1-2. Rariso kosouser wos anun ḇero Amsal 4:25 ya? Fasnai fawar oso.

WAWASENPAN fawar ine. Imbesrar ḇesinan kwar oso iswarepen mura ro fawar ḇepyum ḇyena ro fafisu byabo kaker anya. Kirine syambraḇ imnis ra ḇepondi wer ḇa, mboi syewar kaku fa byuk roi ḇepyum syadi faro Yahwe I. (1 Kor. 15:58) Ras ḇe ras, iwasenkara nari ikenem kuker snonggaku iswar sya ro Firdaus. Imbesrar oso ḇese imewer ikram masasor faro min Kristen ḇefrur fa sneri iduf kwar, inja ḇyefnder sasar ḇyena. (Kol. 3:13) Mambesrar oso ifrur sasar ro fafisu naiwara, mboi dun snemuk fa isouser pdef ḇe Yahwe I.​—Mz. 51:10.

² Roi ḇemnis rosai komam ro naek srar anskoine? Siswarepen roi sismai ro fafisu naiwara, imboi skomewer skokain skoswarepen ker na. ’Skomamuser ḇe ḇarpon’ ḇe fafisu iyama.​—Wasya Amsal 4:25.

3. Rosai ḇefnai fandun kaku fa ’komamuser pdef’ ḇe fafisu iyama?

³ Rosai ḇefnai fandun kaku fa ’komamuser pdef’ ḇe fafisu iyama? Na kopok kombran pdef ḇe ḇarpon ḇa rofyor komam ker ḇe ḇarpur. Imnis rarirya, koswarepen ker rosai ḇeḇejadi kwar ḇaido roi kofrur ro fafisu naiwara ido, na kofarmyan ḇe Yahwe I kuker sne ḇesiper ḇa.​—Luk. 9:62.

4. Rosai nari kawos ya?

⁴ Nari kawos denem rikyor ḇefrur fa kokain koswarepen mura ker ḇe roi kosmai kwar ro fafisu naiwara: (1) manander, (2) kokram masasor, ma (3) kobuk sasar ker ḇe manggunko. Na komam rariso wos farkin ro Refo nafnoḇek ko insama kokain koswarepen ker awer ”rosai  ḇero ḇarpur”, mboi kosewar fa komam monda faro ”rosai ḇero ḇarpon”.​—Flp. 3:14.

5. Imnis wos ro Pengkhotbah 7:10 ya, rosai kopok kofrur awer na?

⁵ Wasya Pengkhotbah 7:10. Mnuk ine ikofen ḇa kopok kofuken awer radine: ”Sai ḇefnai fa rasras naiwara napyum syadi?” Yahwe iso ḇebuk swarapepen faro ko fa koswarepen roi ḇepyum ro fafisu naiwara. Imbape mnuk ine doḇe, ”Wakofen awer, ’Sai ḇefnai fa rasras naiwara napyum syadi ro baboine?’” Ḇaido ine imnis ra komam ma kobukikara kenem koḇena ro fafisu naiwara napyum syadi, ḇo koḇo roi kosmai ro fafisu inema naḇye ḇa syadi. Kakara ḇeradine nari ḇyedenem ḇe ko. Refo ro wos ḇese, mnuk ine ryok radine: ”Wapok wafuken awer, ’Sye, sai ḇefnai fa roi nakam ro rasras ḇepon aniwara napyum syadi?’ Wafuken radinema napyum ḇaḇeri.”

6. Rosai ḇefnai fa kokara ker awer ḇo koḇo fafisu naiwara napyum syadi? Fasnaipan fawar oso.

⁶ Rosai ḇefnai fa kokara ker awer ḇo koḇo fafisu naiwara napyum syadi? Swarapepen ḇeradirya nafrur fa koswarepen roi ḇepyum na monda ḇo koḇefnder roi ḇepyum ḇa kosmai ro rasras naiwara. Imnis ra, er Israel ḇepon siwara. Fyor sisasyarbur sup Masir kwar, fasaw kaku sefnder kandera sena ro diwa. Siswarepen monda ḇe roḇean ḇepyum san ro diwa na. Soḇe, ”Fyor iwara nggoro sup Masir anya, nggan ker in mboi nggokowes na ḇa, ma ampek, semangka, bawang ram, bawang ḇerik, ma bawang ḇepyoper!” (Bil. 11:5) Ḇape komam kaku kada, roḇean anna sikowes na ḇa ke? Oroḇa. Sikowes na kuker ḇaḇyak ḇekaki, isoine sfararur marḇak ḇe women faro snonggaku Masir sya. (Kel. 1:13, 14; 3:6-9) Mboi sefnder kandera  sismai anya. Roi siswarepen monda iso roḇean ḇeyan pyum na ḇo smam faro roi ḇepyum insape Yahwe ifrur faro si na ḇa. Rari sfasnai nane nafrur fa Yahwe imsor kaku si.​—Bil. 11:10.

7. Rosai ḇefnoḇek imbesrar oso fa iswar mura ker ḇe fafisu ḇepyum naiwara ḇa?

⁷ Moḇsa koḇinggwan ro denem ḇeradine? Kokarapan fawar ro imbesrar oso ḇefarmyan ro Betel Amerika ro taun 1945. Taun riḇeso mura, imbesrar ine fyarḇuk kuker mambesrar oso ḇeyakfarmyan ro Betel kako. Sufarmyan ro Betel ro swaf kawan kaku. Ḇape ro taun 1976, swari iduf. Imbesrar ine fyawar ḇo doḇe fyor swari imar ḇaim, byuk wos ananun ḇepyum kaku ḇefrur i fa syambraḇ. Swari ikofen ḇe i radine, ”Farḇakḇuk kuḇenane nun aski kaku. Snonggaku siwara simnis ra ku ḇa. Na waswarepen fawar ḇepyum kuḇena ḇae, mboi kwain waswarepen ker na awer. Fawas mura na besneso wer ḇa. Inja besanekar syadi awer faro roi ḇekur au na. Waryaḇ kukro kubuk swaf ḇepyum kwar fa kufarmyan ḇe Yahwe I. Yahwe iso ḇefrur ku fa kuswarepen faro roi kusmai kwar.” Inema wos anun ḇepyum kaku.

8. Rariso imbesrar koḇedi ismai payamyum ro swari wos anun ḇyena?

⁸ Imbesrar ani isouser swari wos anun ḇyena. Ifarmyan ḇe Yahwe I pdef isof imar fyor ḇyeumur taun ri 92. Fyor imar ḇaim, doḇe, ”Yamarisen kaku kukro yabuk kenem yena kwar fa yafarmyan ḇe Yahwe I ro oras nakam swaf taun ri 63.” Rosai ḇewar fa imarisen kaku? Ikofen wer, ”Roi ḇefrur fa yamarisen kaku iso mambekanaek koḇedi ma saneraro kankenem fyoro ro firdaus fnoḇek naek srar sya, kosyom Manḇedaw koḇedi, Allah ḇekaku, Yahwe I, isof fyoro-fyoro.” * Kun farkarkor nabor kaku ro imbesrar ine  fawar ḇyena kukro myamuser pdef ḇe Yahwe asas Ḇyena!

9. Imnis wos ro Imamat 19:18 ya, fafisu risai na samswen kaku fa kobuk ampun faro snonggaku ḇefrur fa komsor kwar?

⁹ Wasya Imamat 19:18. Fafisu ono samswen kaku fa kobuk ampun faro snonggaku ḇefrur fa komsor kwar, isyadi wer snonggaku ani iso naek srar koḇesi, bati, ḇaido kina koḇedi. Rupa ra, imbesrar oso doḇe imbesrar ḇese kyaraw pipi ḇyena. Ḇarpur mura, imbesrar ine dor maf ḇe sumin kyursof ani, mboi imewer. Ras oso wakḇaḇir rarirya kwar ke? Imbude kaksmai roi ḇeradirya ḇaim, mboi na komsor kaku ma kokara na kopok koḇefnder na ḇaḇeri.

10. Rosai na ḇefnoḇek ko fyor komsor kwar?

¹⁰ Rosai na ḇefnoḇek ko fyor komsor kwar? Koswarepen, Yahwe myam roi nakame. Ifawi roi ḇekur ko na, ma rofyor sia sifrur roi ḇeḇye ḇa yoḇ ko, ifawi na kako. (Ibr. 4:13) Allah Yahwe ḇyesneso kaku fyor myam koḇekandera. (Yes. 63:9) Ma ḇyeasas nari ipyos roi ḇefrur fa komsor anya bur ko.​—Why. 21:3, 4.

11. Kobuk ampun ḇe snonggaku ḇesesya ido, payamyum rosai na kosmai ya?

¹¹ Koswarepen kobuk ampun faro snonggaku ḇefrur sasar yoḇ ko ido, na komarisen kaku. Iso roi imbesrar insandi skursof ani ḇyaḇir na. Imewer ikram masasor ro sneri pdef. Ifawi kaku, kobuk ampun faro snonggaku ḇese ido, Yahwe nari dakbuk ampun faro ko kako. (Mat. 6:14) Imbesrar ine ifawi roi sumin ya ifrur ḇe i anya nama nsasar nairi, mboi imarisen ḇyefnder sasar ḇyena. Imbesrar koḇedine ismai roi ḇepyum, imarisen syadi ma ifarmyan pdef ḇe Yahwe I.

12. Rosai kofarkor ro 1 Yohanes 3:19, 20 ya?

¹² Wasya 1 Yohanes 3:19, 20. Koḇaḇir kosasar kwar ima sasar oḇa. Rupa ra, ono sisya sbuk sasar ḇe manggunsi kukro roi sifrur rofyor sfarkor Refo ḇaime. Ḇesesya wer sbuk sasar ḇe manggunsi kukro sifrur sasar fafisu sebaptis kwar. (Rm. 3:23) Kakuḇae, kokam komarisen kofrur roi ḇekaku. Mboi ”kokam kosasar ro roi nabor”. (Yak. 3:2; Rm. 7:21-23) Koḇaḇir kosasar kwar ido na nun marisen ḇe ko ḇa, ḇape bisa kosmai farkarkor ḇepyum ro na kako. Rosai ḇefnai fa kokofen radine? Snar koḇaḇir kosasar kwar ido na nadif ko fa kofrur fararwei ma kombror ro sasar koḇena ma komewer kofrur sasar wer.​—Ibr. 12:12, 13.

13. Rosai ḇefnai fa kobuk sasar ker ḇe manggunko awer?

¹³ Imbape, bisa kobuk sasar ḇesyadadi ḇe manggunko. Imnis radine, kombror ro sasar koḇena kwar ma Yahwe byuk ampun ḇe ko kwar, mboi koḇaḇir kosasar kaker. Ḇaḇaḇir ḇeradine na nun ḇe roi ḇeḇye ḇa. (Mz. 31:10; 38:3, 4) Kukro? Kokarapan fawar ro imbesrar oso. Ifrur sasar ro fafisu naiwara, mboi byuk sasar ker ḇe manggundi. Doḇe, ”Yafrur roi nabor ro fararur ḇesren ya kwar yano nari yasmai kankenem fyoro ya ḇa, nakame nefromo monda.” Ḇebor ro ko, imbude kakḇaḇir rarirya. Fandun fa kosasor ko insama kobuk sasar ker ḇe manggunko awer. Rosai ḇefnai ya? Kukro Ibiris imarisen kaku kofarmyan ḇe Yahwe I wer ḇa. Yahwe byuk ampun ḇe ko kwar!  Mboi Ibiris imarisen kobuk sasar ker ḇe manggunko!​—Mam kako 2 Korintus 2:5-7, 11.

14. Moḇsa kofawi Yahwe ima imarisen byuk ampun?

¹⁴ Imbude kokara, ’Moḇsa yafawi Yahwe imarisen byuk ampun ḇe aya?’ Wafuken rarirya ido, fasnaiḇair Yahwe bisa byuk ampun faro Au. Syap The Watchtower ḇesasyar ro taun-taun naiwara ikofen, ”Imbude kosapi ma kofrur sasar ono rarirya ker. Kokara ḇo koḇo jadi fa komnai kofrur sasar ani ḇa. . . . Kosusu awer. Kokara awer kofrur sasar ḇeba kwar, inja Yahwe ipok byuk ampun ḇe ko wer ḇa. Iso roi Ibiris imarisen kokara na. Koswarepen, koḇaḇir kosasar kwar ma koḇesneso, kyurfasnai koma snonggaku ḇeḇarḇor koisya ḇa ma Yahwe na byuk ampun ḇe ko. Kuker sne ḇerun konadi ḇe Yahwe ḇesya kwar, kor ampun ro I ma kor sneuser ḇesren. Romawa oso ifrur sasar ker ḇe kmari rariryano, nari fyanam ḇe kmari pdef. Inja, kor fafnoḇek ro Yahwe I pdef. Nari ifnoḇek ko pdef kukro ima isawarwar.”

15-16. Mosḇa naek srar sya sḇaḇir rai fyor sifawi Yahwe byuk ampun faro si kwar?

¹⁵ Yahwe kawasa Ḇyesi ḇebor sya sismai sneprei kaku kukro sifawi Yahwe byuk ampun ḇe si kwar. Imnis ra, taun ḇeḇeso naiwara mambesrar oso imarisen kaku kukro iwasya bar ”Refo Fyadwer Kankenem” ḇeser fawar ro imbesrar oso. Imbesrar ani doḇe sasar ifrur ro fafisu naiwara, samswen kaku fa ikyar Yahwe ima iswar i kaker. Ḇyaḇir rarirya ker swaf taun ḇe taun fyor ḇyebaptis kwar. Ḇape, iwasenkara rariso Yesus imarwarek snonggaku syakam, inja fyadwer nyan kakara ḇyena. *

¹⁶ Rariso imbesrar ani fawar ḇyena nafnoḇek mambesrar ani rai? Ikofenbos, ”Fyor yababo ya, yamam ker sonin ḇeḇye ḇa na, ma jadi fa yamnai ḇa. Rasras ḇarpur ine, yamam na wer. Mura, yor  fafnoḇek ro penatua sya. Inja bisa yapampum na. Penatua sya sifnoḇek aya fa yakyar Yahwe iswar kaku aya ma imarisen byuk ampun. Fafisu ono ido, yaḇaḇir yasyus ḇa kwar, ma nari Yahwe iswar aya wer ḇa. Mboi imbesrar ani fawar ḇyena nafnoḇek kaku aya. Yafawi fyor yakara Allah na byuk ampun ḇe aya ḇa ido, ine imnis ra yakofen Roma Ḇyedi rik ḇyena nasrow ḇaim fa nbuk ḇaḇyak faro sasar yena. Imbesrar ani fawar ḇyena yakram na, insama bisa yawasya wer ma yawasenkara na rofyor yaḇaḇir yasyus ḇa ro ḇarpon Yahwe I.”

17. Rosai Manwawan Paulus ifrur ya insama byuk sasar ker ḇe manggundi ḇa?

¹⁷ Fawar nane nafrur fa koswarepen mura ḇe Manwawan Paulus i. Fafisu dakḇe snonggaku Kristen ḇaim, ifrur sasar ḇeba nabore. Iswarepen sasar ḇyena, mboi imewer kyain kyara ker na. (1 Tim. 1:12-15) Isyadi wer Paulus myam Yesus imarwarek i kwar. (Gal. 2:20) Inja Paulus imewer byuk sasar ker ḇe manggundi, mboi syewar pdef ḇe ḇarpon fa byuk roi ḇepyum syadi faro Yahwe I.

18. Rosai kofarkor kwar ro farkarkor ine na?

¹⁸ Rosai kofarkor ro denem rikyor anskoya? (1) Yahwe iso ḇefrur ko fa koswarepen faro roi ḇepyum ro fafisu naiwara. Ḇape kenem koḇena ro fafisu anya nafrur marisen rariryano, kankenem ro dunya babo ima ipyum syadi. (2) Snonggaku oso imbude ifrur fa kokram masasor, ḇape kobuk ampun ido, na kofarmyan pdef ḇe Yahwe kuker marasrisen. (3) Kobuk sasar ḇesyadadi ḇe manggunko ido, na kosmai marisen oḇa. Inja raris Paulus i, fandun fa kokyar Yahwe byuk ampun faro sasar koḇena kwar.

19. Rosai ḇefnai fa ro dunya babo, na koswarepen roi ḇefrur fa koḇesneso wer ḇa?

¹⁹ Kona saneraro kankenem fyoro. Ro dunya babo, na koswarepen roi ḇefrur fa koḇesneso wer ḇa. Refo ikofen, ”Roi ḇebor ḇekwar na nari siswarepen na wer ḇa kwar.” (Yes. 65:17) Kokarapan kada: Ḇebor ro ko kofarmyan ḇe Yahwe rofyor kobabo kaker isof kirine koḇe mansar binsar kwar, ḇape ro dunya babo, na kobabo kaḇer. (Ayb. 33:25) Inja, iḇye kada koswarepen ker awer ḇe fafisu naiwara. Mboi, komamuser pdef ḇe ḇarpon iyama ma kankenem ro dunya babo!