1. Fakfuken risai imbude kokara na?

ROFYOR kwara faro sarisa nari ḇeḇejadi fyoro wer ḇa isoine agama ḇekaku ḇa ḇyeḇemun pres, roi Gog ma Magog ifrur na, ma mamamun Armagedon nane ido nafrur fa wamgak ke? Imbude kwara radine, ’Rofyor papupes dunya ine nejadi na yasouser pdef ḇo yamgak ḇa ke?’ Kwara rarirya ido, farkarkor ine nari ḇyuk fainda ḇe Au. Nari kawos Yesus wos ḇyena ro farkarkor imbe kawos ine. Ikofen ḇe manfamyan ḇyesi, ”Mkosnemna neḇirḇar awer; mkokyar faro Allah.” (Yoh. 14:1) Rofyor kakyar koḇena nsambraḇ kaku, nari nafnoḇek ko fa komgak ḇa faro roi na ḇeḇejadi ro fafisu iyama.

2. Rariso kosambraḇser kakyar koḇena ma rosai nari kawos ro farkarkor ine?

² Ro kirine, kosmai fafrowes ro kakyar ya nabore. Fyor kofawi nyan fa kofrur mnis na ido, na kosambraḇser kakyar koḇena. Na kofawi ro roi risai monda kosambraḇser kakyar koḇena. Inja, fafisu komkeibur farawrowes na, kakyar koḇena nsambraḇ syadi. Nfasos ko fa kofrurmnis samswen ro ras ḇarpon iyama. Ro farkarkor ine, nari kawos roi rifyak Yesus mamfamyan ḇyesi sismai na, ḇefasnai sifandun kakyar ḇesambraḇ syadi. Ramnai, nari kawos fafisu kaksmai roi ḇerarya ro kirine ido, moḇsa komam na rai ma rariso roi anna nfasos ko faro roi na ḇeḇejadi ro ras ḇarpon iyama.

3. Imnis ḇeḇefas ro Matius 6:30, 33, rosai Yesus ikofen kaku kuker kakyar ya?

³ Ḇebukor ro kina oso imarisen fa fyasos roḇean, sansun, ma moḇ ḇeḇarek faro swari ma romawa ḇyesya. Ḇape, kokenem ro fafisu ḇesamswen inja nari napyan  ḇe i ḇa. Faro naek srar riḇeso sifararur wer ḇa kwar, ma sḇensewar kaku kwar fa sna fararur ḇoi sismai ḇaim. Ono spampum fararur oso snar nasrow kuker ko ḇe snonggaku Kristen ḇa. Inja, rofyor kosmai roi ḇeradine, kokyar kaku Yahwe nari myam fa fyamfon fandandun koḇena ro kina. Iso ḇefnai fa Yesus dawos ḇe manfamyan ḇyesi fyor ikofen Faya ḇyedi ro Urekbon. (Wasya Matius 6:30, 33.) Inja fyor kokyar kaku snar Yahwe nari ibur ko ḇa, na komam monda faro fararmyan koḇena ḇe Yahwe I. Ma fyor komam rariso Yahwe fyamfon roi kofandun na, nari kofanam syadi ḇe I ma kakyar koḇena nasambraḇ syadi.

4-5. Rosai ḇefnoḇek kina oso fyor skoḇeḇirḇar kuker fandandun rasras skoḇena?

⁴ Castro kina ḇyedi ro Venezuela skoḇaḇir rariso Yahwe ifnoḇek sko fyor skoḇirḇar kuker fandandun skoḇena. Fyor iwara, Castro kina ḇyedi skona pipi nabor snar skona yaf ro manggunsko. Ḇape ḇarpur ya, snonggaku ḇeyuf romamun sun yaf skoḇena bur sko ma sidif sko fa skobur moḇ ani. Miguel, doḇe, ”Kirine nggofararur ro yaf kasun nggor ro snonggaku ḇesesya. Ro arwo nakam, yaḇenadi insama Yahwe fyamfon fandandun nggoḇena ro ras ani.” Kankenem skoḇena napyan ḇa, ḇape skokyar kaku Kma ḇesaswar na fyamfon fandandun rasras skoḇena. Kina anine skoso kako fananjur ma skobaryas ker. Skomam ḇepon fararmyan skoḇena faro Yahwe, inja Yahwe myam fandandun rasras skoḇena.

⁵ Rofyor skosmai samswen ani, Miguel ma swari, Yurai i, sukarauser ker rariso Yahwe ifnoḇek sko rai. Fyorno ido, sumam Yahwe byuk naek srar sya fa sfasos fandandun skoḇena ḇaido sifnoḇek Miguel fa nya fararur. Fafisu ḇese, Yahwe fyasos fandandun skoḇena roro bantuan kemanusiaan ḇerama ro kantor cabang. Yahwe ipok ibur sko ḇa. Kina anine kakyar skoḇena nsambraḇ kaku. Miguel inai ḇeba ḇyedi, Yoselin i, fyawar fawar oso ḇefasnai rariso Yahwe ifnoḇek sko raya. Fyawar fawar ani ramnai, ikofen, ”Yamam kaku Yahwe bramin Ḇyedi ifnoḇek inggo, ma syambraḇser aya. Yamam Yahwe I ḇe Bati yakyar kaku ro kankenem yedi.” Ikofen wer ḇo doḇe, ”Samswen kina nggoḇedi nggosmai na nfasos syadi nggo faro samswen ḇeba syadi na ḇerama ro fafisu nayama.”

6. Rofyor wasmai samswen fa famfon fandandun rasras bena ido, rariso wasambraḇser kakyar bena rai?

⁶ Ausya nwa samswen ro fandandun rasras na ke? Rarirya ido, ine fafisu ḇesamswen ḇe Au kaku. Rariryano, na buk fafisu ḇesamswen bena fa wasambraḇser kakyar bena. Ḇenadi faro Yahwe I, wawasya Yesus wos ḇyena ro Matius 6:25-34, ma kwarauser wos anna. Kwara kako fawar ḇero baboine ḇefasnai  kaku Yahwe fyasos ḇesya kwar fandandun snonggaku ḇefakapon fararmyan ya. (1 Kor. 15:58) Fyor wafrur roi anna ido, nari wakyar kaku Yahwe nari ifnoḇek Au ḇesya kwar, raris ifnoḇek snonggaku ḇese ḇesmai samswen ḇerarirya. Ifawi rosai wafandun na, ma ifawi nyan fa fyamfon fandandun bena. Rofyor mam fafnoḇek Yahwe Ḇyena ido, nari kakyar bena syambraḇ kaku ma nfasos Au faro samswen ḇemarḇak wasmai ro ras nayama.​—Hab. 3:17, 18.

7. Imnis Matius 8:23-26, rariso ”wamdoḇer ḇeba” ifrowes kakyar ro manfamyan sya?

⁷ Rofyor Yesus ma manfamyan ḇyesi sisya ro wai yadori, sikandor monda wamdoḇer ya myun si. Yesus byuk roi ḇeḇejadi ani fa ifnoḇek manfamyam ḇyesine fa sfawi kaku snar fandun fa sisambraḇser kakyar sena. (Wasya Matius 8:23-26.) Wamdoḇer ḇemun si iba fafaya kaku, ma war nasun ro wai yadori. Ḇape, Yesus denef kaker. Snar mamfamyan ḇyesi simgak kaku, sban Yesus fa fyaspar si. Yesus kuker myaren isonek si, ”Snaro mkomkak, mkokyar mankunba?” Manfamyan ansine fandun fa sfawi snar Yahwe na kyadaunwarek Yesus ma snonggaku ḇewarpu insya. Rosai kofarkor ro roi nane? Kakyar ḇesambraḇ kaku na nafnoḇek ko fa komkeibur ”wamdoḇer ḇeba”, isoine wamdoḇer kosmai kaku ḇaido roi ḇeḇair faro roi ine.

8-9. Rariso Anel kakyar ḇyena neḇefrowes rai, ma rosai ḇefnoḇek i?

⁸ Mam pan Anel, imbesrar ḇefarḇuk ḇaim oso ro Puerto Riko fawar ḇyena. Moḇsa kakyar ḇyena nsambraḇ syadi fyor imkeibur fafisu ḇesamswen ḇyena. Ismai wamdoḇer ḇeba ḇekur i. Ro taun 2017, wamdoḇer ḇeba Maria kyakok Anel rum ḇyedi. Snar wamdoḇer ani, nafrur ismai fararur wer ḇa. Anel ikofen, ”Fafisu ḇesamswen ani, yaḇeḇirḇar kaku. Ḇape, yakyar kaku ḇe Yahwe kuker yaḇenadi ḇesya kwar ḇe I ma yamewer yaḇeḇirḇar kakerdi.”

⁹ Anel doḇe snar soasuser ifnoḇek kako i fa imkuepen. Fyawar ḇo doḇe, ”Snar yasouser farkankin ḇerama ro organisasi, inja yaknon kaku. Yahwe byuk fafnoḇek roro naek srar sya fa sisambraḇser aya. Ma sbuk roi yafandun na.” Ikofen wer ḇo doḇe, ”Yahwe byuk syadi ro roi yor na, ma ine nafrur kakyar yena nsambraḇ kaku.”

10. Rosai na wafrur ya fyor wasmai ”wamdoḇer ḇeba”?

¹⁰ Ausya wasmai ”wamdoḇer ḇeba” ke? Imbude wasmai samswen snar waksmai rim ḇeba. Ḇaido, imbude wasmai roi ḇeḇair raris wamdoḇer ḇeba, imnis ra waduf dafduf ḇemarḇak, ḇefrur fa ḇesanekar ma wafawi roi imbe wafrur kaku ya ḇa. Nafrur fa ḇeḇirḇar kaku. Ḇape roi  anna nafrur awer Au fa wakyar faro Yahwe I wer ḇa. Wafanam ḇe I wor kaku ro nadi bena. Wasambraḇser kakyar bena kuker kwarauser rariso Yahwe isya ifnoḇek Au kwar. (Mz. 77:11, 12) Wakyar kaku Yahwe nari ibur Au ḇaḇeri.

11. Rosai ḇefnai kun snemuk fa kosouser naek ḇefarkin ko ro organisasi sya?

¹¹ Rosai na ḇefnoḇek Au fa wafarmku? Raris Anel dap kwar ani, soasuser ine fyandun kaku. Ḇensewar kaku fa wakyar faro snonggaku Yahwe ma Yesus sukyar kwar sya. Fyorno ido, naek ḇefarkin ro organisasi sbuk farkankin ma mam rya nsun ro swaruser koḇena ḇa. Ḇape, kosouser pdef ido, Yahwe nari ḇyebarakas ko. Ro Wos Ḇyena ma fawar ro manfamyan ḇesouser Ḇyesi, kofarkor snar soasuser ine bisa fyaspar kenem koḇena. (Kel. 14:1-4; 2 Taw. 20:17) Inja kwarauser fawar annane. Rarirya, na wun snemuk kaku fa wasouser farkankin ḇerama ro organisasi, imbude sbuk ro kirine ḇaido fafisu iyama. (Ibr. 13:17) Wamgak ḇa kwar faro wamdoḇer ḇeba syadi, nari kerower ḇerama ya.​—Ams. 3:25.

12. Imnis sarḇer ḇero Lukas 18:1-8, rariso kakyar ifnoḇek ko fa kofarmku fyor sifrur roi ḇenapes ḇa faro ko?

¹² Yesus ifawi roi ḇenapes ḇa na bisa nafrowes kakyar ro manfamyan ḇyesi. Insama ifnoḇek si fa sisambraḇ, fyawar sarḇer oso ḇeḇefas ro syap Lukas. Yesus fyawar kuker bin kabom oso ḇeyor ḇesya kwar nanapes ro mankara ḇeḇarḇor oso. Bin kabom ani ikyar kaku fyor dor ker ido, mankara ani ḇarpur ya nari ifnoḇek i. Ma kaku, mankara ani ḇarpur ya byuk roi dor na. Rosai kofarkor ro sarḇer ine? Yahwe ima Allah ḇenapes ḇa risyaḇa. Inja, Yesus doḇe, ”Nari Allah ḇyuk nanapes faro snonkaku kyinfir kwarsya, ma ḇeyori, ro roḇ meser syaḇake?” (Wasya Lukas 18:1-8.) Ramnai Yesus ikofen wer, ”Rofyor Rumkun Snonkakuya ryama ido, nari isma kakyaro ro supswan ine kakerke?” Rofyor sifrur pyum ko ḇa, fandun fa kokaḇaḇaḇ ma kofarmku. Kofrur rarirya ido, kofasnai kaku snar kona kakyar ḇesambraḇ raris bin kabom ani. Kakyar ḇesambraḇ ḇerarirya nafrur kokyar kaku snar kerower nari Yahwe ifnoḇek ko. Ko kako kokyar kaku snar nadi nbuk roi ḇepyum kaku. Fyorno ido, komam nadi koḇena imbude neḇekarem kuker nyan kokara ḇa na.

13. Moḇsa nadi ifnoḇek kina oso ḇesmai roi ḇemnis ḇa?

¹³ Mam fawar ro imbesrar oso ḇenir Vero, ḇeḇarek ro Republik Demokratik Kongo. Vero, swari ḇena kakyar oser kukeri ḇa, ma inai suḇedi ḇeḇeumur 15 fandun fa skofrarbur mnu skoḇeja kukro tentara riḇeso sya sisun ro mnu ani. Ro nyan ya faduri, tentara riḇeso sya sidwarek sko ma sikofen na smun sko fa  skomar. Vero ryower sawos rarya mura kyanes. Insama iknon, inai byani Vero i, ḇyenadi naba kaku ma dap kaḇer ker Yahwe snonsnon Ḇyedi. Fafisu inadi ramnai, ḇebukor ro tentara ansya ifuken, ”Mansei ḇefarkor au fa ḇenadi ya?” Kyarem ḇo doḇo, ”Awin iso ḇefarkor ayani. Awin byuk contoh nadi ḇero Matius 6:9-13.” Ḇebukor ro tentara ani doḇe, ”Au kukro sinan bansuya mgora mura kwar. Iḇye kada Yahwe Allah mgoḇedi ryous mgo!”

14. Fafisu risai imbude ḇefrowes kakyar koḇena, ma rosai na ḇefnoḇek ko fa kofarmku pdef?

¹⁴ Ro fawar ani, kofarkor snar komam kyur awer nadi ya. Ḇape, fyor nadi bena neḇekarem ḇeri ḇa, imbude neuji kakyar bena. Rosai na ḇefnoḇek Au fa wafarmku pdef? Raris bin kabom ro Yesus sarḇer ḇyena, benadi ḇesya kwar. Wakyar kaku Allah nari ipok ibur Au ḇaḇeri. Ro fafisu ya, nari kyarem nadi bena kuker nyan oso ḇese. Wor pdef rur ḇesren ro Yahwe. (Flp. 4:13) Waswarepen snar kero wer, Yahwe nari ḇyebarakas Au rawo waswarepen wer ḇa kandera ḇebor wasmai na. Fyor wafarmku pdef ro samswen bena ma mam Yahwe fafnoḇek Ḇyena, nari wasambraḇ syadi ma nfasos syadi Au faro fafrowes ḇerama ro ras ḇarpon iyama.​—1 Ptr. 1:6, 7.

15. Raris ḇeḇefas ro Matius 17:19, 20, roi ḇedwarek risai Yesus manfamyan ḇyesi sismai na?

¹⁵ Yesus fyarkor manfamyan ḇyesi snar kakyar ya nari nafnoḇek si fa sifrur mnis roi ḇedwarek si na. (Wasya Matius 17:19, 20.) Randak ya, Yesus manfamyan ḇyesi siyawbur rur ḇemambak rarwan riḇeso kwar, ḇoi ras oso, jadi fa siyawbur rur ḇemambak ya ḇa. Rosai ḇefnai i? Yesus ikofenbos ḇe si snar fandun fa sna kakyar ḇeba syadi. Ikofenḇair ḇe si fyor sna kakyar ḇesambraḇ ido, na sifrur samswen ḇaido roi ḇedwarek ḇeba sismai na raris Urek! Kirine, imbude ko kako kaksmai samswen ḇaido roi ḇedwarek ḇeba kaku ma kokara kosambraḇ ḇa fa kofrur mnis na.

16. Rariso kakyar ifnoḇek Geydi fa fyarmku rofyor smun swari fa imar?

¹⁶ Mam Geydi, imbesrar oso ḇeramaker Guatemala fawar ḇyedi. Smun swari, Edi i, fyor isya imbran ibur ro fananjur. Rariso Geydi kakyar ḇyena nasambraḇser i fafisu ḇyesneso kaku? Doḇe, ”Kuker yaḇenadi, yasawen roi marḇak yasmai na ḇe Yahwe I. Nafrur yaknon kaku. Yamam fafnoḇek Yahwe ḇyena ro kina ma bati ayesi ro sidang. Aya kako snar yamam monda faro fararmyan yena ḇe Yahwe, nafrur fa yaḇesneso ker ḇa. Osower ido, yaḇeḇirḇar manggunḇa ma yambran kankenem ine imnis ras ḇe ras. Ro fawar ine, yafarkor rosai rirya nari yasmai ro ras ḇarpon nayama, yakyar na yafarmku pdef kuker fafnoḇek ro Yahwe, Yesus, ma organisasi Ḇyedi.”

17. Rosai kofrur ya rofyor kosmai samswen ḇaido roi ḇedwarek ḇemnis raris bon?

 ¹⁷ Ausya wafafardun snar snonggaku waswar sya simarbur Au ke? Swambraḇser kakyar bena faro saneraro kaḇakḇok ya kuker wawasya farfyar ḇekur kaḇakḇok ḇeḇefas ro Refo. Ausya ḇesneso snar ḇero kina bedi oso sisasyarburi ro sidang ke? Wafrur farkarkor manggun insama wafawi kaku snar aprer ḇerama ro Allah nbuk payamyum ḇesya kwar. Inja, samswen sarirya wasmai na, buk swaf ani fa wasambraḇser kakyar bena. Wakofenḇair roi ḇero snembri ḇe Yahwe. Ḇero manggundaw awer, ḇape fanam pdef kuker naek srar sya. (Ams. 18:1) Wafrur fararur na ḇefnobek Au fa wafarmku pdef, imbape na wakanes fyor wafrur roi anna. (Mz. 126:5, 6) Waso fananjur, ḇaḇebaryas, ma wawasya Refo ya pdef. Ma, kwara faro barakas ḇeba Yahwe ḇyeasas ḇe Au kwar na. Fyor mam rariso Yahwe ifnoḇek Au raya, kakyar bena faro I nari syambraḇ kaku.

18. Fyor ḇaḇir kakyar bena nsambraḇ kuf ḇa, rosai na wafrur ya?

¹⁸ Ro nyan wafrur mnis samswen bena ro ḇepon iwara ma kirine, imbude ḇaḇir kakyar Bena nsambraḇ kuf ḇaim. Ḇape, ḇesanekar awer. Buk swaf ine fa swambraḇser kakyar Bena. Manwawan sya sor roi ine faro Yesus, ”Buk sambraḇ maḇe nko ro kakyarya.” (Luk. 17:5) Au kako bisa wor roi ḇerarirya. Osower ido, kwarapan fawar kawos kwar ro farkarkor ine. Raris Miguel ma Yurai, waswarepen roi nakam Yahwe ifrur kwar na fa byukifnoḇek Au. Raris Vero inaikir ḇyedi ma Anel, benadi kaku faro Yahwe, ḇesyadi ya fyor wasmai samswen ḇeba kaku. Ma raris Geydi, waswarepen snar Yahwe imbude ifnoḇek Au roro kina ḇaido bati besya. Rofyor wamarisen wasmai fafnoḇek ro Yahwe fa wafarmku pdef ro samswen bena ro kirine na, nari wakyar syadi snar na ifnoḇek Au ro samswen sarirya ro ras ḇarpon nayama.

19. Yesus ikyar kaku faro roi risai, ma wakyar kaku faro roi risai?

¹⁹ Yesus ifnoḇek manfamyan ḇyesi fa sifawi ro roi risai monda fandun fa sisambraḇser kakyar sena. Ḇape, Yesus ḇyeḇirḇar ḇaḇeri kuker fafnoḇek Yahwe Ḇyena, na sfarmku pdef ro samswen sismai na ro ras nayama. (Yoh. 14:1; 16:33) Osower ido, Yesus ikyar kaku snar raryur ḇeba snonggaku ḇemkei ro kandera ḇeba sisya snar sna kakyar ḇesambraḇ. (Why. 7:9, 14) Au kako nari ausya rofandu snonggaku ansine ke? Kuker fafnoḇek ro Yahwe, na ausya rodiwa kako, fyor ḇesewar kaku fa wasambraḇser kakyar Bena ro kirine ḇeri!​—Ibr. 10:39.