Koḇuk Farkarkor Roi Ḇekaku
”Sye Yahwe, . . . knam ro wos Bena iso kakaku.”—MAZMUR 119:159, 160.
1, 2. (a) Fararur ḇefandun kaku rosai Yesus ifrur ro kankenem ḇyedi, ma rosai ḇefnai ya? (b) Rosai fandun fa kofrur insama kosmai bon ḇepyum ro ḇaḇeḇaryas?
YESUS KRISTUS ima sukan ai diri, mura ḇye guru. (Markus 6:3; Roma 15:8) Ifrur fararur anna fa nambran mnis. Ḇye sukan ai, inja ifawi moḇsa ḇyuk robebor fa ifrur roi bebor ro aimun na. Ḇye guru, ḇyuk fawawi ḇyena ro Refo fa ifnoḇek snonkaku ḇebor sya fa sifawi kakaku ya. (Matius 7:28; Lukas 24:32, 45) Fafisu Yesus ḇyeumur taun ri 30, ḇye sukan ai werḇa ma ḇye guru snar ifawi ine iso fararur ḇefandun kaku fa ifrur nairi. Doḇe fararur ḇaḇeḇaryas ankankinem ḇeḇye Karajan Allah naiso ḇefnai fa Allah iwan i ḇe supswan ine. (Matius 20:28; Lukas 3:23; 4:43) Yesus fyakapon ḇaḇeḇaryas ankankinem ḇeḇye ro kankenem ḇyedi, ma imarisen snonkaku ḇesesya sakfrur rarirya kako.—Matius 9:35-38.
2 Ḇebor ro koinema sukan ai siko ḇa, mboi kokame koma guru ḇeḇuk farkarkor ankankinem ḇeḇye faro ḇesesya. Fararur ine fyandun kaku snar Allah iso ḇeyuf na. Refo dap ko ḇe ”min ḇefararur kayam fnoḇek Allah”. (1 Korintus 3:9; 2 Korintus 6:4) Kona kakara ḇemnis manḇefas mazmur ḇekofen, ”Knam ro wos Bena iso kakaku.” (Mazmur 119:159, 160) Yahwe wos Ḇyena nama kakaku nairi. Iso ḇefnai fa komarisen kokir fa koḇaryasbos wos ḇekaku anna ro fararmyan koḇena. (Wasya 2 Timotius 2:15.) Inja kosewar kaku fa kokir syadi ro koḇuk Refo, roi ḇepon kaku fa koḇukifarkor snonkaku ḇesesya fa sifawi Yahwe, Yesus, ma Karajan Allah. Insama kosmai bon ḇepyum ro ḇaḇeḇaryas, Yahwe organisasi Ḇyedi ḇyuk roi ḇesena ḇefnoḇek ko, ma fandun fa kofawi mnis moḇsa koḇuk na rai. Roi nane kofawi na ḇe Roi fa Koḇukifarkor.
3. (a) Rosai fandun fa komam kaku ro fararmyan koḇena? (b) Ro Farfyar 13:48, snonkaku ḇemnis rariso kosewari?
3 Imbude wafuken rosai ḇefnai kap na ḇe Roi fa Koḇukifarkor mboi Roi fa Koḇukiḇaryas ḇa. Snaro wos ”koḇaryas” ima kokofenbadir ankinem oso, mboi wos ”koḇukifarkor” ima kofasnaiḇair ankinem ḇe snonkaku oso insama ifawi pyum rosai ryower na ma nadif i fa ifrur raris rosai fyarkor kwar na. Snar papupes dunya ine fyanam kaku kwar, fandun fa komam kaku fa koḇuk farkarkor Refo ma koḇukifarkor snonkaku sya kakaku ḇero Refo na, insama sakḇe manfamyan faro Yesus i. Ine kyurfasnai fandun fa koryaḇ fa kosewar snonkaku ḇena sne ḇenapes faro kankenem fyoro ma kofnoḇek si fa sakfarmyan ḇe Allah.—Wasya Farfyar 13:44-48.
4. Moḇsa na kosrow snonkaku ḇena sne ḇenapes faro kankenem fyoro rai?
4 Moḇsa na kosrow snonkaku ḇena sne ḇenapes faro kankenem fyoro rai? Snonkaku Kristen ḇero abad randak siwara, nyan oser sisrow snonkaku ḇeradine iso ro ḇaḇeḇaryas. Yesus ikofen ḇe manfamyan ḇyesi, ”Rofyor mkosun ro mnu-mnu ḇeba ma kasun, mkosewar ro dia snonkaku ḇefrur pyum.” (Matius 10:11) Fandun fa kofrur rarirya kako ro baboine. Kakuḇae, fyorno ido kosrow snonkaku ḇemarisen ḇa, ḇeararer, ḇaido ḇefandun faro Allah ḇa. Kopok kokara awer na simarisen srower ankankinem ḇeḇye ya. Kosewar snonkaku ḇemarisen, sne ḇerun, ma ḇefandun Allah kakaku Ḇyena. Sasewar koḇenane namnis kuker Yesus fararur ḇyedi ḇe sukan ai. Fafisu ifrur robebor raris kedwa, kamnam, ḇaido roi ḇesena ḇaim, ḇepon ya fandun fa syewar ai ḇepyum. Mura ḇyuk robebor fa ḇyukifararur ma ḇaḇekir ḇyena fa ifrur roiebor na. Rarirya kako ro baboine, ḇepon ya kosewar snonkaku ḇena sne ḇemarisen, ma koḇekir syadi ro koḇuk roi fa koḇukifarkor insama kofnoḇek snonkaku sya fa sakḇe manfamyan.—Matius 28:19, 20.
5. Rosai fandun fa kofawi ro roi nakam ḇero Roi fa Koḇukifarkor na? Fasnaiḇairpan. (Mam sonin ro randak artikel ine.)
5 Robebor sḇukifararur srir na ro kas, nya fainda oser-oser. Imnis raris, robebor Yesus ḇyuk ro fararur ḇyedi ḇe sukan ai. * (Mam fasfas kasun ro sop.) Fyandun robebor fa ḇyukiwarnkyara, ḇyukikakop, ḇyukikuskir, ma ḇyukipai aimun na. Ono wer, robebor fa ḇyukiorirem ma ḇyukifes aimun na. Rarirya kako, roi nakam ḇero Roi fa Koḇukifarkor dakna fainda oser-oser. Inja, mkorama komam fa kofawi moḇsa koḇuk na rai.
ROI ḆEFASNAIḆAIR MANSEISIKO
6, 7. (a) Moḇsa koḇuk kartu kontak ro ḇaḇeḇaryas koḇena rai? (b) Rosai ḇefnai fa koḇuk undangan fananjur ḇe ḇesesya?
6 Kartu Kontak. Kartu kasun ine ipyum kaku snar fyasnaiḇair ḇe snonkaku sya manseisiko ma ifnoḇek si fa smam situs web jw.org. Ro situs web koḇedine, na sifawi nabor syadi wer manseisiko ma sor fa sakfarkor Refo kako. Snonkaku sisyadi ro 400.000 sor farkarkor Refo ro jw.org, inja kokor ido ro ras oser snonkaku ḇeyor farkarkor Refo seutin syadi! Wun kartu kontak ḇeḇeso ma buk na faro snonkaku wasrow sya ro ras oso.
7 Undangan. Ro undangan fananjur sfas radine: ”Nkomarisen nkor au fa wafarkor Refo kuker Saksi-Saksi Yahwe”. Ikofen kako na sifrur roi nane ”ro fananjur nkoḇedi” ”ḇaido kuker manḇeḇuk farkarkor oso”. Inja undangan ani ikofenḇair ḇe snonkaku sya manseisiko ma kor snonkaku ḇefandun Allah farkankin Ḇyena fa sakfarkor Refo kuker ko. (Matius 5:3) Kakuḇae, snonkaku sya sfarkor Refo ke roḇa, bisa srama ro fananjur ya. Rofyor srama ro fananjur ya ido, na sfarkor nabor syadi ro Refo.
8. Rosai ḇefnai fandun kaku fa kor snonkaku sya pdef fa sakrama ro fananjur ya? Fawar farfyar oso.
8 Fandun kaku fa kor snonkaku sya pdef insama sakrama ro fananjur ya. Rosai ḇefnai ya? Snaro rofyor srama ido, nari smam ro mankunsi Saksi-Saksi Yahwe sima sfarkor kakaku ro Refo ma sifnoḇek snonkaku sya fa sakmambir Allah, roi agama ḇekaku ḇa sifrur na ḇa. (Yesaya 65:13) Imnis raris, taun riḇeso naiwara, imbeswa ro Amerika Serikat, Ray ma Linda sumam roi ḇeḇese nane. Suma sukyar faro Allah ma sumarisen sumambir syadi I wer. Inja suna wos oser fa surama ḇe rumari ḇero kota suḇedi kam. Suḇe sumam roi risuru ḇeponari insape suryur ro rumari oso: Oser ya, suḇe susmai farkarkor ro rumari. Ḇesuru ya, ḇeyakso sya fandun fa sisun sansun ḇefasnaiḇair sifarmyan ḇe Allah. Nefandun swaf taun riḇeso snar rumari nabor naisya ro diwa. Mboi sufafko kaku. Susmai farkarkor onoḇaḇeri, ma ḇeyakso sya sisansun famfnom si. Susaebur rumari ḇepupes ya raposa, Linda rya fa fyararur ma Ray ibur ḇe rum. Ro marandan ḇe rum, Ray myam Balai Karajan oso. Kyara ḇo doḇe, ’Yara fa yamampan ari rosai sifrur ro dianya.’ Kakuḇae, roi myam na neḇesebur ro ḇepon nakam! Ḇero Balai Karajan syakam sifrur pyum, sfasnai syowi ma sisansun pyum kaku si. Ray kyain ro ḇarpon ma imarisen faro rosai fyarkor na! Na koswarepen manwawan Paulus wos ḇyena nefasnaiḇair snonkaku oso ḇerama babo ro fananjur ya na ikofen, ”Kaku ḇeri, Allah isya rofandu mko.” (1 Korintus 14:23-25) Fafisuya mura, Ray dakso ker fananjur ro ras Minggu. Mura, dakso wer fananjur minggu fadu ma Linda dakso fananjur ya kako. Suḇeumur taun ri 70 syadi, mboi suyakfarkor Refo ma suḇebaptis.
ROI ḆEFNOḆEK KO FA KORANDAK AWAWOS NA
9, 10. (a) Rosai ḇefnai fa napyan monda koḇuk syapram ro ḇaḇeḇaryas? (b) Fasnaiḇairpan nyan fa koḇuk syapram Ḇaḇesasoser Allah Indo Rosairiri?
9 Syapram. Kona syapram riwar. Napyan syadi fa koḇukiḇaryas, ma napyum syadi fa korandak awawos na. Syapram ḇerandak isae ro 2013, rofyor ya indokada syapram se milyar ririm sifrur na kwar! Syapram nane nasnai mnis kam. Inja, wafarkor fa buk syapram oser ido, na napyan ḇe Au fa buk ḇesena kam! Moḇsa na buk syapram fa ḇerandak awawos kuker snonkaku oso rai?
10 Imnis raris, imbe buk syaram Ḇaḇesasoser Allah Indo Rosairiri? Fasnai ḇe snonkaku ani fakfuken ḇero ram ḇarpon ma wafuken, ”Fafisu ono wakfuken Karajan Allah ima rosairirya ke? Au indo rosai . . . ?” Mura wori fa kyinfir oser ro kankarem rikyor anna. Wakofen awer kankarem ḇyena nsasar ḇaido nkaku. Ipyum syadi bas ram fadu ya ro ḇar ”Rosai Refo Byadir Na” ma wawasya mnuk Lukas 1:32, 33 ma Wahyu 11:15. Ro papupes awawos anna, wafuken fakfuken ḇero ram ḇarpur ro bar ”Infa Kokara”: ”Rosai na kosmai kaku ro Ḇaḇesasoser Allah ya?” Na kwarem fakfuken ani ro awawos ḇeuser ya. Rofyor rwama kaḇer ido, fasnai farkarkor ḇeḇe 7 ro syap Ankankinem Ḇeḇye Ḇerama ro Allah! Ine iso syap oser fa koḇukifarkor Refo.
ROI KOḆUKIḆAWES RARYAḆ SENA FARO REFO
11. Sifrur majalah koḇesuya faro mansei, ma rosai ḇefnai fandun fa kofawi pyum na?
11 Majalah. Baryas ma Sadarlah! suma majalah ḇeḇeryewen ro moḇ nakam ma sifrur na ro wos ḇebor syadi ro majalah ḇero supswan ine kam! Snar snonkaku ḇero sup ḇeba ḇebor siwasya majalah suine, inja awawos ḇepon ya sifrur na fa namnis faro fandun snonkaku ro moḇ nakam. Fandun fa koḇuk majalah nane fa kofnoḇek snonkaku sya insama smam monda faro roi ḇefandun kaku ro kankenem sena ro baboine. Mboi ḇepon ya, fandun fa kofawi majalah koḇesuine sifrur na faro mansei.
12. (a) Sifrur Sadarlah! ine faro mansei, ma faro fandun rosai? (b) Fawar ḇepyum rosai waksmai rofyor buk majalah ine?
12 Sadarlah! sifrur na faro snonkaku ḇefawi kermkun ḇaido ḇefawi Refoya ḇaḇeri. Imbude sifawi farkarkor Kristen ḇaḇeri, sikyar mankun faro agama na ḇa, ḇaido sifawi pyum Refo na nafnoḇek kankenem sena ḇa. Fandun oso ro Sadarlah! iso ḇyuk kakyar faro ḇewasya snar Allah ima isya. (Roma 1:20; Ibrani 11:6) Ifnoḇek kako ḇewasya fa sikyar Refo ima ”kaku ḇeri rarirya Allah wos ḇyedi”. (1 Tesalonika 2:13) Sadarlah! rikyor ḇesae ro 2018 skona awawos ḇepon raris: ”Apa Kebahagiaan Sejati Itu?”, ”12 Kunci Keluarga Bahagia”, ma ”Bantuan bagi Yang Berduka”.
13. (a) Sifrur majalah Baryas faro kawasa kam ḇe mansei? (b) Fawar ḇepyum rosai waksmai rofyor buk majalah ine?
13 Fandun ro majalah Baryas faro kawasa kam iso fyasnaiḇair farkarkor Roma 10:2; 1 Timotius 2:3, 4) Majalah Baryas rikyor ḇesae ro 2018 skokarem fakfuken: ”Refoya Ḇyefainda Kaker ro Fafisu Ine Ke?”, ”Rosai Na Ḇeḇejadi ro Ras Ḇarpon Iyama?”, ma ”Allah Myam ma Fyandun Kaku Au Ke?”
Refo ḇe snonkaku ḇesyowi Allah ma Refoya kwar. Imbude sifawi roi ḇeḇeso ro Refo, mboi sifawi mnis ḇaim rosai Refo fyarkor na. (ROI KOḆUKIDIF SISNESNA
14. (a) Vidio rifyak ḇero Roi fa Koḇukifarkor, sifrur na faro fandun rosai? (b) Fawar ḇepyum rosai waksmai rofyor wafasnai vidio anna?
14 Vidio. Ro Yesus fafisu ḇyedi, sukan ai na sḇuk robebor suf kuker bramin monda. Mboi ro baboine, sukan ai sna robebor ḇena listrik na fa sḇukikaruk, sḇukikuskir, ma sḇukiorirem aimun na. Fafisu koḇaryas ro baboine, kona publikasi sifrur kwar na monda ḇa, kona kako vidio ḇepyum kaku fa kofasnai ḇe snonkaku sya. Vidio rifyak nane naiso: Rosai Ḇefnai fa Farkor Refo ya?, Imnis Rariso Farkarkor Refo Inkobena?, Rosai Sifrurna ro Balai Karajan? ma Saksi-Saksi Yahwe Sima Manseisiri? Vidio ḇeknampu nane bisa kofasnai na ro swaf nasyadi ḇa ro menit risuru ma napyum kaku faro rarama randak. Vidio ḇekwan syadi na kofasnai ro rarama kaḇer ma faro snonkaku ḇesmai swaf nabor. Vidio nane napyum kaku snar nari nadif snonkaku sya sisnesna fa sakfarkor Refo ma srama ro fananjur ya.
15. Rosai fainda ya rofyor snonkaku sya smam vidio ro wos mankun sena? Fawarpan.
15 Komampan fawar ine. Imbesrar oso isrow bin ḇerama babo ro Mikronesia ḇeyawos pyum wos Yap. Imbesrar ani fyasnai vidio Rosai Ḇefnai fa Farkor Refo ya? ro wos Yap. Rofyor imbesrar ani ḇye vidio anya fa ifnak, bin ani doḇe, ”Inema wos ayenairi. Yakara na ḇaḇeri! Ro mkarem ḇyena, yafawi ima ryama ro myos yediri. Dawos ro wos yedi!” Ramnai, ikofen nari iwasya ma myam roi nakam ḇero jw.org ro wos ḇyedi. (Mam kako Farfyar 2:8, 11.) Fawar ḇese wer, imbesrar oso ro Amerika Serikat fno ḇyedi ḇyarek ro sup ḇese. Imbesrar ani fyarem link ḇe i faro vidio Rosai Ḇefnai fa Farkor Refo ya? ro wos ḇyedi. Fno ḇyedi myam vidio ani ma fyarem e-mail ḇo doḇe, ”Yamam kaku sonin ḇefasnai Setan ḇyepoik supswan ḇesiper ine. Inja, yor fa yakfarkor Refo.” Roi ine ipyum kaku snar ḇyarek ro sup moḇ fararur koḇedi sidwarek na!
ROI KOḆUKIFARKOR KAKAKU YA
16. Fasnaiḇair fainda oser-oser ro brosur: (a) Wamnaf Allah Insama Wakenem Fioro. (b) Ankankinem Ḇeḇye Ḇerama ro Allah! (c) Siapa yang Melakukan Kehendak Yehuwa Dewasa Ini?
16 Brosur. Rariso na koḇuk farkarkor kakaku ya ḇe snonkaku ḇefawi ḇewasya mnis ḇa ḇaido publikasi naisya ro wos ḇyedi ḇa? Na koḇuk brosur Wamnaf Allah Insama Wakenem Fioro. * (Mam fasfas kasun ro sop.) Brosur ḇefnoḇek ko fa korandak farkarkor Refo ya iso Ankankinem Ḇeḇye Ḇerama ro Allah! Na fasnai ḇe i farkarkor ri 14 ḇero ram ḇarpur ya ma wor i fa kyinfir farkarkor minsaiso imarisen kaku ya. Inja mufarkor ḇeri ro farkarkor ani. Wafrurpan na kwar ro rarama kaḇer ke? Brosur ḇekyor isoine Siapa yang Melakukan Kehendak Yehuwa Dewasa Ini? Ḇyeḇefrur fa ifnoḇek ḇefarkor Refo sya fa sakfawi organisasi koḇedi. Insama wafawi moḇsa buk brosur ine ro farkarkor Refo ido, mam ro Syapram Farkarkor Kankenem ma Fararmyan Kristen Koḇena paik Maret 2017.
17. (a) Rosai fainda ro syap risuru koḇukifarkor ya? (b) Ḇefarkor Refoya ḇyebaptis kwar ido, rosai fandun kaker fa ifrur ya, ma rosai ḇefnai ya?
17 Syap.Farkor randak snonkaku oso kuker brosur ido, na ras risai monda bisa fadweri kuker syap Rosai Refo Fyarkor Ḇeko? Syap ine na ifnoḇek i fa fyarkor farkarkor ḇeḇeknam kaku ro Refo. Ḇefarkor ya fyasnai kakyar, ifrur rosai fyarkor kwar ma fyarkor syap ani fa ibro kwar ido, na bukfarkor pdef kuker syap Cara agar Tetap Dikasihi Allah. Syap ine na ifnoḇek ḇefarkor ya fa ifrur wos farkin ro Refo ro kankenem ḇyedi ras ḇe ras. Waswarepen, ḇyebaptis kwar ido, na bukfarkor i pdef kuker syap risuru ansuya isof ro nabro. Ine na ifnoḇek i fa nya kakyar ḇesambraḇ faro Yahwe ma isoasuser pdef ḇe I.—Wasya Kolose 2:6, 7.
Roi fa Koḇukifarkor naser roi nabor kofandun fa koḇukfarkor snonkaku sya ankankinem ḇeḇye ya
18. (a) Rosai 1 Timotius 4:16 danun ḇe ko rofyor koḇukfarkor snonkaku sya, ma rosai bon ya? (b) Rosai fandun ro Roi fa Koḇukifarkor?
18 Saksi-Saksi Yahwe koine, kona fakamamar fa koḇukfarkor snonkaku sya ankinem kuker kakaku ya, isoine ankankinem ḇeḇye, naiso ḇeyun si ḇe kankenem fyoro ya. (Kolose 1:5; wasya 1 Timotius 4:16.) Insama kofrur na ido, kona Roi fa Koḇukifarkor ḇeser roi nabor kofandun na. (Mam kotak ”Roi fa Koḇukifarkor”.) Mkorama kosewar kaku fa koḇuk pyum na. Ko oser-oser na kokinfir syap ḇaido vidio minsai imbe koḇuk na ma ro fafisu risai. Mboi koswarepen, fandun ro fararur koḇena iso korwas famfnom publikasi koḇena ḇa, ma kopok koḇuk publikasi na ḇe snonkaku ḇemewer ḇerower ankinem kun anna. Fandun ya iso koḇukfarkor snonkaku ḇena sne ḇemarisen, sne ḇerun, ma ḇemarisen ḇemambir Allah fa sakḇe manfamyan. Siso snonkaku ḇena sne ḇenapes faro kankenem fyoro.—Farfyar 13:48; Matius 28:19, 20.