Kokyar faro Manfarkin Koḇedi—Kristus I
”Manfarkin oser monda faro mko, isoine [Kristus].”—MATIUS 23:10
1, 2. Fararur ḇeba rosai Yosua duf rofyor Moses imar kwar?
YAHWE ikofen ḇe Yosua i, ”Moses manfamyan Yedi imar kwar. Kirine au ma kawasa ansine kam mkofasos mko. Mkobranuk Warḇeki Yordan, ma mkosun ḇe sup iso nari yaḇuk ḇe si.” (Yosua 1:1, 2) Inema fararwei ḇeba kaku faro Yosua i, snar ro swaf taun ri 40 kwar ḇye manḇefnoḇek faro Moses i.
2 Moses fyarkin kawasa Israel sya ro swaf fyoro kwar, mboi kirine Yosua iso nari ḇefarkin si. Inja, imbude kyara na kawasa ansi simarisen i ḇe manfarkin sedi ke roḇa. (Ulangan 34:8, 10-12) Syap referensi Refo oso fyasnaiḇair Yosua 1:1, 2 ḇo ikofen, ro fafisu naiwara ke ro baboine, roi ḇefrur samswen kaku ma nun roi ḇemun faro er oso iso rofyor sfadwer manfarkin sedi kuker manfarkin ḇese.
3, 4. Rosai ḇefnai fa Allah ḇyebarakas Yosua i, ma fakfuken rosai imbude kofuken ya?
3 Roi ono nafrur Yosua i fa ḇyeḇirḇar. Mboi ikyar faro Yahwe I ma fasaw fa iso akurfasnai Ḇyedi. (Yosua 1:9-11) Allah ḇyebarakas ma fyarkin Yosua ma snonkaku Israel sya roro malaikat oso. Ḇekaku ya, malaikat ine iso Allah Roma rak Ḇyedirya, ḇeḇeyap ḇe Wos ya.—Keluaran 23:20-23; Yohanes 1:1.
4 Yahwe ifnoḇek er Israel sya fa siso pyum fararwei rosai Yosua ifrur ḇe manfarkin ḇebabo sedi. Ro fafisu koḇedine, fararwei ḇeba naisya ro Allah organisasi Ḇyedi kako. Imbude kofuken, ’Inja na kokyar faro Yesus ḇesmai ramrem kwar ḇe Manfarkin koḇedi ke?’ (Wasya Matius 23:10.) Insama kokarem fakfuken ine, nari kawos moḇsa Yahwe fyarkin kawasa Ḇyesi ḇepon siwara ro fafisu ḇefararwei na.
ALLAH KAWASA ḆYESI SḆEḆEFARKIN FA SISUN ḆE SUP ḆAḆEASAS YA
5. Rosai ḇeḇejadi rofyor Yosua fyanam ḇe mnu Yerikho? (Mam sonin ro randak artikel ine.)
5 Kero fafisu snonkaku Israel simbranuk Warḇeki Yordan raposa, roi oso ḇyeḇejadi. Fanam ḇe mnu Yerikho, Yosua isrow kuker snon oso ḇeyuf sumber ḇekwan ḇyedi. Yosua ifuken i, ”Au isya ro bar inkoḇedi ke mbroḇ nkoḇedi?” Yosua kyandor fafayaḇa rofyor snon ani ikofen ima ’mananir ro Yahwe sordade Ḇyesi’, isoine malaikat oso ḇemamwarek Allah kawasa Ḇyesi. (Wasya Yosua 5:13-15.) Farfyar ro mnuk-mnuk ḇesena nekofenḇair Yahwe dawos ḇeri ḇe Yosua i, mboi rya Allah dawos yoḇ i roro malaikat ani, raris moḇ ifrur ro ḇepondi raya.—Keluaran 3:2-4; Yosua 4:1, 15; 5:2, 9; Farfyar 7:38; Galatia 3:19.
6-8. (a) Rosai ḇefnai fa akurfasnai ḇeḇeso malaikat ani ḇyuk na rya namnis ḇa kero? (b) Rariso kofawi akurfasnai anna napyum ma ndrama ro fafisu ḇemnis? (Mam kako fasfas kasun ro sop.)
6 Malaikat ani ikofen mnis ḇe Yosua rosai fandun fa ifrur ya insama kyafyo Yerikho. Randak ya, akurfasnai ḇeḇeso ḇyuk na rya namnis ḇa kero. Imnis raris, malaikat ani iwan Yosua i fa sordade ḇyesi kam sismai sofakfuk. Rarirya ido, ro ras ḇeḇeso na sipok ḇa fa smamunmun ḇae. Ine iso swaf ḇemnis faro snon ansine fa sismai sofakfuk ke?—Kejadian 34:24, 25; Yosua 5:2, 8.
7 Imbude sordade ansine na skara, ’Moḇsa na kokadaunwarek kina koḇesya rai rofyor mbroḇ sya srama smun ko?’ Ḇape, roi oso skara ḇaim ya ḇyejadi! Snon ḇero Yerikho sya srama fa smamunmun snonkaku Israel sya ḇa, snar simkak faro si. Kowasya kada, ”Kedwa ḇeba ro Yerikho ḇyeḇesisen snar er Israel, snonkaku osoḇaḇeri isae ma isun indi.” (Yosua 6:1) Roi ine ifrur fa snonkaku Israel sikyar syadi wer faro Allah akurfasnai Ḇyedi!
8 Malaikat ani ikofen ḇe Yosua i ḇo doḇe snonkaku Israel sya smamunmun awer ḇe mnu Yerikho. Imbape, fandun fa simbranyar mnu ani ras oser rarwan oser ro swaf ras riwonem ma rarwan rifik ro ras ḇefik ya. Sordade ansi imbude skara, ’Kofnak oras ma samambraḇ koḇena monda!’ Mboi Manfarkin ḇekaku Israel, Yahwe I, ifawi kaku rosai Yosua 6:2-5; Ibrani 11:30. * (Mam fasfas kasun ro sop.)
ifrur ya! Snar snonkaku Israel sisouser akurfasnai Ḇyedi, skafyo Yerikho kuker mamamun ḇa. Ma rofyor smam fainda ya, kakyar sena nasambraḇ syadi.—9. Rosai ḇefnai fandun fa koso akurfasnai sairirya kam kosmai ro Allah organisasi Ḇyedi? Fasnaiḇairpan fawar oso.
9 Rosai kofarkor ro farfyar ine? Fyorno ido Yahwe organisasi Ḇyedi ifrur roi ono kuker nyan ḇebabo, ma imbude na kofawi mnis roi ḇeḇefnai ya ḇa. Imnis raris, randak ya na kokara ḇaḇeri fainda ro koḇuk HP ḇaido tablet faro farkarkor mankun koḇedi, ḇaḇeḇaryas, ḇaido fananjur ya. Ḇape kirine, insape komam fainda ro koḇuk roi nane. Rofyor komam bon ḇepyum ro fararwei nane, kakyar koḇena nasambraḇ syadi ma koḇeoser syadi kuker naek srar koḇesya.
MOḆSA YESUS FYARKIN SNONKAKU KRISTEN ḆERO ABAD RANDAK SYA RAI?
10. Mansei ḇefarkin kaku badan pimpinan ḇero Yerusalem fa siryur fa sawos roi ḇekur ḇe sofakfuk ya?
10 Indokada swaf taun ri 13 fyor snon Kafir ḇesmai sofakfuk ḇa ḇenir ḇe Kornelius dakḇe Kristen mura, snonkaku Kristen ḇeḇe Yahudi sya sikofen sofakfuk ima fyandun kaker. (Farfyar 15:1, 2) Naek srar ḇero mnu Antiokhia sfamfaḇri kuker roi ine. Inja penatua sya siwan Paulus i fa dakra ḇe Yerusalem ma ifuken badan pimpinan sya. Ḇape, mansei ḇewan kaku i fa rya? Paulus fyasnaiḇair, ”Yara snar fasasna oso.” Nasnai kaku, Kristus iso ḇefarkin i insama fakfuken ani nari ḇyeḇekarem roro badan pimpinan.—Galatia 2:1-3.
Kristus iso Manfarkin sidang Kristen ḇero abad randak (Mam paragraf 10, 11)
11. (a) Rosai snonkaku Kristen Yahudi ḇeḇeso sifrur kaker na? (b) Rariso Paulus fyasnai sne ḇerun fa isonem penatua ḇero Yerusalem sya? (Mam kako fasfas kasun ro sop.)
11 Yesus fyarkin badan pimpinan sya fa sifasnaibos snar snonkaku Kristen ḇeḇe Yahudi ḇa sya sima saksmai sofakfuk ḇa. (Farfyar 15:19, 20) Ḇape, taun ḇe taun ḇe ḇarpon, snonkaku Kristen Yahudi sifrur sofakfuk faro romawa sesya kaker. Mura penatua ḇero Yerusalem sya srower kwar sfar Paulus ima ḇyesyowi Sasoser Moses ya ḇa. Inja penatua sya sor Paulus i fa ifrur roi ḇefasnai ima ḇyesyowi Sasoser ani. * (Mam fasfas kasun ro sop.) (Farfyar 21:20-26) Sikofen ḇe i fa dun naek rifyak ro bait insama snonkaku sya sikyar Paulus ima ḇyesyowi Sasoser Moses. Imbude na Paulus ikofen, ’Roi mkor nane namnis ḇa kero! Rosai ḇefnai fa mkor aya insama yakfrur roi ine? Samswen ine ryamuma ro snonkaku Kristen Yahudi ḇefawi mnis sofakfuk ine ḇa sya.’ Paulus ikofen rarirya ḇa snar ifawi penatua ansya simarisen snonkaku Kristen syakam sḇeoser, inja kuker sne ḇerun iso akurfasnai sena. Ḇape, imbude kofuken, ’Sasoser Moses imnai kwar fafisu Yesus imar. Mboi rosai ḇefnai fa Yesus ryir samswen ḇekur sofakfuk ine imbran kawan kaku?’.—Kolose 2:13, 14.
12. Rosai ḇefnai fa Kristus ryir swaf kawan kaku insape ifrur samswen ḇekur sofakfuk ya fa namnis?
12 Nefandun oras fa siso mnis fawawi ḇebabo na. Snonkaku Kristen Yahudi ḇeḇeso sifandun oras kawan fa sifawi kaku sro baḇ Sasoser ya werḇa. (Yohanes 16:12) Skara kaker sofakfuk iso ḇyeaḇyair fasfesepen ḇepyum kaku sena kuker Allah. (Kejadian 17:9-12) Ḇesesya wer simkak nari min Yahudi sesi sewayam si snar siḇese. (Galatia 6:12) Ḇape ḇarpur mura, Kristus ḇyuk akurfasnai faro si roro syapram Paulus fyas na.—Roma 2:28, 29; Galatia 3:23-25.
KRITUS ISYA FYARKIN SIDANG ḆYEDI
13. Rosai na ḇefnoḇek ko fa kosonem nyan Yesus fyarkin ko ro baboine?
13 Kristus ḇye Manfarkin pdef faro sidang Kristen ro baboine. Inja rofyor Organisasi ifrur fararwei kofawi mnis na ḇa ido, kokarapan nyan Kristus fyarkin Allah kawasa Ḇyesi ḇepon siwara. Ro Yosua fafisu ḇyedi ḇaido manwawan sya fafisu sena, Kristus ḇyuk akurfasnai ḇepyum fa kyadaunwarek Allah Ibrani 13:8.
kawasa Ḇyesi, syambraḇser kakyar sena, ma ifnoḇek si fa sḇeoser pdef.—Akurfasnai ’manfamyan ḇeḇesyowi ma ḇefawi nananem’ sḇuk ḇe ko ro baboine nfasnaiḇair Yesus iswar ko
14-16. Rariso akurfasnai ro ’manfamyan ḇeḇesyowi ma ḇefawi nananem’ fyasnaiḇair Kristus imarisen ifnoḇek ko fa kosambraḇser kakyar koḇena?
14 Baboine, ’manfamyan ḇeḇesyowi ma ḇefawi nananem’ sḇuk akurfasnai kofandun na. (Matius 24:45) Akurfasnai ine fyasnaiḇair Yesus iswar ko. Marc, ḇena roma rifyak doḇe, ”Setan syewar kaku fa ifrur sidang syambraḇ werḇa kuker dawninyan kina sya. Organisasi danun ḇe ko insa kofrur nadi ro kina minggu ḇe minggu, nfasnaibos ḇe ḇebukor ro kina koine fandun fa kokadaunwarek kina koḇesya!”
15 Fafisu komam moḇsa Kristus fyarkin ko raya, na kofawi mnis imarisen ifnoḇek ko fa kosambraḇser kakyar koḇena. Penatua oso ḇenir ḇe Patrick doḇe, ”Rofyor Organisasi sifrur fararwei insama kofanjur ro raryur ḇekasun faro ḇaḇeḇaryas ro papupes minggu, randak ya ḇeḇeso sya siryaḇ ḇa.” Mboi, doḇe fararwei ine fyasnaiḇair Yesus iswar snonkaku oser-oser ro sidang yadori. Imnis raris, naek srar ḇeḇeso ḇemamyai ḇaido ḇeso ḇaḇeḇaryas ker ḇa sya, sḇaḇir sifandun syadi si ma sikyar si. Ine syambraḇser kakyar sena.
16 Kristus ifnoḇek ko kako fa komam monda faro fararur ḇaḇeḇaryas. Iso fararur ḇefandun kaku ro supswan kofrur ro baboine. (Wasya Markus 13:10.) André, insape dakḇe penatua, iso ker akurfasnai ḇebabo ḇerama ro Organisasi. Doḇe, ”Fafisu sifrur fararwei insama ḇefararur ro kantor cabang sya sibor werḇa, ine ḇyuk swarapepen ḇe ko snar kona swaf nabor werḇa ma fandun fa koḇuk samambraḇ koḇena faro fararur ḇaḇeḇaryas monda.”
RARISO KOSONEM KRISTUS FARKANKIN ḆYENA RAI?
17, 18. Rosai ḇefnai fa komam monda faro fainda kosmai ro koso mnis fararwei na?
17 Akurfasnai kosmai ro Yesus Kristus, Raja koḇedi, na nafnoḇek ko ro baboine ma rasras naiwama. Kosewar fa komam monda faro fainda kosmai ro koso mnis fararwei ḇebabo na. Fafisu wafrur nadi ro kina, na wawos moḇsa fararwei sifrur ro fananjur ḇaido ro ḇaḇeḇaryas nafnoḇek kwar kina Bedi raya.
Ausya wafnoḇek kina Bedi ma ḇesesya fa siso mnis fararwei ro Yahwe organisasi Ḇyedi ke? (Mam paragraf 17, 18)
18 Koswarepen snar koso mnis akurfasnai ro Yahwe organisasi Ḇyedi na nun barakas nabor ido, nari napyan ḇe ko fa koso mnis akurfasnai anna ma kosmai aski. Imnis raris, snar kofrur publikasi nabor werḇa imnis ḇepondi, inja kosae kumpan nabor ḇa. Ma snar koḇuk teknologi ḇebabo, inja bisa korwas ankankinem ḇeḇye faro snonkaku sibor syadi wer. Mankunko na koḇuk publikasi elektronik na, audio, ma vidio nabor syadi wer ke? Ine iso nyan oser fa kosonem Kristus ḇemarisen ko fa koḇuk pyum farsarser kumpan sḇuk ḇe Organisasi na.
19. Rosai ḇefnai fandun fa koso mnis akurfasnai ro Kristus i?
19 Fafisu kosonem akurfasnai ro Kristus i, koisya kofnoḇek naek srar koḇesya fa sna kakyar ḇesambraḇ ma sḇeoser syadi. André ikofen ḇekur fararwei ḇebabo sifrur ro Betel ro supswan ḇesiper ryadine, ”Ḇefararur fyoro ro Betel sfasnai simarisen siso mnis fararwei ḇebabo anna. Nane nfarkor aya fa yakyar ma yakunem faro Yesus farkankin ḇyena. Siso raruren ro Yahwe kereta Ḇyedi kuker siryaḇ ro fararur sairirya kam sḇuk faro si na.”
KOKYAR FARO MANFARKIN KOḆEDI
20, 21. (a) Rosai ḇefnai fa na kokyar faro Kristus, Manfarkin koḇedi? (b) Fakfuken rosai nari kawos ro artikel ḇerama ya?
20 Kero wer, Manfarkin koḇedi, Yesus Kristus, nari ’ifrur kafyo mbroḇ ḇyesi isof imnai’ ma ’ifrur roi ḇeyun kanandor’. (Fasasna 6:2; Mazmur 45:4) Iba syadi ro baboine, isya fyasos ko fa kokenem ro dunya babo ma faro fararur nari kofrur ro diwanya. Isoine koḇukfarkor snonkaku ḇesmai kaḇakḇok sya ma kofrur supswan ine ḇe firdaus.
21 Rosai monda ḇekur ko mboi kokyar pdef faro Manfarkin ma Raja koḇedi ido, nari fyarkin ko fa kosun ro dunya babo. (Wasya Mazmur 46:1-3.) Baboine, fararwei na nun samswen, iba syadi rofyor roi anna nefararwei ḇeri kankenem koḇena. Rarirya ido, rariso na kofaduru swaruser ḇepyum ma kona kakyar ḇesambraḇ faro Yahwe I? Nari kawos fakfuken ine ro artikel ḇerama ya.
^ par. 8 Ro mnu Yerikho ḇekarḇaken anya, arkeolog sya sisrow mor nabor kawasa siryur na mboi sanna ḇa. Ine imnis kuker fasfas ḇero Refo, ḇekofenḇair snonkaku Israel siyarwarek mnu Yerikho kawan ḇa ma sor si fa san awer mor-mor ro mnu Yerikho ani. Snar iso fafisu afuf ya, ima swaf ḇepyum faro Israel fa skafyo mnu ani snar ro diwa roḇean nabor naisya ro yaf na.—Yosua 5:10-12.
^ par. 11 Mam kotak ”Paulus dengan Rendah Hati Menyambut Ujian” ro Menara Pengawal 15 Maret 2003, ram 24.