1, 2. Rosai Ibiris ḇyukifrur samswen kaku snonkaku sya?

SNONKAKU sya sifrur robebor raris telefon, lampu, oto, ma kulkas. Roi nane kam nun fainda kaku faro kankenem koḇena. Roi ḇesena wer raris, romamun, ranjau darat, tabaku, ma bom atom, nane nun roi ḇemun. Mboi, roi oso isya kwar ro swaf fyoro syadi ro roi anna kam, ma roi ine dun samswen kaku faro snonkaku sya. Rosairirya? Ankarkar! Kawos ankarkar iso, kokofen roi ḇekaku ḇa insama kofrowes, ḇaido kawninyan snonkaku oso. Mansei ḇeankarkar ḇepon ya? Ibiris i! Yesus dap i ḇe ”kma ro ankarkar na kam”. (Wasya Yohanes 8:44.) Fafisu risai ikofen wos ankarkar ḇepon ya?

² Ikofen na ro taun risyaran naiwara ro yaf Eden. Adam ma Eva sukenem payamyum ro Firdaus ḇepduk kaku Yahwe ifrur faro su na. Allah ikofen yoḇ su ḇo doḇe suyan ”bon ro aiknam fawawi kuker roi ḇeḇye ma roi ḇeḇyeḇa” ido, nari sumar. Setan ifawi roi ine, mboi ḇyuk ikak oso fa dawos yoḇ Eva i, ”Kaku ḇeri nari mumar ḇa.” Ine iso ankarkar ḇepon anya. Setan ikofen wer, ”Allah ifawi ro ras  muyan na, nari mumkamna nbas ma nari mumnis Allah, mufawi roi ḇeḇye ma ḇeḇyeḇa.”​—Kejadian 2:15-17; 3:1-5.

3. Rosai ḇefnai fa Setan ankarkar ḇyena naḇyeḇa kaku, ma ankarkar anna dun bon rosai?

³ Setan ankarkar ḇyenane naḇyeḇa kaku kukro ima fyawi kwar snar Eva ikyar i ma dan aibon ani ido, nari imar. Ma naiso ḇendarirya kaku. Eva ma Adam i kako, susouser Yahwe sasoser Ḇyena ḇa ma ḇarpur mura sumar. (Kejadian 3:6; 5:5) Iba syadi wer, snar Adam sasar ḇyena, ”marmarya iryewen faro snonkaku syakam”. Ine nafnai fa ”marmari ḇyepoik imnis raja . . . , iba syadi faro snonkaku ḇefrur sasar raris Adam sasar ḇyena ḇa sya.” (Roma 5:12, 14, NWT) Iso ḇefnai fa konapes ḇa ma kopok kokenem fyoro raris Allah marisen Ḇyena ḇa. Imbape, kokenem ro swaf fanam ’taun ri 70, ḇaido kosambraḇ syadi ido taun ri 80’ monda. Ma kankenem koḇena ”nafo kuker samswen ma kandera”. (Mazmur 90:10) Nane kam ndarirya snaro Setan ankarkar ḇyena!

4. (a) Fakfuken risai fandun fa kokarem na? (b) Ro Mazmur 15:1, 2, mansei na ḇebati kuker Yahwe I?

⁴ Yesus dawos ḇekur ḇe Setan, ”Ikada iso napnapes yaḇa, snar napnapesya isya roiḇa.” Setan imnis ryadirya kaker. ’Dankarkar supswan ḇesiper’ ine kaker. (Fasasna faro Yohanes 12:9) Ḇape, komewer Setan dawninyan ko. Inja, fandun fa kofawi kankarem faro fakfuken rikyor naine: Rariso Setan fyarkor ninyan snonkaku ḇero baboine sya rai? Rosai ḇefnai fa snonkaku sya sankarkar? Ma rariso kawos roi ḇekaku ro fafisu nakam insama wis koḇena kuker Yahwe namuk ḇa, raris Adam ma Eva su?​—Wasya Mazmur 15:1, 2.

5. Rariso Setan fyarkor ninyan snonkaku ḇero baboine sya rai?

⁵ Na kosewar kaku insama Setan ifrowes awer ko. Manwawan Paulus doḇe, ”Snar kofawi aw ḇyena kwar.” (2 Korintus 2:11, NWT) Kofawi Setan fyara dunya ine ḇesiper, fyara kako agama ḇekaku ḇa na, ḇaḇepapoik ḇeankarkar, ma farḇaḇyan ḇefaḇri mankun. (1 Yohanes 5:19) Inja, na kokandor ḇa snar Setan ma rur ḇeḇarḇor ḇyesya sawninyan snonkaku ḇena papoik sya fa sawos ankarkar. (1 Timotius 4:1, 2) Imnis raris, ḇefarḇaḇyan sya sankar snonkaku ḇesesya roro iklan fa sḇoḇ robebor ḇepyum ḇa ḇaido sifrowes snonkaku ḇo sunbur pipi sena.

6, 7. (a) Rosai ḇefnai fa nari naḇyeḇa syadi rofyor manfarkin agama sya siso ḇekofen ankarkar ya? (b) Ankarkar risai monda manfarkin agama sikofen na?

⁶ Ḇeḇyeḇa syadi wer iso manfarkin agama sya sawos ankarkar. Rosai ḇefnai ya? Snaro rofyor oso ikyar faro farkarkor ḇekaku ḇa sena ma ifrur roi Allah imewer na ido, snonkaku ani na dakna swaf fa ikenem fyoro ḇa. (Hosea 4:9) Yesus ifawi manfarkin agama ḇero fafisu ḇyedi sifrowes snonkaku sya. Imkak ḇa ḇo ikofen yoḇ si, ”Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkokaḇor soren ma mko mbranuk sup, fa mkun snonkaku oser monda insa daksun ro agama mkoḇedi ma  syun kwar, mkofrur iḇe romawa [Gehena]”, isoine marmar isof fyoro-fyoro. (Matius 23:15) Yesus doḇe manfarkin agama ḇekaku ḇa ansi simnis kma sedi Ibiris, iso snonmamun diri.​—Yohanes 8:44.

⁷ Ro fafisu koḇedine kako manfarkin agama sisya sibor. Sor si ḇe pastor, pendeta, ḇaido sḇuk nasan ḇesena. Raris snonkaku Farisi sya, sḇuk farkarkor ḇekaku ro Wos Refoya ḇa mboi ”sfadweri kuker roi ḇekakuḇa”. (Roma 1:18, 25) Ḇeḇeso ro ankarkar sena iso samamyai ro for ḇembrer ḇa, snonkaku sya sna jiwa ḇepok ḇemar ḇa, ḇemar sya na sikenem ḇe moḇ ḇese, ma Allah imarisen faro ḇeḇe farḇakḇuk ḇemnis ḇa rofandu snon kuker snon ḇaido bin kuker bin.

8. Ankarkar rosai kero wer manfarkin agama sya sikofen na, mboi moḇsa komam na rai?

⁸ Ḇefararur ro polotik sya kako sankarkar fa sifrowes snonkaku sya. Kero wer nari sikofen ankarkar ḇeba oser isoine soḇe sun ’aski ma payamyum’ ro supswan ine kwar. Mboi, ”fasaw kaku ḇaḇeraroya kyur si”. Inja kokyar awer faro manfarkin polotik ansine rofyor sikofen roi nakam nambran pyum kwar. Ḇekaku ya iso kofawi kwar Yahwe ras ryamumaya imnisbos kaku ḇekaraw ro roḇ.​—1 Tesalonika 5:1-4.

9, 10. (a) Rosai ḇefnai fa snonkaku sya sankarkar, ma rosai bon ya? (b) Rosai fandun fa koswarepen ya?

⁹ Baboine, ḇekofen ankarkar nama snonkaku ḇena papoik sya monda ḇa. Artikel ”Rosai Ḇefnai fa Kankarkar”, ḇefas ya iso Y. Bhattacharjee, ikofen ḇo doḇe ”ankarkar nama snonkaku sya rari senairi”. Ḇaido, skara sankarkar ima roi ḇesasar risyaḇa. Fyorno ido snonkaku sya sankarkar fa sikadaunwarek mankunsi, nono ido insama siyokef sasar ḇaido ḇarḇor sena ro snonkaku ḇesesya. Sankarkar kako fa sismai pipi ḇaido fandun ḇesena wer. Artikel anya ikofen kako snonkaku ḇeḇeso sḇaḇir sasar oḇa fa sankar ”snonkaku sifawi ḇaim sya, min fararur, bati, ma snonkaku siswar sya”.

¹⁰ Ankarkar anna nafnai fa snonkaku sya sikyaryae si werḇa, ma wis sena namuk. Imnis raris, kokarapan snonswa ḇefrur pyum oso na fyafko kaku rofyor ifawi swari nya snon oso ḇese ḇo dankar i fa iyokef rosai ifrur kwar na. Ḇaido kowasenpan snon oso ifrur pyum swari ma romawa ḇyesi ro rum ḇa, mboi ro ḇarpon snonkaku sya rya iswar ma ifrur pyum si. Ine iḇyeḇa kaku. Snonkaku ḇeradine sya na sifrowes snonkaku ḇesesya, mboi fandun fa koswarepen na jadi fa sifrowes Yahwe I ḇa. Refoya doḇe ”roi ḇeḇor kam nbas ma nbaḇer ro Allah ḇarpon ḇyedi”.​—Ibrani 4:13.

11. Farkarkor rosai kun ro farfyar ḇekur ḇe Ananias ma Safira su? (Mam sonin ro randak artikel ine.)

 ¹¹ Refo naser farfyar oso ḇekur ḇe Setan dawninyan imbeswa Kristen su fa suyankar Allah. Ananias ma Safira susewar fa sufrowes manwawan sya. Suḇoḇ saprop mnuk suḇena ḇo suḇuk kumpan nakam ḇe manwawan sya ḇa. Ananias ma Safira sumarisen ḇesesya ro sidang smanen su, inja sukofen ḇe manwawan sya ḇo suyoḇe suḇuk kumpan nakam kwar. Mboi Yahwe fyawi suisya suyankarkar inja ḇyuk samamyai ḇe su.​—Farfyar ro Manwawansya 5:1-10.

12. Rosai nari ḇekur snonkaku ḇeyawos ankarkar ḇeḇyeḇa ma ḇemewer ḇembror sya, ma rosai ḇefnai ya?

¹² Moḇsa Yahwe myam snonkaku ḇeankarkar sya? Snonkaku ḇeyawos ankarkar ḇeḇyeḇa ma ḇemewer ḇembror syakam nari sḇeḇesawen ḇe ’soren for’, raris Setan i. Ḇaido nari Allah myunpres si isof fyoro. (Fasasna 20:10; 21:8; Mazmur 5:6) Rosai ḇefnai ya? Snaro Yahwe myam snonkaku ḇeankarkar ansine simnis ”snonkaku ḇefrur ayin” ro ḇarpon Ḇyedi.​—Fasasna 22:15.

13. Rosai kofawi ro Yahwe I, ma ine nadif ko fa kofrur rosai?

¹³ Kofawi Yahwe ima ’imnis snonkaku ḇeyawos ankarkar risyaḇa’ ma ima ”isrer ḇa”. (Bilangan 23:19; Ibrani 6:18) Yahwe imewer kaku ”ramar ḇeankarkar”. (Amsal 6:16, 17) Komarisen kofrur fa imarisen ido, fandun fa kawos roi ḇekaku. Inja ’koḇeankaryae awer’.​—Kolose 3:9.

14. (a) Rosai ḇefrur fa snonkaku Kristen ḇekaku sima siḇesebur ro ḇeyakso agama ḇekaku ḇa sya? (b) Rosai knam ro wos farkin ḇero Lukas 6:45 ya?

¹⁴ Roi oser rosaiso ḇefrur fa snonkaku Kristen ḇekaku siḇesebur ro ḇeyakso  agama ḇekaku ḇa sya? Koma kawos roi ḇekaku. (Wasya Efesus 4:25.) Paulus doḇe, ”Nkofasnai nkoinema Allah manfamyan ḇyesi nkosirya. . . . nkawos roi ḇekaku.” (2 Korintus 6:4, 7, NWT) Ma Yesus doḇe snonkaku ”roi ikofen na nakḇairo sne ḇyedi”. (Lukas 6:45) Ine kyurfasnai snonkaku ḇena sne ḇenapes nari dawos roi ḇekaku na. Na ikofen roi ḇekaku faro snonkaku ifawi ḇaim sya, min fararur, bati, ma snonkaku iswar sya. Mkorama kawos nyan ḇeḇeso moḇsa kofasnai kosewar kaku fa kofrur roi ḇekaku ro roi nakam.

15. (a) Rosai ḇefnai fa kankarkar awer? (b) Rosai ḇefnoḇek roma inai babo sya fa spampum farawrowes ro bati sesya? (Mam fasfas kasun ro sop.)

¹⁵ Auma roma ḇaido inai babo disau ido, imbude wakmarisen bati Besi simarisen Au. Ḇape snar roi nane, roma inai babo ḇeḇeso sankarkar. Sro ḇarpon kina sedi ma sidang ido rya sna kenem ḇepyum. Mboi siḇese kaku rofyor sro media sosial ḇaido skainus snonkaku ḇefarmyan faro Yahwe I ḇa sya. Na sawos wos ḇemamas, sisun sansun ḇemnis ḇa, srower musik ḇeser wos ḇeḇyeḇa, simasaser, san narkoba, sifrur kabrai saswar fasis, ma sifrur roi ḇeḇyeḇa ḇesena. Sisya sankarkar sinan sesi, naek srar sesya, ma Yahwe I. (Mazmur 26:4, 5) Mboi, Yahwe ifawi fafisu kokarem koma kosyowi I mboi mura kofrur roi imewer kaku na. (Markus 7:6) Ipyum syadi ya koso anun ine, ”Sne bedi fyafayaf awer faro snonkaku ḇesasar sya, ḇape wamkak faro Yahwe I ro ras nakam.”​—Amsal 23:17. * (Mam fasfas kasun ro sop.)

16. Moḇsa na kokarem fakfuken rofyor koser formulir faro fararur ḇesren ro oras nakam rai?

¹⁶ Wakmarisen wakḇe perintis biasa ḇaido waksun ro fararur ḇesren ḇese ro oras nakam, raris wakfararur ro Betel ido, fandun fa waser formulir oso. Fandun kaku fa kwarem kuker wos ḇekaku fakfuken ḇekur ḇe pararei Bedi, hiburan kwinfir na, ma kenem Bedi. (Ibrani 13:18) Mboi, na moḇsa ḇerai snar wafrur roi Yahwe imewer na ḇaido roi ḇekyaren sneuser Bedi mboi wakofenḇair na ḇe penatua sya ḇa? Wor si fa sifnoḇek Au insama wakfarmyan ḇe Yahwe I kuker sneuser ḇesren.​—Roma 9:1; Galatia 6:1.

17. Rosai fandun fa kofrur rofyor ḇembroḇ konsya sifakfuken ko ḇekur naek srar koḇansi?

¹⁷ Rosai nari wafrur rofyor sidwarek fararur koḇena ro moḇ Bedi ma ḇepoik  sya sfor Au ma sifakfuken Au ḇekur naek srar sya? Fandun fa wakofenḇair faro si roi wafawi kam na ke? Rosai Yesus ifrur rofyor gubernur Roma ifuken i? Yesus iso pyum wos farkin ro Refo ine, ”oras naisya fa kofasise ma oras naisya fa kawose”, ma ro fafisu ono fyasis monda! (Pengkhotbah 3:1, 7; Matius 27:11-14) Rofyor kakro fafisu ḇerarirya, fandun fa kosasor ko ma kofasnai fawinanem insama kofrur awer roi oso ḇeyun samswen ḇe naek srar koḇansi.​—Amsal 10:19; 11:12.

18. Rosai nari kofrur rofyor penatua sya sifuken ko ḇekur naek srar sya?

¹⁸ Wafawi oso ro sidang isya ifrur sasar ḇeba ido na moḇsa ḇerai? Penatua sya sna fakamamar fa sfaduru kenem ḇero sidang insama nasren pdef, inja na sifuken Au kuker rosai wafawi na. Rosai nari wafrur ya, iba syadi snonkaku ani ima bati ḇaido karyer Bedi? Refoya doḇe, ”Saksi ḇesoasuser nari dawos roi ḇekaku.” (Amsal 12:17; 21:28) Inja, fandun fa wakofenḇair roi wafawi kam na ḇe penatua sya. Fandun fa penatua sya sifawi kakaku ḇyena insama sismai nyan ḇepyum fa sifnoḇek i fa ḇyebati kaḇer kuker Yahwe I.​—Yakobus 5:14, 15.

19. Rosai nari kawos ro artikel ḇerama ya?

¹⁹ Raja Daud ḇyenadi ḇe Yahwe I, ”Wamarisen faro snonkaku ḇena sne ḇenapes.” (Mazmur 51:6) Daud ifawi roi ḇefandun syadi iso roi ḇero kosnesna. Ro fafisu nakam, snonkaku Kristen ḇekaku ’sikofen roi ḇekakuyae faro si’. Nyan ḇese wer fa kofasnai koma koḇesebur ro ḇeyakso agama ḇekaku ḇa sya isoine koḇuk farkarkor roi ḇekaku ḇeknam ro Refo. Ro artikel ḇerama ya, nari kawos moḇsa kofrur na ro ḇaḇeḇaryas koḇena rai.