YAḆEABEN taun 1923 ro Hemsworth, mnu oso ḇero Yorkshire, Inggris. Eba yedi snoriso Bob. Rofyor yaḇeumur taun risiw, kamam yedi isma syap ḇeḇeso ḇefasnaḇair agama ḇekakuḇa ḇeyankar snonkaku sya. Kamam yedi imarisen kaku faro rosai iwasyana. Imarisen faro manfarkin agama sya ḇa snar sifarkor roi oso ḇape sifrur roi ḇesena. Taun ḇeḇeso ramnai, naek Bob Atkinson ryama ḇe rum nkoḇedi ma ḇyuk rekaman oso ro faya Naek Rutherford i. Nkokyar faya ine ndrama ro raryur ḇefrursae syap-syap Kamam yedi iwasya anna. Sinan ayesu suyor Naek Atkinson fa dan kayam kuker nko ro roḇ nakam ma kyarem fakfuken nabor nkoḇena ro Refoya. Dor inko fa nkakso fananjur ro naek oso rum ḇyedi ḇeḇinkwan kuker rum nkoḇedi. Nkoso fananjurya pdef, ma fyoro mura sidang kasun oso isya ro Hemsworth. Ramnai, hamba zona (kirine sap si ḇe pengawas wilayah) ḇyarek ru rum nkoḇedi ma perintis ḇero sidang ḇefanam kuker inko srama fa sanan kayam kuker inko. Naek srar ansine sḇuk farari ḇepyum kaku ḇe aya.

Fafisuya kina nkoḇedi insape nkofrur bisnis. Ḇape, Kamam yedi ikofen ḇe eba yedi, ”Ḇe merintis kwar ido, nari koḇoḇ bisnis koḇena.” Bob imarisen, ma ḇyeperintis rofyor ḇyeumur taun ri 21. Taun risuru ramnai, yaksun ro fararur perintis rofyor yaḇeumur taun ri 16. Ras Sabtu ma Minggu ido nari yafararur kayam kuker naek srar sya, ḇape ras ḇesena yaḇaryas ro mankundaya. Yaḇaryas kuker yaḇuk ponograf ma kartu kesaksian, isoine kartu kasun ḇeser anun ḇeknampu ḇero Refo. Yahwe ḇyebarakas aya rofyor snonkaku ḇefarkor Refo kuker aya isur ro ḇaḇerurya. Ma snonkaku ani kina ḇyesikam sifarkor Refo ma saksun ro napnapes. Taun ḇeuserya, yasma fararur ḇe perintis istimewa kuker Mary Henshall. Siwan nuḇe moḇ Saksi sisya rodiyaḇa ro sup Cheshire.

Ro fafisu Perang Dunya II, binsya fandun fa sifararur fa sifnoḇek ro mamamunya. Rohaniwan agama ḇesesya sisma ḇaḇemkei fa sakso ro mamamun  yaḇa, inja yakara snar ayaine perintis istimewa, inja nari yaksma ḇaḇemkei radirya. Ḇape, pengadilan imarisenḇa, inja yasmai ro bui ras ri 31. Taun ḇeuserya, rofyor yaḇe umur 19, yara ḇe pengadilan kali risuru syadi snaro sneuser yedi nadwarek aya fa yakso ro mamamunya. Ḇape, bena papoik sya siwan aya fa yabur. Faro rosai yasma nane, yafawi snar Allah rur ḇesren Ḇyeja nafnoḇek aya ma Yahwe ifrur fa yasambraḇ ma yores nako pdef.​—Yesaya 41:10, 13.

Arthur Matthews ma aya nusrow randak nu ro 1946. Arthur insape ismai ro bui paik rikior snar pyampum fa iso ro mamamunya. Rofyor syae ro bui, fyararur kayam ḇe perintis istimewa kuker srar ḇyedi, Dennis i ro Hemsworth. Kamam suḇedi fyarkor su kuker Yahwe I rofyor subabaya, ma suḇebaptis rofyor suḇe snonkbor. Ramnai, susun kayam ro fararur perintis, Dennis isma fararur ḇe Irlandia. Inja, Arthur fyarmyan ro mankundi. Sinan ayesu sumarisen kaku faro fararur marḇak suḇena ḇe perintis. Inja, suyor Arthur i fa ḇyarek kuker su. Rofyor yarama ḇe rum, Arthur ma aya siwan nufa nubamban rofyor nkonan kwar. Ro fafisuya nufaremyaye syapram. Ro fafisu 1948, Arthur ismai ro bui paik rikior wer. Nufarḇuk ro Januari 1949, ma cita-cita nuḇedi rofyor nusambraḇ ido, numarisen nuro fararmyan ro oras nakam ine pdef. Nuḇesasor pipi nusmana, ma rofyor liburan ya nuḇuk oras ya fa nukum aibon insama nusma kumpan kermkun. Snar barakas ro Yahwe I, inja bisa nuḇemerintis pdef.

Taun oser ḇaim, nusma fararur ḇe Irlandia Utara, randakya ḇe Armagh ramnai nurawer ḇe Newry, mnu ansuine ḇeḇarek rodiwa sya snonkaku Katolik siri. Prasangka agama syambraḇ kaku rodiwa, inja nusasor nu kaku ma nukinfir wos ḇepyum rofyor nuḇaryas ḇe snonkaku sya. Nuso fananjur ro rum naek srar sya, swaf ḇyeja kilometer ri 16 ro rum nuḇedi. Ḇeyakso ro fananjur ani snonkaku riwar monda. Fyorno ido, nuyenef rodiya. Nuyenef ro lantai yaḇori ma arwoya numarisen kaku faro anan sfasos kwarna. Ine aski ḇeba kaku snar nufawi kirine ro moḇ ani Saksi sya sibor kaku.

Eba yedi ma swari, Lottie i, sufarmyan ḇe perintis istimewa ro Irlandia Utara, ma ro 1952 nkoḇefiak nkoso kebaktian distrik ro Belfast. Nkoḇarek ro naek ḇefrurpyum oso rum ḇyedi, nkoḇarek kayam kuker Pryce Hughes, hamba cabang ḇero Inggris. Ro roḇ oser, nkoisya nkowawos syap mkun ḇebabo oso, God’s Way Is Love, sifasosna faro snonkaku Irlandia sya. Naek Hughes ikofen samswen kaku fa siḇaryas ḇe snonkaku Katolik ḇero Republik Irlandia. Naek srar sya sidif si fa siḇur rum sena ma hakim sya sidif snonkaku sya fa smun naek srar sya. Pryce doḇe, ”Nkofandun imbeswa oso kuker oto fa suso ro kampanye istimewa fa sirwas syap-syap ani ḇe sup ḇeba ani ḇesiper.”  * Fafisuya ḇeri nkokofen ”Nkomarisen nkofrurna!”

 Rum oso perintis sya simarisen siḇarek ro Dublin isoine rum ro Ma Rutland, imbesrar ḇesouser ḇefarmyan ḇe Yahwe taun ḇe taun kwar. Nko kako nkomarisen nkoḇarek rodiya swaf ḇeḇeso ma nkoḇoḇ roiebor nkoḇena. Ramnai, nkoyek Bob motor gandeng ḇyeja fa nkosewar oto oso. Nkosrow oto oso ipyum kaker, ma nkofuken ḇe ḇeboḇ oto ani fa dunpyan inko snaro nkokame nkofawi nkun otoḇa. Ro roḇya ḇesiper, Arthur kyain ro kanbow yabori bo ifrur rya isya dun oto ma fyadadwer gigi ro oto ya. Ro arwoya, ḇyensewar fa dun oto ya fa syae ro garasi, misionaris oso ḇenirḇe Mildred Willett (ḇarpurya fyarḇuk kuker John Barr) ryama. Ifawi dun oto! Inja, fyarkor pyan inko fa nkun oto, ramnai fafisuya ḇeri nkora.

Osower ido, nkofandun moḇ fa nkoḇarek ro. Naek srar sya sikofen ḇe inko nkoḇarek awer ro karavan ḇaido rum ro oto snar snonkaku ḇemarisen ḇa sya bisa srap karavan ani. Inja, nkosewar rum oso ḇape nkosma osoḇaḇeri. Inja ro roḇ ani nkoḇarek ro oto yadori. Meserya, nkosrow rum kasun oso ḇeḇefrur ro karavan kuker kambow risuru. Inja iso ḇe rum nkoḇedi. Ḇepyumya, nkosma samswenḇa rofyor nkorir karavan mkoḇena ro manfrudo ḇefrur pyum oso moḇ ḇyedi. Nkoḇaryas ro moḇ ḇeḇinkwan swaf kilometer ri 16 isof ro 24 ro karavan nkoḇarek ani. Rofyor nkora kwar fa nkoḇaryas ro moḇ ḇebabo, nkomarisen nkokaḇer wer fa nkoḇaryas ḇe snonkaku ḇeḇarek fanam kuker karavan ani.

Bisa nkoḇaryas ro rum nakam ḇero bar wambrur Republik Irlandia ma nkosma roi ḇedwarek nabor ḇa. Nkorwas syapmkun ri 20.000 ma snonkaku ḇemarisen sya snonsnon sena nkofarem na ḇe kantor cabang Inggris. Nkomarisen kaku snaro Saksi Yahwe ḇero Irlandia ro kirine barbor sena utin ma utin!

Taun ḇeḇeso ramnai, nusma fararur ḇebabo fa nuraḇe bar wamires London. Minggu ḇeḇeso ramnai, naek ḇerama ro kantor cabang Inggris sor Arthur i ma sikofen meserya ḇeri fyarmyan ḇe pengawas wilayah. Nusma farkarkor minggu oser monda, ramnai nufaryam ḇeri ro moḇ ḇero Skotlandia, inja Arthur nya swaf naborḇa fa fyasos faya ḇyedi. Ḇape, imarisen ḇesya kwar fa ifrur fararur ḇerama ro Allah, iba syadiwer rofyor fararur anna samswen faro i. Farari ḇepyum ḇyena nsambraḇser aya kaku, ma nusma aski ro fararur keliling nufrurna. Snar taun ḇeḇeso aniwara nufarmyan ro moḇ Saksi sisyaḇa, inja kirine numarisen kaku snar nusya rofandu naek srar sya.

Arthur isma undangan fa dakso ro Sekolah Gilead 1962, inja fandun fa nuyun snemuk ḇefandun kaku. Farkarkor ani nambran paik risamfur, ḇape ayama yaksoḇa snaro yasma undangan ḇa. Inja snemuk nuyun iso Arthur iso farkarkor ine. Snar perintis oso iwarpu ayaḇa, inja kantor cabang iwan aya fa yakaḇer ḇe Hemsworth ḇe perintis istimewa. Rofyor Arthur ibur taun oser ramnai, nusma fararur ḇe pengawas distrik. Moḇ nufarmyan yaiso Skotlandia, Inggris utara ma Irlandia Utara.

Ro taun 1964, Arthur isma fakamamar ḇe hamba cabang ro Republik Irlandia. Randakya, yamkak kaku fa yara ḇe Betel snaro yamarisen kaku fararur keliling. Ḇape, rofyor yawasen kaḇer ido, yakofen kasumasa kaku faro fakamaman ḇeba snar yafarmyan ro Betel. Yakyar Yahwe nari ḇyebarakas ko rofyor kosma fararur imbude randakya komarisen na ḇa. Ro Betel, yafararur ro kantor, yafasos lektur na ḇeḇefaremna, yakankun, ma yafrur sren Betel. Ro fafisu ḇeḇeso, nufarmyan kaker ḇe pengawas distrik inja bisa nusrow kuker naek srar ḇerama ro moḇ ḇesena. Nu kako bisa numam ḇefarkor Refo kuker nusya sisur pdef ro rurya, faindaya fasfesepen nuḇena syambraḇ syadi kuker naek srar ro Irlandia. Ine barakas ḇeba kaku!

Kebaktian internasional ḇerandak ro Irlandia sifrurna ro Dublin ro taun 1965. * Sisma roi ḇedwarek nabor raryano, kebaktian ani bisa nambran kuker payamyum. Ḇerama sya barbor sena snonkaku ri 3.948 ma ḇebaptis sya snonkaku ri 65. Delegasi internasional barbor sena snonkaku ri 3.500 ma sḇarek ro snonkaku ḇero Dublin rum sena. Rum oser-oser sḇuk syap ḇeser wos kasumasa. Bena rumsya sḇesyowi kaku rari ḇepyum naek srar sya sifasnana. Kebaktian ani nun fararwe ḇepyum kaku ḇe Irlandia.

Ro taun 1966, Irlandia utara ma selatan sukame suro baḇ kantor cabang Dublin. Ḇaḇeoser ine iḇesebur kuker kakara snonkaku ḇero diansya snaro ro moḇ ani snonkaku sya sḇeoser ro polotik ma agama ḇa. Numarisen kaku numam snonkaku randakya sro agama Katolik, ḇape kirine sifawi kwar napnapes ma sifarmyan kayam ḇe Yahwe I kuker naek srar ḇeḇeagama Protestan ro randak iwara sya.

Ro 2011, kantor cabang Inggris ma Irlandia neoser, inja nusma fararur ḇe Betel London. Rofafisuya kankenem nuḇena nefararwe wer. Fafisuya yamkakwarek snar Arthur iduf ker. Arthur iduf dafduf Parkinson, ma imar ro 20 Mei 2015 fyor ḇyeumur taun ri 66.

Ro taun-taun ḇarpur ine, yaḇaḇir yaḇe sanekar, depresi, ma yaḇe saneso. Fafisu iwara yaḇestres ido Arthur iso ḇebuk sneprei ḇe aya, inja yamander i kaku. Ḇape, rofyor wasambraḇ ro fafisu ḇeradine ido, nari wafanam syadi ḇe Yahwe I. Aya kako yamarisen snar snonkaku ḇebor siswar Arthur i. Naek srar ḇero Irlandia, Inggris, ma Amerika Serikat sifarem syapram ḇe aya. Aya kako yasma wos sneprei ro Arthur eba ḇyedi, Dennis i ma swari Mavis i. Fno yedi Ruth ma Judy su kako suḇuk wos sneprei ḇe aya. Wos sneprei annakam ma syapram sifarem ḇe ayana nafrur fa yasambraḇ pdef ro fafisu ḇesamswen yasmana.

Mnuk ḇesambraḇser aya iso Yesaya 30:18. Mnuk ani doḇe, ”Yahwe nari iwaf ḇesya kwar fa fyasnai ḇaḇenaḇye faro au, ma nari dores ma fyasnai sawarwar ḇe au. Snar Yahwe iso Allah ḇenapes. Aski faro snonkaku ḇewaf I ḇesya kwar.” Yasma sneprei kaku snar yafawi kuker kaḇaḇaḇ Yahwe iwaf fa ipyos samswen koḇenakam ma ḇyuk ḇeko fararur ḇeba kaku ro dunya babo.

Rofyor yawasen muraḇe fafisu iwara ro kankenem nuḇena, bisa yamam Yahwe fyarkin ma ḇyebarakas fararur ḇaḇeḇaryas ro Irlandia! Ine fakamaman ḇeba kaku ḇe aya snaro bisa yafnoḇek fararur ine kako. Kakuḇae, rofyor kofrur rosai Yahwe dorna nari nun barakas nabore.