1. Rosai Yahwe imarisen ro ko na?

YAHWE imarisen kaku faro saswar soasuser. (Hos. 6:6) Imarisen insama kakḇaḇir rarirya. Ro Nabi Mikha, Allah ikofen fandun kaku fa ’koswar saswar soasuser’. (Mi. 6:8, fasfas kasun) Mboi, insama kakḇaḇir rarirya, fandun fa kofawi ḇepon resari saswar soasuser ido rosai rirya.

2. Saswar soasuser ido rosai rirya?

² Wos ”saswar soasuser” ine nasya neḇefas ro Kitab Suci Terjemahan Dunia Baru indokada rarwan ri 200. Ro ”Daftar Istilah Alkitab” ḇero terjemahan ani, saswar soasuser iso: ”Saswar ḇeknam ro wos oser ḇaido ḇaḇeyamk nako faro asas ya, ḇaḇefarmku, soasuser ma fasfesepen ḇesambraḇ kaku. Wos ine sepake ker na faro Allah saswar Ḇyena ḇe snonggaku, ḇape saswar ine kako snonggaku sya sfasnai ḇe min sesya.” Yahwe iso ḇefasnai pyum saswar soasuser. Ro farkarkor ine, nari kawos rariso Yahwe fyasnai saswar soasuser Ḇyena faro snonggaku sya. Ro farkarkor ḇeuser ya, nari kawos rariso Yahwe kawasa Ḇyesi koine koso farari I fa kofasnai saswar soasuser ḇe oso ma ḇesesya.

3. Rosai Yahwe ikofenḇair ḇe Moses ḇefasnaiḇair Manggundi?

³ Fyoro ḇa fyor er Israel sisasyar ro Masir kwar, Yahwe ikofenḇair ḇe Moses kuker snonsnon Ḇyedi ma rari-rari Ḇyena. Ikofen ḇo doḇe, ”Yahwe, Yahwe iso Allah bena sawarwar, snemura, imasasor fasawḇa ma ḇefo kuker saswar soasuser ma napnapes, ḇefasnai saswar soasuser faro snonggaku syaran ma syaran sya. Byuk ampun faro roi ḇesasarna, ḇaḇeyuk, ma sasar.” (Kel. 34:6, 7) Wos ḇepyum nane, Yahwe ikofenḇair ḇe Moses i roi oser ḇefrur saswar soasuser Ḇyedi iba kaku. Mgorama kawos roi ine.

4-5. (a) Rariso Yahwe fyasnaiḇair Manggundi rai? (b) Fakfuken rosai monda nari kawos na?

 ⁴ Yahwe ima dawos monda ḇa snar nya saswar soasuser. Ḇape, Yahwe ikofen snar ’ifo kuker saswar soasuser’. Wos ine kako sap kaḇer ro mnuk dirim ḇese ro Refo. (Mz. 86:15; 103:8; 145:8; Yl. 2:13; Yun. 4:2) Ro mnuk anna kam, wos anna nggurfasnai monda ḇe Yahwe, ma nggurfasnai ḇe snonggaku sya ḇa. Kakuḇae, Yahwe fyasnaiḇair manggundi ker kuker byuk wos ani. Ipyum fafaya kaku. Nane nfasnaiḇair Yahwe ifawi saswar soasuser Ḇyena ifandun kaku. * Iso ḇewar fa Raja Daud ikofen ḇo doḇe, ”Sye Yahwe, saswar soasuser Bena nasof ro farsyos iyaswa . . . Saswar soasuser Bena nemaeja kaku, sye Allah! Romawa snonggaku sya skadaun ro baḇ fadadiren ḇraper Bedi.” (Mz. 36:5, 7) Raris Daud i, ko kako koḇesyowi kaku saswar soasuser Allah Ḇyedi ke?

⁵ Insama kofawi kaku saswar soasuser ya, mgorama kawos fakfuken risuru suine: Faro mansei Yahwe fyasnai saswar soasuser Ḇyena? Ma, payamyum risai monda na kosmai snar kofasnai saswar soasuser?

6. Faro mansei Yahwe fyasnai saswar soasuser Ḇyena?

⁶ Faro mansei Yahwe fyasnai saswar soasuser Ḇyena? Yahwe fyasnai saswar soasuser Ḇyedi faro snonggaku sya kam ḇa. Fyasnai monda faro snonggaku ḇebati fanam kuker I sya. Allah koḇedi fyasnai soasuser faro bati Ḇyesya. Byuk fafisu ḇepyum kaku ḇe si, ma fyasnai pdef saswar Ḇyena faro si.

7. Rariso Yahwe fyasnai saswar Ḇyedi faro snonggaku sya kam?

⁷ Yahwe fyasnai saswar Ḇyena kwar ḇe snonggaku sya kam. Yesus ikofenḇair ḇe snon oso ḇenir Nikodemus, ”Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma [kankenem fyoro].”​—Yoh. 3:1, 16; Mat. 5:44, 45.

8-9. (a) Rosai ḇefnai fa Yahwe fyasnai saswar soasuser Ḇyena ḇe manfamyan Ḇyesi? (b) Rosai nari kawos ro kirine na?

⁸ Raris ḇeḇeyap ḇepon kwar, Yahwe fyasnai saswar soasuser Ḇyena monda ḇe snonggaku ḇebati fanam kuker I sya,  isoine manfamyan Ḇyesi. Roi ine nfasnaibos ro rosai Raja Daud ma Nabi Daniel sukofen na snar susmai farkankin ro Yahwe. Imnis raris, Daud ikofen ḇo doḇo, ”Fasnaiḇair saswar soasuser Bena pdef ḇe snonggaku ḇemambir Au.” Daud i kako doḇe, ”Saswar soasuser Yahwe Ḇyedi isya pdef faro snonggaku ḇesyowi I.” Ma Daniel doḇe, ”Sye Yahwe, Allah ḇekaku, . . . ḇefasnai saswar soasuser ḇe snonggaku ḇeswar I ma ḇesoasuser faro parenta Ḇyena.” (Mz. 36:10; 103:17; Dan. 9:4) Inja nasnai kaku, Yahwe fyasnai saswar soasuser Ḇyena ḇe manfamyan Ḇyesi snar smambir I, sesyowi I, siswar I, ma sisoasuser faro parenta Ḇyena. Kaku, Yahwe fyasnai monda saswar soasuser Ḇyena ḇe snonggaku ḇesyom I sya kuker nyan imarisen na.

⁹ Fafisu koḇe Yahwe manfamyan Ḇyedi ḇaim, koḇaḇir kwar saswar fyasnai ḇe snonggaku sya kam. (Mz. 104:14) Ḇape kirine, koḇe manfamyan Ḇyedi kwar, ko kako koḇaḇir saswar soasuser Ḇyedi. Yahwe byuk kakyar kaku ḇe manfamyan Ḇyesi, doḇe, ”Saswar soasuser Ayena nari nabur Au ḇa.” (Yes. 54:10) Raris Daud ismai ro manggundi na, ”Yahwe nari myanmin kaku manfamyan ḇesouser Ḇyesi”. (Mz. 4:3) Rofyor kofawi snar Yahwe ima iswar kaku ko ido, rosai fandun fa kofrur ya? Ro Yahwe farkankin Ḇyena, manfasfas Mazmur oso byuk anun ine: ”Mansei rirya ḇefawinanem nari myam kaku roi ine ma kyaruser pyum saswar soasuser Yahwe fyasnai na.” (Mz. 107:43) Inja, mgorama kawos nyan rikyor Yahwe fyasnaiḇair saswar soasuser Ḇyena ma rosai payamyum ḇyena ḇe ko.

10. Payamyum risai kosmai na snar saswar soasuser Yahwe Ḇyedi isya isof fyoro? (Mazmur 31:7)

¹⁰ Saswar soasuser Allah Ḇyedi isya isof fyoro. Roi ine ḇyeḇeyap rarwan ri 26 ro Mazmur 136. Ro mnuk ḇerandak, kowasya, ”Kokofen kasumasa faro Yahwe, snar ifrur pyum; saswar soasuser Ḇyena isya isof fyoro.” (Mz. 136:1) Ro mnuk 2 isof ro 26, wos ”snar saswar soasuser Ḇyena isya  isof fyoro” ḇeḇeyap kaḇer ker. Rofyor kowasya Mazmur ine kam ido, na komanen kaku snar nfasnaiḇair nyan sarirya Yahwe fyasnai saswar soasuser Ḇyena ḇesya kwar. Wos ”snar saswar soasuser Ḇyena isya isof fyoro” nbuk kakakyar kaku ḇe ko snar saswar Allah Ḇyedi faro kawasa Ḇyesya napok nefararwe ḇa. Wos ine nbuk samambraḇ kaku ḇe ko snar kofawi Yahwe nari ibur manfamyan Ḇyesi rarirya monda ḇa. Ḇape, Yahwe nari iswar ma ryous ḇesya kwar snonggaku ḇefarmyan I sya, ro fafisu ḇesamswen. Payamyum faro ko: Snar kofawi Yahwe nari ibur ko ḇaḇeri, na kosambraḇ ma koryaḇ pdef. Rarirya, na kofrur mnis samswen sarirya kosmai na ma kofarmyan pdef ḇe Yahwe.​—Wasya Mazmur 31:7.

11. Ro Mazmur 86:5, rosai ḇefrur Yahwe imarisen byuk ampun?

¹¹ Saswar soasuser Allah Ḇyedi nafrur I fa imarisen byuk ampun. Fyor Yahwe myam snonggaku oso imbror ro sasar ḇyena kwar, ma imnai ifrur roi ḇesasar na, saswar soasuser Yahwe Ḇyena nafrur I fa imarisen byuk ampun ḇe snonggaku ani. Daud ikofenḇair kuker Yahwe, ”Na ḇyehukum ko ḇa imnis sasar kofrur na, ḇaido myunsu ko imnis sasar koḇena.” (Mz. 103:8-11) Daud raso ḇyaḇir ro manggundi snar sneḇaḇir ḇesasar nakyaren i kaku. Ḇape, Daud ifawi kako snar Yahwe ima Allah ”ḇemarisen ḇebuk ampun”. Rosai ḇefrur Yahwe imarisen byuk ampun? Kankarem ḇyena isya ro Mazmur 86:5. (Wasya.) Kakuḇae, raris roi Daud ikofen ro nadi ḇyena, Yahwe imarisen byuk ampun snar saswar soasuser Ḇyena naba faro snonggaku ḇeyor faro I sya kam.

12-13. Fyor sneḇaḇir ḇesasar nakyaren ko snar sasar ro fyor iwara na, rosai na ḇefnoḇek koni?

¹² Fyor kofrur sasar, na koḇaḇir kosasar kwar mboi ine roi ḇesasar risyaḇa. Ma, sneḇaḇir ḇerarya nama napyum. Nane nadif ko fa kombror ma kofadwer kenem ḇesasar koḇena. Mboi, Allah manfamyan riḇeso Ḇyesi sbuk sasar ker ḇe si snar sasar sifrur ro fyor iwara na. Simbror kaku kwar ro sasar sifrur na, mboi sḇaḇir kaker Yahwe nari ipok byuk ampun ḇe si ḇa. Iso  ḇaḇir ya ido, rosai na ḇefnoḇek Au? Fandun fa kwarauser snar Yahwe imarisen kaku fa fyasnai saswar soasuser Ḇyena faro manfamyan Ḇyesi.

¹³ Payamyum faro ko: Imbape konapes ḇa raryano, na koryaḇ fa kofarmyan ḇe Yahwe kuker sneuser ḇesren, snar ”Allah Rumkun ḇyedi, Yesus rik ḇyena, nfasren sasar ḇeḇor koḇena kam”. (1 Yoh. 1:7) Rofyor wafafko snar sasar wafrur na, waswarepen snar Yahwe imarisen kaku byuk ampun ḇe Au fyor wambror kaku kwar. Mam pan rariso Daud byukifasepen saswar soasuser Yahwe Ḇyedine kuker ḇaḇeampun Ḇyedi. Daud fyas, ”Raris farsyos iyaswa ikaki syadi ro supswan, rarirya baba ro saswar soasuser Allah Ḇyedi faro snonggaku ḇesyowi I sya. Raris swaf ro oridek isof ro orisyun, swaf ya ryariri sasar koḇena isawen na ḇinkwanbur ko.” (Mz. 103:11, 12) Kaku ya, Yahwe imarisen kaku ”byuk ampun kuker snemura”.​—Yes. 55:7.

14. Rariso Daud fyasnaiḇair saswar soasuser Allah Ḇyedi kyadaunwarek ko?

¹⁴ Saswar soasuser Allah Ḇyedi kyadaunwarek wis koḇena kuker I. Ro Daud nadi ḇyena ḇe Yahwe, ikofen ḇo doḇe, ”Faro Au yayokef; nari kwadaunwarek Aya ro samswen na. Marasrisen isya ro ris yedi snar faspar aya. . . . Snonggaku ḇekyar faro Yahwe nari saswar soasuser Ḇyedi ryo ris sedi.” (Mz. 32:7, 10) Ro fafisu iwara, ayar karui ḇeyar kota oso na kyadaunwarek kawasa ḇero kota ani. Raris ayar karui ani, saswar soasuser Yahwe Ḇyedi iyarwarek ko ma kyadaunwarek ko ro rosai rirya monda na ḇefrur muk ḇaḇebati koḇena kuker I. Saswar soasuser Yahwe Ḇyedi kako nadif I fa dun ko ḇe I.​—Yer. 31:3, ma fasfas kasun.

15. Rosai ḇefnai fa saswar soasuser Yahwe Ḇyena imnis kuker moḇ ḇekadaunwarek ma ayar karui?

¹⁵ Daud byuk contoh ḇese fa fasnaiḇair rariso Allah kyadaunwarek kawasa Ḇyesi. Fyas ḇo doḇe, ”Allah iso moḇ fadadiren ḇepyum ḇe aya, Allah ḇefasnai saswar soasuser faro aya.” Daud i kako ikofen ḇekur Yahwe: ”Fyasnai saswar soasuser Ḇyedi faro aya ma ima ayar karui ayedi, manfaspar ayedi ma moḇ ḇekadaunwarek aya, adai yedi ma moḇ yafadiren.” (Mz. 59:17; 144:2, fasfas kasun) Rosai ḇefnai fa Daud byukimnis saswar soasuser Yahwe Ḇyena kuker moḇ ḇekadaunwarek ma ayar karui? Ro moḇ risai kosya rona, fyor kosyom ḇe Yahwe, nari kyadaunwarek ko insama komamwarek ḇaḇebati koḇena kuker I. Mnuk ḇeḇeso ro Mazmur 91 nbuk kakakyar ḇe ko kako kuker roi ine. Manḇefas mazmur doḇe, ”Nari yakofen faro Yahwe, ’Auso moḇ kadaunwarek ayedi ma ayar karui ayedi.’” (Mz. 91:1-3, 9, 14) Moses byuk wos ḇemnis kako fa ḇyeḇair kadaunwarek ro Yahwe. (Mz. 90:1, fasfas kasun.) Osower ido, kawan ḇa fyor imar ḇaim, Moses byuk wos ḇepyum nane fa fyasnaiḇair roi ani. Fyas ḇo doḇe, ”Allah iso moḇ ḇekadaunwarek ro fafisu iwara, ḇramin ḇyedi ḇesya fyoro-fyoro nari ifnoḇek au.” (Ul. 33:27) Ro wos ”ḇramin ḇyedi ḇesya fyoro-fyoro nari ifnoḇek au”, rosai kofarkor ro Yahwe I?

16. Payamyum risuru risai na kosmai na? (Mazmur 136:23)

¹⁶ Fyor kokyar kaku Yahwe na kyadaunwarek ko ḇesya kwar, na kosya ro payamyum ya. Ḇape fyorno ido, imbude kokara koḇyeḇa kaku ma samswen fa koryaḇ kaḇer. Ro fafisu ḇerarirya na, rosai nari Yahwe ifrur fa ifnoḇek ko? (Wasya Mazmur 136:23.) Nari isaramper  ko kuker ḇramin Ḇyedi ma kuker myaren ifnoḇek ko fa koryaḇ kaḇer wer. (Mz. 28:9; 94:18) Payamyum faro ko: Snar kofawi Allah iso kokyar kaku ḇesya kwar, inja na kosmai payamyum risuru suine: Ḇepon ya, ro moḇ diso koḇarek ya, kokyar kaku snar kona moḇ ḇekadaunwarek ḇepyum. Ḇesuru ya, na koḇaḇir Kma ḇesaswar koḇedi myam ko.

17. Roi risai nari kokyar kaku ya? (Mazmur 33:18-22)

¹⁷ Imnis ra kawos kwar, rofyor kosmai samswen, na kokyar kaku snar Yahwe nari ifnoḇek ko insama kosouser pdef faro I. (2 Kor. 4:7-9) Nabi Yeremia doḇe, ”Snar saswar soasuser Yahwe Ḇyedi, koḇeḇemun ḇa. Snar sawarwar Ḇyena namnai ḇa.” (Rat. 3:22) Kokyar kaku snar Yahwe nari fyasnai ker saswar soasuser Ḇyena faro ko snar Refo doḇe ”Yahwe mgamor ḇyesuya myamwarek snonggaku ḇesyowi I sya, ḇemarisen faro saswar soasuser Ḇyena”.​—Wasya Mazmur 33:18-22.

18-19. (a) Rosai na koswarepen kaku ya? (b) Rosai nari kawos ro farkarkor ḇeuser ya?

¹⁸ Rosai fandun fa koswarepen ya? Fyor koḇe Yahwe manfamyan Ḇyedi ḇaim, koḇaḇir kwar saswar fyasnai ḇe snonggaku sya kam. Ḇape kirine, koḇe manfamyan Ḇyedi kwar inja kakḇaḇir kako saswar soasuser Ḇyena. Saswar soasuser Yahwe Ḇyedi nadif I fa kyadaunwarek ko. Myam kaku insama kofanam kuker I ḇesya kwar. Ma nari ifrur asas Ḇyena ḇe ko. Imarisen koḇebati kuker I isof fyoro. (Mz. 46:1, 2, 7) Inja, samswen rosai rirya kosmai na, Yahwe nari byuk samambraḇ kofandun na insa kosouser pdef.

¹⁹ Kawos kwar nyan sarirya Yahwe fyasnaiḇair saswar soasuser Ḇyedi ḇe kawasa Ḇyesi. Yahwe I kako imarisen insa kofasnai saswar soasuser faro oso ma ḇesesya. Rariso kofrur roi ani rai? Ro farkarkor ḇeuser ya, nari kawos farkarkor ḇefandun kaku ine.