sordade Romawi fafisu iwara, siwan si fa sifrur fararur ḇesena awer. Sisouser na ḇa ido rosai na sismai ya?

13. Rosai ḇefnai fa sordade oso ipok ifrur fararur ḇese awer?

¹³ Kwarapan farfyar ine. Ro arwo raryur sordade oso sfari pakreksi fa sḇuk sumber sena, mboi sordade oso dakso ḇa. Isya byoḇ roḇean ro pasar. Ro mandira ya, sordade ansi sḇuk swaf fa smam mnis romamun na ma siyas sumber sena. Ḇape sordade oso anya ḇyuk swaf ḇyena fa fyasos roḇean imbe byoḇ ro arwo meserya. Imbape, ro meserdi mbroḇ sya srama kanandor si. Kwara ido, mansei ro sordade ansi ḇefasos kwar fa smamunmun ma ḇefrur mananir sarar sedi imarisen? Ma fyor wakso ro mamamun ya, na wamarisen wores fanam kuker sordade ḇefasos kwar ansi ke ḇaido ḇefasos ḇa anya?

14. Snar koine Kristus sordade ḇyesiko, rosai roi ḇefandun kaku ḇe ko?

¹⁴ Koma komnis sordade ḇefasos pyum ansi. Roi ḇefandun kaku ḇe ko iso kofrur Mananir Sarar koḇesuya, Yahwe ma Yesus, sumarisen. Komam na ḇe roi  ḇeḇemaeja syadibur roi Setan dunya ḇyedi ḇyukna. Inja, kosewar fa koḇuk oras ma samambraḇ koḇena fa kofarmyan ḇe Yahwe. Osower ido, komarisen kofaduru pyum adai kakyar koḇedi ma romamun ḇesena fa napyum pdef.

15. Swarapepen rosai Paulus ḇyuk ḇe ko, ma rosai ḇefnai ya?

¹⁵ Fandun fa kosasor ko pdef! Rosai ḇefnai ya? Manwawan Paulus ḇyuk swarapepen ”mansei ḇemarisen ḇenana” nari ”ssunkirbur kakyar sena”. (1 Tim. 6:9, 10) Wos ”ssunkirbur kakyar sena” nfasnaiḇair kosasor ko ḇa ido na korir swaruser koḇena monda faro sasewar nana kofandun mankenem ḇana. Mura sne koḇena ndro ”nafsu ḇeḇor ḇeḇebei ma ḇeyun raro”. Ḇape, fandun fa koswarepen Setan ḇyuk marisen ḇeradiryana nḇe romamun fa ḇyukimun ko.

16. Farfyar ḇefas ro Markus 10:17-22 nadif ko fa kokara fakfuken risai monda?

¹⁶ Imbude kona pipi nabor fa kokoḇes roeḇor nabore. Koisya kofrur sasar ke rofyor kokoḇes roi komarisenna mboi kofandun mankun ḇana? Infa kofawi kankarem ḇyena kokarapan fakfuken naine: Kona pipi fa koḇukikoḇes roi oso mboi, na kona swaf ma samambraḇ fa kofaduru na ke? Na komarisen syadi  faro nana koḇena ke? Nane nafnai fa komnis snon oso ḇepampum Yesus fararyor ḇyedi fa ifrur nabor syadi ro fararmyan ḇe Allah ke? (Wasya Markus 10:17-22.) Ipyum syadi fa kokenem syadadi ḇa ma koḇuk oras ma samambraḇ koḇena fa kofrur Allah marisen Ḇyena!

17. Rosai kopok koḇefnder awer na?

¹⁷ Kopok koḇefnder awer koisya ro mamamun rurya, ma fandun fa kofasos ko ras ḇe ras. (Why. 12:17) Mankunko iso na ḇeyuf nako adai kakyar koḇedi. Naek srar koḇesi nari suf pyan na ḇe ko ḇa.

18. Rosai ḇefnai fa sordade ḇero fafisu iwara na sisewar fa sufepen nako adai sena?

¹⁸ Ro fafisu iwara, nari sesyowi sordade oso snar ḇaḇebri ḇyena ro mamamun ya. Ḇape, nari imai kaku fyor ibur ḇo duf adai ḇyedi ḇa. Manḇefawinanem sejara Romawi ḇenir ḇe Tacitus fyas, ”Sordade oso ibur adai ḇyedi ido, na sesyowi i ḇa kaku.” Iso eḇedari sordade sya na sisewar fa sufepen nako adai sena.

19. Moḇsa na kufepen nako adai kakyar koḇedi rai?

¹⁹ Kufepen nako adai kakyar koḇedi kuker koso fananjur pdef ma koḇaryas snonsnon Yahwe ma Karajan Ḇyedi ḇe snonkaku ḇese. (Ibr. 10:23-25) Osower ido, kowasya Refo ras ḇe ras ma koḇenadi kor ḇe Yahwe ifnoḇek ko fa kosouser parenta Ḇyena. (2 Tim. 3:16, 17) Rarirya, Setan romamun ḇyena kam fa ḇyukimun ko nari napok nun kandera ḇekain fyoro ḇe ko ḇa. (Yes. 54:17) ”Adai kakyar” koḇedi nari kyadaunwarek ko. Nari komkak ḇa ma ras ḇe ras kosaebur kuker payamyum ro mamamun rurya, warpu naek srar koḇesi. Ḇefandun syadi ya, kosmai syowi ḇeba fa kowaira ḇe Yesus fafisu kyafyo Setan ma ḇeso i sya ro mamamun ya.​—Why. 17:14; 20:10.