Awin nya aya ro taun 1983. Fafisu yaba ḇa ya, yapyum monda. Mboi fafisu yaḇeumur taun risamfur, baken ayeja isyur ker. Swaf taun risuru mura, fafisu yakḇok ro arwo, yapok yayer baken ayeja ḇaḇeri. Yasewar kaku fa yaḇe wemin ayena fa iwawai kermgun, fama jadi ḇa. Ras anya ḇeri, yambran ḇa kwar. Dafduf anna nafrur fa baken yena nawarai. Isof ro fafisu ine, baken yena namnis ra roma mgun kaker.

Rofyor yaduf anya, jadi fa yasasyar ḇe bandi ḇa. Paik riḇeso mura, Saksi risuru surama ḇe rum nggoḇeja. Ayama yamam snonggaku sya srama ḇe rum ido na yasasyar ḇa. Mboi ro ras anya, yamarisen yarower bin ansuya. Suyawos Firdaus yoḇ aya, mura yaswarepen faro roi yarower ro fafisu yaḇeumur taun ririm. Fafisu ani, misionaris oso ḇenir ḇe Jethro ḇeḇarek ro Suriname, ryama ḇe mnu nggoḇedi rarwan oser ro paik oser ma byuk farkarkor Refo faro mansar i. Jethro ifrur pyum ker aya. Inja, yamarisen kaku yaḇebati kuker i. Oso wer ido, apus ayesu suyun aya kwar ro swaf ḇeḇeso fa nggora nggoso fananjur sifrur ro mnu nggoḇedi. Inja bin suine sumindi snori Florence ryama ḇe aya ro ras ani ḇo ifuken aya fa yamarisen ido yafarkor Refo wer. Fafisu naiwara yaḇebati kuker Saksi sya kwar, inja yoḇe yamarisen yafarkor wer.

Florence ryama kaḇer wer kuker swari, Justus i, mura nggofarkor Refo ḇeri. Rofyor sufawi ayama yafawi yawasya ḇa, sufarkor aya fa yawasya. Mura yafawi yawasya pyum. Ras oso, Justus ma Florence suyoḇe siwan su fa sura sufarmyan ro Suriname. Mboi ro Orealla ine, oso isya fa fyarkor Refo ḇe aya wer ḇa. Imbape yakofen kasumasa kukro Yahwe ḇyefnder aya ḇaḇeri.

Fyoro ḇa, perintis oso ḇenir ḇe Floyd ryama ifarmyan ro Orealla. Fafisu byaryas ro rum ḇe rum, isrow aya. Doḇe yamarisen ido, yafarkor Refo kuker i. Mura yambrif mgun. Ifuken aya, ”Wambrif kukro?” Yakofen yoḇ i ḇo yoḇe ḇepon iwara yafarkor kwar kuker syap Apa yang Allah Tuntut dari Kita? Ma yafarkor wer kuker syap Pengetahuan yang Membimbing kepada Kehidupan Abadi. * Yafar yoḇ i roi ḇefnai fa yafarkor wer ḇa. Floyd fyarkor aya isof kumnai ro  syap Pengetahuan. Mboi ḇarpur mura, sor i fa ifarmyan ro moḇ ḇese kako. Inja ono sfarkor aya wer ḇa.

Ro taun 2004, naek perintis risuru ḇenir ḇe Granville ma Joshua, sor su fa sufarmyan ro Orealla. Su kako susrow aya rofyor subaryas ro rum ḇe rum. Fafisu sukofen fa yafarkor Refo, yambrif. Yor fa sufarkor aya kuker syap Pengetahuan ro randak wer. Imbe yamam roi sufarkor yoḇ aya namnis raris ḇefarkor aya ḇepon anya ke roḇa. Granville ikofenḇair ḇe aya ḇo doḇe sifrur fananjur ro Orealla. Ro swaf taun risamfur kwar yasasyar ro rum ḇa, mboi fafisu anya yamarisen yakso ro fananjur. Inja, Granville ryama dun aya ma isaramper aya fa yakain ro kursi roda. Mura, dun pyan aya ḇe Balai Karajan.

Ḇarpur mura, Granville danun aya fa yaso Farkarkor Fararmyan Teokratis. Doḇe, ”Wambran ḇa, mboi bisa wawose. Inja ras oso, wakyar nari wun faya.” Granville wos ḇyenane nafrur fa yana kakara ḇepyum syadi.

Yakso Granville fa nura nubaryas. Mboi sampak ḇero Orealla namnis manggun ḇa, inja samswen fa kursi roda ifrar ro na. Inja, yor fa Granville dun aya kuker gorobak monda. Nane nafrur fa numbran ḇe moḇ nabore. Ro paik April 2005, yakḇebaptis. Fyoro ḇa mura, sfarkor pyan aya fa yamam syap-syap ma tata suara ro Balai Karajan.

Ro taun 2007 ya, kma yedi imar kukro dek wai mboi pyambar ro soren. Nggoḇesaneso kaku. Granville ḇyenadi faro inggo ma iwasya mnuk ḇeḇeso fa byuk sneprei ḇe inggo. Mboi taun risuru mura, roi ḇese nafrur saneso wer. Granville i kako imar raris kamam i.

Sidang kasun nggoḇedi sesneso kaku. Fafisu anya sidang nggoḇedi penatua sisya ḇa ma hamba pelayanan oser monda. Yaḇesneso kaku kukro bati yaswar kaku ine imarbur aya. Isaramper ker aya fa yasur pdef ro rur ma ifnoḇek fandun yena ro rasras na. Ras imar anya imnai ma nggoḇeari wer, yasmai tugas fa yawasya syap Baryas. Yasambraḇ fa yawasya syos risuru monda, ramnai yakanes ḇeri ma jadi fa yamnai ḇa. Inja, yakaḇer ḇe moḇ yakain ro ya.

Yasmai sneprei fyor yamam naek srar ḇeramuma ro sidang ḇese srama ḇe Orealla fa sifnoḇek sidang nggoḇedi. Kantor cabang kako siwan perintis istimewa oso ḇenir ḇe Kojo fa ifnoḇek sidang nggoḇedi. Ḇarpur mura, awin ma kasun yedi suyakfarkor Refo ma suḇebaptis. Yamarisen kaku. Ro paik Maret 2015, sikanow aya ḇe hamba pelayanan. Fyoro ḇa mura, yasmai tugas fa yun faya faro kawasa kam. Yaswarepen Granville wos ḇyena taun ḇeḇeso naiwara: ”Ras oso, wakyar nari wun faya.” Fyor yaswarepen wos ḇyenane, yambrif ḇo mgarui yena nasapi.

Ro vidio JW Broadcasting^®, yamam fawar ro naek srar ḇesmai roi ḇemnis kuker aya. Sna roi nabor ḇa, mboi bisa simarisen pdef ma sifrur roi nabor kaku. Aya kako bisa yafrur roi ḇeḇeso. Yamarisen yabuk roi ḇepyum syadi faro Yahwe I. Inja yaksun ro fararur perintis biasa. Mura, ro paik September 2019, yasmai fararur ḇebabo yakara na ḇaḇeri. Sikanow aya ḇe penatua ro sidang nggoḇedi, ḇena manbaryas ri 40.

Yakofen kasumasa kaku faro naek srar ḇefnoḇek aya fa yafarkor Refo ma yabaryas. Isyadi wer, yakofen kasumasa nabor kaku kukro Yahwe ḇyefnder aya ḇaḇeri.