1-2. (a) Rosai ḇefnai fa imbeswa ḇefarḇuk babo sya fandun fa sikyar ḇe Yahwe I? (Mazmur 37:3, 4) (b) Rosai nari kawos ro farkarkor inera?

AUSYA wafrur fasasos fa imbe wafarbuk ḇaido insape farbuk babo ke? Rarirya ido, na wamewer wawaf kawan fa waḇeoser kuker snonggaku waswar kaku ya. Mboi inema roi ḇepyan risya ḇa, fandun fa mufrur snemuk ḇefandun kaku. Inja, nyan mufrur mnis samswen na ma snemuk mufrur na ine na nawyae aski ḇaido marisen muḇena ro ras nayama. Inja insama musmai marasrisen ro farḇakḇuk mubena fandun fa mufrur snemuk ḇepyum iso mukyar kaku faro Yahwe I. Farḇakḇuk muḇena nari nasambraḇ ma musmai aski ya. Ḇape fyor musouser Yahwe wos anun Ḇyena ḇa ido, nari nafrur musmai samswen ro farḇakḇuk ya ma ine kako nawyae farḇakḇuk muḇena. Ma nari musmai marasrisen no ḇa.​—Wasya Mazmur 37:3, 4.

² Farkarkor ine kyur faro imbeswa ḇefarḇuk babo sya, ḇape samswen sismai na imbeswa sya kam saksmai na kako. Inja ro farkarkor ine na kawos kako fawar ḇepyum ro Refo kuker snon ma bin ḇesouser sya. Ro fawar ḇepyum senane, kosmai farkarkor ḇeḇeso bisa kobranser naro kenem koḇena, faro farḇakḇuk ya. Nari kawos kako nyan ḇepyum ro imbeswa ḇeḇeso ro fafisu ine.

3-4. Samswen risai monda imbude ḇefarbuk babo sya sismai na?

³ Samswen ḇeḇeso imbude ḇefarbuk babo sya sismai na. Imbude snonggaku riḇeso sor imbeswa oso fa sukenem raris moḇ snonggaku ḇebor sifrur na. Imnis ra, imbude sinan, karyer ma bati sesya sidif imbeswa ḇefarbuk babo fa suna romawa fasaw, ḇaido sidif su fa sukoḇes rum ḇebabo ma suser na kuker roeḇor nabore insa sukain kuker payamyum.

⁴ Imbeswa ḇefarḇuk sine sisasor si ḇa ido, fyor siso kina, karyer ma bati sesya ido nari nafrur fa skain ro nyaki yabori. Roi ḇeḇesya ine, bisa nafrur fa sufararur marmar kaku fa suḇak nyaki anna kam. Na suna oras ḇa snar sufararur ker, na suna oras noḇa fa sufrur farkarkor manggun, nadi kina, ma suso ro ḇaḇebaryas ya ḇa. Sukako snar suna pipi nabor ma sumewer susewar fararur ḇese mboi suknam fararur anna, inja nafrur fa sufararur ro arwo rawo roḇna. Roi nane nafrur suso fananjur na ḇa ma fababye mura, suna swaf noḇa fa sufarmyan ḇe Yahwe I ḇa.

5. Rosai kofarkor ro Klaus ma Marisa fawar suḇena?

⁵ Na komam fawar nabor ḇefasnai snar na kosmai marisen noḇa kuker kosewar roi nabore. Raris Klaus ma Marisa sukofeni suḇaḇir rarirya. * Suyoḇe rofyor sufarḇuk babo, sufararur ro ras nakam insama sukenem pyum. Ḇape, ine nbuk marasrisen ḇe su ḇa. Klaus manggundi doḇe, ”Nuna roeḇor ma pipi na, nukenem mararen. Ḇape, suna cita-cita rohani noḇa. Nukofen kaku, kankenem nuḇenane nesamswene ma nafrur nuḇoryae kaku.” Imbude kokako kakḇaḇir rarirya rofyor kosewar roiebor ḇaido pipi ḇape nafrur kankenem koḇena neaski ḇa. Ḇaḇir rarirya ido wafafko awer. Komam fawar ḇaido contoh ro snonggaku ḇesesya, bisa nafnoḇek ko fa kofrur fararwe kofandun na. Ḇepon ya, na komam rodine rariso snonswa sya sfarkor ro Raja Yehosyafat contoh ḇyena.

6. Moḇsa Raja Yehosyafat iso mnis anun ḇero Amsal 3:5, 6 rofyor ismai samswen ḇemarḇak?

⁶ Snonswa, fyorno ido na skara roi skamar na marḇak kaku ke? Ḇape rarirya ido, na smam ro Raja Yehosyafat nyan ḇyena moḇsa kosmai payamyum ro fawar ḇyena ine. Snar ḇye raja, Yehosyafat nya fararur ḇemarḇak kaku fa myam er ḇyansi skain kuker payamyum. Rosai ifrur faro fararur ḇeba ḇyenaine? Yehosyafat ḇyesewar fa kyadaun er ḇyansine. Dun sordade ro raryur ḇeba ri 1.160.000 fa smamwarek kota-kota ḇero Yehuda sya. (2 Taw. 17:12-19) Ḇarpur  yawer, Yehosyafat ismai samswen ḇemarḇak. Sordade ḇeba ro snonggaku Ammon, snonggaku Moab, ma snonggaku ro Bon Seir srama imbe smuni, kina ḇyesi, ma er ḇyesya. (2 Taw. 20:1, 2) Inja rosai Yehosyafat ifrur i? Dor fafnoḇek ma samambraḇ ro Yahwe I. Iso mnis anun ḇero Amsal 3:5, 6. (Wasya.) Komam ido nasnai ro nadi ḇyena ḇefas ro 2 Tawarikh 20:5-12. Ro nadi ḇyena ine fyasnai snar Yehosyafat ikyar kaku faro Yahwe I. Inja rariso Yahwe kyarem Yehosyafat nadi ḇyena ine?

7. Rariso Yahwe kyarem Yehosyafat nadi ḇyena?

⁷ Yahwe dawos ḇe Yehosyafat roro snonggaku Lewi ḇenir Yahaziel. Yahwe doḇe, ”Mgofasos mkoro moḇ mgoḇedi, mgores pdef, ma mgomam Yahwe fyasparbur mgo.” (2 Taw. 20:13-17) Inja nyan sifrur ro mamamun ine sifrur na ḇaim. Ḇape, parenta ani ryama ro snonggaku sya ḇa, mboi Yahwe I. Yehosyafat ikyar kaku ḇe Allah Ḇyedi, ma ifrur na imnis moḇ Yahwe parenta Ḇyena. Inja rofyor Yehosyafat ma kawasa ḇyesi sisae fa sisrow kuker mbroḇ ḇyesi, mansei ḇeyores ro ḇarpon sya? Ryir sordade ḇekir sya ḇa ḇape ryir ḇedisen ḇeyuf romamun ḇa. Yahwe I kako ifrur asas Ḇyena kaku rarirya faro Yehosyafat i, ma kyafyo mbrob ansya.​—2 Taw. 20:18-23.

8. Rosai snonswa sfarkor ro Yehosyafat nyan ḇepyum ḇyena?

⁸ Snonswa, na sfarkor ro Yehosyafat nyan fyasnai na. Mgona fakamamar faro payamyum ro kina mgoḇesi. Inja, na mgofararur marḇak fa mgomamwarek ma mgofamfon kina mgoḇesya. Ḇape rofyor mgosmai samswen, imbude na mgoḇaḇir mgopok mgofrur mnis samswen mgoḇena ḇa. Mgokyar faro samambraḇ mgoḇena monda awer. Ḇape, mgoḇenadi mgor Yahwe ifnoḇek mgo. Snonswa sya kako fandun mgoḇenadi kayam kuker mgoswamsi. Mgosewar akurfasnai ro Yahwe kuker mgofarkor Refo ma syap organisasi fyasos kwar na. Ma mgoso kaku anun mgosmai kwar na. Imbude snonggaku ḇesesya na simarisen faro snemuk mgun ro Refo nane ḇa. Imbude soḇe snemuk kofrur nane snemuk ḇepyum ḇa nairi. Snar smam pipi ḇaido roebor na ḇekadaun pyum faro kina mgobesi. Ḇape, koswarepen Yehosyafat nyan ḇyena. Ikyar faro Yahwe I ma fyasnai naro roi ifrur na. Inja Yahwe ibur raja ḇesouser ine ḇa, ma Yahwe I kako na ibur mgo ḇa. (Mz. 37:28; Ibr. 13:5) Inja imbeswa rosai na sifrur na insama sismai marasrisen ya?

9. Rosai na kofawi ro Nabi Yesaya ma swari?

⁹ Yesaya ma swari, sumam fararmyan suḇena faro Yahwe iso roi ḇefandun kaku. Yesaya ima nabi rirya, ma swari kako ismai fararur fa ikofenḇair Yahwe anun Ḇyena, snar sap i ḇe ”nabiah”. (Yes. 8:1-4) Yesaya ma swari sumam monda fararmyan suḇena ḇe Yahwe. Ine contoh ḇepyum faro imbeswa Kristen ro kirine.

10. Rofyor imbeswa sfarkor ḇardadi ḇero Refo nane ido, rosai ḇefnai fa nari simarisen sḇuk roi ḇepyum syadi faro Yahwe I?

¹⁰ Yesaya ma swari suḇuk roi ḇepyum ro fararmyan suḇena inja imbeswa sya bisa sakso contoh suḇena fa sakfrur roi ḇepyum ro fararmyan sena. Inja bisa sikyar kaku faro Yahwe kuker sfarkor ḇardadi ro Refo ma moḇsa smam ḇardadi anna  ndarirya kaku. * (Tit. 1:2) Osower ido, skarauser fakamaman sismai na fa sifrur ḇardadi ro Refo ndarirya. Imnis ra, bisa sakso ro ḇaḇebaryas angginem ḇeḇye ro supswan ḇesiper ine rofyor papupes ro dunya ine ryama ḇaim, inja sakso ido na sifrur ḇardadi Yesus ikofen na ndarirya. (Mat. 24:14) Imbeswa sukyar faro ḇardadi ḇero Refo snar na ndarirya ido, nari suḇesewar kaku suḇuk roi ḇepyum syadi faro Yahwe I.

11. Rosai monda Priskila ma Akuila sufrur na, ma rosai ḇefnai ya?

¹¹ Imbeswa ḇefarḇuk babo bisa sfarkor ro Priskila ma Akuila contoh suḇena. Imbeswa suine snonggaku Yahudi ḇeḇarek ro kota Roma. Ḇape fyor surower angginem ḇeḇye ḇekur Yesus nafrur su fa suḇe snonggaku Kristen. Komam kada suma suna kankenem ḇepyum ro Roma. Ḇape, kankenem suḇena nefarwe fyor Kaisar Klaudius iwan fa kawasa Yahudi sya kam fa sibur Roma. Inja kokara pan kada ine na nawyae Akuila ma Priskila su. Na subur moḇ sufawi kwar na, susewar rum ḇebabo, ma sufrur rum kruḇen fa subow na. Fararwe nabor sufrur nane nafrur suḇuk roi ḇepyum syadi faro Yahwe I ḇa ke? Na rarirya ḇa, imbude na wafawi kankarem ḇyena kwar. Rofyor sura suḇarek ro Korintus kwar, Akuila ma Priskila sufnoḇek sidang ḇero moḇ ani ma sufararur kayam kuker Paulus i fa skosambraḇser naek srar ro diwansya. Inja ḇarpur ya, skora ḇe kota-kota ḇesena ḇefandun manbaryas angginem ḇeḇye ya. (Kis. 18:18-21; Rm. 16:3-5) Na sumarisen kaku faro kankenem ḇeyun raryaḇ ma marisen!

12. Rosai ḇefnai fa imbeswa fandun fa sap ḇepon cita-cita rohani sena?

¹² Priskila ma Akuila contoh sufasnai ine, imbeswa bisa sakso na kuker saksewar ḇepon Karajan Allah. Fandun fa wawos kuker snonswa ḇaido binswa Bedi faro cita-cita imbe musewar na.  Fafisu ḇepyum fa mufrur na iso rofyor muḇepacaran kaker. Inja muyap kwar cita-cita rohani ma muḇensewar fa mufrur na ido, na musmai swaf nabor fa mumam ro manggunmu rariso Yahwe ifnoḇek mu. (Pkh. 4:9, 12) Mgomam Russell ma Elizabeth fawar suḇena. Russell doḇe, ”Rofyor nuḇepacaran, nuyawos asuser cita-cita rohani nuḇedi.” Elizabeth dakofen, ”Nuyawos asuser na insama fyor nufarḇuk kwar ido, na nuyun snemuk ḇefrur samswen nu ḇa fa nufrur cita-cita nuḇedi.” Inja ḇarpur mura Russell ma Elizabeth sura ḇe Mikronesia fa sufarmyan ro dia snar diwa sifandun manbaryas ḇebor syadi.

13. Ro Mazmur 28:7, bon rosai kosmai na fyor kokyar faro Yahwe I?

¹³ Raris Russell ma Elizabeth su, imbeswa ḇebor sya sikenem syadadi ḇa insama bisa sḇuk oras ḇebor sena ro fararmyan ya. Imbeswa sya sap kwar cita-cita rohani ma sfararur kayam fa sifrur na, nari sismai fainda nabore. Nari smam ro manggunsi Yahwe ifnoḇek si, kakyar sena faro I kako nari nsambraḇ syadi, ma nari seaski kaku.​—Wasya Mazmur 28:7.

14. Rariso Manwawan Petrus ma swari sufasnai snar sukyar faro asas ḇero Matius 6:25, 31-34?

¹⁴ Imbeswa bisa sfarkor kako ro Manwawan Petrus ma swari. Indokada paik riwonem isof taun oser fyor Petrus randak isrow Yesus i, fandun fa Petrus ifrur snemuk ḇefandun ya. Petrus fyararur ḇe manraswan faro fandun rasras kina ḇyedi. Inja, fafisu Yesus dor Petrus i fa ryir fararur ḇyena fa iso i, Petrus na kyara mura ro kina ḇyesya kenem sena. (Luk. 5:1-11) Mura Petrus dun snemuk fa iso Yesus roro fararmyan ḇyena. Iso snemuk ḇepyum rirya! Kokyar snar Petrus swari na imarisen faro snemuk Petrus dun ani. Refo ikofenḇair snar fyor Yesus ḇyeḇebawes kwar, Petrus swari dakso ro fararmyan ro fafisu ḇeḇeso. (1 Kor. 9:5) Snar swari ima bin Kristen ḇepyum rirya, na Petrus imkei fa dawose rofyor byuk anun ḇe snonswa ma binswa Kristen sya. (1 Ptr. 3:1-7) Imbo, Petrus ma swari sukyar faro Yahwe asas Ḇyena snar nari myam fandun suḇena fyor susewar ḇepon Allah Karajan Ḇyedi.​—Wasya Matius 6:25, 31-34.

15. Rosai wafarkor ro Tiago ma Esther fawar suḇena?

¹⁵ Au kuker swambri mufarḇuk ro swaf taun ḇeḇeso kwar ido, rariso na musewar fa mumarisen mufrur nabor syadi ro fararmyan ya? Nyan oser ya iso kuker mufarkor ro imbeswa ḇesesya fawar sena. Imnis raris bisa muwasya ro seri ”Mereka Merelakan Diri”. * Fyor suwasya artikel-artikel anna kwar, Tiago ma Esther, imbeswa ro Brasil, susmai samambraḇ fa sufarmyan ro moḇ ḇefandun manbaryas sya. Tiago fyawar ḇo doḇe, ”Rofyor nuwasya rariso Yahwe ifnoḇek manfamyan Byesya ro kirine, nube numam ro manggun nu farkankin ma fafnobek ro Yahwe I.” Ḇarpurya subur ḇe Paraguay, ro diwa randak taun 2014 sufarmyan ro moḇ ḇeyawos wos Portugis. Esther doḇe, ”Mnuk oser numarisen iso Efesus 3:20. Ro fararmyan nuḇedi faro Yahwe, nuḇaḇir kaku snar wos ḇero mnuk ani kyakubos beri.” Paulus fyasepen wos ani  ro syap ram ḇyedi faro sidang ḇero Efesus. Ikofen ḇo doḇe Yahwe nari byuk roi nabor syadi faro rosai kor na. Kaku, Yahwe ifrur roi anna ker!

16. Rofyor mukara kuker cita-cita rohani muḇena ido, faro mansei na muyor anun ya?

¹⁶ Imbeswa ḇefarḇuk babo sya bisa sfarkor ro imbeswa ḇesesya ḇekyar faro Yahwe I ḇesya kwar. Imbeswa ḇeḇeso sya imbude sfarmyan ro oras ḇesiper fyoro kwar. Muyor anun ro si rofyor musya mukarauser cita-cita rohani muḇedi. Ine iso nyan ḇese bisa mufasnai snar mukyar faro Yahwe kaku. (Ams. 22:17, 19) Ḇeḇe penatua sya kako bisa sakfnoḇek imbeswa ḇefarḇuk babo sya fa sfakapon cita-cita rohani sena.

17. Rosai Klaus ma Marisa susmai na, ma rosai na kofarkor ro fawar suḇenaine?

¹⁷ Imbude kona aw ḇeḇeso fa kofararmyan nabor syadi wer. Ḇape fyorno ido, aw kofrur nane nambran raris moḇ komarisen ya ḇa. Mgomam contoh Klaus ma Marisa su, ḇeyap ro ḇepon ani. Swaf taun rikyor sufarḇuk ya, subur rum suḇena ḇo suyakso ro fararur babawes ro kantor cabang Finlandia. Ḇape, na suḇarek ro diwa ḇa swaf paik ri wonem. Randakya sufafko. Ḇape fyoro wer ḇa, sor su fa suso kursus wos Arab. Kirine, sumarisen faro fararmyan suḇena ro moḇ ḇeyawos wos Arab ro sup ḇese. Marisa doḇe, ”Fafisu ani, imbe yafrur roi ḇebabo mboi yamgak. Fandun fa yakyar kaku faro Yahwe. Ḇape, yaḇaḇir Yahwe ifnoḇek ker aya kuker nyan yakara ḇa na. Fafisu yambran nakame, yakyar faro Yahwe.” Raris ḇeḇefasnai ro fawar ani, wakyar snar Yahwe nari ḇyebarakas au rofyor wakyar kaku faro I.

18. Rariso imbeswa bisa sfasnai snar sikyar kaku faro Yahwe?

¹⁸ Farḇakḇuk ḇaido fakawawin iso hadiah ḇesyowi kaku ro Yahwe I. (Mat. 19:5, 6) Imarisen insa imbeswa sismai payamyum ro hadiah ani. (Ams. 5:18) Imbeswa ḇefarḇuk babo mgoya, mgokarauser rosai mgosewar ro kankenem mgoḇena. Mgosewar kaku fa mgofasnai faro Yahwe snar mgoḇesyowi kaku hadiah byuk ani ke? Mgoḇenadi faro Yahwe I. Mgosewar farkankin ro Refo na fa nbuki fnoḇek mgo. Ramnai, mgoso anun Yahwe byuk kwar na. Mgofarmyan monda faro Yahwe ido, na mgokyar snar kankenem mgoḇena nari nun aski ma marasrisen!